2 AƆ́CƐ́ 6 - Ubáyíbu kú Idɔma

É le íkpɛ̄yí āgā pīyɛ

¹ Ɛ̄cī éyi ɔ́wá kú ācomɛ́ɛbɛ nɛ̄ Ɛláyíssa gē leyīkwu uwá ā da ɔ́ kahíníī, “Ɛga nɛ̄ alɔ lā ā kwú nyɛ́ lɛ alɔ ɛ́ɛ́.

² Lɛ ɛga je lɛ alɔ kú ālɔ̄ nyɔ̄ í lɛ ɔcí hɛ́ ŋmá okónu ísu kú Ujɔ́dan, cɛ́ɛ́ kú ālɔ̄ lɛ ɛga éyi gwó nɛ̄ alɔ géē lā.” Anɔ́ɔ. Ɛláyíssa da uwá ka “Aá nyɔ̄”.

³ Anɔ́ɔ éyi kú uwá da ɔ́ kɔ́ɔ̄ nyɔ̄ mla aá, anɔ́ɔ ó cɛ̄ á.

⁴ Anɔ́ɔ é gbɔɔ́ á. Eko nēé gā Ujɔ́dan ā, é gbɔɔ́ ō hɛ́ ɔcí abɔ́ɔ.

⁵ Abɔ̄ éyi kú uwá yɔ̄ í hɛ́ ɔcí ā, āgā kú nū kwú wú ga ipú enyi ā. Anɔ́ɔ ó da Ɛláyíssa kahíníī, “Ɛhɛ́ɛ! Ɔdí nɛ̄ n géē yá ā, n kē ba āgā nyā ŋmá ɛga ɔhá.”

⁶ Anɔ́ɔ Ɛláyíssa da ɔ́ ɔ̄kā kahíníī, “Iní nɛ̄ ó wú nyɔ̄ ā?” Ɔ̄cɛ ā le abɔ́ɔ mafú lɛ ɔ́. Anɔ́ɔ Ɛláyíssa lɛ ɔcí hɛ́ lɛ ɔ́ tá ga abɔ́ɔ, anɔ́ɔ īkpɛ̄yí āgā ā kwú nū ce eyī enyi á.

⁷ Ɛláyíssa da ɔ́ kahíníī, “Nyɔ̄ í kwú ɔ̄ ú”, anɔ́ɔ ó gaá kwú īkpɛ̄yí āgā ā ú á.

Ísrɛ̄lu le aícɔ́ɔja kú Usiríya yálé

⁸ Ɔcɛ́ kú Usiríya yɔ̄ gē kpɛ́fú mla ācɛ Ísrɛ̄lu. Anɔ́ɔ anú mɛ́mla ācɛ ɔlɛ́ nū le ɛga nēé géē kwu aáklɔ̄kpɛ́ kú ɛfú kú uwá ā miya á.

⁹ Amáŋ Ɛláyíssa le ɛhɔ̄ tū fu ɔcɛ́ kú Ísrɛ̄lu gaá le ɔ́ ahɔ̄ pi ka ɔ́ɔ túbla abɔ́ɔ ŋ́. Ohígbū ka aícɔ́ɔja kú Usiríya ā tayínū ipácí abɔ́ɔ bá ī gbēyī nū.

¹⁰ Anɔ́ɔ ɔcɛ́ kú Ísrɛ̄lu kē lɛ ācɛ nēe lā abɔ́ɔ ā ahɔ̄ pi. Ó da ɔ́ kéē leyī kwɛcɛ gɛɛ. Ɔdā ɛ́gɛ́nyā yá igbo alɛwa.

¹¹ Ɛlā nyā le kwú ɔcɛ́ kú Usiríya iyē nɛ̄hi, anɔ́ɔ ó lɛ ācɛ ɔlɛ́ nū kpó hīgwú, anɔ́ɔ ó da uwá ɔ̄kā kahíníī, “Ɔ̄nyɛ kú aá yɔ̄ amānyā nōo gē yɛce ɔcɛ́ kú Ísrɛ̄lu ā?”

¹² Anɔ́ɔ éyi kú uwá tá ɔcɛ́ ā ohi kahíníī, “Ɔcɛ́ dúúmā ɛ́gɔ́ɔmā í yɔ̄ ipú alɔ ŋ́. Amáŋ Ɛláyíssa, ɔ̄comɛ́ɛbɛ ā gē da ɔcɛ́ kú Ísrɛ̄lu ɔdā dóódu nāa gē ka ā á. Ó kōō kwu ɛ̄nɛ̄ a gē ka inu eyīpú kú ɔlɛ́ uwɔ ā, mɛ́mla ɔdā nāa gē yá ā.”

¹³ Anɔ́ɔ ɔcɛ́ kú Usiríya ā da uwá kahíníī, “Aá nyɔ̄ gaá lɛ ɛga nɛ̄ ó yɔ̄ ā má, cɛ́ɛ́ ká n̄ lɛ ācɛ tɛ̄hɔ̄ gaá lɛ ɔ́ kwú.” Anɔ́ɔ é da ɔ́ kahíníī, “Ó yɔ̄ Udótan.”

