Ɛ́STA 3 - Ubáyíbu kú Idɔma

Ujɔ̄ nɛ̄ Uháman tū tū ācɛ Ujíyu ā

¹ Ɔ̄cɛ éyi yɔ̄ nɛ̄ iyē lé ka Uháman. Ó wɛ ɔyí kú Uhamedáta, ipɔ́ɔma kú Ágāgi, ɔcɛ́ kú Ámālēki. Eko éyi, Ahásɛ̄rɔ̄si, ɔcɛ́ ā le ɔ́ je gicō, kwú ɔ̄ ú yá alápā kú nū.

² Ɔcɛ́ ā le ɔ́da je ka, odúúdú aígabɔ̄ mɛ́mla ācoyúklɔ́ kú ɔlɛ́ anúɔ kéē lɛ ojīlīmā ce Uháman, ŋmá lɛ o túkpɛɛ́ iyɔ̄bū nū. Anɔ́ɔ odúúdú uwā gāá lɛ okwúukwu kwaajɛ lɛ ɔ́, amáŋ, Umɔ́dɛkāyi tá kóō túkpɛɛ́ iyɔ̄bū nū.

³ Aígabɔ̄ ohile ā gē da ɔ́ ɔ̄kā, eko dóódu, ɔdā nōo yá ɛ́ɛ́ nɛ̄ Umɔ́dɛkāyi ɔ́ɔ lɛyítáajɛ lɛ̄ ɔ́da kú ɔcɛ́ ā gaá túkpɛɛ́ iyɔ̄bū Uháman ŋ́ mā ā.

⁴ Eko dóódu, é bá ī da ɔ́ ká ɔ́ɔ̄ nyɔ̄ gāá túkpɛɛ́ iyɔ̄bū Uháman, amáŋ ó tá, ohígbū koó kahíníī, “N wɛ ɔ̄cɛ Ujíyu, ń kē gáā túkpɛɛ́ lɛ Uháman glá ŋ́.” Anɔ́ɔ é lɛ ɛlā nyā ka lɛ Uháman, ɔ́dāŋ́ koó géē yɔ̄ í leyīkwu ucē kú Umɔ́dɛkāyi nya icííci.

⁵ Eko nɛ̄ Uháman le jé ka, Umɔ́dɛkāyi ɔ́ɔ gaá túkpɛɛ́ iyɔbū anúɔ ŋ́ mā, ó kwú cɔ̄nū nɛ̄hi.

⁶ Eko nōó klla le jé ka Umɔ́dɛkāyi ɔ́ɔ wɛ ɔ̄cɛ Ujíyu ā, ó le tútū kóō yá ɔdā ɔhá fíyɛ́ ō yá Umɔ́dɛkāyi ōfōōnū italā. Ó le miya kóō lɛ ɛjɛ̄ɛ̄jī ācɛ Ujíyu nēe bá odúúdú ajɔ̄cɛ́nɛ̄hi kú Upɛ́sīya mɛ́mla Umɔ́dɛkāyi ā kpó ŋmó.

⁷ Ipú iháyí ɔ́migwɛ́ɛpa nɛ̄ Ahásɛ̄rɔ̄si cɔcɛ́ ā, ipú ɛ̄cī éyi kú ɔyā nēé hī ka Unísān ā, Uháman le ɔ́da je kéē lɛ ɛbā anwa nēé hī “upúrim” ā gwó, cɛ́ɛ́ kéē jé ɛ̄cī mɛ́mla ɔyā nɛ̄ ó géē je odúúdú ācɛ Ujíyu kpó ŋmó ā. Anɔ́ɔ é kwú ɔ̄ ú tá ɛ̄cī igwɛ́ɛtá kú ɔyā igwɛ́ɛpa, nēé hī ka Áda ā.

⁸ Anɔ́ɔ Uháman le da ɔcɛ́ a kahíníī, “Ígwu kú ācɛ éyi lā ipú ajɛ kú uwɔ ā. É le nyīla klá ɛga dóódu kú ipú ajɛ kú uwɔ ā. Ucē kú uwá wɛ ɛyɛ́ɛ́yí hɛ̄ ucē kú alɔ tá. Ofíyɛ́ dúú ā, é ī lɛyí táajɛ lɛ íne kú ajɛ ɔlɛ́ uwɔ ā ŋ́. Ó gáā lɔhi ga uwɔ fíyɛ́ ɔ́dāŋ́ ka á yɔ̄ í leyīkwu uwá kpɔ́ ŋ́.

