UDÁNĪYƐ̄LU 8 - Ubáyíbu kú Idɔma

Ɛbɛ nɛ̄ Udánīyɛlu má lɛyíkwu Omlede mɛ́mla Ɛwū ā

¹ Ipú iháyí ɔ́mɛtá nɛ̄ Ubɛ́lssása, cɔcɛ́ Ubábīlɔn ā, n klla le ɔ̄na ɔhá nā kpɔ́, nōo wɛ ɛyɛ́ɛ́yí hɛ̄ ɛ̄nɛ̄ n tɛtɛ nā ā tá.

² Ipú ɔ̄na nɛ̄ n nā ā, igbeékpónú, n má iyī um klá Usúsa, ɔlɛ́ ɔtāhɛ̄ kú igelī nɛ̄hi nōo wɛ ɔlɛ́ ɔtāhɛ̄ kú Ɛ́lam ā. N klla má ipú ɔ̄na, abɔ̄ n yɔ̄ okónu ísu kú Úlāyi.

³ N je eyī gicō, anɔ́ɔ n má omlede éyi háyi úkɔngɔ̄ kú ɔkpá ā ogbée ɔhá. Ó bū aájī ɛpa. Aájī kú nū ā jɛ̄ līkpō nɛ̄hi. Amáŋ éyi kú aájī ā līkpō fíyɛ́ ɔhá á. Ɛ̄nɛ̄ o kē līkpō fíyɛ́ nyā nōó bū igbīhāajɛ á.

⁴ N má omlede ā yɔ̄ ī yɛ ī gwōgli mla ɔfú kú nū, yɔ̄ ī kwinya ga ɛhícō, ga ɛnɔ̄ɔ̄nɛ̄, ga ɛháajɛ yɔ̄ gē lɛ aájī kú nū tū aɛ́bɛ́ dóódu nēe háyi ɔwɛ kú nū ā. Ɛbɛ́ dúúmā ī kwú ɔ̄ tū glá ŋ́, ɛ́ɛ́ nɛ̄ ɔdā dúúmā lɔfú jɛ̄ nōo gē nyatá ŋmá ɔfú kú nū glá ŋ́. Ɔdā dóódu nōo he ɔ́ ɔtū ā, nōó gē yá á. Ó klla yɔ̄ ī lɔfú tōōtɔ̄.

⁵ Abɔ̄ n yɔ̄ ī lɛ eyī yɛ ɔdā nɛ̄ ɛbɛ nyā wɛ ā, n má opī éyi le bɛ̄cɛ yɔ̄ ī kwinya nɛ̄hi ŋmá ɛnɔ̄ɔ̄nɛ̄. Ɛ́gɛ́nɛ̄ ó yɔ̄ ī kwinya lɔfú lɛ ā, ó lɛbɛ̄ɛka ikpó kú nū í kōō kwaajɛ ŋ́ mā. Ó bū ajī nɛ̄hi éyi nōo kwu ɛplá kú īkpēyī ɛplɛ́ɛpa kú nū.

⁶ Anɔ́ɔ opī ā gaá lɛyíkwu omlede nōo lɛ ajī ɛpa nɛ̄ n má háyi okónu ísu ā. Anɔ́ɔ ó ce ɔ́ tikpótikpó mla odúúdú ɔfú kú nū.

⁷ N má ɔ̄ yɔ̄ ī túblá omlede ā ajaajɛ. Ó le cɔ̄nū lɛyíkwu omlede ā nɛ̄ɛ̄nɛ̄hi. Anɔ́ɔ ó le wu gaá kwu ɔ́, le ɔ́ ajī ɛpɛplɛ́ɛpa kpó cē á. Omlede ā í kōō lɔfú nōó ī tɔ́búnu tá ɔ̄ ŋ́. Ó le omlede ā gwō le ikpó da ɔ́ ɛyí bá ajɛ. Ɔ̄cɛ dúúmā í lɔfú nya ɔ́ tá ŋmá abɔ̄ mɛ́mla ɔfú kú opī ā glá ŋ́.

⁸ Anɔ́ɔ opi ā yɔ̄ ī mupītī mla ɔbɔ́ɔ́cɛ nɛ̄hi. Amáŋ ɛpléeko nōó lɔfú fíyɛ́ dúú ā, é lɛ ɔ́ ajī cē. Anɔ́ɔ aájī nɛ̄hi ɛnɛ ɔhá le bū kwɛyí éyi ā. Éyééye kú uwā le eyī pīya kwu ɔ́kíkā ɛnɛ kú ɛcɛ ā.

