2 AƆ́CƐ́ 24 - Ubáyíbu kú Idɔma

¹ Eko nɛ̄ Ujɛhóyākim wɛ ɔcɛ́ kú Ujúda ā, Unebúkádinēsa, ɔcɛ́ kú Ubábīlɔn le ɛfú kpó wā í gwū ācɛ Ujúda, anɔ́ɔ ó mīyɛ ajɛ kú Ujúda abɔ̄fú á. Iháyí ɛtá, ācɛ Ujúda mɛ́mla Ujɛhóyākim bá ipú abɔ̄ kú Ubábīlɔn mɛ́mla Unebúkádinēsa. Anɔ́ɔ oŋmɛ́yí kú iháyí ɔ́mɛtá ā, Ujɛhóyākim le īkpɛ̄yí olɔfú yá tá Unebúkádinēsa ka, anúɔ ɔ́ɔ gáā yɔ̄ ɛháajɛ kú nū ɛ́ɛ́ gɛ ŋ́.

² Anɔ́ɔ Óndú ā le ígwu kú ācɛ o bī iyɔ́fú nēe ŋmá Ubábīlɔn, Usírīya, Umówābu mɛ́mla Ámɔn kpó tɔ̄há lɛyíkwu ācɛ kú Ujúda, cɛ́ɛ́ kéē lɛ uwá kpó yíífi ŋmá ajɛ dúúdú, ɛ́gɛ́nɛ̄ Óndú ā tɛtɛ ka bū okónu kú ācocɛ̄hɔ̄ kú nū, ācomɛ́ɛbɛ, ka ánúɔ géē yá ā.

³ Óndú ā cɛ̄ lɛ ɛ̄nyā kóō le yá lɛ ā, cɛ́ɛ́ kóō lɛ ācɛ kú Ujúda kpó ŋmá eyī kú nū, ohígbū ɔ́bíipú nɛ̄ odúúdú ācɛ kú Ujúda mɛ́mla Umanásɛ, ɔcɛ́ kú uwā bī tū Óndú ā.

⁴ Ofíyɛ́ dúú ā, ucē kú ɔ́bíipú nɛ̄ Umanásɛ yá eko nɛ̄ ó kpó ācɛ nēé yá ɔdā dúúmā ŋ́ mā ŋmó Ujerúsālɛm ā. Óndú ā í je ɔdā nɛ̄ Umanásɛ yá ɔ́ɔmā yá ɔ̄ ɛhi glá ŋ́.

⁵ Aɔ́dā o hile ɔhá nɛ̄ Ujɛhóyākim yá ā, é le ɔ́ tá tū ipú ɔkpá kú ígwú ō gbo kú aɔ́cɛ́ kú Ujúda.

⁶ Ujɛhóyākim gekwú, anɔ́ɔ ɔyí nū Ujɛhóyākin lɛ ɔcɛ́ lé kwɛyí nū á.

⁷ Ɔcɛ́ kú Íjīpiti í klla lɔfú ga ɛcɛ gaá kpɛ́fú mla aícɔ́ɔja kú nū glá ɛ́ɛ́ gɛ ŋ́. Ohígbū ka ɔcɛ́ kú Ubábīlɔn mīyɛ odúúdú ajɛ kú ācɛ Íjīpiti, klla leyī hɛ́ kwu odúúdú ajɛ kú uwá nōo gbɔɔ́ ŋmá ísu kú Uyúfarétīisi jāā ga ɛhícō kú ajɛ Íjīpiti ā.

Ujɛhóyākin, ɔcɛ́ kú Ujúda

⁸ Ujɛhóyākin wɛ iháyí ahātá ɛɛ́ nōo lé ɔcɛ́ kú Ujúda á, ó ce ɔcɛ́ Ujerúsālɛm ɔyā ɛtá. Ɛ́nɛ́ nū wɛ Unehústa, ɔyínɔ̄nyā kú Ɛlinátan nōo ŋmá Ujerúsālɛm ā.

⁹ Ó yɛ tíkpa kú ádā nū, Ujɛhóyākim, anɔ́ɔ ó le ɔdōbɔ̄bí mla íne kú Óndú ā bīya á.

¹⁰ Eko nɛ̄ ó ce ɔcɛ́ ā, ɔcɛ́ kú Ubábīlɔn, Unebúkádinēsa le aícɔ́ɔja kú nū kpó wā Ujerúsālɛm gaá le íbɔm cē tū Ujerúsālɛm.

