2 AƆ́CƐ́ 4 - Ubáyíbu kú Idɔma

Ɛláyíssa tá ɔnyōkwū éyi abɔ̄

¹ Ɔnyōkwū kú ɔ̄comɛ́ɛbɛ éyi kú ɔ́wá kú ācomɛ́ɛbɛ kú Óndú ā wā í da Ɛláyíssa kahíníī, “Ɔkpani ɔbá um gekwú ɛɛ́. Ɛ́gɛ́nɛ̄ a jé ā, okwūmā ɔbá um ā ī gbā Óndú ā ɛ̄gbā. Amáŋ ó le ulé bī ɛ́ɛ́ nɛ̄ ó kwú á. Ɔ̄cɛ nɛ̄ ó bī ɔ̄ ulé ā gā gáā kpó ayí um ɛpa ā kéē cɔ̄ɔfiyɛ lɛ ɔ́ kwɛyí ulé nɛ̄ ɔbá um bī ɔ̄ ā ɛɛ́ n.”

² Anɔ́ɔ Ɛláyíssa da ɔ́ ɔ̄kā kahíníī, “Ɔdí nāa tíne ká n yá ga uwɔ ā? Ɔdí nāa lɛ ipú inu ɔlɛ́ uwɔ ā?” Anɔ́ɔ ɔnyā ā tá ɔ̄ ohi kahíníī, “Ń lɛ ɔdā dúúmā inu nóó, ayíka ɔjá kú anɔ̄ kú ɔcí nēé hī ólīfu ā ōfōōfūnū.

³ Anɔ́ɔ ó tá ɔnyā ā ohi ka ɔ́ɔ nyɔ̄ gaá lɛ aɔ́já nɛ̄ ɔdā dúúmā í yɔ̄ uwā ŋ́ mā ā ba ŋmá ɛgiyí aɔ́mpa nū lɛwa lɛwa.

⁴ Cɛ́ɛ́ anú mɛ́mla ayí nū kéē le pé ga inu ɔlɛ́ uwā, kɛ́ɛ̄ lɛ ɔwɛ gwū, cɛ́ɛ́ kɛ́ɛ̄ gbɔɔ́ ō pīya anɔ̄ ā tū ipú aɔ́já, nēé ba ā. Ó da ɔ́ ka ɔjá dúúmā nōo kwú mu, ɔ́ɔ̄ kwu ɔ̄ ú háyi ɛga ɔhá, cɛ́ɛ́ kɛ́ɛ̄ kwú ɔjá ɔhá ú.

⁵ Anɔ́ɔ ɔnyā ā le tá ipú inu ɔlɛ́ nū mla ayí nū. É le ɔwɛ gwū, anɔ́ɔ ó gbɔɔ́ ō pīya anɔ̄ kú ɔcí nēé hī ólīfu ā tū aɔ́já áncā ā, éyééye ɛ́gɛ́nɛ̄ ayí nū géē bī wā gé lɛ ɔ́ lɛ glá ā.

⁶ Eko nɛ̄ ó lɛ odúúdú aɔ́já ā kpó mu ā, ó da ayí nū ɔ̄kā kahíníī, “Ɔja dúúmā í yɔ̄ gɛ ŋ́ ŋ̄?” Anɔ́ɔ ayí nū tá ɔ̄ ohi ka ɔjá ámōōmɛ ā ɔ́ɔ yɔ̄ abɔ́ɔ mɛ́ɛ̄ á. Anɔ́ɔ anɔ̄ kú ɔcí nēé hī ka ólīfu ā í klla pɛ́ wāajɛ ɛ́ɛ́ gɛ ŋ́ má.

⁷ Ɔnyā ā kwúcē le tá ɛgiyí Ɛláyíssa gaá da ɔ́ ɔdā nēé yá ā. Anɔ́ɔ ó da ɔnyā ā kahíníī, “Nyɔ̄ gaá kwú anɔ̄ ā ú kpó lá. A géē má ije ŋmá anú nāa géē le cíla ulé nɛ̄ ɔbá uwɔ bī ā mɛ́mla ɛ̄nɛ̄ awɔ mɛ́mla ayí uwɔ géē le lá ɔdōlé glá kpɔ́.”

