UDÁNĪYƐ̄LU 3 - Ubáyíbu kú Idɔma

Ojibó kú oje ɔdɔ kú Unebúkádinēsa

¹ Unebúcádnēsa, ɔcɛ́nɛ̄hi kú Ubábīlɔn le ojibó kú oje ɔdɔ (ugoolu) ma. Olicó kú nū wɛ ikpó ofu cigwó, olɔwá kú nū wɛ ikpō ɛhīlī. Ó kwú ɔ̄ ú kwu ajɛ ŋmɛ́ɛɛ kú Udúra ipú ajɛ kú Ubábīlɔn abɔ́ɔ.

² Anɔ́ɔ ɔcɛ́ ā le ɛhɔ̄ tū gaá lɛ odúúdú aígabɔ̄, ācojɔ́dā, aɔ́cɛ́ ohɛ́pɔ̄, aígabɔ̄ mɛ́mla aígbómína kú odúúdú Ubábīlɔn ā kpó hīīgwú tɔ̄há kéē wā. Ó kéē wā ɛ̄cī nēé gē gwɛ́ɛya klla í je ojibó nyā kwaajɛ gbɔɔ́ ō gbā ɔ̄ ɛ̄gbā ā.

³ Eko nɛ̄ odúúdú ācɛ mɛ́mla odúúdú aígabɔ̄ kú nū nōó hīīgwú ā, gaá le jīla ā. É gaá háyi iyɔ̄bū kú ojibó ā lɛ eyī pīya kwu ɔ́,

⁴ ɔ̄cotɔ́ɔna éyi lɛ ɔna tá gbōmgbōm kahíníī, “Odúúdú ācɛ, aéwo mɛ́mla ucē dóódu, é le ɔ́da je lɛ aá ka,

⁵ eko dúúmā nɛ̄ aá lɛ ɔkɔ kú opo, áma, ɔgalúmpɛ̄, ɛ̄ngwū, úmōlō mɛ́mla ɛdɔ kú ɔdā ō bī gwíijē dóódu pó, odúúdú aá géē tú wāajɛ géē gbā ojibó nɛ̄ Unebúkádinēsa, ɔcɛ́nɛ̄hi ā, ma kwu ajɛ nyā ɛ̄gbā.

⁶ Ɔ̄cɛ dúúmā nōó gbā ojibó nyā ɛ̄gbā ŋ́, é géē je ɔ́ tɛ́ɛcɔ̄ ga ipú ɔlá kú útuló ā.”

⁷ Abɔ̄ ó le lɛ ā, ɔkwɔɔkwu nɛ̄ ācɛ lɛ uya kú ajī ɛbɛ́, opo, ɛ̄ngwū ɔgalúmpɛ̄, ufíyé, áma, mɛ́mla uba, mɛ́mla ɔdā ō bī gwíijē dóódu ā pó ā, odúúdú ācɛ mɛ́mla aéwo mɛ́mla ucē dóódu túkpɛɛ́ le ɛ̄gbā gbā ojibó kú Unebúkádinēsa, nōó ma kwu ajɛ ā.

É lɛ ije cē bá aɔ́mpa Udánīyɛlu ɛtá ā.

⁸ Eko ɔ́ɔmā, ācɛ kú Ubábīlɔn ōhī le ɛga má kéē má ācɛ Ujíyu ímálānyī ā, le ɛlā tū ce uwá.

⁹ É da ɔcɛ́nɛ̄hi ā kahíníī, “Ágábáidu kóō yēeyī piyóo!

¹⁰ Ó wɛ awɔ ɔcɛ́ ā je ɔ́da ka, ɔ̄cɛ dóódu nōo lɛ ɔkɔ kú opo, ɔkpānā, ɔgalúmpɛ̄, ɛ̄ngwū, ajī ɛbɛ́, ɛ́mula, mɛ́mla aɔ́dā ō bī gwíije dóódu pó, kéē túkpɛɛ́ cɛ́ɛ́ kéē gbā ojibo nɛ̄ anúɔ le kwu ajɛ ā ɛ̄gbā ŋ́ nɛɛ?

¹¹ Anɔ́ɔ a klla ka ɔ̄cɛ dúúmā nōó gbā ojibó ā ɛ̄gbā ŋ́, é géē je ɔ́ tɛ́cɔ̄ ga ipú ɔlá kú útuló ā ŋ́ nɛɛ?

¹² Ācɛ kú Ujíyu ōhī bá amānyā, nɛ̄ a fu kéē leyīkwu ɛlā kú ajɛ kú odúúdú Ubábīlɔn, nēe lé ka Usádrāki, Uméssaki, mɛ́mla Abɛ́dinēgo. Ɔcɛ́, ācɛ nēe bá nyā í jāhɔ̄ gā uwɔ ɛ́ɛ́ nēé gē lɛyítáajɛ lɛ íne kú uwɔ ā ŋ́. É ī gbā ojibó kú oje ɔdɔ (ugoolu) nɛ̄ a le kwaajɛ ā ɛ̄gbā ŋ́.”

