UDÁNĪYƐ̄LU 2 - Ubáyíbu kú Idɔma

Ɔ̄na nɛ̄ Unebúkádinēsa nā ā

¹ Ipú iháyí ɔ́mpa nɛ̄ Unebúkádinēsa lé ɔcɛ́ ā, ó le ɔ̄na éyi nā, nōo je unwalu lɛ ɔ́ nɛ̄hi. Ó kōō cɛ̄ lɛ ɔ́ gbiyɔ̄lā glá ŋ́.

² Anɔ́ɔ ɔcɛ́ ā le ɔ́da je kéē lɛ ācoyímabɔ̄, ācogwɛ́ɛbā, mɛ́mla aɔ́hɛ mɛ́mla ācɛ nēe ī bī aínyílɔ́wɔ lɛ jé ɔdā nōo ī yá ā, kpó hīgwú wā, kéē wā í lɛyí ɔ̄na ā ka lɛ anúɔ. Anɔ́ɔ é le pɛ́ wā ī māháyi iyɔ̄bū ɔcɛ́nɛ̄hi ā.

³ Anɔ́ɔ ɔcɛ́nɛ̄hi ā da uwá kahíníī, “N nɔ̄na nōo gē je unwalu gā um nɛ̄hi, ń kē gbɛlá kwu ɔ́ gɛ ŋ́.”

⁴ Anɔ́ɔ ācɛ nēe gē jɛ́yí ɔ̄na ā, le okónu hɛ́ tū ɔcɛ́nɛ̄hi ā okónū Aramáyīk, “Ágábáidu, ɔwɔ kóō lɛ uwɔ ɛyí tápɛ́tɛ́cɔ̄. Lɛ ɔ̄na kú uwɔ ā ka lɛ alɔ mɛ́ɛ́nɛ, alɔ í ka ɛyí nū gā uwɔ.”

⁵ Ɔcɛ́ ā tá uwá ohi kahíníī, “N le ɔtū kú um ŋmótá ɛɛ́, ka ɔ́dāŋ nɛ̄ aá ka ɔ̄na ā klla ka ɛyí nū ā gā um glá ŋ́, é géē je aá kpó fā ŋmá ayíkābɔ̄ ga ɔtīkpó kú aá. N klla ī je ɔlɛ́ aá kpó yíífi, í je uwá tá alácɛ̄.

⁶ Amáŋ ɔ́dāŋ ka, aá kē lɛ ɔ̄na ā mɛ́mla ɛyí nū ka gā um glá, n géē yá aá ɛhi nɛ̄hi klla í lɛ ojīlīmā nɛ̄hi ce aá. Ó lɛ ā, aá lɛ ɔ̄na ā mɛ́mla ɛyí nū ka ga um mɛ́ɛ́nɛ.”

⁷ É klla tá ɔcɛ́nɛ̄hi ā ohi igbɔhá kahíníī, “Ágábáidu kóō lɛ ɔ̄na ā da alɔ mɛ́ɛ́nɛ, alɔ ī ka ɛyí nū gā uwɔ.”

⁸ Anɔ́ɔ ɔcɛ́nɛ̄hi ā da uwá kahíníī, “Ɛ́gɛ́nɛ̄ n gbɛlá lɛ ā, aá yɔ̄ ī lɛ eko tū ɔ̄ lɛ iyī aá gɔbū icííci nɛ̄, ohígbū ka aá lɛ má ka ɛlā nōo ŋmá ɛgiyī um í gáā lɛ ō opīyabɔ̄ ŋ́.

⁹ Ɔ́dāŋ ka aá ka ɔ̄na ā gā um ŋ́, n géē yá odúúdú aá italā. Aá le ojuju yá klla cɛ̄ tɔ̄há ká aá lɛ ɛ̄kɛ̄mgbɛ̄ kā gā um ɛɛ́. Ohígbū ka aá gbɛlá ka eko kpiíí, odée géē je pīyabɔ̄. Aá lɛ ɔ̄na ā ka gā um, cɛ́ɛ́ n géē jé ka aá lɔfú ka ɛyí nū gā um glá.”

¹⁰ Anɔ́ɔ ācɛ nōo gē jɛ́yí ɔ̄na kú Ubábīlɔn nyā tá ɔcɛ́nɛ̄hi ā ohi kahíníī, “Ɔ̄cɛ dúúmā í yɔ̄ ipú ɛcɛ, nōo lɔfú yá ɔdā nɛ̄ Ágábáidu gē tíne nyā glá ŋ́. Ɔcɛ́ dúúmā, ɛ́gɛ́ dúú nōó kōō nwuné lɛ, í dɔ̄ɔ̄ka ɔdā ɛ́gɛ́nyā ŋmá ɛgiyī ācogwɛ́bā, mɛ́mla ācoyímabɔ̄, mɛ́mla aɔ́hɛ mɛ́mla ācojɔ́dā kú ɔlɛ́ nū jééjéē ɛ́ɛ́ ŋ́.

