2 AƆ́CƐ́ 21 - Ubáyíbu kú Idɔma

Umanásɛ ɔcɛ́ kú Ujúda

¹ Umanásɛ wɛ iháyí igwɛ́ɛpa ɛɛ́ nɛ̄ ó le ɔcɛ́ kú Ujúda á. Ó ce ɔcɛ́ kú Ujúda, Ujerúsālɛm iháyí ofɛpa ce igwɛ́ɛhɔ̄. Ɛ́nɛ́ nū wɛ Uhɛfusíba.

² Ó le ɔdōbɔ̄bí mɛ́mla íne kú Ɔwɔicō bīya bɛ̄ɛka aéwo nɛ̄ Óndú ā nū bɛ̄cɛ hīla ācɛ kú Ísrɛ̄lu ā.

³ Ó le aíkpɛ́cí nɛ̄ ádā nū Uhɛsɛkíya ca tāajɛ ā túgwó kpɔ́. Ó klla le aéde ɛga nɛ̄ ācɛ í pā ɔwɔ nēé hī Ubáalu ā ma. Ó kē le ojibó kú ɔwɔ nɔ̄nya nēé hī ka Ássɛ̄ra ā ma ɛ́gɛ́nɛ̄ Áhābu, ɔcɛ́ kú Ujerúsālɛm yá ā. Umanáse gē gbā aínyílɔ́wɔ kú ɔkpáncō ɛ̄gbā dúú.

⁴ Ó lɛ ede kú ɛ̄cí kpó gwó bá ipú Agblīihɔ-nɛ̄hi kú Óndú ā ɛga nɛ̄ Óndú ā ka abɔ́ɔ ā nɛ́ɛ géē gbā anúɔ ɛ̄gbā á ā.”

⁵ Ó klla lɛ ede ɛpa gwó bá ódúdɛ̄cɛ kú Agblīihɔ-nɛ̄hi kú Óndú ā, cɛ́ɛ́ kéē gbā aínyílɔ́wɔ kú ɔkpáncō ɛ̄gbā.

⁶ Ó kwú ɔyínɔ̄nyīlɔ kú nū ú ŋmó, anɔ́ɔ ó kwú ɔ̄ ú gwɛ́ɛya o yɔlá dúúdú lɛ ɛcí kú nū á. Ó gbɔɔ́ ō gwɛ́bā klla gē yíimabɔ̄ dúú. Ó gē nyɔ̄ ɛgiyí ācɛ o gwɛ́ɛbā mɛ́mla ācɛ o mɛ́ɛbɛ dúú. Ó bɔ́bíipú nɛ̄hi tū Óndú ā nɛ̄hi, anɔ́ɔ Óndú ā kwú cɔ̄nū nɛ̄hi á.

⁷ Ó le ojibó kú ɔwɔ nɔ̄nyā nēé hī Ássɛ̄ra ā ma, anɔ́ɔ ó kwú ɔ̄ ú kwu Agblīihɔ-nɛ̄hi kú Óndú ā, ɛga nɛ̄ Óndú ā da Udéfīdi mɛ́mla Usólōmɔn ohígbū nū kahíníī, “Ipú Ujerúsālɛm nyā mɛ́mla ipú Agblīihɔ-nɛ̄hi nyā wɛ ɛga nɛ̄ n je ŋmá ipú odúúdú ajɛ kú aípɔ́ɔma kú Ísrɛ̄lu kóō wɛ ɛga nɛ̄ n géē yɔ̄ á.

⁸ Ń klla gáā je ayí kú Ísrɛ̄lu kpó ŋmá ipú ajɛ nɛ̄ n je lɛ aádáádā uwā ā ɛ́ɛ́ gɛ ŋ́. Ɔ́dāŋ́ ka é géē yá ɔdā dóódu nɛ̄ n da uwá ā, nēé klla í lɛyítáajɛ lɛ aíne kú um, nɛ̄ ɔ̄cocɛ̄hɔ̄ kú um, Umósīsi je lɛ uwá ā.”

⁹ Amáŋ ācɛ kú Ujúda tá kéē pó ɛlā nɛ̄ Óndú ā ka ā. Umanásɛ le uwá ikpó kpó tū ɛdɔ kú ínoōbīya mla ɛdɔ kú ɔ́bíipú ō bī tū Óndú ā nōo bɔ̄bí fíyɛ́ ɛdɔ nɛ̄ aéwo nɛ̄ Óndú ā nū bɛ̄cɛ hīla uwá ā bī ā.

¹⁰ Anɔ́ɔ Óndú ā ka bū okónu kú ācomɛ́ɛbɛ, ɔ̄cocɛ̄hɔ̄ kú nū éyi kahíníī,

¹¹ “Abɔ̄ Umanásɛ le ɔdōbɔ̄bí nɛ̄hi nyā yá, nɛ̄ ó klla yá ɔdōbɔ̄bí fíyɛ́ ucē kú ɔ́bíipú kú ācɛ kú Ámɔn nēe bá gbɔbū lɛ ɔ́ ā yá ā, nɛ̄ ó klla cɛ̄ lɛ ācɛ kú Ujúda le ɔ́bíipú kú ɛcí ō pā bī ā.

