2 AƆ́CƐ́ 25 - Ubáyíbu kú Idɔma

É kwú Ujerúsālɛm í yíifu dúúdú

¹ Usedekíya le īkpɛ̄yí olɔfú yá tá Unebúkádinēsa ɔcɛ́ kú Ubábīlɔn, ka anúɔ klla gáā yɔ̄ ɛháajɛ kú nū kóō gbō anúɔ ɛ́ɛ́ gɛ ŋ́. Anɔ́ɔ ipú ɛ̄cī igwó kú ɔyā igwó kú iháyí ɔ́mahāanɛ nɛ̄ Usedekíya ce ɔcɛ́ ā, Unebúkádinēsa le odúúdú aícɔ́ɔja kú nū ā kpó wā Ujerúsālɛm, gaá le íbɔm cē tū ɔ̄. Ó le aáklɔ̄kpɛ kú ɛ́fú kú uwā cēce eyiyɛ̄cɛ kú igá kú Ujerúsālɛm. Ó klla le úbɔ̄ kú íbɔm o licō nɛ̄hi ma yɛ ɔdɔ kú Ujerúsālɛm ā jīla tá, cɛ́ɛ́ kú ɔ̄cɛ dúúmā kú ipú igelī nɛ̄hi ā kóō híī bū uwā abɔ̄ glá ŋ́.

² É le íbɔm ā cē tū ācɛ kú Ujerúsālɛm lɛ ā jāā gbō ipú iháyí ɔmigwóléyi nɛ̄ Usedekíya ce ɔcɛ́ ā.

³ Ɛ̄cī ɔ́mahāanɛ kú ɔyā ɛnɛ kú ipú iháyí ɔ́migwóléyi nɛ̄ Usedekíya ce ɔcɛ́ ā, ɔkpɛtá nɛ̄hi gbɔɔ́ ō ŋmó. Ɔkpɛtā ŋmó gbóógbó, anɔ́ɔ ɔdā dúúmā í yɔ̄ nɛ̄ ācɛ kú Ujúda gē lé gɛ ŋ́.

⁴ É le ɔdɔ kú igelī nɛ̄hi kú Ujerúsālɛm ā hɛ́bū. Abɔ̄ aícɔ́ɔja kú Ubábīlɔn le yɛ Ujerúsālɛm jīla tá nááná ā, odúúdú aícɔ́ɔja kú Ujúda ā kwú pɛ kwu otú. É le kwu bū ɔwɛ kú ɛhɔ̄ ɔlɛ́ ɔcɛ́ gaá kwú bū ɔwɛ nōo yɛ í kwu ɔdɔ kú igelī nɛ̄hi ā, anɔ́ɔ é le kwu lɛyíkwu ɔpɛ́ kú Ujɔ́dan á.

⁵ Amáŋ aícɔ́ɔja kú Ubábīlɔn ā le inya nū Usedekíya jāā gbéeko nēé gaá lɛ ɔ́ kwú, ɔpɛ́ kú Ujérīko ā. Anɔ́ɔ odúúdú aícɔ́ɔja kú ɔlɛ́ nū ā kwú kpó kwu hɛ̄ ɔ̄ tá.

⁶ É le Usedekíya bī gé lɛ Unebúkádinēsa, nōo yɔ̄ igelī nɛ̄hi kú Uríbila eko ɔ́ɔmā ā. Anɔ́ɔ Unebúkádinēsa le ɛpɔ̄ ka tū ɔ̄ á.

⁷ Eko nɛ̄ Usedekíya leyīkwu ca ā, é kwú ayí nū ú kpó ŋmó ipéeyī nū. Anɔ́ɔ Unebúkádinēsa kwú ɛ̄wā ú le ɔ́ eyī kpó nwūla, klla kwú agbá ú kwu ɔ́ abɔ̄, anɔ́ɔ ó le ɔ́ bī ga Ubábīlɔn á.

É kwú Agblīihɔ-nɛ̄hi kú Óndú ā ú yíífi

⁸ Ɛ̄cī ɔ́mahāapa kú ɔyā ɛhɔ̄ kú iháyí ɔ́migwáahānɛ nɛ̄ Unebúkádinēsa ce ɔcɛ́ kú Ubábīlɔn ā, Unebúsāradan, ɔ̄cɛ o nwū ɔcɛ́ ɛlā nōo wɛ otrɛ̄yí kú aícɔ́ɔja kú Ubábīlɔn ā dúú ā le tá Ujerúsālɛm.