¹¹ Ɔdā nɛ̄ Ágábáidu gē tíne nyā lɔnɔ, ɔlɛɛcɛ dúúmā í yá ɔ̄ lɛ ɔcɛ́ glá ŋ́, ayíka aɔ́wɔ ōfōōfū uwā nɛ̄ n. É kē lā ipú ɛcɛ nyā ŋ́.”

¹² Ohígbū ɛlā nēé ka nyā, ɔcɛ́ ā kwú cɔ̄nū nɛ̄ɛ̄nɛ̄hi, le ɔ́da je kéē lɛ odúúdú ācojéeyī kú Ubábīlɔn ā kpó ŋmó.

¹³ Anɔ́ɔ é lɛ ɔ́da ā je kéē lɛ odúúdú ācojéeyī kú Ubábīlɔn ā kpó ŋmó á, kwu Udánīyɛlu mɛ́mla aɔ́mpa nū.

Ɔwɔicō lɛ ɔ̄na ā mɛ́mla ɛyí nū mafú lɛ Udánīyɛlu

¹⁴ Anɔ́ɔ Udánīyɛlu bī íjéeyī le ɔ̄kā da Áriyɔ̄ku, otrɛ̄yí kú ācogbāajɛ kú ɔlɛ́ ɔcɛ́ nēé fu kóō kpó ācojéeyí kú Ubábīlɔn ŋmó ā kahíníī,

¹⁵ “Ɔdíyá nɛ̄ ɔcɛ́nɛ̄hi gē je ɔ́da olɔnɔ nɛ̄hi nyā yɔ̄ ā dúú āa?” Anɔ́ɔ Áriyɔ̄ku le ɔkwɛ̄lā ā ka lɛ Udánīyɛlu á.

¹⁶ Anɔ́ɔ Udánīyɛlu le tá ipú inu ɛgiyī ɔcɛ́nɛ̄hi gaá le ɔkɔ gbā lɛ ɔ̄ kú ɔcɛ́nɛ̄hi kóō lɛ eko je lɛ anúɔ, cɛ́ɛ́ ka anúɔ géē lɛ ɔ̄na ā mɛ́mla ɛyí nū ā kpó ka lɛ ɔcɛ́.

¹⁷ Anɔ́ɔ Udánīyɛlu le tá ɔlɛ́, gaá le ɛlā nyā ka lɛ Umíssɛ̄lu, Uhananíya mɛ́mla Asárīya, aɔ́mpa nū á.

¹⁸ Ó da uwá kéē gbɔ̄ɔkɔ lɛ Ɔwɔicō kú ɔkpáncō ā kóō ményinyi uwā, ohígbū ɔdōtayínū nyā. Cɛ́ɛ́ kóō lɛ ɔ́ mafú lɛ aá, cɛ́ɛ́ kéē je anú mɛ́mla uwā kpó ŋmó tɔ̄há mɛ́mla ācojéeyī kú Ubábīlɔn ā ŋ́.

¹⁹ Anɔ́ɔ Ɔwɔicō le ɔdōtayínū ā mafú lɛ Udánīyɛlu ipú ɔna otú á. Anɔ́ɔ Udánīyɛlu le cɛ̄tra Ɔwɔicō kú ɔkpáncō klla le ahínyá tá ɔ̄ kahíníī,

²⁰ “N cɛ̄tra iyē kú awɔ nōo wɛ Ɔwɔicō ā piyóó. A jééyī, a klla lɔfú nɛ̄hi.

²¹ Awɔ gē pīya eko mɛ́mla iháyí abɔ̄ á. Awɔ gē fu aɔ́cɛ́ ɔkwu ŋmá ajɛ, klla ī je aɔ́cɛ́ ɔhá ce á. A gē je íjééyī mɛ́mla ɛyí kú ɔdā ō jé lɛ ācɛ.

²² Awɔ gē mafú ɔdā ō lipú mɛ́mla ɔdōtayínū nɛ̄hi ā lɛ ɔ̄cɛ á. A jé ɔdā nōo tá ipú obū ā. Ɔlá ō fíyajɛ kē lɛ ɔ́ uwɔ yɛ jīla tá eko dóódu.