¹⁴ Anɔ́ɔ ɔcɛ́ kú Usiríya ā le aícɔ́ɔja, mla ācɛ o kpɛ́fú ɔnyā mɛ́mla aúgbɔ́ɔnya o bī kpɛ́fú kpó tɛ̄hɔ̄ gaá le íbɔm cē tū igelī nɛ̄ŋcɛ́ ā otú éyi.

¹⁵ Eko nɛ̄ ɔ̄cocɛ̄hɔ̄ kú Ɛláyíssa ā cāŋjɛ wɛ̄ɛcɛ ɔ̄cɔ̄ɔ̄cī ā, ó má aícɔ́ɔja kú Usiríya mɛ́mla aɔ́nya o bī kpɛ́fú, mɛ́mla aúgbɔ́ɔnya o bī kpɛ́fú le íbɔm cē tū uwā jīla tá. Anɔ́ɔ ó lɛ ɛgba dɛ̄ kwúcē ga ɛgiyí Ɛláyíssa kahíníī, “Ɔkpáni um, ákú alɔ mɛ ɛɛ́ n, ɔdí nɛ̄ alɔ géē yá ā gɛ?”

¹⁶ Anɔ́ɔ Ɛláyíssa da ɔ́ kahíníī, “Ā yúufi ŋ́, ohígbū ka ācɛ nēe bá mla alɔ ā fíyɛ́ ācɛ nēe bá mla uwá ā á.”

¹⁷ Anɔ́ɔ Ɛláyíssa le ɔkɔ gbā kahíníī, “Óndú, n gē gbɔ̄ɔkɔ gā uwɔ, káā lɛ ɔ̄cocɛ̄hɔ̄ kú um eyī nwūla kóō lɛ ɛbɛ má.” Anɔ́ɔ Óndú ā le eyī kú ɔyípōklóbíya ā nwūla, anɔ́ɔ ó má ka ɛyí ɛfu ā le mu mla aɔ́nya o bī kpɛ́fú, aúgbɔ́ɔnya o bī kpɛ́fú kú ɔlá le yɛ Ɛláyíssa jīla tá.

¹⁸ Eko nɛ̄ ācɛ kú Usiríya gbɔɔ́ lɛyíkwu ɔ́ ā, Ɛláyíssa le ɔkɔ gbā kahíníī, “Óndú, lɛ uwá eyī kpó pu” Anɔ́ɔ Óndú ā lɛ uwá eyī kpó pu ɛ́gɛ́nɛ̄ Ɛláyíssa gbɔ̄ɔkɔ lɛ ā.

¹⁹ Anɔ́ɔ Ɛláyíssa le tá ɛgiyí uwā anɔ́ɔ ó da uwá kahíníī, “Amānyā í wɛ ɔwɛ kú ɛga nɛ̄ aá gē nyɔ̄ ā ŋ́, ɛ̄nyā í wɛ igelī nɛ̄hi nɛ̄ aá gē nyɔ̄ ā ŋ́. Aá yɛce um ká n̄ lɛ aá bī ga ɛgiyí ɔ̄cɛ nɛ̄ aá gē dɔɔ̄kā ā.” Anɔ́ɔ Ɛláyíssa lɛ uwá kpó ga ipú igelī nɛ̄hi kú Usamérīya á.

²⁰ Abɔ̄ uwá gā Usamérīya bōōbū ā, Ɛláyíssa le ɔkɔ gbā lɛ Óndú ā kahíníī, “Óndú, lɛ eyī kú ācɛ nēe bá nyā nwūla kéē mɛ́ɛbɛ.” Anɔ́ɔ Óndú ā le uwá eyī nwūla, anɔ́ɔ é má ka aá bá ipú igelī nɛ̄hi kú Usamérīya ā.

²¹ Eko nɛ̄ ɔcɛ́ kú Ísrɛ̄lu lɛ uwá má ā, ó da Ɛláyíssa ɔ̄kā kahíníī, “Ádā um, n̄ lɛ uwá kpó ŋmó nɛɛ? N lɛ uwá kpó ŋmó ōō?”

²² Anɔ́ɔ Ɛláyíssa tá ɔ̄ ohi kahíníī, “Á gaá kpó uwā ŋmó ŋ́. A géē ŋmó ācɛ nāa kwú oyēeyī nēe kwú pīya aálagbá kú ɛfú nɛɛ? Lɛ ɔdōlé je lɛ uwá kéē lé, káā klla je odée lɛ uwá kéē gwá, cɛ́ɛ́ kéē kwúcē igbīhi ga ɛgiyí ɔcɛ́ kú uwā.”

²³ Anɔ́ɔ ɔcɛ́ kú Ísrɛ̄lu lɛ ucɛ nɛ̄hi yá lɛ uwá. Eko nēé le lé klla le gwá ā, ó le uwá kpó nū nyɔ̄ ɔlɛ́ uwā, ɛgiyí ɔcɛ́ kú Usiríya. Ó ŋmífi ɔ́ɔmā ā, ācɛ kú Usiríya í klla wā í kpɛ́fú tá ācɛ Ísrɛ̄lu ɛ́ɛ́ gɛ ŋ́ má.

