2 USÁMUWƐ̄LU 6 - Ubáyíbu kú Idɔma

É lɛ ikpáti kú Ɛka kú Óndú ā bī wā Ujerúsālɛm (1 Uklɔ́ kú Aɔ́cɛ́ 13.1-14; 15.25—16.6,43)

¹ Udéfīdi lɛ aícɔ́ɔja kú Ísrɛ̄lu úlā ofɛtá ce úlā igwɛ́ɛhɔ̄ (30,000) túbá.

² Anɔ́ɔ ó gbɔɔ́ mɛ́mla uwá ga Ubála ipú ajɛ kú Ujūda gáā nyɔ̄ í bī Ikpati kú Ɛka kú Ɔwɔicō, nóō lé iyē kú Óndú ā. Óndú ā cīce akpa kú ɔcɛ́ kú nū ɛhícō nū ɔtāhɛ̄ ɛyí Aúcérūbim ā.

³ Anɔ́ɔ é kwú Īkpati ā ú ŋmá ɔlɛ́ kú Abínādābu nōo kwu ɛyí ɛfu ā, kwú ɔ̄ ú tá ipú úgbɔ́ɔnya okpíyó ɛ̄pɛ̄pɛ̄ á. Ússa mɛ́mla Ahíyo, ayínɔ̄nyīlɔ kú Abínādābu bā ī pɛ́ úgbɔ́ɔnya ā nyɔ̄ á.

⁴ Ikpati ā tá ipú úgbɔ́ɔnya ā, Ahíyo kē tá iyɔ̄bū nū.

⁵ Udéfīdi mɛ́mla ācɛ ɔlɛ́ nū ā tá ɔ̄ igbīhi bá ī gwííjē bá ī gwō ɔdā ō bī le gwíije klla bā í jīije, bá í je ojīlīma ce Óndú ā. É bá ī gwō ɔkanga, uba, ɛ̄ngwū, ɔgalumpɛ̄, mɛ́mla aóje nɛ̄é gē gwo ā.

⁶ Eko néē ga ɛga owu igwu kú Unákɔn ā, aɛ́na ā le túgagá, anɔ́ɔ Ússa gāá kwú abɔ̄ í bī Ikpati kú Ɛka kú Ɔwɔicō ā á.

⁷ Anɔ́ɔ ikpííkpó ɔ́ɔmā, Óndú ā le cɔ̄nū da Ússa, le ɔ́ ŋmó bōōbū abɔ́ɔ á. Ohígbū abɔ̄ nōó le kwu Ikpati ā á. Ó gekwú pi Ikpati kú Ɛka ā abɔ́ɔ.

⁸ Udéfīdi kwú cɔ̄nū ohígbū ɔnū nɛ̄ Óndú ā cɛ̄ da Ússa je ɔ́ ŋmó ā. Anɔ́ɔ ó kwú iyē ú ce abɔ́ɔ ka, Upéresúsa á (ɛyí nū lé ka ‘Ɔwɔicō wúla klá Ússa’). Iyē ā néē hī abɔ́ɔ jāā kwu eko nɛ̄é tɔ́kpá nyā á.

⁹ Udéfīdi gbɔɔ́ ō yúúfi, anɔ́ɔ ó kahíníī, “Abɔ̄ ó yá lɛ ɛɛ́ nɛ̄ n géē bī Ikpáti kú Ɛka kú Óndú ā ga igelī nɛ̄hi kú ɔlɛ́ um mɛ́ɛ ā?”

¹⁰ Udéfīdi tá ō je ɔ́ ga igelī nɛ̄hi kú ɔlɛ́ nū. Amáŋ ó kwú ɔ̄ ú tá ɔlɛ́ kú Obɛ́dɛdɔm, ɔ̄cɛ kú Ugáati ā.

¹¹ Ikpáti kú Ɛka kú Óndú ā tá ɔlɛ Obɛ́dɛdɔ̄m ɔyā ɛtá. Ɔwɔicō kē yɔ̄ ī hɔ́há ce Obɛ̄dɛdɔ̄m mɛ́mla ācɛ ɔlɛ́ nū nɛ̄hi.

¹² Anɔ́ɔ é le da Udéfīdi kahíníī, “Óndú ā yɔ̄ ī hɔ́há ce Obɛ́dɛdɔ̄m mɛ́mla ācɛ ɔlɛ́ nū mɛ́mla ɔdā dóódu nōó lɛ ā, ohígbū Īkpáti kú Ɛka kú Óndú ā nōo tá ɔlɛ́ nū ā.” Anɔ́ɔ Udéfīdi gaá kwú Ikpáti kú Óndú ā ú ŋmá ɔlɛ́ kú Obɛ́dɛdɔ̄m wā ipú igelī nɛ̄hi kú Udéfīdi ā á. Odúúdú ācɛ ā bá ī gwéeyē nɛ̄hi.

