UDÁNĪYƐ̄LU 4 - Ubáyíbu kú Idɔma

Unebúkádinēsa, ɔcɛ́ le ɔ̄na ɔhá nā

¹ Ɔcɛ́ Unebúkádinēsa le ɛhɔ̄ nyā tū fu odúúdú aéwo, ɛdɔ kú ācɛ mɛ́mla aúcē kú ipú ɛcɛ ā kahíníī, “Ɛbɔ́ mɛ́mla ojɛ̄ gɔbū ipú agbénú kóō yɔ̄ lɛ aá.

² N gbɛlá koó wɛ ɔdā olɔhi ga um, cɛ́ɛ́ ká n̄ le máfu lɛ aá ɔdā ohídáagó mɛ́mla ɛlōome nɛ̄ Ɔwɔicō nōo fíyɛ́ dúú ā yá gā um ā.

³ Ɔdōcābɔ̄ kú nū ā nwuné nɛ̄hi, úklɔ́ ohídáagó nōó yá ā klla nwuné dúú. Ɔwɔicō wɛ ɔcɛ́ piyóó. Ó géē cɔcɛ́ o ŋmá ɛ́gɔ́ éyi ga ɛ́gɔ́ ɔhá gbógbóō.

⁴ N lā ajɔ̄ɔ̄cɛ́ kú um yɔ̄ ī jɔ́ɔnyɛ lɔɔlɔhi, n klla yɔ̄ ī jɛ̄ gɔbū.

⁵ Amáŋ eko nɛ̄ n yɔ̄ ī gbiyɔ̄lā otú éyi ā, n le ɔ̄na nōo tūufi nɛ̄hi nā. Ɔkwɔ̄ɔ̄kwɛ̄yi, ó kē cɛ̄ ufi tū um iyē nɛ̄ɛ̄nɛ̄hi.

⁶ Ohígbū ɔ́ɔmā, n le ɔ́da je kéē lɛ odúúdú ācojééyī kú Ubábīlɔn kpó wā cɛ́ɛ́ kéē géē lɛ ɛyí ɔ̄na nyā ka gā um.

⁷ Anɔ́ɔ ācoyíimabɔ̄, ācógwɛ́bā, mɛ́mla ācomɛ́ɛbɛ, mɛ́mla ācojɔ́dā ŋmá ínyílɔ́wɔ le pɛ́ wā ɛgiyí um. Anɔ́ɔ n lɛ ɔ̄na nyā ka lɛ uwá, amáŋ é ka ɛyí nū gā um glá ŋ́.

⁸ Igbīhāajɛ, Udánīyɛlu, nɛ̄ n lɛ īye kú ɔwɔ kú um, Ubɛtessása ce ɔ́ ā, gā ɛgiyí um. Anú nɛ̄ alelékwū kú Ɔwɔicō nōo tīihɔ ā yɔ̄ mla anú ā. Anɔ́ɔ n le ɔ̄na ā ka lɛ ɔ́ kahíníī,

⁹ “Kóocōō, Ubɛtessása, otrɛ̄yí kú ācoyímabɔ̄ mɛ́mla ācojɔ́dā dóódu, ohígbū ka n jé ka alelékwū kú aɔ́wɔ otīihɔ ā yɔ̄ mla uwɔ á. Ɔdā dúúmā ī tayínū ŋmá ɛgiyí íjééyī kú uwɔ ŋ́. Ɛ̄nyā ā wɛ ɔ̄na nɛ̄ n nā á. Lɛ ɛyí nū ka gā um.

¹⁰ Ɔ̄na nɛ̄ n nā eko nɛ̄ n yɔ̄ ī gbiiyɔ̄lā yɔ̄ á. N pīyeyī, anɔ́ɔ n má ɔcí kwu ɔtāhɛ̄ ɛcɛ. Ó jɛ̄ licō nɛ̄hi.

¹¹ Ɔcí ā klla le jɛ̄ nwuné fíyɛ́, klla kwú lɔfú nɛ̄hi. Īkpɛ̄yí kú ɔcí ā gaá kwu ɔkpáncō, ācɛ lɔfú má ɔcí ā ŋmá ɛga dóódu kú ɛcɛ.

¹² Ó lɛ ēpū olɔhi, ó klla gwá īkpō nɛ̄hi, īkpō ā nwuné jɛ̄ nɛ̄ odúúdú ācɛ kú ipú ɛcɛ ā lé glá. Aɛ́bɛ́ kú ipácí ī mlɛ́nyɔ́ obobowú kú nū, aígbáanɔ̄ gē gwó ɔlɛ́ ce ābɔ̄ kú nū. Odúúdú aɛ́dɔ kú aɔ́dā ōyēeyī gē lé īkpō kú ɔcí nyā.