²³ N tá uwɔ ahínyá nɛ̄ɛ̄nɛ̄hi, awɔ nōo wɛ Ɔwɔicō nɛ̄ ádáádā um gbā ɛ̄gbā ā. Ohígbū ka a kwú íjééyī mɛ́mla ɔfú ú gā um. A kē le ɔkɔ nɛ̄ alɔ gbā gā uwɔ ā pó. Anɔ́ɔ ɔdā nɛ̄ alɔ géē da ɔcɛ́ ā, a le ka lɛ alɔ ɛɛ́.”

Udánīyɛlu ka ɔ̄na ā, mɛ́mla ɛyí nū lɛ ɔcɛ́nɛ̄hi

²⁴ Anɔ́ɔ Udánīyɛlu le tá ɛgiyí Áriyɔ̄ku nɛ̄ ɔcɛ́ je ɔ́da lɛ ɔ́ kóō lɛ ācojéeyī kú Ubábīlɔn kpó ŋmó ā, gaá da ɔ́ kahíníī, “Á híī je ācojééyī kú Ubábīlɔn ā kpó ŋmó gɛ ŋ́. Lɛ um bī ga ɛgiyí ɔcɛ́, n géē ka ɔ̄na ā mɛ́mla ɛyí nū lɛ ɔ́.”

²⁵ Anɔ́ɔ Áriyɔ̄ku páápá le Udánīyɛlu bī ga iyɔ̄bū ɔcɛ́nɛ̄hi á. Anɔ́ɔ ó da ɔcɛ́nɛ̄hi ā kahíníī, “N lɛ ɔ̄cɛ éyi má ipú aɔ́fiyɛ kú Ujúda nēe bá nyā nōo lɔfú ka ɔ̄na mɛ́mla ɛyí nū lɛ Ágábáidu glá.”

²⁶ Ɔcɛ́nɛ̄hi ā da Udánīyɛlu nōó hī ka, Ubɛtɛssása ā ɔ̄kā kahíníī, “A lɔfú da um ɔ̄na nɛ̄ n nā ā, klla ka ɛyí nū gā um glá āa?”

²⁷ Anɔ́ɔ Udánīyɛlu tá ɔcɛ́ ohi kahíníī, “Ācojéeyī, aójɔ́dā, aógwɛ́bā, mɛ́mla aɔ́hɛ dúúmā í yɔ̄ ipú ɛcɛ nyā nōo lɔfú ka ɔ̄na nyā mɛ́mla ɛyí nū lɛ ɔcɛ́ glá ŋ́.

²⁸ Amáŋ, Ɔwɔicō éyi yɔ̄ ɔkpáncō nōo gē ma ɔdōtayínū fú lɛ ɔ̄cɛ. Ó le ɔdā nōo gaá yá igbīhāajɛ ā mafú lɛ Ágábáidu, cɛ́ɛ́ kóō le ɔdā nōo gáā yá ā jé.

²⁹ Eko nɛ̄ Ágábáidu gwutá yɔ̄ ī gbiyɔ̄lā ā, a nɔ̄ɔna kú ɔdā nōo géē yá ɛ̄cɔ̄bū ā, anɔ́ɔ Ɔwɔicō nōo gē ma ɔdōtayínū fú ā, le ɔdā nōo gáā yá ɛ̄cɔ̄bū ā mafú gā uwɔ á.

³⁰ Amáŋ, ami ā, ó wɛ ka ami jíjééyī fíyɛ́ odúúdú alɛɛcɛ, ɛ́ɛ́ nōó ma ɔdōtayínū nyā fú gā um ā ŋ́, amáŋ o yá ɛ́ɛ́ ka awɔ ā kóō lɛyí nū jé, cɛ́ɛ́ ká ā géē jé ɛlá nɛ̄ a gbo ipú odo kú uwɔ ā.

³¹ Ágábáidu, ipú ɔ̄na nɛ̄ a nā ā, a má ojibó nɛ̄hi éyi. Ojibó nyā nwuné, ó gē fíyajɛ klla ī ceyī. Ó māhayi iyɔ̄bū uwɔ. Ó tūufi ō má nɛ̄hi.

³² Oje ɔdɔ (ugoolu) nēé bī le yá ɛyí kú ojibó nyā á. Oje nɛ̄hɛ́ nēé bī le yá abɔ̄ mɛ́mla ɔtū kú nū á. Oje udɔ nēé bī le yá ohí mɛ́mla átákwū kú nū á.