¹² Ohígbū ɔ́ɔmā, Ami nōo wɛ Óndú ā, Ɔwɔicō kú Ísrɛ̄lu ā géē bī ɔdōbɔ̄bí nɛ̄hi wā í klá ācɛ kú Ujúda mɛ́mla Ujerúsālɛm, nɛ̄ ahɔ̄ dóódu nōo géē pó ā í gwōoje wámm.

¹³ Okolo nɛ̄ n le miya igwu lɛ Usamérīya ā, nɛ̄ n klla le miya igwu lɛ Áhābu, ɔcɛ́ mɛ́mla ayááyí nū ā, nɛ̄ n géē lɛ miya igwu lɛ ācɛ kú Ujerúsālɛm dúú á. N géē kpó ācɛ nyā ŋmá ipú Ujerúsālɛm péee ɛ́gɛ́nɛ̄ ācɛ gē bī īlī ī le nya ocíbú péee klla ī pīya ɔ́ eyī kláajɛ ā.”

¹⁴ Óndú ā klla yɔ̄ ī kɛlā kpɔ́ kahíníī, “N géē kpó ācɛ ɔlɛ́ um nēe hile ā ŋmá ipéeyī um, cɛ́ɛ́ n kwú uwā ú kpó tū aólɛlā kú uwā abɔ̄, aólɛlā nēe géē yá uwā lé ɔgbɛ́fú klla í je uwá kpó pīya ɔdā úgwū kú uwā.”

¹⁵ Óndú ā ka anúɔ géē yá ɔdā nɛ̄ anúɔ ka ā ohígbū ka ācɛ ā le íne kú anúɔ bīya ɛ̄nɛ̄ o yá kú anúɔ le cɔ̄nū nɛ̄hi ŋmá eko nɛ̄ anúɔ kpó aádáádā uwā bɛ̄cɛ ŋmá ajɛ kú Íjīpiti jāā kwu ícɛ nyā.”

¹⁶ Umanásɛ ŋmó ācɛ nɛ̄ɛ̄nɛ̄hi nōo cɛ̄ lɛ oyī yɔ̄ gē pɛ́ ipú úláyi kú Ujerúsālɛm. Ó yá ɛ̄nyā tɔ̄há mla ɔ́bíipú nɛ̄ ó bī tū Óndú ā klla kpó ācɛ kú Ujúda ikpó tū ɔ̄ dúú ā.

¹⁷ Ɔdā ɔhá dóódu nɛ̄ Umanásɛ yá ā mla íne nɛ̄ ó bīya ā, é le ɔ́ tá tū ipú ɔkpá kú ígwú ō gbo kú aɔ́cɛ́ kú Ujúda.

¹⁸ Umanásɛ gekwú, anɔ́ɔ é kwú ɔ̄ ú nyi ipú ɛhɔ̄, igbīhi ɔlɛ́ ɔcɛ́ ā, ɛhɔ̄ kú Íssa, anɔ́ɔ ɔyí nū Ámɔn lɛ ɔcɛ́ lé kwɛyí nū á.

Ámɔn ɔcɛ́ kú Ujúda

¹⁹ Ámɔn wɛ iháyí ofu ce ɛpa ɛɛ́ nɛ̄ ó lé ɔcɛ́ kú Ujúda á. Ó ce ɔcɛ́ Ujerúsālɛm iháyí ɛpa. Ɛ́nɛ́ nū wɛ Umɛssúlɛ̄mɛti ɔyínɔ̄nyā kú Uhárusi nōo ŋmá igelī nɛ̄hi kú Ujótiba ā.

²⁰ Ámɔn le ɔ́bíipú bī tū Óndú ā bɛ̄ɛka ádā nū Umanásɛ ā.

²¹ Ó gbla ádā nū yá gē pā ɛcí nɛ̄ ádā nū pā ā.

²² Ó tá ō cɛ̄ɛ̄lā kú Óndú ā, Ɔwɔicō kú aádáádā nū. Ó klla tá kóō lɛ íne kú Óndú ā, Ɔwɔicó kú Ísrɛ̄lu tū.

²³ Aígabɔ̄ kú Ámɔn le ujɔ̄ tū tū ɔ̄, anɔ́ɔ é kwú ɔ̄ ú ŋmó ipú agbla kú ɔcɛ́ kú nū.

²⁴ Ācɛ kú Ujúda le ācɛ nēe ŋmó Ámɔn ā kpó ŋmó, anɔ́ɔ é kwú ɔyí nū Ujosíya ú ce ɔ̄cɛ kwɛyí Ámɔn.

²⁵ Aɔ́dā o hile ɔhá dóódu nɛ̄ Ámɔn yá ā, é le ɔ́ tá tū ipú ɔkpá kú ígwú ō gbo kú aɔ́cɛ́ kú Ujúda.

²⁶ Anɔ́ɔ é kwú Ámɔn ú nyi ikpámílī kú ipú ɛhɔ̄ kú Íssa á. Anɔ́ɔ ɔyí nū Ujosíya lɛ ɔcɛ́ lé kwɛyí nū á.