AYISÁYA 1 - Ubáyíbu kú Idɔma

Ɔwɔicō pi ācɛ ɔlɛ́ nū ahɔ̄

¹ Ɔ̄cɛ éyi yɔ̄ nɛ̄ iyē kú nū lé ka Ayisáya. Ó wɛ ɔyí kú Amɔ́si. Aɔ́dā nēé tá tū ɔkpá nyā wɛ olɛhɔ̄ nɛ̄ Ɔwɔicō mafú lɛ ɔ́ lɛyíkwú Ujúda mɛ́mla Ujerúsālɛm ā. Ó mɛ́ɛbɛ ā, ɛpléeko ɛyɛ́ɛ́yɛ́yí nɛ̄ Usíya, Ujɔ́tam, Áhāsi mɛ́mla Uhɛsɛkíya wɛ aɔ́cɛ́ kú Ujúda ɔgbɔɔgba ā.

² Ayisáya ka Óndú ā ɔ́ɔ kahíníī, “Ɛcɛ mɛ́mla ɔkpáncō, aá jahɔ̄ lɛ ɛlā nɛ̄ n gē ka ā. Ayí nɛ̄ n bī jɛ̄ abɔ̄yī um ā gbɔɔ́ ō yá īkpɛ̄yí olɔfú tá um, klla ī bɛ̄yíkwu um ɛɛ́.

³ Ó kōō ɛna bɛ́ɛ, ó kē jé óndū nū, ijakī kē jé ɛga nɛ̄ óndū nū gē je ɔdōlé lɛ ɔ́ lé ā. Amáŋ Ísrɛ̄lu, ācɛ ɔlɛ́ um, í jé um ŋ́, ɛ́ɛ́ nēé kōō jɛ́yí ɔdā dóódu fúlufúlu ŋ́.

⁴ Kwúcō! Ācɛ Ísrɛ̄lu, aá wɛ éwo nēe bɔ́bíipú nɛ̄hi. Ɔ́bíipú cɛ̄ lɛ aá le gblīgwū icíici. Aá tá ami Ɔwɔicō, nōo wɛ Óndú kú Ísrɛ̄lu. Aá kwú igbīhi ú cē kwu ami nɛ̄ ɔdā dúúmā í tōō le gbla um ŋ́ mā.

⁵ Kpáyi, ɔdíyá nɛ̄ ɛ̄jɛ̄ kú ijē nɛ̄ n yɔ̄ gē ŋmó aá ā í gē jɛ̄ aá ŋ́ mā āa? Nɛ̄ aá klla bá yɔ̄ gē yá īkpɛ́yí olɔfú kpɔ́ āa? Aá má iyī aá ŋ́ nɛɛ, īkpɛ̄yí kú aá wɛ ágbáágbe. Odo kú aá í gbɛlá olɔhi ɛ́ɛ́ gɛ ŋ́.

⁶ Aá lɔfú iyē gɛ ŋ́, o ŋmá ɔtīkpó kú aá jāā gaá kwu īkpɛ̄yí kú aá wɛ ágbáágbe, ínálēgbē-ínálēgbé mɛ́mla ámáámata. É kōō lɛ anōlé tū ɔ̄ cɛ́ɛ́ kóō liiyē, cɛ́ɛ́ kéē lɛ ifu pí bónū ŋmá anú ŋ́. É kōō na ágbe ā ŋ́, ɛ́ɛ́ nɛ̄ n kōō ī kɛlā ō lɛ ɛcí tū ɔ̄ dɛ̄ɛ̄ ŋ́.

⁷ Ajɛ ɔlɛ́ aá má tá alácɛ̄ ɛɛ́. É kwú igelī nɛ̄hi kú aá ā ú kpó tɔ̄lá ɛɛ́. Aá leyīkwu cɔɔɔ, ɛ́ɛ́ nɛ̄ ācɛ éwɔhá mīyɛ ajɛ kú ɔlɛ́ aá klla le ɔdā dúúmā nēé má ā kpó yíífi ŋmá ajɛ á.

⁸ É mā ācɛ kú Ujerúsalem bá ōfōōfū uwā bɛ̄ɛka ɔda kú ɔ̄cɛ o gbɛ̄hɔ̄ kú ufáyin ámāŋ ka ákú ɛhɔ̄ ku apɛ nōo kwu ōfōōfūnū ā. É klla lɛbɛ̄ɛka igelī nɛ̄ aólɛlā le íbɔm cē tū ɔ̄ ā.

⁹ Ɔ́dāŋ ka Óndú ā nōo lɔfú fíyɛ́ dúú ā, í mā ācɛ ōhī tá kéē yēeyī ŋ́ nɛɛ, é géē yɛ í lɛ alɔ kpó yíífi ɛ́gɛ́nɛ̄ ó kpó ācɛ kú aígelī kú Usɔ́dɔm mɛ́mla Ugomóra yíífi ā.

