2 USÁMUWƐ̄LU 7 - Ubáyíbu kú Idɔma

Ɛhɔ̄ nɛ̄ Unátan cɛ̄ lɛ Udéfīdi ā

¹ Udéfīdi má lā ipú agblɔ̄cɛ́ kú nū ɛbɔ́, Ɔwɔicō kē lɛ omulɛ́nyɔ́ je lɛ ɔ́ ŋmá ɛgiyí odúúdú aólɛlā kú nū.

² Anɔ́ɔ Udéfīdi da Unátan, ɔ̄comɛ́ɛbɛ ā ka ɔ́ɔ̄ má ɔ̄, anúɔ lā inu abɔ̄yīnū nēe bī ɔcí usɛ́da le gwó amáŋ Ikpati kú Ɛka kú Óndú ā ɔ́ɔ kē háyi ipú ádá.

³ Anɔ́ɔ Unátan tá ɔ̄ ohi ka ɔ́ɔ̄ nyɔ̄ gaá yá ɔdā dúúmā nɛ̄ ɔ́ɔ yɔ̄ ɔtū kú nū ā ō yá. Ohígbū ka Óndú ā ɔ́ɔ yɔ̄ mɛ́mla anú.

⁴ Amáŋ otú piíí ɔ́ɔmā, Óndú ā wā ɛgiyí Unátan gaá da ɔ́ kahíníī,

⁵ ɔ́ɔ̄ nyɔ̄ gaá da Udéfīdi ɔ̄cocɛ̄hɔ̄ kú anúɔ ka ɔ́ɔ wɛ anú ɔ́ɔ gáā gwó ɔlɛ́ lɛ anúɔ kú anúɔ̄ lā ipú nū ŋ́.

⁶ Óndú ā ka oŋmífī nɛ̄ anúɔ nya ācɛ Ísrɛ̄lu tá klla kpó uwā bɛ̄cɛ ŋmá Íjīpiti ā, ka anúɔ í lā ipú Agblīihɔ-nɛ̄hi jéjéē ɛ́ɛ́ ŋ́. Ó klla ka ka abɔ̄ anúɔ húmāyī ī yɛ ŋmá ɛga éyi ga ɛga ɔhá ā, ipú áklɔ̄kpɛ nɛ̄ anɔ́ɔ húmāyī lā á.

⁷ Óndú ā klla ka abɔ̄ anúɔ hímáyī yɛ mla ācɛ ɔlɛ́ anúɔ, Ísrɛ̄lu ā, ka anúɔ da otrɛ̄yí kú uwā dóódu ámāŋ ka ācɛ nɛ̄ anúɔ fu kɛ́ɛ̄ gbō ācɛ ɔlɛ́ anúɔ bɛ̄ɛka álá á, kɛ́ɛ̄ lɛ Agblīihɔ kú ɔcí usɛ́da gwó lɛ anúɔ jéjéē ɛɛ́ ɛ̄?

⁸ Ó ka abɔ̄ nōó le lɛ ā, Unátan, ɔ̄comɛ́ɛbɛ ā, ka ɔ́ɔ̄ nyɔ̄ í da Udéfīdi, ɔ̄cocɛ̄hɔ̄ kú anúɔ ka anúɔ je ɔ́ ŋmá ipácí ɛga nɛ̄ ɔ́ɔ yɔ̄ ī gbāálá ā, ɛ́ɛ́ nɛ̄ anúɔ je ɔ́ pīya ɔcɛ́ kú ācɛ ɔlɛ́ anúɔ, Ísrɛ̄lu á.

⁹ Ka ɛga dúúmā nɛ̄ ɔ́ɔ húmáyī yɛ ā, anúɔ yɔ̄ pi ɔ̄ɔ̄. Ka anúɔ klla cɛ̄ le ɔ́ le odúúdú aólɛlā kú nū kpó yálé. Ó ka anúɔ klla géē yá ká iyē kú nú nōo wɛ Udéfīdi ā ká ɔ̄ lófu nɛ̄hi bɛ̄ɛka iyē kú aótrɛ̄yí nɛ̄hi kú ipú ɛcɛ nyā ā.

¹⁰ Óndú ka anúɔ géē yá ɛga lɛ ācɛ ɔlɛ́ anúɔ, Ísrɛ̄lu, nɛ̄ anúɔ géē kpó uwā bá, cɛ́ɛ́ kéē bá céé kú uwā ɛbɔ́, nɛ̄ abɔ̄ dúú í gáā kwu uwá gɛ ŋ́.

