2 AƆ́CƐ́ 22 - Ubáyíbu kú Idɔma

Ujosíya, ɔcɛ́ kú Ujúda

¹ Ujosíya wɛ iháyí ahātá ɛɛ́ nɛ̄ ó lé ɔcɛ́ kú Ujúda ā. Ó ce ɔcɛ́ Ujerúsālɛm iháyí ofu ce igwóléyi. Ɛ́nɛ́ nū wɛ Ujɛdída, ɔyínɔ̄nyā kú Adáya nōo ŋmá Ubóskatu ā.

² Ujosíya yá ɔdā nōo he Óndú ā ɔtū. Ó yɛce ɔwɛ olɔhi dóódu kú aádáádā nū Udéfīdi ā. Ó klla lɛyítáajɛ lɛ íne dóódu kú Óndú ā.

É lɛ ɔkpá kú íne ā pīyɛ̄

³ Ipú iháyí igwáahātá nɛ̄ Ujosíya lé ɔcɛ́ ā, ó lɛ ɔmálɛ otɔ́kpá kú únɛ́pɔ̄, Ussafán, ɔyínɔ̄nyīlɔ kú Asálīya, ɔyí kú ɔyí kú Umesúlam tɛ̄hɔ̄ ga Agblīihɔ-nɛ̄hi kú Óndú ā, anɔ́ɔ ó da ɔ́ kahíníī,

⁴ “Nyɔ̄ ga ɛgiyí otrɛ̄yí kú ācogwɛ́ɛya ā, Uhilikáya cɛ́ɛ́ káā gaá mīyɛ áluka kú ije nɛ̄ ɔ̄cogwɛ́ɛya nōo ī yúklɔ́ okómpíinu kú ipú Agblīihɔ-nɛ̄hi ā gē mīyɛ ŋmá ɛgiyí ācɛ ā wā.”

⁵ Ó klla da ɔ́ kóō le da ɔ́ ka ɔ́ɔ kwú ije ā ú kpó lɛ ācɛ nēe gē leyīkwu úklɔ́ kú oōgllayá kú Agblīihɔ-nɛ̄hi ā. Cɛ́ɛ́ kéē bī le gbā ulé lɛ

⁶ ācogbɔ̄cí, ācominu, mɛ́mla ācoplíinu ā, cɛ́ɛ́ kéē le lá ɔcí mɛ́mla ɛcɔ̄ kú úklɔ́ kú Agblīihɔ-nɛ̄hi ā.

⁷ Ācɛ nēe leyīkwu úklɔ́ kú Agblīihɔ-nɛ̄hi ā wɛ ācɛ ɔkwɛ̄yi nɛ̄hi nɛ̄ ó cɛgbá kú ɔ̄cɛ dúú kóō da uwá ɔ̄kā ɛ́gɛ́nɛ̄ é bī ije ā le yúklɔ́ lɛ ā ŋ́.

⁸ Eko nɛ̄ Ussafán gaá lɛ ɛhɔ̄ nyā cɛ̄ ā, Uhilikáya otrɛ̄yí kú ācogwɛ́ɛya ā da ɔ́ kahíníī, “N lɛ ɔkpá kú íne kú Óndú ā pīyɛ̄ ipú Agblīihɔ-nɛ̄hi kú Óndú ā.” Anɔ́ɔ ó kwú ɔkpá á ú ce Ussafán abɔ̄, anɔ́ɔ ó lɛ ɔ́ jé á.

⁹ Anɔ́ɔ Ussafán kwúcē wā gaá da ɔcɛ́ ā kahíníī, “Ije nōo yɔ̄ ipú Agblīihɔ-nɛ̄hi ā, n kwú kpó ŋmá ipú ikpati ā lɛ ācɛ nēe gē leyīkwu oōgláyá kú Agblīihɔ-nɛ̄hi ā ɛɛ́.”

¹⁰ Anɔ́ɔ ó klla da ɔ́ kahíníī, “Uhilikáya, ɔ̄cogwɛ́ɛya ā le ɔkpá ɔhá je gā um kpɔ́” Anɔ́ɔ ó le ɔkpá ā jé tɛ́ɛcɛ lɛ ɔcɛ́ ā.

¹¹ Eko nɛ̄ ɔcɛ́ ā le ɔdā nēé tá ipú ɔkpá ā pó ā, ó kwú īlī kú nū ú híla.