³³ Oje ɔlamu nēé bī le yá aíkpó kú nū á. É bī oje mɛ́mla ɔmɛ wīya tɔ̄há le yá aíkpó ō daajɛ kú nū ā.

³⁴ Abɔ̄ a yɔ̄ ī má ɔ̄ ā, ɛcɔ̄ nɛ̄hi éyi nɛ̄ ɔ̄cɛ dúúmā í lɛ abɔ̄ kwu ɔ́ ŋ́ mā, le cē ŋmá icō ɛfu abɔ̄yīnū gaá gɔ́ ikpó ō daajɛ nēé yá mla oje mɛ́mla ɔmɛ nēé wīya tɔ̄há ā, le uwá ca nyɛŋɛnyɛŋɛ.

³⁵ Anɔ́ɔ oje ɔdɔ, oje udɔ, oje nɛ̄hɛ́, oje ɔlamu mɛ́mla ɔmɛ kú nū ā le kpó ca nyɛŋɛnyɛŋɛ, kwú pīya úmúúmúlá bɛ̄ɛka úmúlá kú ɛgowíīkpɔ̄dā eko ɔnɔ̄ ā. Owu le odúúdú nū kpó bónū, nɛ̄ ɔ̄cɛ í lɔfú má iwili kú nū dúúmā glá ŋ́. Amáŋ ɛcɔ̄ nōo je ojibó nyā wúlatāajɛ nyā kwú píya ɛfu nɛ̄hi nōo mīyɛ odúúdú ɛcɛ tābɔ̄.

³⁶ “Ɔdā nɛ̄ n húmáyī ka ā wɛ ɔ̄na nɛ̄ a nā ā. Amáŋ alɔ géē ka ɛyí nū lɛ ɔcɛ́ abālɔbányā.

³⁷ Ágábáidu, a wɛ ɔcɛ́ kú aɔ́cɛ́. Awɔ nɛ̄ Ɔwɔicō kú ɔkpáncō je yá ɔcɛ́nɛ̄hi klla je ɔfú, ɔfú iyē mɛ́mla ofú gā uwɔ á.

³⁸ Ó le uwɔ yá otrɛ̄yí ká ā gbō odúúdú aɔ́dā nēe bá ipú ɛcɛ ā, ká ā klla wɛ otrɛ̄yí kú odúúdú aɛ́bɛ́ mɛ́mla aígbáanɔ. Awɔ wɛ īkpɛ̄yí kú oje ɔdɔ (ugoolu) kú ojibó ɔ́ɔmā á.

³⁹ Ɔcɛ́ ɔhá géē lé igbīhi ūwɔ, nōó gáā lɔfú bɛ̄ɛka awɔ ā glá ŋ́. Cɛ́ɛ́ igbīhi ɔ́ɔmā, ajɔ̄ɔ̄cɛ́ ɔ́mɛtá ɔhá nōo wɛ ajɔ̄ɔ̄cɛ́ nōo géē lɔfú bɛ̄ɛka oje udɔ klla géē gbō odúúdú ɛcɛ.

⁴⁰ Ajɔ̄ɔ̄cɛ́ ɔmɛɛnɛ klla ī wā, nōo géē lɔfú bɛ̄ɛka oje ā, ohígbū ka oje gē je ɔdā dóódu ca klla ī je ɔ́ pīya ewo bɛ̄ɛka oje o gbɔ̄ɔda nōo gē ca odée klla ī je ɔdā dóódu gbā umu ā.

⁴¹ Ɛ́gɛ́nɛ̄ a má ikpó kú ojibó ā, nɛ̄ ɛga ōhī kú ikpó ō daajɛ ā wɛ ɔmɛ, nɛ̄ āyā ɔhá ā wɛ oje ā. Ɛ̄nyā cābɔ̄ ka ajɔ̄ɔ̄cɛ́ ɔ́ɔmā géē je kɔ̄ ɛpa. Éyi kú nū géē lɔfú bɛ̄ɛka oje ā ohígbū ka ɛ́gɛ́nɛ̄ a má ipú ɔnā lɛ ā oje mɛ́mla ɔmɛ wīya tɔ̄há á.

⁴² Ɛ́gɛ́nɛ̄ nɛ̄ a má ikpó ō daajɛ, nɛ̄ ɛga ōhī kú nū wɛ oje nɛ̄ ɛgɔhá wɛ ɔmɛ ā, ɛ́gɔ́ɔmā nɛ̄ ajɔ̄ɔ̄cɛ́ ā nɛ̄ āyā ōhī gē lɔfú, āyā ɔhá ī kwáahi á.

