2 AƆ́CƐ́ 5 - Ubáyíbu kú Idɔma

Agwú kú Unáaman mɛ

¹ Ɔ̄cɛ éyi lé ka Unáaman. Anú wɛ otrɛ̄yí kú aícɔ́ɔja kú Usiríya á. Ó wɛ ɔ̄cɛnɛ̄hi. Ɔcɛ́ kú Usiríya klla í lɛ ojīlīmā ce ɔ́ nɛ̄hi, ohígbū ka Óndú ā bī Unáaman le yá aólɛlā kú ācɛ Usiríya lé. Ó wɛ ícɔ́ɔ́ja olɔfú nɛ̄hi, amáŋ ó lɛ agwú.

² Eko éyi nɛ̄ ācɛ kú Usiríya wā í hɛ́ ācɛ Ísrɛ̄lu pllaka ā, é kwú ɔyínɔ̄nyā nɛ̄ŋcɛ́ éyi kú Ísrɛ̄lu ú ga ɔlɛ́ uwā. Anɔ́ɔ ó gaá kwú pīya ɔ̄cocɛ̄hɔ̄ kú ɔnyā kú Unáaman.

³ Ɛ̄cī éyi ó da ɛ́nɛ́ ɔlɛ́ nū ā kahíníī, “Ɔ́dāŋ́ ka ɔkpáni um le tá ɛgiyí ɔ̄comɛ́ɛbɛ éyi, nōo yɔ̄ Usamérīya ā nɛɛ, ó géē lɛ agwú kú nū nyā yá kóō mɛ.”

⁴ Eko nɛ̄ Unáaman lɛ ɛlā nyā pó ā, ó le tá ɛgiyí ɔcɛ́ gaá le ka lɛ ɔ́.

⁵ Anɔ́ɔ ɔcɛ́ ā tá ɔ̄ ohi kahíníī, “Mīyɛ ɔkpá nyā gē lɛ ɔcɛ́ kú Ísrɛ̄lu.” Unáaman gbɔɔ́ ō nyɔ̄ mla īkpō ije nɛ̄hɛ́ úlā ofɛtá ce igwɛ́ɛhɔ̄ (1,500), mɛ́mla īkpō ugóolu (oje ɔdɔ) úlā igwɛ́ɛhɔ̄ (6,000), mɛ́mla ɔtóngwō ɛyɛ́ɛyɛ́yí igwó.

⁶ Ɔdā nēé tá tū iléta nɛ̄ ó bī gé lɛ ɔ̄cɛ kú Ísrɛ̄lu ā yɔ̄ á, “Ɛ̄nyā wɛ Unáaman otrɛ̄yí kú aícɔ́ɔja kú ɔlɛ́ um á, lɛ ɔ́ hɛ́tá ŋmá agwú kú nū ā gā um.”

⁷ Eko nɛ̄ ɔcɛ́ kú Ísrɛ̄lu le iléta nyā jé ā, ó lɛ īlī kú nū híla bónū, anɔ́ɔ ó kahíníī, “N wɛ Ɔwɔicō nōo gē ŋmó ɔ̄cɛ klla ī je ɔ̄cɛ héyī ā nɛɛ, ɛ́ɛ́ nɛ̄ ɔcɛ́ kú ācɛ Usiríya gē tū olagwú ɛhɔ̄ fu um kú n̄ lɛ ɔ́ hɛ́tá āa? Aá leyī yɛ ɔ́, kú aá má, ɛ́gɛ́nɛ̄ ó gē dɔɔ̄kɛ̄lā um ā ɛ́”

⁸ Amáŋ eko nɛ̄ Ɛláyíssa le pó ka, ɔcɛ́ kú Ísrɛ̄lu ɔ́ɔ le īlī kú nū híla bónū ā, ó lɛ ɛhɔ̄ tū gaá da ɔ́ ɔ̄kā kahíníī, “Ɔdíyá nāa híla īlī kú uwɔ bónū ā? Kwú ɔ̄cɛ ā í tɛ̄hɔ̄ fu um, cɛ́ɛ́ kóō le jé ka ɔ̄comɛ́ɛbɛ ɔ́ɔ yɔ̄ Ísrɛ̄lu.”

⁹ Anɔ́ɔ Unáaman le yɛ mla aɔ́nya, mɛ́mla ugbɔ́nya kú nū gaá māháyi okómpinu ɔlɛ́ Ɛláyíssa.

¹⁰ Anɔ́ɔ Ɛláyíssa lɛ ɛhɔ̄ tū fu ɔ́ kahíníī, “Nyɔ̄ gaá le iyē gwá ipú ísu kú Ujɔ́dan igbo ahāapa, agwú kú uwɔ géē mɛ.”