¹³ Abɔ̄ n yɔ̄ ī gbiyɔ̄lā kpɔ́ ā, n má alelékwū-ōtɛ̄hɔ̄ nōo lɛ eyī kwɛcɛ gɛɛ yɔ̄ ī wā ajɛ ŋmá ɔkpáncō ipú ɔ̄na kú um ā dúu.

¹⁴ Anɔ́ɔ ó lɛ ɛgba dɛ̄ gbōmgbōm ka, ‘Lɛ ɔcí ā hɛ́ wā ajɛ, lɛ īkpō mɛ́mla ābɔ̄ mɛ́mla odúúdú nū kpó gwó, ká ā lɛ ɔ́ fíyákátā klá ɛcɛ. Lɛ aɛ́bɛ́ kpó nū ŋmá ɔkwu nū, ká ā lɛ aígbáanɔ kpó nū ŋmá ābɔ̄ kú nū.

¹⁵ Amáŋ, habɔ̄ ikpaŋkini kú nū tá kwaajɛ, cɛ́ɛ́ a kwú agbá kú oje olamu mɛ́mla oje udɔ ā í kwú ikpaŋkini ɔcí ā biílí. Má ɔ̄ tá kwu ipácí abɔ́ɔ. Ébú kóō cē klá ɔ̄cɛ ā, kóō lā ipácí mɛ́mla aɛ́bɛ́, cɛ́ɛ́ kóō lé ēpū mɛ́mla uwá.

¹⁶ Ohígbū ka iháyí ahāapa ā, ó gáā lɛ ohílīpú kú ɔ̄cɛ ŋ́, amáŋ ákú ɛbɛ́ kú ipácí nɛ.

¹⁷ Ɛ̄nyā wɛ ɛlā nɛ̄ alelékwū-otɛ̄hɔ̄, o lɛ eyī kwɛcɛ gɛɛ nyā yātū á. Cɛ́ɛ́ odúúdú ācɛ nēe bá ɛga dóódu ā, kéē jé ka Ɔwɔicō nōo fíyɛ́ dúú ā, lɛ íkwu īkpɛ̄yí kú ajɔ̄ɔ̄cɛ́ kú alɛɛcɛ́ dúúmā ipú ɛcɛ nyā. Ó klla lɔfú je ajɔ̄ɔ̄cɛ́ nyā lɛ ɔ̄cɛ ɔhá dóódu nōó fu ā. Kwu ɔ̄cɛ nōó jɛ̄ ācɛ eyī ŋ́ fíyɛ́ dúú ā.’

¹⁸ Ɔ̄na nɛ̄ n nā a yɔ̄ á. Ubɛltessása, lɛ ɛyí nū ka gā um mɛ́ɛ́nɛ. Odúúdú ācojééyī kú ɔlɛ́ um ā, í ka ɛyí nū gā um glá ŋ́. Amáŋ awɔ ā, ka ɛyí nū gā um glá. Ohígbū ka alelékwū kú aɔ́wɔ otīihɔ ā yɔ̄ mla awɔ.”

Udánīyɛlu le ɛyí ɔ̄na ā ka lɛ ɔcɛ́.

¹⁹ Ohí le hɛ́ lɛ Udánīyɛlu nēé hī ka Ubɛltessása ā nɛ̄ɛ̄nɛ̄hi nōó cɛ̄ lɛ ɔ́ kɛlā glá ŋ́. Anɔ́ɔ ɔcɛ́ ā da ɔ́ kahíníī, “Ubɛltessása, ɔ̄na ā mɛ́mla ɛyí nū ō ka ā, kóō híī tū uwɔ ufi ŋ́.’’ Anɔ́ɔ Udánīyɛlu tá ɔ̄ ohi kahíníī, “Óndú um, eyī yá um kú ɔ̄na nyā mɛ́mla ɔwɔ ō cɛ̄ kú nū kóō yɔ̄ lɛ aólɛlā kú uwɔ, kóō híi wɛ awɔ ŋ́.

