2 AƆ́CƐ́ 2 - Ubáyíbu kú Idɔma

É kwú Ɛláyíja ú ga ɔkpáncō

¹ Eko nɛ̄ Óndú ā gáā bī ofúlutu nɛ̄hi le je Ɛláyíja ga ɔkpáncō ā, Ɛláyíja mɛ́mla Ɛláyíssa, ɔ̄cocɛ̄hɔ̄ kú nū ā, gbɔɔ́ ŋmá Ugígalu.

² Anɔ́ɔ Ɛláyíja da Ɛláyíssa kahíníī, “Yɔ̄ amānyā gbēyī um, ohígbū ka Óndú le ɛhɔ̄ tū um ga Ubɛ́tɛlu ɛɛ́.” Amáŋ Ɛláyíssa da ɔ́ kahíníī, “Abɔ̄ Óndú ā yēeyī ā, nɛ̄ awɔ abɔ̄yī uwɔ klla yēeyī ā, ń gáā cīghīhi gwū uwɔ tá ŋ́.” Anɔ́ɔ é le tá Ubɛ́tɛlu á.

³ Ígwu kú ayí kú ācomɛ́ɛbɛ nēe lā Ubɛ́tɛlu ā gaá le ɔ̄kā da Ɛláyíssa kahíníī, “A jé ka Óndú ā gáā je ɔkpáni uwɔ ŋmá ɛgiyí uwɔ ícɛ déē?” Anɔ́ɔ Ɛláyíssa tá uwá ohi kahíníī, “N jé gbóó, aá bá cíí mɛ́ɛnɛ, ālɔ̄ kɛlā ga abɔ́ɔ ŋ́.”

⁴ Anɔ́ɔ Ɛláyíja da Ɛláyíssa kahíníī, “Yɔ̄ amānyā gbēyī um, ohígbū ka Óndú ā le ɛhɔ̄ tū um ga Ujérīko.” Amáŋ Ɛláyíssa tá ɔ̄ ohi kahíníī, “Abɔ̄ Óndú ā yēeyī ā, nāa kē yēeyī dúú ā, ń gāa cīghīhi gwū uwɔ tá ŋ́.” Anɔ́ɔ é le yɛ i tá Ujérīko á.

⁵ Ígwu kú ācomɛ́ɛbɛ nēe lā Ujérīko ā gaá da Ɛláyíssa kahíníī, “A jé ka Óndú ɔ́ɔ gáā je ɔkpáni uwɔ ŋmá ɛgiyí uwɔ ícɛ ɛɛ?” Anɔ́ɔ Ɛláyíssa tū uwá ohi kahíníī, “N jé gbóó, Aá bá cíí mɛ́ɛnɛ, ālɔ̄ kɛlā ga abɔ́ɔ ŋ́.”

⁶ Anɔ́ɔ Ɛláyíja da Ɛláyíssa kahíníī, “Yɔ̄ amānyā gbēyī um, ohígbū ka Óndú le um tɛ̄hɔ̄ ga ísu kú Ujɔ́dan.” Anɔ́ɔ Ɛláyíssa klla tá ɔ̄ ohi kahíníī, “Abɔ̄ Óndú ā yēeyī ā, nāa kē yēeyī dúú ā, ń gāa cīgbīhi gwū uwɔ tá ŋ́.” Anɔ́ɔ uwá ɛpɛplɛ́ɛpa bá ī yɛ gɔbū kpɔ́ á.

⁷ Anɔ́ɔ ācomɛ́ɛbɛ ofu ɛpa ce igwó ā le yɛce uwá le tá Ujɔ́dan á. Anɔ́ɔ ācomɛ́ɛbɛ ofu ɛpa cigwó ā gaá háyi ɛcɛɛcɛ hɛ uwá tá ŋmá ɛga nɛ̄ Ɛláyíja mɛ́mla Ɛláyíssa háyi pī ísu kú Ujɔ́dan ā.

⁸ Ɛláyíja lɛ úwé kú nū plla, le ɔ́ hā gblógbló, anɔ́ɔ ó lɛ ɔ́ fīyɛ̄ eyī ísu kú Ujɔ́dan ā, anɔ́ɔ ísu ā kwú kɔ̄ ɛpa waa! Anɔ́ɔ é kwú bū ɔtāhɛ̄ ajɛ kú ɔtū ísu ā bēé á.

