UDÁNĪYƐ̄LU 5 - Ubáyíbu kú Idɔma

Ucɛ kú Ubɛ́lssása

¹ Igbīhāajɛ, ó lɛ ɔcɛ́ éyi nōo lé Ubábīlɔn, nɛ̄ iyē ké nū lé ka Ubɛ́lssása. Ɛ̄cī éyi ó le ucɛ nɛ̄hi yá. Anɔ́ɔ ó le aígabɔ̄ kú nū, úlā ɛpa ce ofigwó kpó hīīgwú. Anɔ́ɔ é bá ī gwá ejé tɔ̄ɔhá á.

² Eko nɛ̄ Ubɛ́lssása yɔ̄ gē gwá ejé ā, ó lɛ ɔ́da je kéē gaá lɛ íkókwū kú Agblīihɔ-nɛ̄hi kú Óndú ā nēé bī oje ɔdɔ (ugoolu) mɛ́mla aɛ́nɛ̄ é bī oje nɛ̄hɛ́, mɛ́mla oje udɔ yá uwā nɛ̄ ádā anúɔ ɔ́ɔ kpó ŋmá Ujerúsālɛm wā ā, kpó wā ká anúɔ mɛ́mla aígabɔ̄ kú anúɔ, anyā anúɔ, mɛ́mla anyā ō cikpó kú anúɔ, kéē bī uwā le gwá ejé.

³ Anɔ́ɔ é lɛ odúúdú aíkókwū nēé kpó ŋmá Agblīihɔ-nɛ̄hi kú Ɔwɔicō nōo yɔ̄ Ujerúsālɛm ā kpó gē lɛ ɔ́. Anɔ́ɔ ɔcɛ́ ā mɛ́mla aígabɔ̄, mɛ́mla anyā nū mɛ́mla anyā ōcikpó kú nū bī aíkókwū ā le gwá ejé á.

⁴ É gwá ejé bá gē cɛ̄tra aɔ́wɔ nēé bī ɛcɔ̄, oje ɔdɔ, oje udɔ, mɛ́mla oje nɛ̄hɛ́ lɛ yá uwā ā.

⁵ Anɔ́ɔ igbeékpónú, abɔ̄ kú ɔ̄cɛ éyi le hɛ́wɛ̄ɛcɛ, anɔ́ɔ ó gbɔɔ́ ō tɔ́kpá tū ɔdɔ kú Agblɔ̄cɛ́. Abɔ̄ ā ŋmá ɛga nɛ̄ agege háyi gē fíyajɛ fíyɛ́ dúú ā. Ɔcɛ́ ā kē le abɔ̄ ā má eko nōó yɔ̄ ī tɔ́kpá ā.

⁶ Iyē kú ɔcɛ́ ā kwú pīya ɔhá, ɔtū kú nū kwú gbogodo nɛ̄ɛ̄nɛ̄hi nōo cɛ̄ le okwúukwu kú nū gbɔɔ́ ō fiyégbúlú kpáákpá.

⁷ Ɔcɛ́ ā lɛ ɛgba dɛ̄ ka ɔ̄cɛ éyi kóō lɛ ācoyímabɔ̄, aɔ́hɛ, ācɛ nēe ī bī aínyílɔ́wɔ lɛ jé ɔdā nōo ī yá ā mɛ́mla odúúdú ācojééyī kú Ubábīlɔn ā kpó wā. Anɔ́ɔ ɔcɛ́ ā da ācojééyī kú Ubábīlɔn ā kahíníī, “Ɔ̄cɛ dúúmā nōo lɛ ɔkpá nēé tá tū ɔdɔ nyā jé, nōó klla lɛ ɛyí nū ka ga um, n géē je awulú nɔ̄wá kú ɔcɛ́ wu ɔ́ iyē, n klla í lɛ agbá oje ɔdɔ tū ɔ̄ ɔkɔ. Anú klla géē wɛ ɔcɛ́ ɔ́mɛtá ipú ajɛ kú ajɔ̄ɔ̄cɛ́ kú um á.”

⁸ Anɔ́ɔ odúúdú ācojééyī kú ɔlɛ́ ɔcɛ́ ā kwú pɛ́ wā inu, amáŋ é jé ɔkpá nyā glá ɛɛ́ nēé gē jé ɛyí nū, nēé gē ka lɛ ɔcɛ́ ā ŋ́.

⁹ Ɛlā nyā kwú ɔcɛ́ iyē nɛ̄hi, eyī kú nū kwú pīya ɔhá fíyɛ́, ipú kú nū kwú gbogodo, ɛ́gɔ́ɔmā nōo kwú odúúdú aígabɔ̄ kú nū iyē lɛ dúú á.

Udánīyɛlu lɛ ɔkpá nya jé le ɛyí nū ka lɛ ɔcɛ́

¹⁰ Ɔcányā ā le uya nɛ̄ ɔcɛ́ mɛ́mla aígabɔ̄ kú nū yá ā pó, anɔ́ɔ ó le bēhé ga inu ɛga kú ucɛ ā. Anɔ́ɔ ó kahíníī, “Ágábáidu, Ɔwɔicō kóō lɛ uwɔ ɛyí tápátɛ́cɔ̄! Ɛlā nyā kóō híī je unwalu gā uwɔ, ɛ́ɛ́ nɛ̄ eyī kú uwɔ gē je pīya ɛdɔ ɔhá ŋ́.

