ÚKLƆ́ KÚ ĀCOTƐ̄HƆ̄ 8 - Ubáyíbu kú Idɔma

Usɔ́lu ya icɔ́ɔci kú Ohɔ́nyɛtá ā ŋmó

¹ Ɔyípōklóbīya éyi lé ka Usɔ́lu, ó kē cɛ̄ tɔ̄há mɛ́mla ācɛ nēe ŋmó Usitífin ā. Anɔ́ɔ oŋmá ɛ̄cī ɔ́ɔmā oyáŋmó nɛ̄hi le hútu lɛyíkwu icɔ́ɔci nōo yɔ̄ ipú Ujerúsālɛm ā, anɔ́ɔ ɛjɛ̄ɛ̄jī ācocɛ̄lɔ̄wɔicō ā kwú pahīla bá ɛbɛɛbɛ kwu ajɛ kú Ujudíya mɛ́mla Usamérīya. Ācotɛ̄hɔ̄ ā ōfōōfū uwā bá ɛga ékpó mɛ́ɛ̄ á.

² Ācɛ éyi nēe lɛ ojīlīmā ce Ɔwɔicō lɛ Usitífin nyi, é kē jikwū nū gbōmgbōm nɛ̄hi.

³ Amáŋ Usɔ́lu cēyītīkwū kéē lɛ icɔ́ɔci ā yíífi, ó kē ī ŋmá inu éyi ga inu ɔhá gē kwú ācɛnyīlɔ mɛ́mla ācɛnyā kéē kpó uwā tū agbá.

Ufílīpu tɔ́ɔna kú ɛhɔ̄ olɔhi Usamérīya

⁴ Amáŋ nááná ā, ācocɛ̄lɔ̄wɔicō ā le pahīla bá gē yɛ ɛbɛɛbɛ gē tɔ́ɔna kú ɔkōolɔhi.

⁵ Eko nɛ̄ Ufílīpu le tá ajɛ igelī nɛ̄hi kú Usamérīya ā, ó le ɔna kú Ɔkōolɔhi kú Ohɔ́nyɛtá tá lɛ uwá.

⁶ Ɛwa ā bī ɔtū ékpó le jāhɔ̄ lɛ ɛlā nɛ̄ Ufílīpu ka ā ohígbū ɔdōcābɔ̄ nōo yá ā.

⁷ Aálelékwū oblínyī ā gē dɛ̄ gbōmgbōm cɛ́ɛ́ é le bɛ̄cɛ ŋmá ipú ācɛ alɛwa nēé bá ipú uwā ā. Anɔ́ɔ é lɛ ācɛ alɛwa nɛ̄ iyē kú uwā le ŋmó mɛ́mla aócīkpó ā hɛ́tá.

⁸ Ācɛ kú Usamérīya gwéeyē nɛ̄hi.

Usáyímɔ̄n ɔ̄cɛ oyímabɔ̄

⁹ Amáŋ ɔ̄cɛ éyi yɔ̄, nēé hī ɔ̄ ka Usáyímɔ̄n, nōo tɛtɛ gē yá imabɔ̄ igelī nɛ̄hi ā, ó kē ī yá ɔdā nōo hɛ́ ācɛ kú Usamérīya idáagó, ó ī gwō ka anúɔ abɔ̄ anúɔ ɔ́ɔ wɛ ɔ̄cɛ nɛ̄hi éyi nɛ̄.

¹⁰ Ɛjɛ̄ɛ̄jī ācɛ kú igelī nɛ̄hi ā, o ŋmá ɔ̄cɛ nɛ̄ŋcɛ́ gaá kwu ɔ̄cɛ nɛ̄hi, le ahɔ̄ jē lɛ ɔ́ lɔɔlɔhi. É ka, anú wɛ ɔfú kú Ɔwɔicō nɛ̄ ācɛ hī ka ‘Ɔfú nɛ̄hi á.”

¹¹ É jahɔ̄ lɛ ɔ́ ohígbū ka eko ɛyɛ́ɛyɛ́yí nēe gla ā, ó bī imabɔ̄ kú nū gē le yúklɔ́ idáagó.

¹² Amáŋ eko nēé cɛ̄ɛ̄lā kú Ufílīpu lɛyíkwu ɔkōolɔhi kú ajɔ̄ɔ̄cɛ́ kú Ɔwɔicō mɛ́mla Ujísɔ̄si Ohɔ́nyɛtá ā, é le uwá yúbatísim kwu ācɛnyīlɔ mɛ́mla ācɛnyā.