⁹ Anɔ́ɔ ajī nɛ̄ncɛ́ éyi le bū ŋmá ipú éyi kú ajī ɛnɛ kú nū nyā ā. Ɔfú kú ajī nyā yɛ lɛyī kwu ɛháajɛ, mɛ́mla ɛnɔ̄ɔ̄cī, ó klla yɛ lɛyíkwu ajɛ kú okónu ō ce ā.

¹⁰ Ó le jɛ̄ lɔfú nɛ̄hi klla gbɔɔ́ ō kpɛ́fú tá aícɔ́ɔja kú ɔkpańcō mɛ́mla aínyílɔ́wɔ abɔ̄yī uwā. Ó kōō le ōhī kú uwā kpó tɛ́ɛcɔ̄ wā ajɛ, anɔ́ɔ ó le ikpó da uwá bá ajɛ á.

¹¹ Ó kōō le abɔ̄ gbɔtū lɛyíkwu ɔfú kú Ɔwɔicō nōo wɛ otrɛ̄yí kú aícɔ́ɔja kú ɔkpáncō ā dúú. Ó lɛ ɛya nēé gē gwó lɛ Ɔwɔicō ɛ̄cī dóódu ā ci. Ó klla kwú Agblīihɔ-nɛ̄hi kú nū ā ú tēelihɔ.

¹² Ācɛ kú ipú Agblīihɔ-nɛ̄hi ā le íne bīya abɔ́ɔ ikɔkɔ nēé gwɛ́ɛya okpaakpa kú ɛ̄cī dóódu ā, anɔ́ɔ é le ɔwɛ kú ɛ̄gbā ō gbā Ɔwɔicō ɔwɛ okpaakpa ā tēelihɔ. Ajī nyā le yálé ipú ɔdā dóódu nōó yá ā.

¹³ Anɔ́ɔ n pó abɔ̄ alelékwū-ōtɛ̄hɔ̄ éyi da ɔ́mpa nū ɔ̄kā kahíníī, “Eko nyá nɛ̄ ɔdā nɛ̄ a má ipú ɔ̄na nyā gáā yá gaá kwu āa? Eko nyā nɛ̄ íne ō bīya ɛdɔ obɔ̄bí nɛ̄hi nyā géē kwɛyí ɛya okpaakpa nēé gē gwó lɛ Óndú ā ɛ̄cī dóódu ā í ŋmɛ́yí āa? Eko nyā nēé géē lɛ ikpó da aícɔ́ɔja kú ɔkpáncō mɛ́mla Agblīihɔ-nɛ̄hi ā tāajɛ í gaá kwu āa?”

¹⁴ N pó alelékwū-ōtɛ̄hɔ̄ ɔhá ā tá ɔ̄ ohi kahíníī, “Ɔdā nyā géē yá ɔnɔ̄ɔ̄nɛ̄ mɛ́mla ɔ̄cɔ̄ɔ̄cī ɛ̄cī úlā ɛhɔ̄ cofigwɛ́ɛhɔ̄, nēé gáā gwɛ́ɛya ŋ́ má. Cɛ́ɛ́ é kwú Agblīihɔ-nɛ̄hi kú Óndú ā ú kwúcē wā āhɔ̄ nōó tɛtɛ wɛ ā.”

Ugébríyɛlu, alelékwū-ōtɛ̄hɔ̄ le ɛyí ɛbɛ nɛ̄ Udánīyɛlu má ā ka lɛ ɔ́

¹⁵ N yɔ̄ ī gbɛlá ɔdā nɛ̄ ɛyí kú ɛbɛ nɛ̄ um má nyā wɛ ā, anɔ́ɔ igbeékpónú n̄ má ɔ̄cɛ éyi gaá háyi iyɔ̄bū um.

¹⁶ Anɔ́ɔ n pó ɔkɔ nɛ̄hi ŋmá ipú ísu kú Úlāyi ā kahíníī, “Ugébríyɛlu, lɛ ɛyí kú ɔdā nōó má nyā ka lɛ ɔ́.”

¹⁷ Anɔ́ɔ Ugébríyɛlu wā gaá háyi pī um, anɔ́ɔ n gbɔɔ́ ō yúúfi nɛ̄hi, anɔ́ɔ n má gwōnū klá ajɛ á. Anɔ́ɔ ó da um kahíníī, “Ɔyí kú ɔ̄cɛ lɛ ɛyí kú ɛbɛ nyā jé. Ɛbɛ nyā yɛ lɛyíkwu eko nɛ̄ ɛcɛ nyā í mɛ ā.”

