2 USÁMUWƐ̄LU 5 - Ubáyíbu kú Idɔma

Udéfīdi kwú pīya ɔcɛ́ kú Ísrɛ̄lu mɛ́mla Ujúda

¹ Anɔ́ɔ odúúdú ācɛ aípɔ́ɔma kú Ísrɛ̄lu gā ɛgiyí Udéfīdi Uhɛ́brɔn gaá da ɔ́ kahíníī, “Alɔ mɛ́mla uwɔ wɛ ācɛ ékpónú.

² Eko tɛtɛ nɛ̄ Usɔ́ɔlu wɛ ɔcɛ́ kú alɔ nááná ā, awɔ gē kpó ācɛ kú Ísrɛ̄lu trɛ̄yí ga ɔnɛ̄fú klla í yálé á. Óndú ā kē cokónu ga uwɔ eko ɔ́ɔmā ka ɛ̄cī éyi awɔ ɔ́ɔ géē wɛ ɔcɛ́ kú ācɛ ɔlɛ́ anúɔ Ísrɛ̄lu, klla í leyīkwu alɔ bɛ̄ɛka ɛ́gɛ́nɛ̄ ɔ̄cogbāálá gē gbō aálá ā.

³ Abɔ̄ odúúdú anyākwɔ́cɛ kú Ísrɛ̄lu ga ɛgiyí Udéfīdi, Udéfīdi bī iyē kú Ɔwɔicō le okónu ce mɛ́mla uwá Uhɛ́brɔn abɔ́ɔ. Anɔ́ɔ é le anɔ̄ tū Udéfīdi ɛyí kóō wɛ ɔcɛ́ kú odúúdú Ísrɛ̄lu á.

⁴ Udéfīdi wɛ iháyí ofuciigwó ɛ́ɛ́ nōo gbɔɔ́ ō gbō ācɛ kú Ísrɛ̄lu dúúdú á. Ó kē wɛ ɔcɛ́ kú uwá iháyí ofɛpa.

⁵ Abɔ̄ ó klá Uhébrɔn ā ó gbō ācɛ Ujúda iháyí ahāapa ce ɔyā ɛhīlī. Igbīhāajɛ ó kē klá Ujerúsālɛm gbō odúúdú Ísrɛ̄lu mɛ́mla Ujúda iháyí ofu cigwɛ́ɛtá.

⁶ Eko éyi Udéfīdi lɛ ācɛ ɔlɛ nū kpó nyɔ̄ gáā kpɛ́fú tá ācɛ Ujɛ́būsi nēe tɛtɛ lɛ Ujerúsālɛm ā. Anɔ́ɔ ācɛ Ujɛ́būsi nēe lā Ujerúsālɛm ā gbɛlá ka Udéfīdi ɔ́ɔ wā í yá aá lé, mīyɛ ɔlɛ́ ā glá ŋ́ nɛ. Anɔ́ɔ é da Udéfīdi kahíníī, “Aópeyī mɛ́mla aócīkpó kú ɔlɛ́ alɔ ofōofū uwá í gáā cɛ̄ ga uwɔ bēhé wā ipú igelī ā glá ŋ́.

⁷ Amáŋ Udéfīdi lɛ uwá yálé klla mīyɛ ɛga olɔfú kú Usáyɔn ā. Abɔ́ɔ kē je pīya igelī kú Udéfīdi igbīhāajɛ á.

⁸ Udéfīdi da ācɛ ɔlɛ́ nū eko ɔ́ɔmā kóō lɛ ɔ̄cɛ dúúmā yɔ̄ abɔ́ɔ nōo wɔ́tū ācɛ Ujɛ́būsi, ɛ́gɛ́nɛ̄ anúɔ wɔ́tū uwā ā, nɛ̄ eyī yá anúɔ kú anúɔ kwú uwā í kpó ŋmó ā ā? Ayíka ɔ̄cɛ ɔ́ɔmā ká ɔ́ɔ bū okónu ɔ̄gɔ nɛ̄ éŋkpɔ̄ ī bū wā ipú igelī ā, cɛ́ɛ́ kú ɔ́ɔ gaá lɛ āconyɔ́ɔ́nyí nēe bá abɔ́ɔ ā kpó ŋmó. Ɔdā nōo yá ɛɛ́ nēé gē ka kahíníī, “Aópeyī mɛ́mla aócīkpó mɛ́mla āconyɔ́ɔ́nyí í gáā ga ipú inū kú Óndú ŋ́ mā yɔ̄ á.”

⁹ Anɔ́ɔ Udéfīdi má lā abɔ́ɔ klla le iyē ɛ̄pɛ̄pɛ̄ ce ɔ́ ka “igelī nɛ̄hi kú Udéfīdi.” Anɔ́ɔ Udéfīdi lɛ ɔlɛ́ gwó jīla anú tá ŋmá Umílo wā eyīpú á.

¹⁰ Udéfīdi klla kwú pīya ɔcɛ́ nōo yɔ̄ ī lɔfú tōōtɔ̄ɔ̄ nɛ̄hi fíyɛ́, ohígbū ka Óndú ā nōo wɛ Ɔwɔicō nōo lɔfú fíyɛ́ dúú ā yɔ̄ pi ɔ̄.