⁹ Ó kwú Agblīihɔ-nɛ̄hi kú Óndú ā, mla agbla kú ɔcɛ́ mɛ́mla inu ojīlīmā ɔhá dóódu nēe bá Ujerúsālɛm ā ú kpó tɔ̄lá.

¹⁰ Aícɔ́ɔja kú ɔlɛ́ nū klla le ɔdɔ kú Ujerúsālɛm ā wúla tāajɛ.

¹¹ Anɔ́ɔ Unebúsāradan kwú odúúdú ācoyúklábɔ̄ mɛ́mla ācɛ nēe nyɛ̄ɛ̄ ga abɔ̄ ɔlɛ́ ɔcɛ́ kú Ubábīlɔn mɛ́mla ācɛ o hile ā ú kpó ga Ubábīlɔn.

¹² Amáŋ ó mā aógbɛhá fíyɛ́ dúú ā nēé lɛ ɔdā dúúmā ŋ́ má tá ipú Ujerúsālɛm kéē ŋmó ácí tū aɛ́hɔ̄ kú ugrépu.

¹³ Ācɛ kú Ubábīlɔn ā le aúpíla kú oje udɔ ā, ede kú oje udɔ, mɛ́mla utánki kú udɔ, mɛ́mla ɛna kú oje udɔ igwɛ́ɛpa nɛ̄ utánki ā ce ɛyí uwá ā, mɛ́mla utéblu ō lɛ akā kú oje udɔ ā kpó ca nyɛŋɛnyɛŋɛ, anɔ́ɔ é le odúúdú nū kpó ga Ubábīlɔn á.

¹⁴ É klla kwú usɔ́bɛ̄lu mla ɔdā ō gwu ewo kú ɛyí ede tū ɔ̄ ā, mɛ́mla ɔdā ō lɛ agege ce ɔ́, mɛ́mla ocíbú nēé gē hɛ́ oyī kú ɛbɛ ɛya ōgwo nōo gē wā ajɛ ŋmá ɛyí ede ā tū ɔ̄ ā, mɛ́mla ocíbú o yi ɔtulalī ɔlá ipú nū, mɛ́mla íyó kú oje udɔ ɔhá dóódu kú Agblīihɔ-nɛ̄hi ā ú kpó ga Ubábīlɔn

¹⁵ Ɔdā dóódu nēé yá mla oje nɛ̄hɛ́, oje udɔ mɛ́mla oje ɔdɔ ā, kwu ocíbú nɛ̄ŋcɛ́ nēé gē bī le fu ɔlá kú Agblīihɔ-nɛ̄hi ā, é kwú uwā ú kpó ga Ubábīlɔn.

¹⁶ É kwú ɔdā dóódu kú oje udɔ nɛ̄ Usólōmɔn bī le yá eyɛ̄ɛ̄cɛ kú Agblīihɔ-nɛ̄hi ā ifa ā mɛ́mla aúpíla ɛpa ā, utébulu ō lɛ akā, utánki kú éŋkpɔ̄ nɛ̄hi ā le nwuné fíyɛ́ nɛ̄ ɔ̄cɛ í miya uwá glá ŋ́.

¹⁷ Aúpíla ɛpa ā gbla iyī uwā nɛ̄hi. Éyééye kú uwā wɛ ikpó ofu ce ahāapa, é kē le ogbló kú oje udɔ nēe wɛ ikpó ɛnɛ ce āyā kpó ce uwá. É klla kē le ijā kú ohépú kú ɔcí nēé hī ka upomégranēeti ā he tū aógbló ā kpɛ́mm.

É kwú ācɛ kú Ujúda ú kpó ga Ubábīlɔn

¹⁸ Ācɛ o hile nɛ̄ Unebúsāradan kpó kwú nyɔ̄ ā wɛ Useráya otrɛ̄yí kú ācogwɛ́ɛya, mɛ́mla Usefaníya nōo kpó okónu ce ɔ́ ā, mɛ́mla ācɛ o kpɔ́cíkpɔ́cí ɛtá ɔhá nēe gē yúklɔ́ ipú Agblīihɔ-nɛ̄hi ā.

¹⁹ Unebúsāradan klla kwú aótrɛ̄yí kú aícɔ́ɔja ā, mɛ́mla aígabɔ̄ kú Usedekíya ɛhɔ̄ nēe gē nwū ɔ̄ ɛlā ā, mɛ́mla ācɛ nēe gē leyīkwu iyó kú ɛfú ā, mɛ́mla ācɛ nɛ̄hi ofɛtá ɔhá ú kpó ga Ubábīlɔn.