Ɛláyíssa mɛ́mla ɔnyā olɔdu kú Ussúnɛm ā

⁸ Ɛcí éyi, Ɛláyíssa le tá Ussúnɛm, ɛga nɛ̄ ɔnyā olɔdu éyi lā ā. Ɔnyā a le ɔ́ hīgwú kɔ́ɔ̄ wā í le ɔdōlé lé ɔlɛ́ anúɔ. O ŋmá eko ɔ́ɔmā gɔbū ā, eko dúú nɛ̄ Ɛláyíssa le tá Ussúnɛm, abɔ́ɔ nɛ̄ ó gē lé ɔdōlé mɛ́ɛ̄ á.

⁹ Anɔ́ɔ ɔnyā ā da ɔbá nū kahíníī, “N gbɛlá ka, ɔ̄cɛ nōo gē wā amānyā eko dóódu nyā, wɛ ɔ̄cɛ otīihɔ nɛ̄ n.

¹⁰ Ālɔ̄ lɛ inu lígíí éyi gwó kwu ɛyí inu kú alɔ ā lɛ ɔ́, cɛ́ɛ́ alɔ kwú agōdō, úgādā, agege ú kpó tá ɔ̄ mɛ́mla utébulu éyi, cɛ́ɛ́ eko dúúmā nɛ̄ ó gā amānyā kóō wā í gbɔga anú.”

¹¹ Ɛ̄cī éyi Ɛláyíssa pīyɛyí wā Ussúnɛm gaá gbɔga ipú inu nēé gwō gbēyī nū ā.

¹² Anɔ́ɔ ó le da Ugɛ́hási, ɔ̄cocɛ̄hɔ̄ kú nū ā kóō gaá lɛ ɔnyā ā hīgwú wā. Eko nɛ̄ ɔnyā ā gā ā,

¹³ Ɛláyíssa da Ugɛ́hási kahíníī, “Da ɔnyā ā ɔ̄kā, ɔdí nɛ̄ n géē yá lɛ ɔ́, ohígbū unwalu kú um kpɛ́mm nɛ̄ ó húmáyī bī ce iyī nū ā. Ó klla yɔ̄ ī je ɔdōlé ga um piyóó ā? Eko ōhī ó gē tíne ká n̄ ga ɛgiyí ɔcɛ́, amáŋ ka otrɛ̄yí kú aícɔ́ɔja ā gáā lɛ ɛlā olɔhi éyi ka lɛ uwá ohígbū nū.” Anɔ́ɔ ɔnyā ā da ɔ́ kahíníī, “Ɔdā dóódu nɛ̄ n cɛgbá ā, n le lɛ ipú ācɛ ɔlɛ́ um amānyā ɛɛ́.”

¹⁴ Anɔ́ɔ Ɛláyíssa da Ugɛ́hási ɔ̄kā kahíníī, “Ɔdí nɛ̄ n géē yá lɛ ɔ́ mɛ́ɛ̄ ā?” Anɔ́ɔ Ugɛ́hási tá Ɛláyíssa ohi kahíníī, “Ɔnyā ā wɛ ɔdɔma, ɔbá nū kē le hīla ɛɛ́.”

¹⁵ Anɔ́ɔ Ɛláyíssa da ɔ́ kahíníī, “Da ɔnyā ā kóō gā amānyā.” Anɔ́ɔ ɔnyā ā gā gaá māháyi okómpíinu á.

¹⁶ Ɛláyíssa da ɔ́ kahíníī, “Eko ɛ́gɛ́nyā kú iháyí ɔhá, a géē bī ɔyí nɔ̄nyīlɔ éyi abɔ̄.” Anɔ́ɔ ɔnyā ā tá ɔ̄ ohi kahíníī, “Ehée ɔkpani, ā híī kɛ̄mgbɛ̄ gā um ŋ́, ohígbū ka a wɛ ɔ̄cɛ kú Ɔwɔicō.”