¹¹ Óndú ā klla ka kpɔ́ ka oŋmá eko nɛ̄ ɛ́ɛ wā í lā ipú ajɛ ā, ācɛ o yá ɔdābɔ̄fú ɛ́ɛ húmāyī kpɔ́fú kwu uwá, amáŋ ó ka ɔdā ɛ́gɔ́ɔmā ɔ́ɔ gáā yá da uwá ɛ́ɛ́ gɛ ŋ́. Ó ka anúɔ cokónu lɛ Udéfīdi ka anúɔ géē lɛ ɔ́ tū céé ŋmá abɔ̄ kú odúúdú aólɛlā kú nū, klla géē kpó ayááyí lɛ ɔ́ nēe gē bá ī lé ɔcɛ́.

¹² Óndú ā klla da Udéfīdi ka eko nɛ̄ ɔ́ɔ gekwú, anúɔ géē je ɔyínɔ̄nyīlɔ kú nū éyi cɔcɛ́. Ó ka anúɔ klla í yá kú ajɔ̄ɔ̄cɛ́ kú ɔyí nū ɔ́ɔmā ka ɔ́ɔ̄ le lɔfú nɛ̄hi

¹³ Óndú ā klla ka ɔyínɔ̄nyīlɔ kú nū ā ɔ́ɔ géē gwó Agblīihɔ-nɛ̄hi lɛ anúɔ á. Ó klla ka anúɔ géē yá ka ajɔ̄ɔ̄cɛ́ kú ɔyí nū ɔ́ɔmā kóō yɔ̄ piyóó.

¹⁴ Óndú ā klla ka ka anúɔ géē wɛ ádā ɔyí nū ɔ́ɔmā, ɔ́ɔ kē géē wɛ ɔyí anúɔ. Ó ka eko nɛ̄ ɔyínɔ̄nyīlɔ ɔ́ɔmā ɔ́ɔ lɛ ɔdōbɔ̄bí yá, anúɔ géē yá ɔ̄ italā ɛ́gɛ́nɛ̄ ádā gē yá ɔyí nū italā ā.

¹⁵ Ó ka amáŋ anúɔ ɔ́ɔ gáā mā ō yíihɔtū ɔyí nū ɔ́ɔmā gbóógbō ŋ́, ɛ́gɛ́nɛ̄ anúɔ mā ō yíihɔtū Usɔ́ɔlu, nɛ̄ anúɔ je ɔ́ táajɛ ŋmá ɔcɛ́ kú anúɔ je anú nɛ̄ ɔ́ɔ wɛ Udéfīdi ā cɔcɛ́ ā ŋ́.

¹⁶ Óndú ā klla ka ka ayááyí kú Udéfīdi ɛ́ɛ géē yɔ̄ ī cɔcɛ́ piyóó ajɛ kú Ísrɛ̄lu.

¹⁷ Unátan le ɔdā dóódu nɛ̄ Óndú ā ka lɛ ɔ́ ā kpó ka lɛ Udéfīdi.

Ahínyá nɛ̄ Udéfīdi tá ipú ɔkɔ nōó gbā ā

¹⁸ Anɔ́ɔ Udéfīdi le tá ipú áklɔ̄kpɛ kú ikpáti kú Ɛka kú Óndú ā gaá cīce pīya Óndú ā. Anɔ́ɔ ó kahíníī, “Ɔ̄nyɛ nɛ̄ um wɛ, woó, Óndú ā, nōo wɛ Ɔwɔicō. Ɔ̄nyɛ nɛ̄ ipɔ́ɔ́nū kú um wɛ, ɛ́ɛ́ nɛ̄ a gē yá ɔdā nɛ̄hi nyā lɛ alɔ āa?

¹⁹ Náaná ɔdā nɛ̄ a yá nyā kōō wɛ ɔdā nɛ̄ŋcɛ́ īpéeyī uwɔ kpɔ́, woó, Óndú, nōo wɛ Ɔwɔicō. A klla lɛ okónu ce lɛyíkwu ayááyí kú um kú ɛ̄cɔ̄bū.

²⁰ Ɔdí ɔhá nɛ̄ ami, Udéfīdi ā géē ka ga uwɔ kpɔ́ ɛɛ́ gɛ? Ohígbū ka a jé ami nōo wɛ ɔ̄cocɛ̄hɔ̄ kú uwɔ ā, Óndú, Ɔwɔicō.