¹⁰ Aá nēe wɛ ācɛ kú Ujerúsālɛm ā, aótrɛ̄yí kú aá í lɔhi fíyɛ́ ācɛ kú Usɔ́dɔm mɛ́mla ācɛ kú Ugomóra ā ŋ́. Ohígbū ɔ́ɔmā, aá jāhɔ̄ cɛ́ɛ́ kú aá pó ɛlā nɛ̄ Ɔwɔicō, nōo wɛ Óndú alɔ gē nwū aá ā.”

¹¹ Óndú ā da uwá kpɔ́ kahíníī, “Áluka kú aɔ́dā nɛ̄ aá le gwɛ́ɛya gā um í wɛ ɔdā dúúmā tū um ŋ́. Ehé! ɛ̄jɛ̄ kú aómlede o yɔlá dúúdú ā mɛ́mla ijē kú aɛ́bɛ́ ojɔ̄kwū kú aá le jɛ̄ um ɛɛ́. Ɛ̄jɛ̄ kú oyī kú aálá mɛ́mla opī nɛ̄ aá gē le gwɛ́ɛya gā um ā klla le jɛ̄ um dúú ɛɛ́.

¹² Ɔ̄nyɛ da aá kóō bī aɔ́dā nēe bá ā wā gé um eko nɛ̄ aá ī gbā um ɛ̄gbā ā? Ɔ̄nyɛ da aá kú aá bá ī tāglīyɛ gicō gaajɛ Agblīihɔ-nɛ̄hi kú um āa?

¹³ Aɔ́dā nɛ̄ aá gē bī wā ī le gbā um ɛ̄gbā ā le cúmeyī ɛɛ́. Ɔtulalī nɛ̄ aá gē fú tū ɔlá ā gē hɔ́yí tū um ɛnwū. Ucɛ kú ɔyā ɛ̄yīpɛ̄ mɛ́mla ákú usábāti, mɛ́mla eko nɛ̄ aá gē jīla tɔ̄há ká aá gbā um ɛ̄gbā ɔ́ɔmā le cúmeyī dúú ɛɛ́. Ń háyi má ɔ́bíipú kú aá ɔ́ɔmā glá gɛ ŋ́.

¹⁴ Ucɛ kú ɔyā ɛ̄yīpɛ̄ mɛ́mla ucɛ ɔhá dóódu kú aá, í wú um ɔtū nɛ̄hi. É lɛbɛ̄ɛka unwalu nɛ̄ aá ī je gā um ā. Ɛ̄jɛ̄ kú nū kōō le jē um dúú ɛɛ́.”

¹⁵ Óndú ā klla yɔ̄ ī kɛlā gɔbú kpɔ́ kahíníī, “Eko dúúmā nɛ̄ aá nā abɔ̄ daa kwiicō lɛyíkwu um gē gbɔ̄ɔkɔ gā um oŋmá abālɔbányā gɛɛ, n géē je eyī kú um tónū ŋmá ɛgiyí aá, Ɛ́gɛ́dúú nɛ̄ aá kōō gbɔ̄kɔ nɛ̄hi lɛ, náaná, ń gáā tá aá ohi ŋ́. Ohígbū ka aá wɛ ācōŋmɔ́ɔ̄cɛ.

¹⁶ Aá lɛ ucē obɔ̄bí kú aá kpó bōnū. Aá habɔ̄ ɔdōbɔ̄bí nɛ̄ n má aá yɔ̄ ī yá ā tá.

¹⁷ Aá kllɔcɛ́ kú aá yá ucē olɔhi, Aá má ka ācɛ gē hɛ́pɔ̄ okpaakpa. Aá tá ācɛ nēé bá ī yáŋmó ā abɔ̄. Aá cɛ̄pɔ̄ anyōkwū mɛ́mla ayókwū.

¹⁸ Óndú ā kahíníī, “Aá wā kú alɔ ga ojuju. Náaná nɛ̄ óbíipú nɛ̄ aá bī ā le aá iyē bīyā dúúdú ā. N géē je yá aá ɛhi dúúdu, cɛ́ɛ́ aá kwú yá yēŋēē bɛ̄ɛka owú otutú ā.

¹⁹ Ɔ́dāŋ ka aá cɛ̄, nɛ̄ aá lɛyítáajɛ gā um nɛɛ, n géē cɛ̄ lɛ aá lé aɔ́dā olɔhi nēe í ŋmá ajɛ ā.

²⁰ Amáŋ, ɔ́dāŋ ka aá lɛ um gwēyī lɛ ɛyí búkwu um kpɔ́, aólɛlā kú aá géē wā í kpó aá ŋmó. Ami, Óndú ā le ka ɛɛ́.”