¹¹ Amáŋ, Unáaman kwú cɔ̄nū klla nyɛ̄ɛ̄ gbɔɔ́ ō da iyī nū kahíníī, “N gbɛlá ka ó géē wā gaá háyi iyɔ̄bū um, cɛ́ɛ́ ó lɛ iyē kú Óndú, Ɔwɔicō kú nū hī, cɛ́ɛ́ ó lɛ abɔ̄ kú nū ma um iyē, ɛgiyí agwú kú um ā, cɛ́ɛ́ ká agwú kú um ā kóō mɛ nɛ̄ n.”

¹² Unáaman klla kahíníī, “Ó wɛ ísu kú Abāna mɛ́mla Ufápa kú Udamáskɔ̄si ā lɔhi fíyɛ́ odúúdú ísu kú Ísrɛ̄lu ā ŋ́ nɛɛ?” Anɔ́ɔ ó kwú cɔ̄nū nɛ̄hi gbɔɔ́ ō nyɛ̄ɛ̄ á.

¹³ Amáŋ ācocɛ̄hɔ̄ kú nū ā wā gaá da ɔ́ kahíníī, “Ɔkpáni ɔ́dāŋ́ ka ɔ̄comɛ́ɛbɛ kú Ɔwɔicō ka awɔ ɔ́ɔ yá ɔdā ōnwuné fíyɛ́ ɛ̄nyā, á gaá yá ɔ̄ glá ŋ́ nɛɛ? Ɔdíyá nɛ̄ á gáā yá ɔdā lígíí nɛ̄ ó da uwɔ ka, ‘Lɛ iyē gwá ká ā kwú yá yēŋēē ā ŋ́ mā?’”

¹⁴ Anɔ́ɔ Unáaman le yɛ gaá lɛ iyē wu ísu kú Ujɔ́dan igbo ahāapa ɛ́gɛ́nɛ̄ ɔ̄comɛ́ɛbɛ kú Ɔwɔicō ā ka lɛ ā. Anɔ́ɔ agwú kú nū mɛ, ɔkpíyē kú nū klla kwú yá mɛ́ɛ́lɛ bɛ̄ɛka ɔkpíyē kú ɔyípɛ̄nɛŋcɛ́ obene ā.

¹⁵ Anɔ́ɔ ó kwúcē gā ɛgiyí ɔ̄comɛ́ɛbɛ kú Ɔwɔicō ā mla odúúdú ācɛ nēe yɛce ɔ́ ā. Ó gaá māháyi iyɔ̄bū nū, anɔ́ɔ ó kahíníī, “N le jé ɛɛ́ ka, Ɔwɔicō ɔhá dúú í yɔ̄ ɛga dúúmā ipú ɛcɛ nyā ɛ́ɛ́ gɛ ŋ́, ayíka Ɔwɔicō kú ācɛ Ísrɛ̄lu ōfōōfūnū nɛ. Ohígbū ɔ́ɔmā, miyɛ ɛhi nyā ŋmá abɔ̄ kú ɔ̄cocɛ̄hɔ̄ kú uwɔ.”

¹⁶ Anɔ́ɔ Ɛláyíssa tá ɔ̄ ohi ka, ‘Ɛ́gɛ́nɛ̄ Óndú ā nɛ̄ n gē gbā ā yēeyī ā, ń gáā mīyɛ ɔdā dúúmā ŋmá abɔ̄ kú uwɔ ŋ́.” Ó gbɔ̄ɔkɔ lɛ ɔ́ kóō mīyɛ. Amáŋ Ɛláyíssa tá.

¹⁷ Anɔ́ɔ Unáaman kahíníī, “Ɔ́dāŋ ka á mīyɛ ɔdā dúúmā ŋmá abɔ̄ um ŋ́, ayíka a cɛ̄ kú n̄ lɛ iyo kú ɔjɛ nɛ̄ ijakī ɛpa géē bī ŋmá ajɛ Ísrɛ̄lu glá ā miya gā um. Ohígbū ka o ŋmá abālɔbányā, ami, ɔ̄cocɛ̄hɔ̄ kú uwɔ í gáā gwɛ́ɛya lɛ ɔwɔ ɔhá dúúmā ɛ́ɛ́ gɛ ŋ́, ayíka Óndú, Ɔwɔ̄icō kú Ísrɛ̄lu ā ōfōōfūnū nɛ.

¹⁸ N gbɛlá ka Óndú ā í je yá um ɛhi, eko nɛ̄ n nyɔ̄ mla ɔcɛ́ kú ɔlɛ́ um ga agbla kú ɛcí kú Urímmɔ̄n, ɔwɔ kú Usiríya gaá gbā ɔ̄ ɛ̄gbā ā. Óndú ā kē í je yá um ɛhi piíí.”

