2 ĀCƐ UTESALONÍKA 3 - Ubáyíbu kú Idɔma

Aá gbɔ̄ɔkɔ ohígbū alɔ

¹ Oŋmɛ́yí kú ɛlā kú ɔkpá nyā yɔ̄ á, ayínɛ́ alɔ, aá gbɔ̄ɔkɔ lɛ Ɔwɔicō ohígbū alɔ olɛhɔ̄ kú Óndú ā kóō nyīla gɔbɔ̄ɔ̄bū cɛ́ɛ́ kú ācɛ keē cɛ̄tra anú ɛga dóódu ɛ́gɛ́nɛ̄ aá cɛ̄tra nū eko nɛ̄ aá mīyɛ dúú ā.

² Aá gbɔ̄ɔkɔ lɛ Ɔwɔicō kóō híīī cɛ̄ lɛ ācobɔ̄bíipú nɛ̄ɛ̄nɛ̄hi ā kéē kpó unwalu nɛ̄hi wā ī ce alɔ ŋ́. Ohígbū koó wɛ ācɛ dóódu cɛ̄ɛ̄lā kú ɔ̄kōolɔhi nɛ̄ alɔ bī wā ā ŋ́.

³ Amáŋ Óndú ā tōō kpɔ́tūce, ó kē géē lɔfú tū aá iyē, í klla gáā cɛ̄ lɛ ɔ̄cɛ oyá ɔdōōbɔbí ā yá aá odée ŋ́.

⁴ Óndú alɔ yá ɛ́ɛ́ nɛ̄ alɔ lɔtūce aá á, alɔ jé kpɔ́cíí ka aá yɔ̄ ī yá, aá kē géē yá ɔdā nɛ̄ alɔ nwū aá ā.

⁵ Alɔ ī gbɔ̄ɔkɔ lɛ Óndú ā kóō mafú lɛ aá ɛ́gɛ́nɛ̄ ihɔtū kú Ɔwɔicō lɛ ā, kóō yá ká aá gbolóce Ohɔ́nyɛtá dúúdú.

O cɛgbá kú ālɔ̄ yúklɔ́

⁶ Ayínɛ́ alɔ, n bī íkwu kú Óndú alɔ Ujísɔ̄si Ohɔ́nyɛtá ī da aá ká aá lɛ iyī aá fō gɛcɛ ŋmá ɛgiyí odúúdú ayínɛ́ nēe tá ka aá yúklɔ́ ŋ́ mā, kē tá kéē bī ɔdā nɛ̄ alɔ nwū uwā ā le yúklɔ́ ā.

⁷ Aá abɔ̄yī aá jé lɔɔlɔhi ka aá cíkā ō yá ɔdā nɛ̄ alɔ yá ā. Alɔ cēyītīkwū yúklɔ́ nɛ̄hi eko nɛ̄ alɔ yɔ̄ mla aá ā.

⁸ Alɔ í mīyɛ otábɔ̄ ŋmá ɛgiyí ɔ̄cɛ dúúmā nɛ̄ alɔ í gbā ulé nū ŋ́ nɛɛ ŋ́. Ikɔkɔ ɔ́ɔmā, alɔ lɛyí nyaajɛ yúklɔ́ nɛ̄ɛ̄nɛ̄hi. Alɔ yúklɔ́ eko dóódu cɛ́ɛ́ ká alɔ híīī wɛ iyó lɛ ɔ̄cɛ dúúmā kú ipú aá ŋ́.

⁹ Alɔ lɛ ikwú o da aá kú aá tá alɔ abɔ̄, amáŋ alɔ í yá lɛ ā ŋ́. Ikɔkɔ ɔ́ɔmā alɔ lɛyí báajɛ yúklɔ́ nɛ̄hi o yá ɛ́ɛ́ kú ālɔ̄ wɛ ɔdōcābɔ̄ nɛ̄ aá géē yɛce glá.

¹⁰ Eko nɛ̄ alɔ bá mla aá ā, alɔ gē da aá ka, “Ɔ̄cɛ dúúmā nōó yúklɔ́ ŋ́, í cíkā ō lé ɔdōlé ŋ́”.

¹¹ Alɔ ka ɛ̄nyā ohígbū ka alɔ pó ka ācɛ ōhī kú aá tá kéē yúklɔ́, amáŋ é kē ī gwōtū ipú ɛlā kú ācɛ ɔhá.

¹² N bī íkwu kú Óndú Ujísɔ̄si Ohɔ́nyɛtá ī da ācɛ nēe bá ā lɔfúlɔfú kéē yɔ̄ ɛ́gɛ́nɛ̄ é cíkā ó yɔ̄ ā, cɛ́ɛ́ kéē yúklɔ́ kéē lé ɔdōlé mɛ́mla ɔdōōwiyē nēé cɛgbá ā.

¹³ Amáŋ, aá ayínɛ́ alɔ, ācɔ̄lóhɔ́nyɛtá, ɔdā olɔhi nɛ̄ aá gē yá ā kóō híīī jɛ̄ aá ɛ̄jɛ̄ ŋ́.

¹⁴ Amáŋ, ɔ́dāŋ ka ɔ̄cɛ dúúmā tá kóō bī ɔdā nɛ̄ alɔ ka ipú ɔkpá nyā yúklɔ́, aá leyī bī ɔ̄ kú aá lé tɔ̄há mla anú gɛ ŋ́, cɛ́ɛ́ kú uwēyī kóō lɛ ɔ́ kwú.

¹⁵ Amáŋ, aá híīī je uwá bɛ̄ɛka olɛlā ā ŋ́, ikɔkɔ ɔ́ɔmā aá pi uwá ahɔ̄ abɔ̄ é wɛ ācɔ̄lóhɔ́nyɛtá ɔ́mpā aá.

Upɔ́lu tá ācɛ Utesalōníka ŋ́ŋmóōō

¹⁶ Alɔ gē gbɔ̄ɔkɔ lɛ Óndú ā abɔ̄yī nū nōo gē yá kú ālɔ̄ bá ɛbɔ́ ā, kóō yá kú aá bá ɛbɔ́ dúúdú, eko dóódu. Óndú ā kóō yɔ mla odúúdú aá kpɛ́mm.

¹⁷ Ami, Upɔ́lu, yɔ̄ ī bī abɔ̄ kú um le tá okónu ōhɛ́ tū aá nyā á. Ɛ̄nyā wɛ ɔwɛ nɛ̄ n gē tá iyē kú um tū ɛjɛ̄ɛ̄jī ɔkpá kú um á.

¹⁸ N gē gbɔ̄ɔkɔ lɛ Óndú alɔ Ujísɔ̄si Ohɔ́nyɛtá kóō ményinyi odúúdú aá.