2 ĀCƐ UKƆ́RĪNTI 8 - Ubáyíbu kú Idɔma

Ɛhi o je ohígbū ācɛ ɔlɛ́ Ɔwɔicō nēe bá Ujudíya ā

¹ Ayínɛ́ alɔ, n tíne kú aá lɛ ɔdā nɛ̄ ɛhi kú eyīnyinyi kú Ɔwɔicō yá ipú aícɔ́ɔci kú Umasɛdónīya ā jé.

² Ayínɛ́ alɔ kú Umasɛdónīya bū ipú ojámá mɛ́mla eko unwalu nɛ̄hi náána ɔtū gē he uwá nɛ̄hi. É klla gbɛhá nɛ̄ɛ̄nɛhi, amáŋ é wɛ ācɛ nēe ī nwūla abɔ̄ nɛ̄hi.

³ N cɛ̄ uwā ijáalí ka uwá je ɛ́gɛ́nɛ̄ é má lɛ ā, é klla kōō je fíyɛ́ ɛ́gɛ́nɛ̄ é má abɔ̄ lɛ ā. É jé ŋmá ɔtū kú uwā.

⁴ É gbɔ̄ɔkɔ lɛ alɔ ka ālɔ̄ lɛ ɛga je lɛ uwā cɛ́ɛ́ kéē wɛ ipú úklɔ́ kóō tá ācɛ ɔlɛ́ Ɔwɔicō nēe bá Ujudíya ā abɔ̄ dúú.

⁵ Ɔdā nēé yá ā le fíyɛ́ ɛ́gɛ́nɛ̄ alɔ leyīce ā! Ohígbū kéē kwú iyī uwā í lɛ Óndú ā aflɛ́yí, anɔ́ɔ oŋmá ɛ́gɛ́nɛ̄ Ɔwɔicō cɛ̄ lɛ ā, é kwú iyī uwā í lɛ alɔ dúú á.

⁶ Ohígbū ɔ́ɔmā alɔ gbɔ̄ɔkɔ lɛ Utáyítɔ̄si nōo hútu úklɔ́ kú ɛhi ō da nyā ipú aá ā, kóō yɛ gɔbū mla anú jāā gbéeko nōó lɛ ɔ́ yá kwɛyí.

⁷ Aá le fíyɛ́ ācɛ ɔhá dóódu ipú ɔdā nɛ̄ aá lɛ ā. Ipú ɔtōōce Ohɔ́nyɛtá, ipú ɔna kú ɔ̄kōōlɔhi nɛ̄ aá ī tá ā, ipú ɔdā nɛ̄ aá jé lɛyíkwu ɛlā ɔkwɛyi ā, ipú ɛ́gɛ́nɛ̄ aá gē cɛ̄ kú aá tábɔ̄ lɛ ā, mɛ́mla ɛ́gɛ́nɛ̄ aá gē yíhɔtū tá alɔ lɛ ā. Ohígbū ɔ́ɔmā alɔ tíne kú aá le fíyɛ́ ācɛ ɔhá dúú ipú úklɔ́ ihɔtū kú oōje lɛ ācɛ nyā.

⁸ Ɛ̄nyā í wɛ íne nɛ̄ n gē je lɛ aá ā ŋ́, amáŋ n gē bī ɔtū ōcaca kú ācɛ icɔ́ɔci kú Umasɛdónīya le yá ɔdōcābɔ̄ lɛ aá. N yɔ̄ gē je ɛga nyā lɛ aá ká aá mafú ɛ́gɛ́nɛ̄ ihɔtū kú aā wɛ ɔkwɛ̄yi lɛ ā.

⁹ Aá jé ɛ́gɛ́nɛ̄ Óndú Ujísɔ̄si Ohɔ́nyɛtá ményinyi aá lɛ ā. Ó lagbénú nɛ̄hi, amáŋ ohígbū aá ā, ó kwú gbɛhá. Ó yá ɛ̄nyā cɛ́ɛ́ kú aá le gbagbénú ŋmá ɛhá kú nū.

¹⁰ Ɛlā kú um ipú ɛlā nyā ā yɔ̄ á. Ó lɔhi ká aá lɛ ɔdā nɛ̄ aá gbɔɔ́ iháyí nōo yɛ ā yá kwɛyí. Aá wɛ ācɛ aflɛ́yí á, ó wɛ úklɔ́ ō yá ōfōōfūnū ŋ́, amáŋ aá cɛ̄ ka aá géē yúklɔ́.

¹¹ Aá gɔbū mla úklɔ́ ā, ká aá lɛ ɔ́ yá kwɛyí! Aá bī ɔtū ōcaca nɛ̄ aá le hútu úklɔ́ ā lɛ ɔ́ yá kwɛyí, aá bī ɔdā nɛ̄ aá lɛ abālɔbányā ā le yá ɔ̄ kwɛyí.

¹² Ɔ́dāŋ ka aá gē yá ɔtūcaca kú aá je ɛhi lɛ Ɔwɔicō, ɛhi nɛ̄ aá je ā géē he Ɔwɔicō ɔtū. Ɔ́ɔmā wɛ ka aá gē je ɛ́gɛ́nɛ̄ aá lɛ ā. Ɔwɔicō ī leyīce aá kú aá je ŋmá ɔdā nɛ̄ aá lɛ ŋ́ mā ŋ́.