¹⁷ Amáŋ ɛ́gɛ́nɛ̄ Ɛláyíssa ka lɛ ā, ɛpllá eko kú iháyí ɔhá ɔ́ɔmā ā, ó lɛ ɔyí nɔ̄nyīlɔ éyi ma.

¹⁸ Igbīhāajɛ eko nɛ̄ ācɛ gē cē ɔdɛ̄hɔ̄ ā, ɔyí ā le tá ɛhɔ̄ mla ádā nū ɔ̄cɔ̄ɔ̄cī éyi gaá cē ɔdɛ̄hɔ̄.

¹⁹ Acígilí ɔyí ā gbɔɔ́ ō dɛ̄gba kahíníī, “Īkpɛ̄yí nɛ, īkpɛ̄yí nɛ.” Anɔ́ɔ Ádā nū da ɔ̄cocɛ̄hɔ̄ kú nū ā kahíníī, “Aá lɛ ɔ́ bī gé lɛ ɛ́nɛ́ nū.”

²⁰ Anɔ́ɔ é kwú ɔyí ā ú gé lɛ ɛ́nɛ́ nú á. Ó bī ɔyí ā bɔ́tū jāā gbó ɔlɛ́ɛnɔ, anɔ́ɔ ɔyí ā gekwú á.

²¹ Ó kwú ɔyí ā ú ga inīīcō kú Ɛláyíssa, anɔ́ɔ ó kwú ɔ̄ ú gwutá agōdō kú Ɛláyíssa le ɔwɛ gwū tū ɔ̄, anɔ́ɔ ó nyɛ̄ɛ̄ á.

²² Anɔ́ɔ ó le ɔbá nū hīgwú kahíníī, “Lɛ ɔ̄cocɛ̄hɔ̄ éyi tɛ̄hɔ̄ mla um fíyaa, ká n̄ ga ɛgiyí Ɛláyíssa, n géē kwúcē wā ānāānā.”

²³ Anɔ́ɔ ɔbá nū da ɔ́ ɔ̄kā kahíníī, “Ɔdí yá nāa géē nyɔ̄ ícɛ ā, ícɛ í wɛ Usábāti, ámāŋ ucɛ kú ɔyā ɛ̄yīpɛ̄ ŋ́.” Anɔ́ɔ ó tá ɔbá nū ohi kahíníī, “Ā lɛ ɛlá wu ɔ́ ŋ́.”

²⁴ Anɔ́ɔ ɔnyā ā cɛ̄ lɛ uwá kwú ɔdōcīce ú ce ijakī ā, anɔ́ɔ ó da éyi kú ɔ̄cocɛ̄hɔ̄ ā kahíníī, “Cɛ̄ lɛ ijakī ā kóō kwinya lɔfú ɛ́gɛ́nɛ̄ ó kwu lɛ glá ā, ā híī cɛ̄ lɛ ɔ́ kwú ikpó tū ŋ́, jāā gbéeko nɛ̄ n da uwɔ ka ā yá lɛ ā.”

²⁵ Anɔ́ɔ é gbɔɔ́ le tá ɛyí ɛfu kú Ukámɛ̄lu, ɛga nɛ̄ Ɛláyíssa yɔ̄ ā. Eko nɛ̄ Ɛláyíssa lɛ ɔ́ má ŋmá ɛcɛɛcɛ ā, ó da Ugɛ́hási kahíníī, “Má ɔnyā kú Ussúnɛm ā yɔ̄ í wā abɔ́ɔ á.

²⁶ Nyɔ̄ ɛgiyí nū fíyaa kú ā da ɔ́ ɔ̄kā, ɔ́dāŋ ka ɔdā dúúmā í yá ɔbá nū mɛ́mla ɔyí nū ŋ́.” Eko nɛ̄ ɔ̄cocɛ̄hɔ̄ ā le tá ɛgiyí ɔnyā ā, ó da Ugɛ́hási ka ɔdā dúúmā ɔ́ yá ŋ́, ka, aá bá lɔhi.