Ɔ́bíipú kú Ujerúsālɛm

²¹ Ɛhɛ́ɛ, ācɛ Ujerúsālɛm, aá bá yɔ̄ áā? Igelī nɛ̄hi nōo tɛtɛ le yēŋēē gē yá ɔdā nōo le kpaakpa ā klla gbɔɔ́ ō yá ucē bɛ̄ɛka akwuna yɔ̄ á ā? Ācohɛ́pɔ̄ kú aá tɛtɛ gē hɛ́pɔ̄ okpaakpa, ācɛ ɔlɛ́ aá tɛtɛ lā oyēeyī nōo le yēŋēē. Amáŋ abālɔbányā ācoŋmáācɛ kwú lɛwa ipú igelī nɛ̄hi nyā ɛɛ́.

²² Ehɛ́ɛ! ācɛ kú Ujerúsālɛm, ucē kú aá tɛtɛ lɔhi nɛ̄hi bɛ̄ɛka oje nɛ̄hɛ́ ɛ́nɛ́nɛ̄ ā. Ucē kú aá klla tɛtɛ lɔhi nɛ̄hi bɛ̄ɛka ejé olɔhi nɛ̄hi ā, amáŋ abālɔbányā, ucē kú aá kwú bɔ̄bí bɛ̄ɛka ejé nēé le énkpɔ̄ cē tū ɔ̄ nɛ̄hi kwú ɔ̄ ú bīya ā.

²³ Aótrɛ̄yí kú aá kwú pīya ācɛ nēe gē bɛ́yíkwu Ɔwɔicō. É klla kwú pīya aóklobīya kú ācohéjulúgwu ɛɛ́. É bá yɔ̄ ī leyītáajɛ ɛhi mɛ́mla ómíci nēé géē mīyɛ ŋmá ɛgiyí ācɛ. É gē kɔkɔ lɛ ayókwū únɛ́pɔ̄ ŋ́, ɛ́ɛ́ nēé gē hɛ́pɔ̄ okpaakpa lɛ anyōkwū ŋ́.

²⁴ Ohígbū ɔ́ɔmā, Óndú ā, Ɔwɔicō nōo lɔfú fíyɛ́ dúú, nɛ̄ ācɛ kú Ísrɛ̄lu gē gbā ā kahíníī, “Abɔ̄ aá kwú pīya aólɛlā kú um ɛɛ́ mā, n géē bī ícɔ̄nū nɛ̄hi kú um lɛ gwū aá ɔ́ci piíí.

²⁵ N géē yá aá italā nɛ̄ɛ̄nɛ̄hi. N géē yá aá italā jāā gbéeko nɛ̄ aá kwú na yōŋōō bɛ̄ɛka ɛ́gɛ́nɛ̄ é gē le oje tá ɔlá gē na īnyī kú nū ŋmá ɔ̄ iyē ā.

²⁶ Cɛ́ɛ́ n kwú ɛdɔ kú ācohɛ́pɔ̄ mɛ́mla aígabɔ̄ nɛ̄ aá tɛtɛ lɛ ā ú kpó ce lɛ aá ɛ́gɛ́nɛ̄ ó wɛ eko aflɛ́yí ā. Igbīhāajɛ ā, é géē hī aá ka ācɛ nēe ī yá ucē okpaakpa mɛ́mla ācɛ nēe ī gbā Ɔwɔicō kpaakpa.”

²⁷ Ɔwɔicō nōo yá ɔdā olɔhi ā géē nya ācɛ kú Ujerúsālɛm mɛ́mla ɛjɛ̄ɛ̄jī acɛ nēe pīyabɔ̄ ā tá.

²⁸ Amáŋ Óndú ā géē kpó odúúdú ācɛ nēe bīya íne klla gē bɛ́yíkwu ɔ́ ā kpó yíífi. Ó kē í kpó ɛjɛ̄ɛ̄jī ācɛ nēe cīgbīhi kwu ɔ́ ŋmó.

²⁹ Aá géē hīíjémā ka aá nyɔ̄ í pɛ̄cí ɔkwu aɔ́cí nēé hī ka óoku ā.

³⁰ Aá géē je ŋmɔ́lá ŋmá ajɛ bɛ̄ɛka ɔcí kú óoku nōó má énkpɔ̄ ŋ́ nōo yɔ̄ ī kwú eko ɔnɔ̄ ā.

³¹ Ɛ́gɛ́nɛ̄ ɔlá ō hɛ́blu gē je ácí yi tāajɛ ā, ɛ́gɔ́ɔmā nɛ̄ ucē ɔbɔ̄bí kú ācɛ olɔfú nɛ̄hi ā géē kpó uwā yíífi lɛ ā á. Ɔ̄cɛ dúúmā í yɔ̄ nōo gáā ce ífi kú uwā glá ŋ́.