¹³ Ɔkwɔɔkwu nɛ̄ ɔcɛ́ ā le ɛlā ā pó ā, ó kwú cɔ̄nū nɛ̄hi, anɔ́ɔ ó le ɔ́da je kéē lɛ uwá kpó wā iyɔ̄bū anúɔ.

¹⁴ Anɔ́ɔ Unebúkádinēsa da uwá ɔ̄kā kahíníī, “Ɔkwɛ̄yi nōó wɛ á nɛɛ? Usádrāki, Uméssaki mɛ́mla Abɛ́dinēgo, aá gē túkpɛɛ́ ká aá gbā ojibó kú oje ɔdɔ (ugoolu) nɛ̄ n ma kwaajɛ ā ɛ̄gbā ŋ́ ɔkwɛ̄yi i?

¹⁵ Abālɔbányā ɔ́dāŋ ka aá lɛ tútū nɛɛ, eko dúúmā nɛ̄ aá lɛ ɔkɔ kú opo, ɛ̄ngwū ogalúmpɛ̄ mɛ́mla áma, mɛ́mla ɛdɔ kú ɔdā ō bī gwíije dóódu ɔhá pó, aá í túkpɛɛ ká aá gbā ojibó kú oje ɔdɔ (ugoolu) nɛ̄ n ma kwaajɛ ā ɛ̄gbā, ó kē í lɔhi. Amáŋ ɔ́dāŋ ka aá gáā gbā ojibó kú um ā ɛ̄gbā ŋ́. Ayíka é géē je aá kpó tá tū ipú ɔlá bōōbū, cɛ́ɛ́ kú n má ɔ̄cɛ nōo wɛ Ɔwɔicō ɔ́ɔmā nōo géē wā gaá nya aá tá ŋmá abɔ̄ kú um glá ā.”

¹⁶ Anɔ́ɔ Usádrāki, Uméssaki mɛ́mla Abɛ́dinēgo tá ɔcɛ́nɛ̄hi ā ohi kahíníi, “Ágábáidu, alɔ í cɛgbá ō kɔkɔ ga uwɔ ipú ɛlā nyā ŋ́.

¹⁷ Ɔ́dāŋ ka a lɛ ɔ́ ka lɛ ā, Ɔwɔicō kú alɔ nɛ̄ alɔ gē gbā ā, géē lɔfú nya alɔ tá ŋmá ipú ɔlá kú útuló kú uwɔ ā glá, ó kē í nyi alɔ tá ŋmá abɔ̄ kú uwɔ.

¹⁸ Ɔ́daŋ koó tá ō nya alɔ tá nááná, ɔcɛ́, le jé kpɔ́cíí ka alɔ í gáā gbā ojibó kú oje ɔdɔ (ugoolu) nɛ̄ a ma kwaajɛ ā ɛ̄gbā ŋ́.”

Ōwē mɛ́mla ohɛ́tá kú ayípōklóbīya ɛtá ā

¹⁹ Anɔ́ɔ Unebúkádinēsa kwú cɔ̄nū nɛ̄hi, anɔ́ɔ īkpēyī kú nū kwú pīya ɔnɔ̄wá ohígbū ícɔ̄nū lɛyíkwu Ussádrāki, Uméssaki mɛ́mla Abɛ́dinēgo. Anɔ́ɔ ó lɛ ɔ́da je kéē lɛ ɔlá kú útuló ā túgwó igbo ahāapa fíyɛ́ ɛ́gɛ́nɛ̄ ó tɛtɛ gē kplá lɛ ā.

²⁰ Anɔ́ɔ ó le aɔ́báagwu nɛ̄hi kú aícɔ́ɔja kú nū ā fu, le ɔ́da je lɛ uwá kéē lɛ ayípōklóbīya ɛtá ā gbō kéē kwú uwā ú kpó tɛ́ɛcɔ̄ tū ipú ɔlá kú útuló ā.

²¹ Anɔ́ɔ é lɛ uwá gbo mla odúúdú īlī kú uwá, kwu ɔdōkwɛyí kú uwā, anɔ́ɔ é le uwá kpó tɛ́ɛcɔ̄ tū ipú ɔlá kú útuló á.

²² Ɛ́gɛ́nɛ̄ ɔ́da kú ɔcɛ́ ā lɔfú lɛ ā, útuló le kwɔ́lá nɛ̄hi, anɔ́ɔ ígblɛ́nyī kú ɔlá ā kwú ācɛ nēe gáā kpó uwā tɛ́ɛcɔ̄ tū ipú ɔlɛ́ kú útuló ā ū kpó yi, le uwá kpó ŋmó.