¹⁸ Abɔ̄ ō yɔ̄ ī kɛlā ā, n le hɛ́kwú gwutá ajɛ kɔ́ngɔ́ɔ, anɔ́ɔ ó lɛ abɔ̄ bī um, kwú um ú cāŋjɛ háyi icō á.

¹⁹ Anɔ́ɔ ó da um kahíníī, “N géē mafú gā uwɔ, ɔdā nōo tá ícɔ̄nū kú Ɔwɔicō ɔkwu ā. Ɛbɛ nɛ̄ a má nyā lɛyíkwu eko nɛ̄ ɛcɛ í mɛ ā.

²⁰ Omlede nɛ̄ a má mɛ́mla aájī ɛpa ā, kwɛyí aájɔ̄ɔ̄cɛ́ kú Umɛ́dīya mɛ́mla Upɛ́sīya.

²¹ Opī ā kwɛyí ajɔ̄ɔ̄cɛ́ kú Ugríísi. Ajī nɛ̄hi nōo kwu ɛplá eyī ɛplɛ́ɛpa kú nū ā wɛ ɔcɛ́ aflɛ́yí kú Ugríísi ā nɛ.

²² Aájī ɛnɛ nōo bɛ̄cɛ eko nɛ̄ ajī ɛpa kú nū ā kwú kpó cē ā, kwɛyí ajɔ̄ɔ̄cɛ́ kú nū, nōo géē je kpó kɔ̄ ɛga ɛnɛ igbīhi ɔcɛ́ kú aflɛ́yí ā. É gáā lɔfú bɛ̄ɛka ákú aflɛ́yí ā ŋ́.

²³ Eko nɛ̄ oŋmɛ́yí kú uwā le bá ā, é géē bɔ̄bíipú nɛ̄hi, nōo í yá kéē lɛ italā yá uwā. É géē wɛ aɔ́cɛ́ nēé pó ahɔ̄ ŋ́. É géē lɛ ikpɛ̄yí olɔfú, í bɔ̄bíipú klla í wɛ aɔ́cɛ́ ō plla ācɛ.

²⁴ Ó géē jɛ̄ lɔfú nɛ̄hi, amáŋ ó wɛ ɔfú kú abɔ̄yī nū ŋ́. Ó géē bīya ɔdā alɛwa nɛ̄hi. Ó kē í yálé ipú ɔdā dóódu nōó géē yá ā. Ó géē je ācɛ olɔfú nɛ̄hi ā kpó yíífi mɛ́mla ācɛ kú Ɔwɔicō abɔ̄yī nū ā.

²⁵ Abɔ̄ ó jé ula ā, ó kē ī bī ula le plla ācɛ. Ó géē gwō klla í yá ɔbɔ́ɔ́cɛ, klla ī je ācɛ alɛwa kpó yíífi ŋmá ajɛ icííci. Ó géē lɛ abɔ̄ gbɔtū lɛyíkwu ɔcɛ́ nōo fíyɛ́ dúú klla ī nyílá iyē kú nū. Amáŋ é géē je ɔ́ yíífi ɔwɛ nɛ̄ abɔ̄ kú ɔlɛɛcɛ í gaá kwu ɔ́ ŋ́.

²⁶ Ɛbɛ nɛ̄ a má lɛyíkwu ɛya ō gwó kú ɔ̄cɔ̄ɔ̄cī mɛ́mla ɔ̄nɔ̄ɔ̄nɛ̄ nēé ka ɛyí nū ga uwɔ ɔ́ɔmā géē yá lɛ ā ɔkwɛ̄yi. Amáŋ kwú ɔ̄ ú tayínū ipú ɔtū kú uwɔ, ohígbū ka eko nōó géē yá ā, í bá ɛ́ɛ́ ŋ́.”

²⁷ N le gbayibó, klla le ōcē du ohígbū ɛbɛ nyā ɛ̄cī alɛwa. Anɔ́ɔ n cāŋjɛ klla gaá gbɔɔ́ ō yúklɔ́ nɛ̄ ɔcɛ́ je gā um kā n yá ā. Amáŋ ɔ̄na nyā yá um eyījii nɛ̄hi, n jé ɛyí nū ŋ́.