²⁰ Ɔcí nɛ̄ a má, nōo jɛ̄ klla lɔfú nɛ̄hi, nōo jɛ̄ gaá kwu ɔkpáncō ā, nɛ̄ odúúdú ācɛ kú ipú ɛcɛ lɔfú má ɔ̄ ŋmá ɛga dóódu glá ā,

²¹ ɛ̄nɛ̄ o lɛ ēpū olɔhi klla gwá īkpō nɛ̄hi nōo lɔfú jɛ̄ odúúdú ācɛ kú ɛcɛ ā ɔdōlé glá ā, nɛ̄ aɛ́bɛ́ kú ipácí gē wā ī mlɛ́nyɔ́ ɔkwu nū, nɛ̄ aígbáanɔ kú ɔkpáncō gē gwó ɔlɛ́ ce ābɔ̄ nū ā,

²² wɛ awɔ nɛ, ɔcɛ́. Awɔ jɛ̄ klla lɔfú nɛ̄hi á. Onwūnē kú uwɔ yɛ jāā gaá kwu ɔkpáncō, ajɔ̄ɔ̄cɛ́ kú uwɔ kē yɛ ga oŋmɛ́yí kú ɛcɛ.

²³ Eko nɛ̄ awɔ, ɔcɛ́ ā, lɛ eyī kwɛcɛ gɛɛ yɔ̄ ī mɛ́ɛbɛ cíí ā, alelékwū-ōtɛ̄hɔ̄ ō tīihɔ ā, gā ajɛ ŋmá Ɔkpáncō gaá kahíníī, ‘Lɛ ɔcí ā tú wā ajɛ ká ā lɛ ɔ́ yíífi, amáŋ habɔ̄ ikpaŋkini kú nū tá kwaajɛ, lɛ agbá kú oje ɔlamu mɛ́mla oje udɔ ā kwú ɔ́ biílí, cɛ́ɛ́ kú ā habɔ̄ tá kwu ipácí abɔ́ɔ. Cɛ́ɛ́ ka ébú kú ɔkpáncō kóō cē klá ɔ̄cɛ ā. Ó géē yɔ̄ mɛ́mla aɛ́bɛ́ kú ipácí iháyí ahāapa.’

²⁴ Ɛyí ɔ̄na ā yɔ̄ á ɔcɛ́, ɛ̄nyā wɛ ɔ́da nɛ̄ Ɔwɔicō nōo lɔfú fíyɛ́ dúú ā je kóō yá uwɔ á.

²⁵ Keé géē nū uwɔ ŋmá ipú alɛɛcɛ gaá lā mɛ́mla aɛ́bɛ́ kú ipácí, cɛ́ɛ́ a géē yɔ̄ ī lé ácí klla ī lé ēpū bɛ̄ɛka ɛna ā, iháyí ahāapa, jāā gbéeko nɛ̄ a le jé ka Ɔwɔicō nōo lɔfú fíyɛ́ dúú ā, ɔ́ɔ gē gbō ajɔ̄ɔ̄cɛ́ kú alɛɛcɛ á. Ka ɔ́ɔ klla ī je ɔfú lɛ ɔ̄cɛ dúúmā nōo hi ɔ́ ɔtū.

²⁶ Ɛ́gɛ́nɛ̄ alelékwū-otɛ̄hɔ̄ je ɔ́da kéē habɔ̄ ikpaŋkini kú nū tá kwaajɛ ā. Ɛ̄nya cābɔ̄ ka a géē wɛ ɔcɛ́ kpɔ́ ɛ́ɛ́ eko nɛ̄ a lɛ Ɔwɔicō jéjúma ka anú nōo wɛ Ɔwɔicō kú ɔkpáncō ā gē gbō odúúdú ɛcɛ á.

²⁷ Ohígbū ɔ́ɔmā, ɔcɛ́, mīyɛ ɛlā nɛ̄ n gaá nwū uwɔ nyā ā. Mā íne nɛ̄ a gē bīya ā tá, cɛ́ɛ́ ká ā lā oyēeyī olɔhi mɛ́mla oyēeyī okpaakpa. Cɛ́ɛ́ ká ā ményīnyi kú aógbɛhá, cɛ́ɛ́ a géē yɔ̄ ī gɔbū lɔɔlɔhi.”

²⁸ Odúúdú ɛ̄nyā wā ī le yá da Unebúkádinēsa.

²⁹ Oŋmɛ́yí kú ɔyā igwó ɛpa ā, eko nōó yɔ̄ ī yāwu icō kú agblɔ̄cɛ́ kú Ubábīlɔn ā,

³⁰ anɔ́ɔ ɔcɛ́ ā kahíníī, “Ubábīlɔn, igelī nɛ̄hi, nɛ̄ n bī abɔ̄ olɔfú kú um gwó kóō wɛ ɛga nɛ̄ n géē lā kóō mafú ɔfú mɛ́mla ojílímā kú um fú ā yɔ̄ á?”