¹¹ Ɔ̄cɛ éyi yɔ̄ ipú ajɔ̄ɔ̄cɛ́ kú uwɔ amānyā, nɛ̄ alelékwū kú aɔ́wɔ otīihɔ yɔ̄ mla anú. Eko kú ádā uwɔ ā, ɔ̄cɛ ā bī ɛbɛ, íjééyī, mɛ́mla ɔdōōjé bɛ̄ɛka ákú aɔ́wɔ nōo yɔ̄ ipú nū ā lɛ yúklɔ́. Unebúcádinēsa, ɔcɛ́nɛ̄hi ā, ádā uwɔ, kwú ɔ̄ ú pīya ɔcɛ́ kú ācojɔ́dā mɛ́mla ācoyímabɔ̄, mɛ́mla ācomɛ́ɛbɛ,

¹² ohígbū koó lɛ alelékwū olɔhi kú íjééyī, ɔdōōjé, ɛbɛ oōmá, ɛyí ɔ̄na ō ka, mɛ́mla unwalu ō ŋmúla dóódú yɔ̄ ipú Udánīyɛlu nyā nɛ̄ ádā uwɔ hī ka Ubɛ́ltɛssása ā. Lɛ ɛhɔ̄ tū kéē lɛ Udánīyɛlu hīīgwú gé lɛ uwɔ. Ó í da uwɔ ɔdā nɛ̄ ɛyí ɔkpá nyā wɛ ā.”

¹³ Anɔ́ɔ é le Udánīyɛlu bī wā iyɔbū ɔcɛ́ ā bōōbū. Ɔcɛ́ ā da Udánīyɛlu ɔ̄kā kahíníī, “Awɔ wɛ Udánīyɛlu ɔ́ɔmā, nōo wɛ éyi kú aálagbá kú ɛfú, ɔ̄cɛ Ujíyu nɛ̄ ádā um, ɔcɛ́ ā bī ŋmá Ujúda wā amānyā á nɛɛ?

¹⁴ N lɛ ɔ̄kā kú uwɔ pó ɛɛ́, ka alelékwū kú aɔ́wɔ otīihɔ ā yɔ̄ ipú uwɔ, a jééyī, a jɔ́ɔ́dā, klla lɛ ohílīpú.

¹⁵ É lɛ odúúdú ācojééyī mɛ́mla ācojɔ́dā kú Ubábīlɔn ā kpó wā, kéē lɛ ɔkpá nyā jé cɛ́ɛ́ kéē klla lɛ ɛyí nū ka gā um, amáŋ é jé ɔ̄ glá ɛ́ɛ́ nēé gē ka ɛyī nū gā um glá ŋ́.

¹⁶ Amáŋ n pó ka a gē ka ɛyí ɔ̄na lɛ ɔ̄cɛ klla ī ŋmúla unwalu kú ɔ̄cɛ lɛ ɔ́. Ɔ́dāŋ ka a lɛ ɔkpá nyā jé nɛ̄ a klla lɛ ɛyí nū ka gā um, n géē je awulú nɔ̄wá wu uwɔ iyē, klla í lɛ agbá kú oje ɔdɔ (ugóolu) tū uwɔ ɔkɔ. A klla géē wɛ ɔ̄cɛ o gbāājɛ ɔ́mɛɛtá ipú ajɛ kú Ubábīlɔn ā.”

¹⁷ Anɔ́ɔ Udánīyɛlu tá ɔcɛ́ ohi kahíníī, “Bī ɛhi kú uwɔ ā mla iyī uwɔ, ámāŋ a kwú lɛ ɔ̄cɛ ɔhá. N géē jé ɔkpá ā gā uwɔ, klla í ka ɛyí nū gā uwɔ.

¹⁸ “Woó, Ágábáidu, Ɔwɔicō nōo fíyɛ́ dúú ā le ádā uwɔ Unebúkádinēsa yá ɔcɛ́ nōo lɔfú nɛ̄hi á. Ó klla je ɛgahi mɛ́mla ojīlīmā lɛ ɔ́.

¹⁹ Ó lɔfú nɛ̄ɛ̄nɛ̄hi, ɛ̄nyā yá ɛ́ɛ́ nɛ̄ odúúdú aéwo, ɛdɔ kú ācɛ mɛ́mla ācɛ o ka ucē dóódu gē yúúfi nū klla ī fīyégbúlú iyɔ́bū nū á. Ɔ̄cɛ dúúmā nōó tíne ō ŋmó ɔ̄ nɛɛ, ó gē je ɔ̄cɛ ɔ́ɔmā ŋmó. Ɔcɛ dúúmā nōó tíne kóō yēeyī, ó gē yēeyī. Ó klla ī lɛ ojīlīmā ce ɔ̄cɛ dúúmā nōo he ɔ́ ɔtū. Ó kē ī je uwēyī lɛ ɔ̄cɛ dúúmā nōo he ɔ́ ɔtū.