¹³ Ó wɛ ka n yɔ̄ gē mabɔ̄ ācɛ ɔhá tá ɛ́ɛ́ nɛ̄ n gē je iyó ce aá ā ŋ́. Amáŋ abɔ̄ aá lɛ nɛ̄hi eko nyā ā, ó lɔhi kú aá cíkā ō tá ācɛ ɔhá nɛ̄ ɛgbá gē ce uwá ā abɔ̄.

¹⁴ Cɛ́ɛ́, eko nɛ̄ ɛgbá kē ce aá, nēé lɛ nwuné á, é géē tá aá abɔ̄. Ɔwɛ ɛ́gɛ́nyā ā, ógo tá ga ɔlɛ́ apɛ, apɛ tá ga ɔlɛ́ ógo.

¹⁵ Ɛ́gɛ́nɛ̄ Ɔkpíihɔ ká lɛ ā, “Ɔ̄cɛ nōo tú bá nwuné ā, í lɛ cabá ŋ́, anɔ́ɔ ɔ̄cɛ nōó tú bā nwuné ŋ́ mā í kē lɛ nyɛ́ ŋ́ má.”

Utáyítɔ̄si mɛ́mla Ɔ́mpānū

¹⁶ Alɔ tá Ɔwɔicō ahínyá ohígbū koó lɛ Utáyítɔ̄si yá kóō lɛ ɔtucaca kóō tá aá abɔ̄ ɛ́gɛ́nɛ̄ alɔ lɛ ā!

¹⁷ Ó lɛ ɔkɔ nɛ̄ alɔ gbā lɛ ɔ́ kóō wā ɛgiyí aá ā pó. Ɛlā ɔkwɔ̄ɔ̄kwɛ̄yi, ɔtūcaca nōó lɛ kóō yá ɔdā ɔ́ɔmā nɛ̄ alɔ da ɔ́ á, cɛ̄ lɛ ɔ́ lɛ iyī nū fu kóō nyɔ̄.

¹⁸ Alɔ yɔ̄ ge tū ɔyínɛ́ éyi ɛhɔ̄ mla anú! Ɔ̄cɛ ā wɛ ɔ̄cɛ nɛ̄ odúúdú icɔ́ɔci gē lɛ ojīlīmā ce ɔ́ ohígbū úklɔ́ kú ɔna kú ɔ̄kōōlɔhi nōó gē yá ā.

¹⁹ Ó wɛ kéē jé ɔ̄ lɔɔhɔhi ōfōōfūnū ŋ́, amáŋ aícɔ́ɔci ā lɛ ɔ́ fu ɔ̄cɛ ɛyɛ́ɛ́yí kóō tá alɔ ɔkwu ipú iyāwu kú alɔ. Ó géē tá alɔ abɔ̄ kóō leyīkwu ije ojīlīmā nɛ̄ alɔ yɔ̄ ī da nyā, nōo géē yá kú ācɛ kéē cɛ̄tra Óndú Ujísɔ̄si, Ohɔ́nyɛtá. Ɛ̄nyā kē ī mafú ka alɔ le tútū ō tá ācɛ ɔlɛ́ Ɔwɔicō ɔ́mpā alɔ nɛ̄ ɛgbá ce uwá ā abɔ̄.

²⁰ Alɔ yɔ̄ gē leyī kwɛcɛ kú alɔ yá kú iŋini dúú kóō bɛ̄cɛ lɛyíkwu ɔwɛ nɛ̄ alɔ gē leyīkwu ɛhi kú ojīlīmā nɛ̄hi nyā ŋ́.

²¹ Ɛyí kú ɔdā nɛ̄ alɔ ī yá nyā wɛ ka ālɔ̄ yá ɔdā nōo le kpaakpa, ó híīī wɛ iyɔ̄bū Óndú ā ōfōōfūnū ŋ́, óō wɛ iyɔ̄bū ācɛ dúú.

²² Alɔ yɔ̄ ī tū ɔyínɛ́ nɔ̄nyīlɔ ɔhá kóō nyɔ̄ mla uwá. Ó húmáyī mafú lɛ alɔ igbalɛwa koó le tútū kóō tá alɔ abɔ̄ eko dóódu. Anɔ́ɔ abālɔbányā nōó lɔtūce aá ā, ó le tútū fíyɛ́ kóō tá alɔ abɔ̄.

²³ Aá bla ka Utáyítɔ̄si wɛ obíyē kú um. Ami mla anú yúklɔ́ tɔ̄há ohígbū olɔhi kú aá. Ācɛ o cɛ̄lā Ɔwɔicō ɛpa nēe bá gē nyɔ̄ mla anú ā kwɛyí aícɔ́ɔci, úklɔ́ kú uwā kē ī bī ojīlīmā gé lɛ Ohɔ́nyɛtá ā.

²⁴ Aá mafú lɛ ācɛ nēe bá nyā kéē he aá ɔtū. Cɛ́ɛ́ kú aícɔ́ɔci nēe tū uwā ɛhɔ̄ ā kéē le jé. Ɛ̄nyā géē mafú lɛ uwá ka obī aá gwō kú alɔ wɛ ɔkwɛ̄yi.