⁹ Abɔ̄ nēé kwú bēé ísu ā, Ɛláyíja da Ɛláyíssa kahíníī, “Da um ɔdā nāa tíne ká n̄ yá ga uwɔ ɛ́ɛ́ kéē je um ŋmá ɛgiyí uwɔ.” Anɔ́ɔ Ɛláyíssa tá ɔkpáni nū ohi kahíníī, “Lɛ ukpɛ̄ ɔ́klɛ́ɛpa kú ɔfú kú alelékwu nɛ̄ a lɛ nōo géē je um pīya ɔ̄cɛ o kwɛyí uwɔ ā, je ga um.”

¹⁰ Anɔ́ɔ Ɛláyíja tá ɔ̄ ohi kahíníī, “Ɔdā ō lɔnɔ nɛ̄hi nāa ba yɔ̄ á, amáŋ a géē mīyɛ, ɔ́dáŋ ka a géē má um abɔ̄ é géē je um ga ɔkpáncō ŋmá ɛgiyī uwɔ ā. Ɔ́dáŋ ka á má um ŋ́, á gáā mīyɛ alelékwū ā ŋ́.”

¹¹ É bá yɔ̄ ī kɛlā, abɔ̄ é bā ī nyɔ̄ ā, anɔ́ɔ igbeékpónu úgbɔ́ɔ́nya kú ɔlá nɛ̄ ɔnya kú ɔlá yɔ̄ í pi ā gaajɛ ɔtāhɛ̄ uwā ɛplɛ́ɛpa, anɔ́ɔ ofúlutu kwú Ɛláyíja ú ga ɔkpáncō á.

¹² Ɛláyíssa le ɔ́ má, anɔ́ɔ ó dɛ̄gba tɛ́ɛcɛ kahíníī, “Ádā um. ádā um, a lɛbɛ̄ɛka úgbɔ́ɔnya o kpɛ́fú kú Ísrɛ̄lu ā, a klla lɛbɛ̄ɛka ɔnya o bī kpɛ́fú ā dúú.” Anɔ́ɔ ó klla má ɔ̄ ɛ́ɛ́ gɛ ŋ́ má Anɔ́ɔ Ɛláyíssa kwú úwé kú nū ú híla ɛpa wāajɛ.

¹³ Anɔ́ɔ ó kwú úwé kú Ɛláyíja, nōo je pɛ́ wā ajɛ ā ú kpó, anɔ́ɔ ó kwúcē igbīhi gaá háyi okónu ísu kú Ujɔ́dan ā.

¹⁴ Anɔ́ɔ ó lɛ úwé kú Ɛláyíja ā fíyɛ́ eyī ísu kú Ujɔ́dan ā, anɔ́ɔ ó kahíníī, “Iní nɛ̄ Óndú, Ɔwɔicō kú Ɛláyíja yɔ̄ āa?” Anɔ́ɔ ó klla lɛ úwé ā fíyɛ́ eyī ísu ā igbɔhá kpɔ́, anɔ́ɔ ísu ā kwú hɛ́ ɛpa waa! Anɔ́ɔ Ɛláyíssa kwú bū ɔtū ísu ā ɛyí ɔjɛ, le bēé á.

¹⁵ Ācomɛ́ɛbɛ ofu ɛpa ce igwó nēe ŋmá Ujérīko ā le ɔdā nɛ̄ Ɛláyíssa yá ā má ā. Anɔ́ɔ é kahíníī, “Alelékwū kú Ɛláyíja ā yɔ̄ ipú Ɛláyíssa dúú.” Anɔ́ɔ é wā gaá le yɛ jīla anú ɔwɛ, klla túkpɛɛ́ iyɔ̄bú nū.