²⁰ Amáŋ abɔ̄ ó gbɔɔ́ ō yɔ́bɔ́ɔ́cɛ, klla gē bɔ̄bíipú, gē yíkpɛ̄yí olɔfú ā, Ɔwɔicō kwú ɔ̄ ú tá ajɛ ŋmá ɔcɛ́, ɛga kú ojīlīmā kú nū hɛ́ ɔ̄ abɔ̄.

²¹ É lɛ ɔ́ nū ŋmá ipú ācɛ ga ipú ácí, ohílīpú kú nū klla kwú pīya ákú aɛ́bɛ́ kú ipácí. Ó lā mɛ́mla aɛ́bɛ́ kú ipácí klla gē lé ácí mɛ́mla ēpū bɛ̄ɛka ɛna ā. Ó klla gē gbo ɛcɛ áncā ipácí. Ébú gē ce klá anú ɛyí. Igbīhāajɛ ó le jé ka Ɔwɔicō nōo lɔfú klla fíyɛ́ dúú ā, ɔ́ɔ gē gbō ajɔ̄ɔ̄cɛ́, klla ī je ɔcɛ́ dóódu nōo he ɔ́ ɔtū ce á.

²² Anɔ́ɔ awɔ, ɔyínū, Ubɛ́lssása nōo jé ɛ̄nyā nááná ā, í tū ɔtū kú uwɔ wāajɛ ŋ́ kpɔ́ á.

²³ Anɔ́ɔ a le īyī uwɔ fu ce, gē yá ɔbɔ́ɔ́cɛ ɛgiyí Óndú kú Ɔkpáncō mɛ́mla ɛcɛ. Anɔ́ɔ é lɛ íkókwū kú Agblīihɔ-nɛ̄hi kú Óndú ɔ́ɔmā kpó wā iyɔ̄bū uwɔ, anɔ́ɔ awɔ, mɛ́mla aígabɔ̄ kú uwɔ, anyā uwɔ mɛ́mla anyā ō cikpó kú uwɔ gē gwá ejé ŋmá anú á. Aá klla ī cɛ̄tra aɔ́wɔ nēé yá ŋmá oje ɔdɔ, oje nɛ̄hɛ́, oje udɔ, ɔcí mɛ́mla ɛcɔ̄, nōó mɛ́ɛbɛ ɛ́ɛ́ nēe gē pó ɛlā, ɛ́ɛ́ nēe gē jé ɔdā dúúmā ŋ́ mā. Amáŋ á lɛ ojīlīmā ce Ɔwɔicō nɛ̄ owu kú uwɔ yɔ̄ ipú abɔ̄ nū ā ŋ́ má.

²⁴ Ohígbū ɔ́ɔmā nɛ̄ Ɔwɔicō yá nɛ̄ a má abɔ̄ nōo gaá tɔ́kpá nyā tū ɔdɔ á.

²⁵ Ɔkpá nɛ̄ abɔ̄ ā tá tū ɔdɔ ā yɔ̄ á: ‘É lɛ ɔ́ gbaáluka ɛɛ́, é lɛ ɔ́ miya ɛɛ́, é le ɔ́ kɔ̄ ɛɛ́.’

²⁶ Ɛyí kú nū kē yɔ̄ á: É le ɔ́ gbaáluka ɛɛ́ mā wɛ ka Ɔwɔicō le ɛ̄cī kú ajɔɔcɛ́ kú uwɔ gbaáluka, klla lɛ ɔ́ ŋmɛ́yí ɛɛ́.

²⁷ É le ɔ́ miya ɛɛ́ mā wɛ ka, Ɔwɔicō le uwɔ miya, anɔ́ɔ ó kē má ka, á wɛ ɔdā dóódu nɛ̄ a cíka ō wɛ ā ŋ́.

²⁸ É le ɔ́ kɔ̄ ɛɛ́ mā wɛ ka é le ajɔ̄ɔcɛ́ kú uwɔ kɔ̄ lɛ ācɛ Umédes mɛ́mla Upɛ́siya ɛɛ́.”

²⁹ Anɔ́ɔ Ubɛ́lssása lɛ ɔ́da je, kéē kwú awulú nɔ̄wá ú wu Udánīyɛlu iyē. Ó kéē klla kwú agbá oje ɔdɔ (ugóolu) ú tū ɔ̄ ɔkɔ. Anɔ́ɔ ó le ka tɛ́ɛcɛ ka anú ɔ́ɔ wɛ ɔcɛ́ ɔ́mɛɛtá kú ajɛ kú Ubábīlɔn mɛ́ɛ̄ á.

³⁰ Anɔ́ɔ otóótú ɔ́ɔmā, é kwú Ubɛ́lssása, ɔcɛ́ kú Ubábīlɔn ā ú ŋmó.

³¹ Anɔ́ɔ Udárīyɔs, ɔcɛ́ kú Uméde, wā gaá mīyɛ ajɔ̄ɔ̄cɛ́ kú nū á.” Eko ɔ́ɔmā, Udárīyɔsi wɛ iháyí ofɛtá.