¹³ Eko nɛ̄ ācɛ nēe bī Ikpati kú Ɛka kú Ɔwɔicō ā le ikpó ɛhīlī fu ā, Udéfīdi, ɔcɛ́ ā da uwá kéē māháyi, anɔ́ɔ ó le ɔbá ɛna mɛ́mla ɔyí ɛna otījē kpó gwɛ́ɛya lɛ Óndú ā.

¹⁴ Udéfīdi bī ákpá fōōfūnū kwú ɔkwu yɔ̄ ī jīijē lɛ Óndú ā mla odúúdú ɔfú kú nū.

¹⁵ Udéfídi mɛ́mla odúúdú ācɛ Ísrɛ̄lu bá ī hólígbō klla bá ī tá opo ce Ikpati kú Ɛka kú Óndú ā, abɔ̄ é bá ī je ɔ́ ga Ujerúsālɛm ā.

¹⁶ Abɔ̄ é kwú Ikpati kú Ɛka kú Óndú ā í bī bēhé wā igelī kú Udéfīdi ā, Umáyíkalu, ɔyínɔ̄nyā kú Usɔ́ɔlu ā, feyī kpeé bū uwíndo, anɔ́ɔ ó má Udéfīdi yɔ̄ í jīijē, yɔ̄ í tóómbili gicō lɛ ákpá fōōfūnū kwu ɔkwu á. Ó lɛ opiyɛ́ɛlɛ́ tá leyī gwū ɔ́ bónū ipú ɔtū kú nū.

¹⁷ É lɛ Ikpati ā bī wā í tá ipú ádá, nɛ̄ Udéfīdi gwó lɛ ɔ́ ā. Anɔ́ɔ Udéfīdi lɛ ɛya o yɔlá dúúdú mɛ́mla ɛya kú olétɔ̄há gwó lɛ Óndú ā á.

¹⁸ Eko nɛ̄ Udéfīdi lɛ ɛya ā gwó kwɛyí ā, ó bī iyē kú Ɔwɔicō nōo lɔfú fíyɛ́ dúú ā lɛ ɔhā hɛ́ ce ācɛ ā.

¹⁹ Anɔ́ɔ ó le igbō mɛ́mla ɛbɛ́ mɛ́mla aíkpɔ̄cí ufáyin nēe le ŋmó nēé hī ka Uréyísin ā kɔ̄ miya odúúdú ācɛ kú Ísrɛ̄lu, kwu ācɛnyā mɛ́mla ācɛnyīlɔ. Anɔ́ɔ ɔnyɔɔnyɛ nyɛ̄ɛ̄ ga ɔlɛ́ nū á.

²⁰ Anɔ́ɔ Udéfīdi pīyɛyí wā ɔlɛ́ kóō wā í hɔ́hā ce ācɛ ɔlɛ́ nū á. Umáyíkalu, ɔyínɔ̄nyā kú Usɔ́ɔlu ā, wā í jīla Udéfīdi ɔwɛ, anɔ́ɔ ó da ɔ́ kahíníī, “Ojīlīmā nɛ̄ ɔcɛ́ kú Ísrɛ̄lu je lɛ īyī nū ícɛ dúú áā! Ó lɛ īyī nū tóohɛ́ɛwa iyɔ̄bū ācocɛ̄hɔ̄ nɔ̄nyā kú ɔlɛ́ ācocɛ̄hɔ̄ kú ɔlɛ́ nū ā, bɛ̄ɛka ɛ́gɛ́nɛ̄ ācɛ icííci, nōó lɛ uwēyī ɛyí ŋ, gē tóohɛ́ɛwa ā.

²¹ Anɔ́ɔ Udéfīdi tá Umáyíkalu ohi kahíníī, “N yɔ̄ í jīijē lɛ Óndú ā nōó je um fíyɛ́ ádā uwɔ mɛ́mla odúúdú ipíinu kú nū ā. Óndú ā klla lɛ um pīya ɔcɛ́ kú Ísrɛ̄lu, nōo wɛ ācɛ ɔlɛ́ nū ā. Ohígbū ɔ́ɔmā n géē yɔ̄ í gwéeyē klla í yɔ í jīijē lɛ Óndú ā gbóó.

²² N klla í yɔ̄ ī yá īyī um olíla klla í je uwēyī lɛ īyī um fíyɛ́ ɛ̄nyā ɛ́ɛ n. N géē tū wā ajɛ īkpēyī kú uwɔ fíyɛ́ ɛ̄nyā kpɔ́ ɛɛ́. Amáŋ n géē jɛ̄ ācocɛ̄hɔ̄ nɔ̄nyā nɛ̄ a gē kɛlā uwá ā ɔ́ɔmā eyī nɛ̄hi, nēé klla í lɛ ojīlīma ce um.”

²³ Ohígbū ɔ́ɔmā Umáyíkalu, ɔyínɔ̄nyā kú Usɔ́ɔlu ā, nōo wɛ ɔnyā Udéfīdi í ma ɔyí dóódu ŋ́.