¹¹ Uhíram, ɔcɛ́ kú Utáya, lɛ aígbɔ́cí kú usɛ́da mɛ́mla ācogbɔ̄cí mɛ́mla ācohɔ́ɔdɔ tɛ̄hɔ̄ fú Udéfīdi kéē wā í lɛ agblɔ́cɛ́ gwó lɛ Udéfīdi

¹² Anɔ́ɔ Udéfīdi le jé ka Óndú ā ɔ́ɔ kwú anúɔ ú butū ka anúɔ wɛ ɔcɛ́ kú Ísrɛ̄lu ɛɛ́. Ka Óndú ā ɔ́ɔ kē yɔ̄ ī yá ka ajɔ̄ɔ̄cɛ́ kú anúɔ kóō jɛ̄ gicō ohígbū ka ācɛ ɔlɛ́ nū, Ísrɛ̄lu he ɔ́ ɔtū.

¹³ Eko nɛ̄ Udéfīdi nyɛ̄ɛ̄ ŋmá Uhɛ́brɔn ā, ó le anyā nōo ī cikpó uwā mɛ́mla anyā ɔhá lɛ tū aɛ́nɛ̄ ó tɛtɛ lɛ ā Ujerúsālɛm. É kē ma ayí alɛwa ɔhá lɛ Udéfīdi.

¹⁴ Iyē kú ayí ɔhá nēé ma lɛ Udéfīdi Ujerúsālɛm ā wɛ Ussámūwa, Ussóbābu, Unátan, Usólōmɔn

¹⁵ Íbha, Ɛlíssūwa, Unéfɛ̄gi, Ujáfīya,

¹⁶ Ɛlíssāma, Ɛlíyāda mɛ́mla Ɛlífɛ̄lɛ̄ɛti.

Udéfīdi lɛ ācɛ Ufílistiya yálé

¹⁷ Ācɛ Ufílīstiya le pó kéē lɛ anɔ̄ tū Udéfīdi ɛyí, kwú ɔ̄ ú pīya ɔcɛ́ kú odúúdú Ísrɛ̄lu ɛɛ́. Abɔ̄ é le pó ā, é gbɔɔ́ ō wā kéē gaá lɛ Udéfīdi kwú. Eko nɛ̄ Udéfīdi le pó ā, ó le tá igelī, ɛga nēé cē igá tū ɔ̄.

¹⁸ Ācɛ kú Ufílīstiya ā ga ɔpɛ́ kú Urefém ā gaá mīya abɔ́ɔ tū abɔ̄.

¹⁹ Anɔ́ɔ Udéfīdi da Óndú ā ɔ̄kā kahíníī, “N̄ kpɛ́fú tá ācɛ kú Ufílīstiya kɛɛ? A géē yá ká n yá uwá lé ēē?” Anɔ́ɔ Óndú ā tá ɔ̄ ohi kahíníī, “Īī, kpɛ́fú tá uwá, n géē cɛ̄ ga uwɔ yá uwá lé.”

²⁰ Anɔ́ɔ Udéfīdi le tá Ubáalu Upérāsim gaá lɛ ācɛ kú Ufílīstiya yálé abɔ́ɔ á. Anɔ́ɔ ó kahíníī, “Óndú ā le bū ipú aólɛlā kú um ga um bɛ̄ɛka éŋkpɔ̄ nōo le cēenyi wā í yɛ ā.” Ohígbū ɔ́ɔmā ā, o kwú iyē ce abɔ́ɔ ka Ubáalu Upérāsim (ɛyí kú iyē ā lé ka, ‘Óndú ā le ca bēhé’).

²¹ Ācɛ Ufílīstiya kwú kwu gwū aójibó kú aɛ́cí kú uwá tá abɔ́ɔ. Anɔ́ɔ Udéfīdi mɛ́mla ācɛ ɔlɛ́ nū kwú uwā í kpó á.

²² Ācɛ Ufílīstiya klla kwúcē wā í bá ɔpɛ́ kú Urefém le tútū ɛfú kpɔ́.

²³ Anɔ́ɔ Udéfīdi klla lɛ ɔ̄kā da Óndú ā igbɔhá, anɔ́ɔ ó tá ɔ̄ ohi kahíníī, “Aá tū uwā iyē ŋmá iyɔ̄bū kpaakpa ɛ́ gɛ ŋ́. Amáŋ aá le yɛ igbīhi uwá ka aá tū uwā iyē ŋmá āyā ɔhá, ŋmá ɛgiyí aɔ́cí nēé hī ka Ubálsam ā.

²⁴ Aá géē pó uya ɛyí aɔ́cí kú Ubálsam ā bɛ̄ɛka ikpó kú aícɔ́ɔja nēe bá ī nɔɔwɔ ā. Eko nɛ̄ aá lɛ ɔ́ɔmā pó, cɛ́ɛ́ aá gbɔɔ́ ō kpɛ́fú tū uwá. Ohígbū ka n le yɛ gbɔbū lɛ aá ī nyɔ̄ í yá aícɔ́ɔja kú Ufílīstiya lé ɛɛ́.”

²⁵ Udéfīdi lɛ ɔdā nɛ̄ Óndú ā da ɔ́ ā yá, anɔ́ɔ ó le ācɛ Ufílīstiya yálé, ó klla nū uwā ŋmá Ugéba jāā ga ɔwɛ kú Ugɛ́sa ā.