⁹ Ɔ́dáŋ ka ó he Ágábáidu ɔtū nɛɛ, ó lɛ ɔ́da je kéē lɛ odúúdú uwá kpó ŋmó. Ɔ́dáŋ ka ɔcɛ́ cɛ̄ lɛ ā, nēé lɛ uwá kpó ŋmó, n géē yɔ̄ ī cílá ɛkpa kú ije nɛ̄hɛ́ ofu igwáahāapa tū ɛga o kpó ije tū kú ɔlɛ́ ɔcɛ́ ā.”

¹⁰ Anɔ́ɔ ɔcɛ́ a le ɔ́da nyā je klla le ɔ́ tá tū ɔkpá, le eliká kú nū nɛ̄ ó ī bá ɔkpá plla ŋmá, anɔ́ɔ ó kwú lɛ Uháman ɔyí kú Uhamedáta, ɔ̄cɛ ipɔ́ɔma kú Ágāgi, olɛlā kú ācɛ Ujíyu ā.

¹¹ Anɔ́ɔ Ágábáidu ā da Uháman kahíníī, “Ācɛ nēe bá abɔ́ɔ ā mɛ́mla ije kú uwā wɛ ákú uwɔ. Ɔdā dóódu nēe he uwɔ ɔtū ā, yá mla uwá.”

¹² Ɛ̄cī igwɛ́ɛtá kú ɔyā éyi ā, Uháman le odúúdú aɔ́málɛ kú ɔlɛ́ ɔcɛ́ ā kpó hīgwú, klla lɛ ɔ́da kú ɔcɛ́ ā jé lɛ uwá kéē lɛ ɔ́ tá okónu ucē kú ācɛ dóódu kú ipú ajɔ̄ɔ̄cɛ́nɛ̄hi kú Upɛ́sīya mɛ́mla Umɛ́dīya ā, cɛ́ɛ́ kéē kwú kpó tɛ̄hɔ̄ fu aígbómína mɛ́mla aígabɔ̄ kú odúúdú ajɛ ɛyɛ́ɛyɛ́yí kú nū ā. É tá ɔkpá ā iyē kú ɔcɛ́, é klla le eliká kú ɔcɛ́ ā gbo ɔ́.

¹³ Ācocɛ̄hɔ̄ ā kwinya, le ɔkpá ā kpó ga ɛga dóódu kú ajɛ kú ajɔ̄ɔ̄cɛ́nɛ̄hi kú Upɛ́sīya mɛ́mla Umɛ́dīya ā. Ɔ́da nēé tá tū ipú ɔkpá ā wɛ ka, ɛ̄cī éyi, ɛ̄cī ɔ́migwɛ́ɛtá kú ɔyā nēé hī ka Áda ā, kéē lɛ odúúdú ācɛ Ujíyu, kwu ācɛnyā, ācɛnyīlɔ, ayípōklóbīya, anyākwɔ́cɛ, mɛ́mla ayípɛ̄ obene, kpó ŋmó dúúdú. Ɔ̄cɛ dúúmā í gáā ményinyi ō kpó uwá ŋmó ŋmá ajɛ dúúdú ŋ́. Eko nɛ̄ aá le uwá kpó ŋmó, cɛ́ɛ́ aá kwú agbénú kú uwā ú kpó.

¹⁴ É le ɔkpá nyā jé tɛ́ɛcɛ klla lɛ ɔ́ kpó bá ɔdɔ ɛga dóódu, cɛ́ɛ́ kéē géē le tútū táajɛ gbēyī ɛ̄cī ɔ́ɔmā.

¹⁵ Ɔcɛ́ ā klla le ɔ́da je, kéē lɛ ɔkpá nyā jé klla lɛ ɔ́ tá bá ɛcɛ lɛ odóódu Usúsa nōo wɛ ɔlɔ́tāhɛ̄ ā. Eko nɛ̄ Usúsa le hútú klla le gbájí ohígbū ɔ́da kú ɔkpá kú ɔcɛ́ nyā ā, Uháman mɛ́mla ɔcɛ́ ā gáā bá ī gwá ejé.