¹¹ Eko nyā, Unebúkádinēsa abɔ̄yī nū gā Ujerúsālɛm eko kú íbɔm ā.

¹² Anɔ́ɔ Ujɛhóyākin mɛ́mla ɛ́nɛ́ nū, ayí nū, anyā nū, aígabɔ̄ kú nū, mɛ́mla aótrɛ̄yí mɛ́mla aícɔ́ɔja kú nū, cɔ̄nyā lɛ ācɛ kú Ubábīlɔn á. Ipú iháyí ɔ́mahātá nɛ̄ Unebúkádinēsa ce ɔcɛ́ kú Ubábīlɔn ā, ó le Ujɛhóyākim kwú tū agbá

¹³ Ó klla kwú odúúdú agbénú kú Agblīihɔ-nɛ̄hi kú Óndú ā, mɛ́mla ákú agbla kú ɔcɛ́ ā ú kpó ga Ubábīlɔn. Unebúkádinēsa kwú odúúdú iyó kú ugóolu (oje ɔdɔ) kú Agblīihɔ-nɛ̄hi nɛ̄ Usólōmɔn yá ā ú kpó ca, ɛ́gɛ́nɛ̄ Óndú ā tɛtɛ ka lɛ, bū okónu kú ācomɛ́ɛbɛ kú nū ā.

¹⁴ Unebúkádinēsa le odúúdú ayípōklóbīya, ācɛ nɛ̄hi, aígabɔ̄, ācɛ olɛ-ojīlīmā kú Ujúda dóódu ā kpó kwú bɛ̄ɛka aálagbá ā ga Ubábīlɔn. Ódúúdú ācɛ nɛ̄ ó kpó nyɔ̄ ā wɛ úlā ofu ce ɛhɔ̄ (10,000). Ó klla kwú odúúdú ācoyúklábɔ̄ abɔ̄ mɛ́mla aónɔwá ā ú kpó nyɔ̄ dúú. Anɔ́ɔ ó habɔ̄ ācogbɛhá fíyɛ́ dúú ā bá ajɛ ipú Ujúda á.

¹⁵ Ó lɛ Ujɛhóyākin mla ayí nū, ɛ́nɛ́ nū, mla anyā nū kpó bɛ̄ɛka aálagbá ā ga Ubábīlɔn dúú

¹⁶ Unebúkádinēsa le odúúdú ācokpɔ́cíkpɔ́cí dóódu kú Ujúda ā kpó ga Ubábīlɔn. Ɛwa kú ācɛ nɛ̄ ó kpó nyɔ̄ ā wɛ úlā ofu, anɔ́ɔ ācɛ o yúklábɔ̄ kē wɛ úlā ɛpa ce ofu igwó, aónɔwá nēe wɛ ācɛ o lɔfú ga ɔgbɛ́fú glá.

¹⁷ Unebúkádinēsa kwú ɔmáapu ádā kú Ujɛhóyākin, Umataníya ú pīya ɔcɛ́ kú Ujúda, anɔ́ɔ ó kwú iyē kú nū ú pīyabɔ̄ ŋmá Umataníya ga Usedekíya á.

Usedekíya, ɔcɛ́ kú Ujúda

¹⁸ Usedekíya wɛ iháyí ofu ce éyi, ɛ́ɛ́ nɛ̄ Unebúkádinēsa je ɔ́ ce ɔcɛ́ kú Ujúda á. Ó ce ɔcɛ́ Ujerúsālɛm iháyí igwóléyi. Ɛ́nɛ́ nū wɛ Uhamūtálu, ɔyínɔ̄nyā kú Ujeremíya nōo ŋmá igelī nɛ̄hi kú Ulíbīna ā.

¹⁹ Usedekíya le ɔdōbɔ̄bí yá klla le íne kú Óndú bīya ɛ́gɛ́nɛ̄ Ujɛhóyākim yá lɛ kpɛ́mm ā.

²⁰ Anɔ́ɔ Óndú ā kwú cɔ̄nū nɛ̄hi mla ācɛ kú Ujúda, anɔ́ɔ ó kwú uwá u kpó yíífi. Ó kwú ācɛ nēe hile ŋmá ipú uwā ú kpó ŋmá ajɛ kú Ujúda dúúdú.