2 USÁMUWƐ̄LU 8 - Ubáyíbu kú Idɔma

Udéfīdi kpɛ́fú klla le aólɛlā kú kpó yálé

¹ Igbīhi ɛlā nyā, Udéfīdi lɛ ācɛ Ufílīstiya yálé dúúdú nēé lɔfú dóódu ipú ajɛ ā gɛ ŋ́. Ó klla mīyɛ ɔlɛ́ kú Umetɛgáma ŋmá abɔ̄ kú uwá.

² Ó klla lɛ ācɛ Umówābu yálé, lɛ ācɛ ɔlɛ́ uwá kpó kwú. Ó le ɔ̄cɛ éyi ŋmá ipú ācɛ ɛtá kú uwá kpó ŋmó. Ó cɛ̄ le aálagbá kú ɛfú ā ké má gwutáajɛ le eyí pīya kláajɛ, ɛ́ɛ́ nōó kpó ācɛ ɛpa ŋmó ŋmá ipú ācɛ ɛtá á. Anɔ́ɔ ācɛ Umówābu gaá bá ɛháajɛ kú nū klla gbɔɔ́ o téélí lɛ ɔ́ á.

³ Udéfīdi le Uhádādēsa, ɔyínɔ̄yīlɔ kú Uréhɔ̄bu, ɔcɛ́ kú ajɛ Usóba ipú ajɛ kú Usiríya yálé, abɔ̄ ɔcɛ́ ā yɔ̄ ī nyɔ̄ ka ɔ́ɔ̄ gaá mīyɛ ajɛ ɛhícō kú ísu kú Uyúfrētīisi tābɔ̄ ā.

⁴ Udéfīdi lɛ ācocɔnya kpɛ́fú kú ɔlɛ́ ɔcɛ́ ā úlā ɛnɛ ce ofɛhɔ̄ (1,700) kpó kwú. Ó klla lɛ aícɔ́ɔja nēe yɛ īkpó kú nū úlā ofɛpa cigwó (20,000) kpó kwú dúú. Ó lɛ ɔnya kú uwá nōo géē jɛ̄ úgbɔ́ɔnya ofɛhɔ̄ glá ā kpó bá ajɛ, anɔ́ɔ ó le ikpó kú aóhile ā kpó cē á.

⁵ Eko nɛ̄ ācɛ Usiríya kú Udamáskɔsi le aícɔ́ɔja tɛ̄hɔ̄ kéē gaá tá Uhádādésa abɔ̄ ā, Udéfīdi le ɔfú kpó kwu uwá, anɔ́ɔ ó le ācɛ úlā ofɛpa cigwɛ́ɛhɔ̄ (22,000) kú uwá ŋmó á.

⁶ Anɔ́ɔ Udéfīdi le aáklɔ̄kpɛ kú ɛfú kú aícɔ́ɔja kú nū gwó abɔ́ɔ klla le aícɔ́ɔja kú nū kpó bá abɔ́ɔ á. Ó klla le aótrɛ̄yí kú aícɔ́ɔja ā kpó bá abɔ́ɔ cɛ́ɛ́ kóō leyīkwu ajɛ ā. Ācɛ ā kwú pīya ācɛ o bá ɛháajɛ kú nū, anɔ́ɔ é gbɔɔ́ ō téélí lɛ ɔ́ á.

⁷ Udéfīdi mīyɛ ɔkplɛ́fú kú ugóolu nɛ̄ ācocɛ̄hɔ̄ kú Uhádādesa bī ā, anɔ́ɔ ó kwú uwā ú kpó ga Ujerúsālɛm á.

⁸ Ó klla kpó agbénú nɛ̄hi kú oje udɔ ŋmá Ubéta mɛ́mla Ubérōtāyi, aígelī nɛ̄ Uhádādesa gē gbō ā.

⁹ Utɔ́yi, ɔcɛ́ kú Uhámati le pó ka Udéfīdi ɔ́ɔ lɛ odúúdú aícɔ́ɔja kú Uhádādēsa ā kpó yálé.

¹⁰ Anɔ́ɔ Utɔ́yi, ɔcɛ́ ā, lɛ ɔyí nū Ujórām tɛ̄hɔ̄ gaá je Udéfīdi abōgwú gicō, ohígbū koó le Uhádādēsa nɛ̄ anú nōo wɛ Utɔ́yi ā húmáyī kpɛ́fú tá ɔ̄ ā yálé. Ujóram bī ɛhi kú ugóolu, oje nɛ̄hɛ́ mɛ́mla oje udɔ gē lɛ Udéfīdi dúú.

¹¹ Anɔ́ɔ Udéfīdi kwú uwā í kpó tū Ɔwɔicō abɔ́ cɛ́ɛ́ kóō bī uwā le yá uculo kú ɛ̄gbā ō gbā Ɔwɔicō. Aóje nɛhɛ́ mɛ́mla ugóolu nōó kpó ŋmá aéwɔhá nōó yálé ā wɛ ipú uwā dúú.

¹² Udéfīdi kpó aíyó ā ŋmá Ɛ́dɔm mɛ́mla Umówābu, mɛ́mla Ámɔ̄ri mɛ́mla Ufílīstiya mɛ́mla aóhī nōó kpó ŋmá ɔlɛ́ Uhádādēsa ā.

¹³ Udéfīdi klla le lóofu nɛ̄hi eko nōó pīyɛyí ŋmá ɛfú nōó kpó ācɛ kú Ɛ́dɔm úlā ofɛpa cɛhɔ̄ (18,000) ŋmó ā.

¹⁴ Ó lɛ áaklɔ̄kpɛ kú aícɔ́ɔja kú nū kpó gwó ajɛ kú Ɛ́dɔm, anɔ́ɔ ācɛ Ɛ́dɔm gaá bá ɛháajɛ nū klla gbɔɔ́ ō téélí lɛ ɔ́ á. Óndú ā cɛ̄ lɛ Udéfīdi lɛ aólɛlā kú nū kpó yálé ɛga dóódu nōó nyɔ̄ ā.

¹⁵ Udéfīdi cɔcɛ́ ajɛ kú Ísrɛ̄lu gē gbō uwā klla ī hɛ́pɔ̄ okpaakpa nɛ̄ opīyatu dúúmā í yɔ̄ anú ŋ́.

¹⁶ Ujówābu, ɔyí kú Userūyah ā wɛ otrɛ̄yí kú aícɔ́ɔja kú nū á. Anɔ́ɔ Ujɛhóssāfāti, ɔyí kú Ahilúdu wɛ ɔmálɛ o tɔ́kpá kú nū á.

¹⁷ Usádɔ̄ku, ɔyí kú Ahítūbu, mɛ́mla Ahímɛ́lɛ̄ki, ɔyí kú Abíyāta wɛ ācogwɛ́ɛya á. Useráya wɛ ɔmálɛ o tɔ́kpá kú agblɔ̄cɛ́ á.

¹⁸ Ubɛnáya wɛ otrɛ̄yí kú ācɛ nēe gē gbō Udéfīdi abɔ̄yī nū á. Ayí kú Udéfīdi ā kē wɛ ācogwɛ́ɛya.