²¹ A lɛ ɔdā nɛ̄hi nyā yá, o yá ɛ́ɛ́ ká ā nwū um ɛlā. A kē yá uwā ɛ́gɛ́nɛ̄ a gē cokónu lɛ ācɛ lɛ ā, mɛ́mla ɛ́gɛ́nɛ̄ ɔdā nɛ̄ a cɛ̄ ka anúɔ gē yá ā ī lɛ ā.

²² A lɔfú íbí, Óndú, nōo wɛ Ɔwɔicō ā. Ɔ̄cɛ ɔhá dóódu í lɛbɛ̄ɛka awɔ ā ɛ́ɛ́ gɛ ŋ́. Ɛ́ɛ́ nɛ̄ ɔwɔ ɔhá dúú í yɔ̄ gwū uwɔ tá ŋ́. Odúúdú ɔdā nɛ̄ alɔ pó lɛyíkwu uwɔ ā wɛ ɔkwɛ̄yi.

²³ Éwo ɔhá dúú í yɔ̄ ipú ɛcɛ nyā nōo lɛbɛ̄ɛka ācɛ Ísrɛ̄lu ā ŋ́. A le uwá hɛ́tá ŋmá ɛga nēé bá gē cɔ̄fiyɛ ā, anɔ́ɔ a kwú uwā ú pīya ācɛ ɔlɛ́ uwɔ á. A klla yá kú iyē kú uwɔ kóō le lóofu ɛga dóódu kú ipú ɛcɛ nyā. A klla le aéwɔhá mɛ́mla aɛ́cí nɛ̄é gē pā ā kpó nū bɛ̄cɛ ŋmá ipú ajɛ kú uwā, abɔ̄ alɔ nēe wɛ ācɛ ɔlɛ́ uwɔ ā yɔ̄ gē wā ā. Ācɛ ɔlɛ́ uwɔ nɛ̄ a hɛ́tá ŋmá ɔfiyɛ nēé bá gē cɛ̄ ipú ajɛ kú Íjīpiti ā, cɛ́ɛ́ kéē kwú pīya ācɛ ɔlɛ́ uwɔ ā.

²⁴ A kwú ācɛ ɔlɛ́ uwɔ Ísrɛ̄lu, ú pīya ācɛ ɔlɛ́ uwɔ piyóó, cɛ́ɛ́ ka awɔ, Óndú ā kóō kwú pīya Ɔwɔicō kú uwā.

²⁵ Óndú, ká ɛlā nɛ̄ a ka lɛyíkwu ami, ɔ̄cocɛ̄hɔ̄ kú uwɔ mɛ́mla ipɔ́ɔ́nū kú um ā, kóō le yá lɛ ā ɔkwɛ̄yi.

²⁶ Cɛ́ɛ́ é géē wóófu iyē kú uwɔ piyóó klla í ka ka, ‘Óndú ā nōo lɔfú fíyɛ́ dúú ā wɛ Ɔwɔicō kú alɔ, Ísrɛ̄lu, piyóó á. Cɛ́ɛ́ ipɔ́ɔ́nū kú ami, Udéfīdi, nōo wɛ ɔ̄cocɛ̄hɔ̄ kú uwɔ ā, géē yɔ̄ piyóó.

²⁷ Óndú ā, nōo wɛ Ɔwɔicō kú Ísrɛ̄lu nōo lɔfú fíyɛ́ dúú ā, n lɔtū gbɔ̄ɔkɔ nyā gā awɔ, ohígbū ka a lɛ aɔ́dā nɛ̄hi mbá máfú lɛ ami nōo wɛ ɔ̄cocɛ̄hɔ̄ kú uwɔ. A klla le da um ka a géē kpó ayááyí um pīya aɔ́cɛ́ igbīhi um.

²⁸ Óndú, abālɔbányā, awɔ wɛ Ɔwɔicō ā nɛ, okónu nɛ̄ a gē ce ā í gē tɔ́lá ŋ́. Anɔ́ɔ a kē le okónu nyā ce gā um á.

²⁹ N gbɔ̄ɔkɔ gā abālɔbányā, cɛ́ɛ́ ká ā lɛ ɔhā hɛ́ ce ipɔ́ɔ́nū kú um, cɛ́ɛ́ kéē géē yɔ̄ ī bá iyɔ̄bū uwɔ piyóó. Awɔ, Óndú, nōo wɛ Ɔwɔicō, le okónu ce ɛ́ɛ́, ka a géē yɔ̄ ī hɔ́hā ce ayááyí um piyóó.”