¹⁹ Anɔ́ɔ Ɛláyíssa da ɔ́ ka,” Nyɔ̄ ɛbɔ́.” Amáŋ, abɔ̄ Unáaman le yɛ kpií ŋmá ɛgiyí nū ā,

²⁰ Ugɛ́hási, ɔ̄cocɛ̄hɔ̄ kú Ɛláyíssa, ɔ̄comɛ́ɛbɛ kú Ɔwɔicō ā da īyī nū kahíníī, “Má ɔ ɛ́ɛ́, ɔkpáni um lɛ Unáaman, ɔ̄cɛ Usiríya nyā hɛ́tá, ó kē mīyɛ ɔdā dúúmā ŋmá ipú ɛhi nɛ̄ ó bī wā ā ŋ́. Kɛ́lā Ɔwɔicō, n géē nū ɔ̄ nyɔ̄ ká n̄ gaá mīyɛ odée ŋmá ɛgiyí nū.”

²¹ Anɔ́ɔ Ugɛ́hási le ɔgwu Unáaman tá á. Eko nɛ̄ Unáaman le ɔ́ má abɔ̄ nɛ̄ ó yɔ̄ ī kwinya ce ɔ́ yɔ̄ ī wā ā, anɔ́ɔ ó le hilatá wāajɛ ŋmá ugbɔ́ɔnya kú nū ā. Anɔ́ɔ ó le ɔ̄kā da kahíníī, “Ɔdée le yá nɛɛ?”

²² Anɔ́ɔ Ugɛhási da ɔ́ kahíníī, “Ɔdā dúúmā ɔhá í yá nóo. Ɔkpani um tū um ɛhɔ̄ fu uwɔ ka, obōōbū nāa nyɛ̄ɛ̄ ā aúgbɔga kú ɔ́wá kú ācomɛ́ɛbɛ ɛpa ɛ́ɛ gaá ce anɔ́ɔ ŋmá Ɛ́frem. Ka āwɔ̄ ɔ́ɔ̄ lɛ ije nɛ̄hɛ́ úlā ahāapa ce ofu igwú (3,000) je gā um mɛ́mla otóngwō ɛpa.”

²³ Anɔ́ɔ Unáaman tá ɔ̄ ohi kahíníī, “Miyɛ ije nɛ̄hɛ́ úlā igwɛ́ɛhɔ̄ (6,000), ó ka ɔ́ɔ̄ mīyɛ piíí, anɔ́ɔ ó lɛ ije ā gbō ɛkpa ɛpa lɛ ɔ́ mɛ́mla otóngwō ɛpa ā. Anɔ́ɔ ó kwú uwā ú kpó ce ācocɛ̄hɔ̄ kú nū ɛpa ā ɛyí á. Anɔ́ɔ ó le uwá tū gɔbū lɛ Ugɛ́hási á.

²⁴ Eko nēé ga ɛyí ɛfu ā, Ugɛ́hási mīyɛ iyó ā ŋmá uwá ɛyí. Ó kwú ɔ̄ ú kpó tū ipú inu, anɔ́ɔ ó da ācocɛ̄hɔ̄ ā kéē nyɔ̄ mɛ́ɛnɛ.

²⁵ Ó le tá ipú inu gaá háyi iyɔ̄bū Ɛláyíssa ɔkpáni nū, anɔ́ɔ Ɛláyíssa da ɔ́ ɔ̄kā kahíníī, “Iní nāa nyɔ̄ ā, Ugɛ́hási?” Anɔ́ɔ ó da ɔ́ kahíníī, “Ɔ̄cocɛ̄hɔ̄ kú uwɔ í ga ɛga dúúmā ŋ́.”

²⁶ Amáŋ Ɛláyíssa da ɔ́ ɔ̄kā kahíníī, “Alelékwū kú um í nyɔ̄ mla awɔ eko nɛ̄ Unáaman hīlatá wāajɛ ŋmá úgbɔ́nya gaá jīla awɔ ɔwɛ ā ŋ́ nɛɛ? Eko nyā í wɛ eko nɛ̄ ɔ̄cɛ í mīyɛ ije, otóngwō, anɔ̄ kú ɔcí nēé hī ka ólīfu, aálá, aɛ́na, aɔ́fiyɛ nɔ̄nyā mɛ́mla ɔfiyɛ nɔ̄nyīlɔ ŋ́.

²⁷ Ohígbū ɔ́ɔmā ā agwú kú Unáaman géē wā í klla awɔ mɛ́mla ipɔ́ɔma kú uwɔ piyóó ipú ɛcɛ nyā.” Anɔ́ɔ Ugɛ́hási kwú gbagwú kwámm bɛ̄ɛka owú otutú ā, ŋmá iyɔ̄bū nū á.