¹³ Usáyímɔ̄ni abɔ̄yī nū kōō cɛ̄ dúú, anɔ́ɔ eko nēé lɛ ɔ́ yúbatísim ā, ó yɔ̄ mla Ufílīpu. Úklɔ́ ō hídáagó mɛ́mla ɔdōcābɔ̄ nɛ̄hi nɛ̄ Ufílīpu yá ā le hɛ́ ɔ̄ idáagó.

Upíta mɛ́mla Ujɔ́ni bá Usamérīya

¹⁴ Abālɔbányā eko nɛ̄ ācotɛ̄hɔ̄ nēe bá Ujerúsālɛm ā le pó ka Usamérīya mīyɛ ɛlā kú Ɔwɔicō ā, é le Upíta mɛ́mla Ujɔ́ni tɛ̄hɔ̄ fu uwá.

¹⁵ Eko nēé hīlatá wāajɛ ā, é le ɔkɔ gbā lɛ Ɔwɔicō ohígbū uwā kéē mīyɛ Alelékwū Ihɔ.

¹⁶ Ohígbū ka Alelékwū Ihɔ ā í wā í ce odúúmā kú uwā ɛ́ɛ́ ŋ́, amáŋ é yá uwā Ubatísim ŋmá lɛ iyē kú Óndú, Ujísɔ̄si ōfōōfūnū ɛ́ɛ́ nɛ.

¹⁷ Upíta mɛ́mla Ujɔni lɛ abɔ̄ ce uwá ɛyí, anɔ́ɔ é mīyɛ Alelékwū Ihɔ á.

¹⁸ Abɔ̄ Usáyímɔ̄n le má kéē gē je Alelékwū Ihɔ ā ŋmá lɛ abɔ̄ ō le ce ācɛ ɛyí kú ācotɛ̄hɔ̄ ā, ó kwú ije ú kwu uwá eyī anɔ́ɔ ó ka,

¹⁹ “Aá je ɔfú nyā gā um dúú, cɛ́ɛ́ ɔ̄cɛ dúúmā nɛ̄ n lɛ abɔ̄ ce ɔ́ kóō mīyɛ Alelékwū Ihɔ ā.”

²⁰ Anɔ́ɔ Upíta da ɔ́ kahíníī, “Ije kú uwɔ kóō le yíífi mla awɔ, ohígbū ka a gbɛlá ka a géē bī ije le lá ɛhi kú Ɔwɔicō.

²¹ Á lɛ ɔdā dúú ipú ɛlā nyā ŋ́, ohígbū ka ɔtū kú uwɔ í le kpaakpa iyɔ̄bū Ɔwɔicō ŋ́.

²² Le pīyabɔ̄ ŋmá ipú ojuju ɔbɔ̄bí kú uwɔ̄ nyā, ká ā gbɔ̄ɔkɔ lɛ Óndú ā, cɛ́ɛ́ kóō kwú ɛlá obɔ̄bí nāa gbo nyā í yá uwɔ ɛhi.

²³ Ohígbū ka n má ka a lɔnɔ ɔtū íbí, ínoōbīya kē lɛ uwɔ gbō.”

²⁴ Anɔ́ɔ Usáyímɔ̄n tóohi kahíníī, “Aá gbɔ̄ɔkɔ lɛ Óndú ā ohígbū um, ká ɔdā nɛ̄ aá ká ā kóō wā ɛgiyí um ŋ́.”

²⁵ Eko nēé lɛ ijáalí cɛ̄ klla lɛ ɛlā kú Óndú ā ka ā, é kwúcē nyɔ̄ Ujerúsālɛm, bá ī tɔ́ɔna kú Ɔ̄kōolɔhi ā ga ipɔ́lɛ́ alɛwa kú ajɛ Usamérīya.

Ufílīpu mla udá kú Itiyópīya

²⁶ Alelékwū otɛ̄hɔ̄ kú Óndú ā da Ufílīpu kahíníī, “Cāŋjɛ ká ā nyɔ̄ lɛyíkwu ɛháajɛ ga ɔwɛ nōo ŋmá Ujerúsālɛm ga Ugása ā.” (ācɛ í gē yɛ ɔwɛ nyā íbí gɛ ŋ́)

²⁷ Anɔ́ɔ ó cāŋjɛ gbɔɔ́ ō nyɔ̄ á. Anɔ́ɔ ó má ɔ̄cɛ Itiyópīya éyi nōo i búdá, igabɔ̄ kú Ukándesi, ɔ̄cɛ ojīlīmā o bī ije lɛ ɔcányā kú Itiyópīya. Ó wā Ujerúsālɛm gaá gbā Ɔwɔicō ɛ̄gbā.

²⁸ Ó yɔ̄ ī pīyɛyí. Ó cīce ipú úgbɔ́nya kú nū, yɔ̄ ī jɔ́kpá kú ɔ̄comɛ́ɛbɛ Ayisáya.