¹⁶ Anɔ́ɔ é da ɔ́ kahíníī, “Má ɔ̄, alɔ nēe wɛ ācomɛ́ɛbɛ nēe bá amānyā wɛ ofɛpa cigwó. Lɛ ɛga je lɛ alɔ ká ālɔ̄ nyɔ̄ í tíne ɔkpani uwɔ, ekōhī Alelékwū kú Óndú ā kwú ɔ̄ ú ga ɛyí ɛfu éyi amáŋ ɔpɛ́ éyi.” Anɔ́ɔ Ɛláyíssa tá uwā ohi ka “Ɔ̄cɛ dúúmā kóō nyɔ̄ ŋ́.”

¹⁷ Amáŋ é pi ɛlā kéē nyɔ̄ í tíne nū jāā gbéeko nɛ̄ ó le uwēyī kú uwá yá. Anɔ́ɔ ó da uwá kahíníī, “Aá nyɔ̄ mɛ́ɛ́nɛ.” Anɔ́ɔ uwá nēe wɛ ācɛ ofɛpa cigwó a le yɛ gaá tíne Ɛláyíja á. É tíne nū ɛ̄cī ɛtá amáŋ é má ɔ̄ ŋ́.

¹⁸ Anɔ́ɔ é kwúcē wā ɛgiyī nū Ujérīko, anɔ́ɔ ó da uwá kahíníī, “Ń da aá ka aá kóō híī nyɔ̄ ŋ́ ŋ̄?”

Úklɔ́ idáagó kú Ɛláyíssa

¹⁹ Anɔ́ɔ ācɛ ŋmá igelī nɛ̄hi kú Ujérīko ā gaá da Ɛláyíssa kahíníī, “Ɛ́gɛ́nɛ̄ a má ɔ̄ lɛ ā, igelī nɛ̄hi nyā lɔhi nɛ̄hi, amáŋ éŋkpɔ̄ kú nū bɔ̄bí, ó klla cɛ̄ lɛ ɔdɛ̄hɔ̄ yá ŋ́.

²⁰ Anɔ́ɔ Ɛláyíssa da uwá kahíníī, “Aá lɛ ɔmā tū ocíbú ɛ̄yīpɛ̄ éyi ka aá le bī gē um.” Anɔ́ɔ é le bī gé lɛ ɔ́ á.

²¹ Anɔ́ɔ ó le tá ɔkpá ā gaá le ɔmā ā fú tū ipú éŋkpɔ̄ ā, anɔ́ɔ ó kahíníī, “Ɛ̄nyā wɛ ɔdā nɛ̄ Óndú ā ka á, ‘N lɛ éŋkpɔ̄ nyā yá yēŋēē ɛɛ́, ó klla gáā ŋmó ɔ̄cɛ dúúmā ɛ́ɛ́ nɛ̄ ó gē plla ɔnyā dúúmā ɔyí ɛ́ɛ́ gɛ ŋ́.”

²² Anɔ́ɔ éŋkpɔ̄ ā kwú yá yēŋēē ŋmá eko ɔ́ɔmā jāā kwu ícɛ, ɛ́gɛ́nɛ̄ Ɛláyíssa ka, ka ɔ́ɔ géē wɛ ā.

²³ Ɛláyíssa nyɛ̄ɛ̄ ŋmá Ujérīko gā Ubɛ́tɛlu. Abɔ̄ ó yɔ̄ ī nyɔ̄ ɔwɛ ā, ayípɛ̄ ōhī ŋmá igelī nɛ̄ŋcɛ́ ā wā gē yá ɔ̄ okónu gē kahíníī, “Nyɔ̄ opllɛyí lé, nyɔ̄ opllɛyí lé!”

²⁴ Anɔ́ɔ Ɛláyíssa pīyeyī le ɔkɔnyɔ má uwā, anɔ́ɔ ó bī iyē kú Óndú le okónu tá le uwá. Anɔ́ɔ aɛ́bɛ́ o bɔ̄bí ɛpa le pɛ́ wɛ̄ɛcɛ ŋmá ipú ūpú gaá kwú ayípɛ̄nɔ̄nyīlɔ ofɛpa cɛpa ú kpó híla nyɛŋɛnyɛŋɛ.

²⁵ Anɔ́ɔ Ɛláyíssa ŋmá abɔ́ɔ gā ɛyí ɛfu kú Ukámɛ̄lu, anɔ́ɔ ó klla kwúcē wā Usamérīya á.