²⁷ Amáŋ eko nɛ̄ ó gā ɛgiyí Ɛláyíssa ā, ó gáā wúla klá ajɛ iyɔ̄bū nū klla gaá bī ɔ̄ ikpó. Ugɛ́hási gáā lɛ abɔ̄ kwu ɔ̄ nyɔ̄ ŋmá ɛgiyí Ɛláyíssa, amáŋ Ɛláyíssa da Ugɛhási ká ɔ̄ habɔ̄ tā cíí, ka ɔ́ɔ má ɛ́gɛ́nɛ̄ ɔtū ɔ́ɔ yɔ̄ ī wú ɔ̄ ohígbū unwalu ā ŋ́ nɛɛ? Ó ka Óndú ā ɔ́ ka ɔdā dúúmā lɛ anúɔ lɛyíkwu ɔ́ ɛɛ́ ŋ́.

²⁸ Ɔnyā ā da ɔ́ kahíníī, “Ɔkpáni, n ba ɔyí ŋmá ɛgiyí uwɔ ɔɔ? Ń tɛtɛ da uwɔ ka ā yá ká n̄ híī leyīce ɔyí dúúmā ŋ́ nɛɛ?”

²⁹ Anɔ́ɔ Ɛláyíssa da Ugɛhási kahíníī, “Kwú okwutɛ kú um, káā nyɔ̄ fíya. Ā māháyi ɔwɛ hókónu tū ɔ̄cɛ dúúmā ŋ́, amáŋ ɔ́dāŋ ka ɔ̄cɛ dúúmā lɛ okónu hɛ́ tū uwɔ, ā híī kpó eko bónū káā cɛ̄ okónu kú nū ŋ́. Nyɔ̄ bōōbū ga ipú inu ā, ká ā bī okwutɛ kú um ā kwu īkpɛ̄yí kú ɔyí ā.”

³⁰ Anɔ́ɔ ɔnyā ā da Ɛláyíssa kahíníī, “Ɛ́gɛ́nɛ̄ a yēeyī nɛ̄ Óndú ā klla yēeyī ā, ń gáā nyɛ̄ɛ̄ gwū uwɔ tá ŋ́.” Anɔ́ɔ Ɛláyíssa cāŋjɛ gbɔɔ́ ō nyɔ̄ mla ɔnyā ā á.

³¹ Amáŋ Ugɛ́hási le yɛ gaá kwú okwutɛ kú Ɛláyíssa ā ú miya kwu ɔyí ā īkpɛ̄yí, amáŋ ɔdā dúúmā í yá ŋmá anú ŋ́. Anɔ́ɔ ó kwúcē wā í le da Ɛláyíssa kahíníī, “Ɔyí ā í héyī nóó.”

³² Eko nɛ̄ Ɛláyíssa le bēé wā ipú inu ā, ó má okwū kú ɔyí ā gwutá agōdō.

³³ Anɔ́ɔ ó lɛ ɔwɛ gwū, gbɔɔ́ ō gbɔ̄ɔkɔ lɛ Óndú á.

³⁴ Ó gáā gwutá klá ɔyí ā, kwú okónu, īkpēyī, mɛ́mla abɔ̄ kú nū ú klá ákú ɔyí ā. Abɔ̄ ó gwutá klá ɔyí ā, iyē kú ɔyí gbɔɔ́ ō kwɔ́lá

³⁵ Ɛláyíssa cāŋjɛ, pīya ipú inu ā bilíbilí, anɔ́ɔ ó klla gaá lɛ īyī nū nāŋ́daa klá ɔyí ā kpɔ́. Anɔ́ɔ ɔyí ā le ácihóo tá igbo ahāapa á, anɔ́ɔ ó kwú eyī nwūla á.

³⁶ Ɛláyíssa le Ugɛ́hási hīgwú kɔ́ɔ̄ lɛ ɛ́nɛ́ kú ɔyí ā hīgwú wā. Eko nɛ̄ ɛ́nɛ́ kú ɔyí ā gā inu ā, Ɛláyíssa da ɔ́ kahíníī, “Kwú ɔyí uwɔ ú, anú yɔ̄ á.”