²³ Anɔ́ɔ ācɛ ɛtá ā, Ussádrāki, Uméssaki, mɛ́mla Abɛ́dinēgo wɛ ō gbō píyɔ́kɔ́ɔ́ kpɔ́, le míya tá ipú īkpɔ̄tū kú ɔlá ā.

²⁴ Anɔ́ɔ igbeékpónú Unebúkádinēsa le tákplá caŋ́jɛ māháyi icō le hídáagó nɛ̄hi. Ó le ɔ̄kā da aígabɔ̄ kú ɔlɛ́ nū kahíníī, “Ó wɛ ācɛ ɛtá nɛ̄ alɔ kpó tá tū ipú ɔlá ā ŋ́ nɛɛ?” Anɔ́ɔ é tá ɔ̄ ohi kahíníī, “Ācɛ ɛtá gbóó, ɔcɛ́.”

²⁵ Anɔ́ɔ ɔcɛ́ tá uwá ohi kahíníī, “Amáŋ n má ācɛ ɛ̄nɛ̄ le wī bá ī yāwu ɔtāhɛ̄ kú ɔlá ā, ɔlá ā í kē yá uwá ɔdā dúúmā ŋ́. Oōmá kú ɔ̄cɛ ɔ́mɛɛnɛ ā lɛbɛ̄ɛka ɔyí kú ɔwɔ ā.”

²⁶ Anɔ́ɔ Unebúkádinēsa túblá okómpinu kú útuló ā, anɔ́ɔ ó kahíníī, “Ussádrāki, Uméssaki, mɛ́mla Abɛ́dinēgo, ācocɛ̄hɔ̄ kú Ɔwɔicō nōo lɔfú fíyɛ́ dúú ā, aá bɛ̄cɛ ká aá wā amānyā.” Anɔ́ɔ ayípōklóbīya ɛtá ā kwú pɛ́ wɛ̄cɛ ŋmá ipú ɔlá ā á.

²⁷ Odúúdú aígbómína, mɛ́mla odúúdú aígabɔ̄ dóódu kú ācɛ ajɛ kú Ubábīlɔn ā gaá le jīla tū uwā, anɔ́ɔ é má ká ɔlá ā í lɔfú yá uwá ɔdā dúúmā glá ŋ́. Ɔlá í kōō yi ɛga dúúmā mɛ́mla ɔdā dúúmā kú uwá ŋ́. Kwu īlī kú uwā, iyē, mɛ́mla īnyīlɛyí kú uwā mɛ́mla ɛga ɔhá dúúmā kú ūwā í kōō níípī kú ɔlá ŋ́.

²⁸ Anɔ́ɔ Unebúkádinēsa kahíníī, “N cɛ̄tra Ɔwɔicō kú Ussádrāki, Uméssāki mɛ́mla Abɛ́dinēgo nōo tū alelékwū-ōtɛ̄hɔ̄ kú nū wā í lɛ ācocɛ̄hɔ̄ kú nū nēe lɛ ɔtū ce ɔ́ ā hɛ́tá, klla le ɔ́da kú ɔcɛ́ pīya ɛflɛ́ɛfu ā. É kwú oyēeyī kú uwá ú lɛ ikwū, ikɔkɔ nēé géē gbā ɔwɔ ɔhá ɛ̄gbā gwū Ɔwɔicō kú uwā tá ā.

²⁹ Ohígbū ɔ́ɔmā, n lɛ ɔ́da je ícɛ, ka ɔ̄cɛ dóódu, éwo dóódu mɛ́mla ucē dóódu nōo lɛ ɔdōbɔ̄bí dúúmā ka lɛyíkwu Ɔwɔicō kú Ussádrāki, Uméssaki, mɛ́mla Abɛ́dinēgo, é géē je ɔ́ fā kɛ́tɛ̄kɛtɛ̄ oyēeyī, é klla í je ɔlɛ́ nū tá alácɛ̄. Ohígbū ka ɛdɔ ɔwɔ ɔhá dúúmā í yɔ̄, nōo lɔfú hɛ́ ɔ̄cɛ tá ɔwɛ ɛ́gɛ́nyā, bɛ̄ɛka Ɔwɔicō kú ācɛ ɛtá ā ɛ́ɛ́ ŋ́.”

³⁰ Anɔ́ɔ ɔcɛ́ a klla lɛ Ussádrāki, Uméssāki, mɛ́mla Abɛ́dinēgo je gicō āhɔ̄ onwuné fíyɛ́ ipú ajɛ kú Ubábīlɔn á.