É le íbɔm ce tū Usamérīya

²⁴ Igbīhāajɛ ā, Ubenhádādi, ɔcɛ́ kú Usiríya le odúúdú aícɔ́ɔja kú ɔlɛ́ nū kpó gaá le íbɔm cē tū Usamérīya jila tá.

²⁵ Ohígbū ɛ̄nyā ɔkpɛtā gbɔɔ́ ō ŋmó nɛ̄hi ajɛ kú Usamérīya. É gbɔɔ́ ō je īkpɛ̄yí ijakī ékpónú lá ikpīje nɛ̄hɛ́ ofɛnɛ. É gē je okoolo kú emī kú okóohō lá ikpīje nɛ̄hɛ́ ɛhɔ̄.

²⁶ Ɛ̄cī éyi Ɔcɛ́ kú Ísrɛ̄lu yɔ̄ í yɛ ɛyí ɔdɔ kú ɔlɛ́ kú Usamérīya. Anɔ́ɔ ɔnyā éyi dɛ̄gba kahíníī, “Tá um abɔ̄ ɔcɛ́.”

²⁷ Anɔ́ɔ ɔcɛ́ ā tá ɔnyā ā ohi kahíníī, “Ɔ́dāŋ́ ka Óndú ā í tá uwɔ abɔ̄ glá ŋ́, ɔdí nɛ̄ n géē bī le tá uwɔ abɔ̄ glá ā? N lɛ īkpɔ̄dā ámāŋ ejé dúúmā nɛɛ?”

²⁸ Anɔ́ɔ ɔcɛ́ ā klla pīya ɔkɔ da ɔnyā ā ɔ̄kā kahíníī, “Ɔdí wɛ unwalu kú uwɔ ā?” Anɔ́ɔ ɔnyā ā tá ɔ̄ ohi kahíníī, “Ɛ̄cī éyi, ɔnyā nyā da um ka aá ká ɔ̄ kwú ɔyí um ú ŋmó, kú aá kwú ɛbɛ́ nū ú he lé, cɛ́ɛ́ ká aá kɔ́ɔ̄ géē je ɔyí nū he lé ɛ̄cī ɔhá.

²⁹ Anɔ́ɔ alɔ kwú ɔyí um ú ŋmó, kwú ɔ̄ ú he lé. Amáŋ ɛ̄cī ɔ́mpa nɛ̄ n da ɔ́ ka ālɔ̄ kwú ɔyí nū ŋmó, cɛ́ɛ́ kú ālɔ̄ je ɛbɛ́ nū he lé ā, ó kwú ɔyí nū ú gaá tayínū.”

³⁰ Eko nɛ̄ ɔcɛ́ lɛ ɛ̄nyā pó ā, ó kwú īlī kú nū ú híla. Anɔ́ɔ ó kwú īlī ekwu ú kpó wu iyē. Anɔ́ɔ ācɛ nēe bá gē yɛ ā má ɔ̄ abɔ̄ ó le īlī ekwu klá iyē.

³¹ Anɔ́ɔ ó kahíníī, Ɔwɔicō kɔ́ɔ̄ lɛ anúɔ ŋmó, ɔ́dāŋ ka anúɔ í je Ɛláyíssa īkpɛ̄yí hɛ́ ícɛ ɛ́ɛ́ ka otú kɔ́ɔ̄ bī ŋ́.

³² Anɔ́ɔ ó lɛ ɛhɔ̄ tū kéē lɛ Ɛláyíssa hīgwú wā gé lɛ anúɔ. Ɛláyíssa yɔ̄ ɔlɛ́ nū mla anyākwɔ́cɛ kú igelī nɛ̄hi ā, nēe gaá má ɔ̄ ā, ɛ́ɛ nɛ̄ olɛhɔ̄ kú ɔcɛ́ ā wā á. Anɔ́ɔ Ɛláyíssa da uwá kahíníī, “Ɔ̄cɛ o ŋmó ɔ̄cɛ ɔ́ɔmā, le ɔ̄cɛ éyi tɛ̄hɔ̄ wā kóō lɛ um ŋmó ɛɛ́ n. Okwɔɔkwu nyā, ɔ́dāŋ ka ɔ̄cocɛ̄hɔ̄ kú nū ā gā amānyā, aá lɛ ɔwɛ gwū, cɛ́ɛ́ aá bī ɔ̄ ká. Ɔcɛ́ abɔ̄yī nū ā tá ɔ̄ igbīhi gē wā.”

³³ Ó kɛlā kwɛyí ɛ́ɛ́ nɛ̄ ɔcɛ́ ā wā gaá da ɔ́ kahíníī, “Óndú ā, abɔ̄yī nū bī unwalu nyā wā í klá alɔ á, ɔdíyá nɛ̄ n cíkā ō gbēyī nū kɔ́ɔ̄ lɛ odée yá kpɔ́ ɛ́ɛ mā ā?”