²⁰ Unebúsāradan kwú uwá ú kpó gé lɛ Unebúkádinēsa ajɛ kú Uríbila,

²¹ ipú ajɛ kú Uhámāti. Anɔ́ɔ é le ācɛ kú Ujúda ā kpó ga ipú ajɛ kú éwo ɔhá abɔ̄fú ŋmá ajɛ kú uwā.

Ugɛdalíya igbómína kú Ujúda

²² Unebúkádinēsa kwú Ugɛdalíya, ɔyí kú Ahíkam, ɔyí kú ɔyí Ussafán ú yá igbómína kú Ujúda, kóō leyīkwu ācɛ nēe hile nēé je kpó ga Ubábīlɔn ŋ́ mā.

²³ Eko nɛ̄ aícɔ́ɔja kú Ujúda nēe hile nēé cɔ̄nyā lɛ Ubábīlɔn ɛ́ɛ́ ŋ́ mā le ɛ̄nyā pó ā, é kwú pɛ́ wā ɛgiyí Ugɛdalíya Umísipa. Aícɔ́ɔja nyā wɛ Íssimɛ̄lu, ɔyí kú Unetaníya, mɛ́mla Ujohánan, ɔyínɔ̄nyīlɔ kú Ukárēya, Usérīya, ɔyí kú Utánhū nōo ŋmá igelī nɛ̄ŋcɛ́ kú Unétōfa, mɛ́mla Ujɛsaníya nōo ŋmá Umáaka ā.

²⁴ Ugɛdalíya da uwá kahíníī, “Aá híī yúufi ɔcɛ́ kú Ubábīlɔn ŋ́, aá lā amānyā kú aá gbā ɔcɛ́ kú Ubábīlɔn ɛ̄gbā, cɛ́ɛ́ ó í lɔhi lɛ aá.”

²⁵ Amáŋ ipú ɔyā ɔ́mahāapa kú iháyí ɔ́ɔmā, Ísimɛ̄lu, ɔyí kú Unetaníya, ɔyí kú ɔyí kú Ɛlíssāma, nōo wɛ ɔ̄cɛ éyi kú ipɔ́ɔnū ɔlɛ́ ɔcɛ́ ā, le tá Umísipa mla ācɛ igwó, gaá lɛ Ugɛdalíya mɛ́mla ācɛ kú Ísrɛ̄lu nēe bá pī ɔ̄ ā kpó ŋmó.

²⁶ Anɔ́ɔ odúúdú ācɛ o hile kú Ísrɛ̄lu ā, kwu aólɛhá, kwu aólɔdu, mɛ́mla aícɔ́ɔja ā, kwú pɛ́ kwu ŋmá Ujerúsālɛm le tá ajɛ kú Íjīpiti ohígbū keé bá ī yúufi kú ācɛ kú Ubábīlɔn.

É lɛ Ujɛhóyākin hɛ́tá ŋmá Agbá

²⁷ Ipú iháyí ɔ́mofu-ce-igwáahāapa nɛ̄ Ujɛhóyākin klá ajɛ éwɔhá abɔ̄fú ā, ífílīmɛródāki le ɔcɛ́ kú Ubábīlɔn lé. Ó kwú gbonɛnɛ lɛ Ujɛhóyākin, anɔ́ɔ ó kwú ɔ̄ ú hɛ́tá ŋmá agbá á.

²⁸ ífílīmīródāki le ojīlīmā ce ɔ̄ nɛ̄hi, anɔ́ɔ ó le āhɔ̄ kú ojīlīmā je lɛ ɔ́ fíyɛ́ aɔ́cɛ́ ɔhá nēe bá ajɛ ɔfiyɛ Ubábīlɔn, ŋmá ajɛ ɔlɛ́ uwā ā.

²⁹ Anɔ́ɔ ó lɛ ɛga je lɛ Ujɛhóyākin kɔ́ɔ̄ le úwé kú agbá kú nū plla bá ajɛ, cɛ́ɛ́ kɔ́ɔ̄ gbɔɔ́ ō lé ɔdōlé ɛyí útébulu kú ɔlɛ́ ɔcɛ́ mla ɔcɛ́ ā.

³⁰ Ɛ̄cī dóódu, é gē cíla anú ulé lígíí ká ɔ̄ bī le yá ɛgbá kú nū, ó kē mīyɛ ije nyā jāā gbéeko nɛ̄ ó yēeyī gaá kwu ā.