³⁷ Ɔnyā ā má gbo klá ajɛ gblugudu iyɔ̄bū Ɛláyíssa, lɛ eyī pīya kláajɛ. Anɔ́ɔ ó kwú ɔyí nū ú nyɛ̄ɛ̄ á.

Úklɔ́ idáagó ɛpa kú Ɛláyíssa ɔhá kpɔ́

³⁸ Ɛláyíssa gā Ugígalu eko nɛ̄ ɔkpɛtā yɔ̄ ī ŋmó nɛ̄hi. Ó yɔ̄ í nwū ayí kú ācomɛ́ɛbɛ ā ɔkpá. Ó da Ugɛ́hási kahíníī, “Kwú ɛ̄hī nɛ̄hi ā ú ce ɔlá kú aá lɛ apɛ he, lɛ ɔ́wá kú ācomɛ́ɛbɛ ā.

³⁹ Éyi kú uwā le tá ipácí kóō gaá le ēpū hɛ́, anɔ́ɔ ó le ɔcí ufáyin kú ipácí má, anɔ́ɔ ó lɛ ɔ́ gbɛ́ mɛ́mla ógo apɛ lígíí alɛwa kú nū. Anɔ́ɔ ó gaá le ɔ́ kpó hɛ́ tū ipú apɛ nɛ̄ ó yɔ̄ ī he ā, amáŋ ó jé ɔdā nɛ̄ ó wɛ a ŋ́. Anɔ́ɔ eko nɛ̄ ó le jé ā,

⁴⁰ é lɛ ɔ pīya tū ɔdée lɛ ācɛ ā kéē lé. Amáŋ okónu nɛ̄ uwá le jé ɔ̄ má ā, é le ɛgba dɛ̄ kahíníī, “Ɔ̄comɛ́ɛbɛ kú Ɔwɔicō, ɔdā ō ŋmó ɔ̄cɛ yɔ̄ ipú ɛ̄hī ɔ́ɔmā abɔ́ɔ á.”

Ɛcí ō ŋmó ɔ̄cɛ

⁴¹ Anɔ́ɔ Ɛláyíssa da uwá kahíníī, “Aá le Umu bī gē um.” Anɔ́ɔ é le bī gē lɛ ɔ́ á, anɔ́ɔ ó kwú ɔ̄ ú pīya tū ipú ɛ̄hī á. Anɔ́ɔ ó da uwá ka, aá je lɛ ācɛ kéē lé mɛ́ɛ́nɛ.” Anɔ́ɔ é le lé klla le má ka ɔdōbɔ̄bí dúúmā ɔ́ɔ́ yɔ̄ anú ɛ́ɛ́ gɛ ŋ́. Ó kwú lɔhi ɛɛ́.

⁴² Eko ɔhá, ɔ̄cɛ éyi ŋmá Ubaalssalíssa lɛ igbō kú īkpɔ̄dɛ̄hɔ̄ ɛ̄yīpɛ̄ ofu bī gē lɛ Ɛláyíssa mla ɔcí igbāmkpa ō hile nēe wɛ ɛ̄yīpɛ̄ dúú ā. Ɛláyíssa da Ugɛ́hási kɔ́ ɔ̄ je lɛ ɔ́wá kú ācomɛ́ɛbɛ ā kéē lé.

⁴³ Amáŋ ó tá Ɛláyíssa ohi kahíníī, “A gbɛlá ka ɛ̄nyā jīla ācɛ ofɛhɔ̄ glá āā?” Anɔ́ɔ Ɛláyíssa tá ɔ̄ ohi kahíníī, “Je lɛ uwá kéē lé, ohígbū ka Óndú ā keé géē lé, ɔ́ɔ klla í hile kpɔ́.”

⁴⁴ Anɔ́ɔ Ugɛ́hási kwú ɔdōlé ā ú kpó ce iyɔ̄bú uwā á, ɛ́gɛ́nɛ̄ Óndú ā ka lɛ ā, é le lé, lɛ ipú nū, ɔdōlé ā klla hile kpɔ́.