³¹ Abɔ̄ ɔcɛ́ bī ɛlā okónu yɔ̄ ī ka kpɔ́ ɛ́ɛ́ mā, ɔkɔ éyi ŋmá ɔkpáncō kahíníī, “Woó, Unebúkádinēsa, ɔcɛ́ awɔ nɛ̄ ɔkɔ nyā gē kɛlā gā uwɔ á. Ajɔ̄ɔ̄cɛ́ ­a nyɛ̄ɛ̄ ŋmá ɛgiyí uwɔ ɛɛ́.

³² É géē nū uwɔ ŋmá ipú ācɛ, gaá lā ipácí mɛ́mla aɛ́bɛ́ kú ipácí. A kē í yɔ̄ ī lé ácí mɛ́mla ēpū bɛ̄ɛka ɛna ā, iháyí ahāapa, jāā gbéeko nɛ̄ a le jé ka Ɔwɔicō nōo lɔfú fíyɛ́ dúú ā ɔ́ɔ gē gbō ajɔ̄ɔ̄cɛ́ kú alɛɛcɛ á. Ó klla gē je ajɔ̄ɔ̄cɛ́ ā lɛ ɔ̄cɛ dúúmā nōo he ɔ́ ɔtū.”

³³ Ikpíikpó ɔ́ɔmā ā, ɛlā ā le cɛ̄ ɛyí Unebúkádinēsa. Anɔ́ɔ é lɛ ɔ́ nū ŋmá ipú ācɛ, gaá yɔ̄ ī lé ácí bɛ̄ɛka ɛna ā ipácí á. Iyē kú nū kwú bū ɔnwū bɛ̄ɛka ɛbɛ́ ā, ébú cē klá anú iye jāā gbéeko nɛ̄ ó kwú bū efū bɛ̄ɛka ɔgɔ ā. Ūkwū kú nū kwaajɛ̄ bɛ̄ɛka ákú ɔgɔ ā.

Unebúkádinēsa cɛ̄tra Ɔwɔicō

³⁴ Unebúkádinēsa, ɔcɛ́nɛ̄hi ā, kahíníī, “Eko nɛ̄ iháyí ahāapa ā le yá ī yɛ ā, n je eyī gicō má ɔkpáncō, anɔ́ɔ ohílīpú kú ɔ̄cɛ kú um kē kwúcē wā ɛgiyī um á. Anɔ́ɔ n cɛ̄tra Ɔwɔicō, nōo lɔfú fíyɛ́ dúú ā. N klla le ojīlīmā ce anú nōo ī yɔ̄ piyóó ipú ɛcɛ nyā ā. Ohígbū koó géē cɔcɛ́ piyóó, Ajɔ̄ɔ̄cɛ́ kú nū yɔ̄ ŋmá ɛ́gɔ́ éyi ga ɛ́gɔ́ ɔhá gbógbóō.

³⁵ Odúúdú ācɛ kú ɛcɛ í wɛ ɔdā dúúmā ɛgiyí nū ŋ́, ɔdā dúúmā nōo wā ɔtū kú nū nōo kē he ɔ́ ɔtū ā, nōó gē yá á, kwu ipú ɔkpáncō mɛ́mla ipú ɛcɛ. Ɔ̄cɛ dúúmā í ce ɔ anú glá ŋ́. Ɔ̄cɛ dúú í da ɔ́ ɔ̄kā ka ɔdí nɛ̄ a yá yɔ̄ ā glá ŋ́.

³⁶ Eko ɔ́ɔmā ohílīpú kú um kwúcē wā ɛgiyī um, é le ojīlīmā kú um, ɛgahi kú ajɔ̄ɔ̄cɛ́ kú um kpó cīgbīhi gā um. Aígabɔ̄ mɛ́mla aótrɛ̄yi kú ɔlɛ́ um le um tá omáabā. Anɔ́ɔ é kē kwú ɔfú kú ɔcɛ́ kú um ú kpó gā um mɛ́mla ojīlīmā nōo fíyɛ́ ákú otɛtɛ ā á.

³⁷ Anɔ́ɔ abālɔbányā, ami, Unebúkádinēsa cɛ̄tra, klla lɛ ojīlīmā ce Ɔcɛ́ kú Ɔkpáncō. Ɛjɛ̄ɛ̄jī úklɔ́ kú nū le kpaakpa, ɔwɛ kú nū dóódu lɔhi. Ācɛ nēe ī yá ɔbɔ́ɔ́cɛ ā, ó gē tá uwā wā ajɛ.”