⁴³ Oje mɛ́mla ɔmɛ nɛ̄ ā má wu īyī ūwā ipú ā, cābɔ̄ ka ajɔ̄ɔ̄cɛ́ ɔ́ɔmā géē ŋmá áájɔ̄ɔ̄cɛ́ ō pīyatɔ̄há oŋmá lɛ ō lɛ ɔnyā ŋmá ɔlɛ́ iyī ūwā. Amáŋ ó gáā tɔ́ɔtɛ́ lɛ uwá ŋ́, ɛ́gɛ́nɛ̄ oje mɛ́mla ɔmɛ í pīya tɔ̄há kéē je pīya ɔdā ékpónú glá ŋ́ mā.

⁴⁴ Eko kú aɔ́cɛ́ ɔ́ɔmā, Ɔwɔicō kú ɔkpáncō géē je ajɔ̄ɔ̄cɛ́ ɔhá kwu ajɛ, nɛ̄ ɔ̄cɛ dúúmā í gáā je ɔ́ yíífi glá ŋ́, ɛ́ɛ́ néé géē yɔ̄ ɔ̄ lé glá ŋ́, ɛ́ɛ́ nɛ̄ ɔ̄cɛ dúúmā ɔhá géē mīyɛ ɔ́ tābɔ̄ glá ŋ́. Ó géē je odúúdú aájɔ̄ɔ̄cɛ́ ohile ɔhá ā kpó yíífi tāajɛ dúúdú, cɛ́ɛ́ ó gaá yɔ̄ piyóó.

⁴⁵ Ɛ́gɛ́nɛ̄ a má ka ɛcɔ̄ le hɛ́ ŋmá ɛyí ɛfu abɔ̄yīnū, nōó wɛ ɔ̄cɛ fu ɔ́ ŋ́ mā, nōó gaá le oje ɔlamu, oje udɔ, ɔmɛ, oje nɛ̄hɛ́ mɛ́mla oje ɔdɔ (ugóolu) ā kpó catāajɛ nyɛŋɛnyɛŋɛ ā, Ɔwɔicō nōo lɔfú fíyɛ́ dúú ā yɔ̄ ī da Ágábáidu ɔdā nōo géē yá ɛ̄cɔ̄bū. Ɔ̄na ā wɛ ɔkwɛ̄yi, ó kē í cɛ̄ píii.”

Ɔcɛ́ lɛ ulé cílá Udánīyɛlu lɛ ojīlīmā je lɛ ɔ́

⁴⁶ Anɔ́ɔ Unebúkádinēsa, ɔcɛ́nɛ̄hi ā, le okwúukwu kpó kwaajɛ le eyī pīya kla ajɛ, anɔ́ɔ ó le ɔ́da je kéē lɛ ɛya gwó lɛ Udánīyɛlu, kéē klla lɛ ɛ̄gbā gbā ɔ̄.

⁴⁷ Anɔ́ɔ ɔcɛ́ da Udánīyɛlu kahíníī, “Ɔkwɛ̄yi nɛ̄, Ɔwɔicō kú uwɔ wɛ Ɔwɔicō nōo fíyɛ́ odúúdú aɔ́wɔ dóódu á. Anú klla wɛ Óndū kú aɔ́cɛ́ á. Ó klla ī ma ɔdōtayínū fú lɛ ɔ̄cɛ, ohígbū koó yá ká ā lɔfú lɛ ɔ̄na kú um nyā mɛ́mla ɛyí nū ka gā um.”

⁴⁸ Anɔ́ɔ ɔcɛ́nɛ̄hi ā le āhɔ̄ ojīlīmā nɛ̄hi je lɛ Udánīyɛlu klla le ɔdā kú ɛhi alɛwa kpó lɛ ɔ́ á. Ó kwú Udánīyɛlu í pīya otrɛ̄yí kú odúúdú Ubábīlɔn. Anú klla wɛ otrɛ̄yí kú odúúdú ācojɔ́dā mɛ́mla ācójéeyī kú Ubábīlɔn á.

⁴⁹ Udánīyɛlu lɛ ɛ̄ba ba ŋmá abɔ̄ ɔcɛ́, anɔ́ɔ ɔcɛ́ klla le Usádrāki, Uméssaki, mɛ́mla Abɛ́dinēgo fu kéē leyīkwu ɛlā kú ajɛ kú Ubálīlɔn dúúdú á. Amáŋ Udánīyɛlu ā lā ipɔ́nū ɔlɛ́ ɔcɛ́nɛ̄hi ā.