²⁹ Anɔ́ɔ Alelékwū Ihɔ ā da Ufílīpu kahíníī, “Nyɔ̄ ká ā lɛ ugbɔ́nya nyā kwú cɛ́ɛ́ ká ā tīkpó mla anú.”

³⁰ Anɔ́ɔ Ufílīpu lɛ inya kwu gā ɛgiyí nū, ó kē pó abɔ̄ ó yɔ̄ í jɔ́kpá kú Ayisáya ɔ̄comɛ́ɛbɛ ā. Anɔ́ɔ ó da ɔ̄kā kahíníī, “A jɛ́yí ɔdā nāa í jé ā déē?”

³¹ Anɔ́ɔ ó tóohi kahíníī, “N lɔfú jɛ́ɛyi nū glá ŋ́, ayíka ɔ̄cɛ éyi lɛ ɔwɔ nū cɛ̄ gā um?” Anɔ́ɔ ó da Ufílīpu kóō wā icō gaá cīce pī anúɔ.

³² Ɔgba kú ɛlɔ̄ɔwɔicō nōó yɔ̄ ī jé ā wɛ ɛ̄nyā ā, “Lɛbɛ̄ɛka álá nēé bī yɔ̄ ī nyɔ̄ ɛga oŋmɛ́bɛ́ ā, amáŋ omlede nōo dokónu iyɔ̄bu ɔ̄cɛ owá ɔ̄ ɔnwū ā, ɛ́gɔ́ɔmā nōó nwūla okónu kú nū ŋ́ má.

³³ É lɛ ɔ́ tū wāajɛ, é klla nyí ɔ̄ ɛpɔ̄hi. Ɔ̄nyɛ géē lɔfú jé ipɔ́ɔma kú nū glá ā? Ohígbū ka oyēeyī kú nū gaá mɛ ŋmá ipú ɛcɛ nyā.”

³⁴ Anɔ́ɔ ɔ̄cɛ nēé búdá ā da Ufílīpu kahíníī, “Kócōō, ɔ̄nyɛ nɛ̄ ɔ̄comɛ́ɛbɛ ā ī kɛlā nyā lɛyíkwu ɔ́ ā? Ó gē ka lɛyíkwu iyī nū kɛ̄ɛ ka lɛyíkwu ɔ̄cɛ ɔhá?”

³⁵ Anɔ́ɔ Ufílīpu gbɔɔ́ ō kɛlā ŋmá ɔgba ékpó kú ɛlɔ̄ɔwɔicō ā, anɔ́ɔ ó le Ɔ̄kōolɔhi kú Ujísɔ̄si ā kā lɛ ɔ́.

³⁶ Abɔ̄ é bá ī yɛ ɔwɛ ā, é gā ɔgblɛga kú éŋkpɔ̄ éyi. Anɔ́ɔ ɔ̄cɛ nēé búdá ā kahíníī, “Pīyeyī, má éŋkpɔ̄. Ɔdí géē ci ubatísim ō yá um mɛ́ ā?”

³⁷ Anɔ́ɔ Ufílīpu da ɔ́ kahíníī, “Ɔ́dāŋ́ ka a bī odúúdú ɔtū kú uwɔ cɛ̄, ó géē tɔ́ɔtɛ́ glá.” Anɔ́ɔ ó tóohi kahíníī, “N cɛ̄ ka Ujísɔ̄si Ohɔ́nyɛtá wɛ Ɔyínɔ̄nyīlɔ kú Ɔwɔicō á.”

³⁸ Ó da ɔ̄cɛ o pɛ́ úgbɔ́nya ā kɔ́ɔ̄ māháyi. Anɔ́ɔ Ufílīpu mla udá kú Itiyópīya ā le hīlatá ga ipú éŋkpɔ̄ ā, anɔ́ɔ Ufílīpu lɛ Ubatísim yá ɔ̄ á.

³⁹ Anɔ́ɔ eko nēé le bɛ̄cɛ ŋmá ipú éŋkpɔ̄ wɛ ɛcɛ ā, Alelékwū kú Óndú ā kwú Ufílīpu ú, anɔ́ɔ ɔ̄cɛ nēé búdá ā í klla má ɔ̄ gɛ ŋ́ má. Amáŋ ó le yɛ tá ɔwɛ ɔlɛ́ nū yɔ̄ ī gwéeyē.

⁴⁰ Ufílīpu má iyīnū ajɛ kú Asɔ́tɔ̄si! Ó tɔ́ɔna kú Ɔ̄kōolɔhi ā abɔ́ɔ mɛ́mla ɛjɛ̄ɛ̄jī igelī nēe bá ɔwɛ ā jāā gbéeko nōó gāājɛ Usísarīya.