¹² Anɔ́ɔ ɔcɛ́ ā le ɔ́da je lɛ Uhilikáya, ɔ̄cogwɛ́ɛya mɛ́mla ācɛ ohile nēe bá ā; Ahíkam, ɔyínɔ̄nyīlɔ kú Ussafán, Ácībɔ, ɔyínɔ̄nyīlɔ kú Umíkáya mɛ́mla Ussafán ɔmále kú únɛ́pɔ̄, mɛ́mla Asáya nōo gē leyīkwu ɔcɛ́ ā ka,

¹³ “Aá nyɔ̄ gaá da Óndú ā ɔ̄kā ohígbū ami mɛ́mla odúúdú ācɛ kú Ujúda lɛyíkwu ɔdā nēe ī nwū ācɛ ipú ɔkpá nyā ā. Ohígbū ka Óndú ā, Ɔwɔicō le cɔ̄nū tū alɔ ohígbū ka aádáádā alɔ í lɛyítáajɛ lɛ ɛlā kú ɔkpá nyā ŋ́, ɛɛ́ nēé gē yá ɔdā nēé tá tū ipú ɔkpá ā ka ālɔ yá piíí ā ŋ́.”

¹⁴ Anɔ́ɔ Uhilikáya, Ahíkam, Ácībɔ, Ussafán, mɛ́mla Asáya le tá ɛgiyí ɔnyā éyi nōo wɛ ɔ̄comɛ́ɛbɛ, nēé hī ka, Uhúlida, nōo lā ɛga ɛ̄yīpɛ̄ kú Ujerúsālɛm ā. Ɔbá nū lé ka Ussálum ɔyínɔ̄nyīlɔ kú Utíkifa nōo klla wɛ ɔyɔ́ɔ́yí kú Uháhasi ā, gē leyīkwu aáwulú nēe bá ipú Agblīihɔ-nɛ̄hi ā. É le ɔdā nōo yá ā kpó cāabɔ̄ lɛ ɔ́.

¹⁵ Anɔ́ɔ ó da uwá kéē kwúcē ga ɛgiyí ɔcɛ́ gaá da ɔ́ ka

¹⁶ olɛhɔ̄ nēe ŋmá ɛgiyí Óndú ā kahíníī, “N géē yá odúúdú ācɛ nēe bá Ujerúsālɛm ā italā ɛ́gɛ́nɛ̄ ɔdā nɛ̄ íne nēé tá tū ɔkpá ā ka lɛ ā.

¹⁷ Ohígbū ka é kwú igbīhi í cēkwu um, anɔ́ɔ é gaá gbɔɔ́ ō gwɛ́ɛya lɛ aɔ́wɔ ɔhá á. É le um yá cɔ̄nū ohígbū odúúdú ɔdā nēé yá nyā. N le cɔ̄nū nɛ̄hi lɛyíkwu Ujerúsālɛm ɛɛ́. Ń kē gáā kpó ɔlá ŋmá ɔtū lɛ ɔ́ gwó ajɛ ŋ́.”

¹⁸ Óndú ā klla ka kpɔ́ kahíníī, “Aá nyɔ̄ ga ɛgiyí ɔcɛ́ kú Ujúda nōo tū aá ɛhɔ̄ wā ā gaá da ɔ́ kahíníī, ‘Ɛ̄nyā wɛ ohi nɛ̄ Óndú ā tá ohígbū ɛlā kú íne nēé tá ipú ɔkpá nāa pó ā,

¹⁹ a le pīyabɔ̄ klla le īyī uwɔ tū wāajɛ iyɔ̄bū ami nōo wɛ Óndú ā. A klla lɛ īlī kú uwɔ híla yɔ̄ ī jikwū, eko nāa le pó ka n géē yá ācɛ Ujerúsālɛm italā piíí ā. N klla ka ka n géē je ɔ́ tá alácɛ̄ mɛ́mla ɛga nɛ̄ ācɛ gē bī le tókónu lɛ ācɛ ɔhá. Amáŋ n le ɔkɔ nāa gbā ā pó ɛɛ́.”

²⁰ Óndú ā da ɔ́ kahíníī, “Eko nāa gekwú nēé lɛ uwɔ nyi mla aádā uwɔ ɛbɔ́ kpó ɛɛ́ nɛ̄ n gaá bī ōwē mɛ́mla ɔdōbɔ̄bí nyā wā í klá ācɛ Ujerúsālɛm mɛ́mla ācɛ kú Ujúda á.” Anɔ́ɔ ācɛ ā kwúcē gaá lɛ ɛhɔ̄ ā cɛ̄ lɛ Ujosíya á.