2 ĀCƐ UKƆ́RĪNTI 7 - Ubáyíbu kú Idɔma

¹ Aóklóbīya um mɛ́mla áncɛ́nyā um, o he um ɔtū, Ɔwɔicō lɛ okónu ce lɛ alɔ ɛɛ́. Ká alɔ lɛ aɔ́dā nēe ī yá kú ɔkpíyē mɛ́mla odo kú alɔ kéē blínyī ā kpó bónū, cɛ́ɛ́ kú alɔ lā oyēeyī ōtīihɔ ohígbū ka alɔ ī yúúfi Ɔwɔicō.

Ɔtūnɛ̄hɛ́ kú Upɔ́lu

² Aá mīyɛ alɔ ŋmá ɔtū kú aá! Alɔ í yá ɔ̄cɛ dúú ɔdōōbɔ̄bí ŋ́, alɔ í kē bī ɔ̄cɛ dúú bí ŋmá ɔtū nōó le ce Óndú á ŋ́, ámāŋ pīya ɔ̄cɛ dúúmā tū ŋ́.

³ Ń ka ɛnyā, ká n̄ bī ɔ̄ le ŋmó aá ɛpɔ̄bí ŋ́. Ohígbū ka n ka aflɛ́yí ka, aá he alɔ ɔtū nɛ̄ɛ̄nɛ̄hi ka ɔdá dúú í fō alɔ ŋmá ɛgiyí aá glá ŋ́, ɔ́dāŋ ka alɔ gekwú amáŋ ka alɔ yēeyī.

⁴ N lɔtūce aá nɛ̄ɛ̄nɛ̄hi, n kē ī bī aá gwō. Odúúdú unwalu nɛ̄ alɔ bū ipú nū á í kōō pīya ɔtū kú um abɔ̄ lɛyíkwu aá ŋ́. Ikɔkɔ ɔ́ɔmá n gē gwéeyē eko dóódu.

⁵ Ó kōō eko nɛ̄ alɔ gā Umasɛdónīya, alɔ í má ɛga mlɛ́nyɔ̄ ŋ́. Unwalu yɔ̄ gē wā ɛgiyí alɔ ŋmá ɛga dóódu, ācɛ ɔhá bá gē yíkpɛ́lā tū alɔ, ɔtū kú alɔ le wuklíicō.

⁶ Amáŋ Ɔwɔicō, nōo gē tá ācɛ nēe lɛ ɔdā nēe gē kpɔ́tūce ɔ́ gɛ ŋ́ mā abɔ̄ ā, bī ōwā kú Utáyítɔ̄si le tá alɔ ɔtū kwu ɔtū.

⁷ Ó wɛ ōwā kú nū ōfōōfūnū ā tá alɔ ɔtūlé ā ŋ́, amáŋ ohígbū ɔ̄kā kú ɛ́gɛ́nɛ̄ aá tá ɔ̄ ɔtū lé lɛ nōó bī wā í kā alɔ ā. Ó da um ɛ́gɛ́nɛ̄ eyī um yɔ̄ gē ce aá ā, ɛ́gɛ́nɛ̄ aá híjémā kú unwalu nɛ̄ aá je ga um ā, ɛ́gɛ́nɛ̄ aá le tútu ō cɛ̄pɔ̄ um lɛ ā ā. Anɔ́ɔ ɔtū he um abālɔbányā fíyɛ́ á.

⁸ Ɔkpá nɛ̄ n tá fu aá ā lɛ aá ɔtū bīya, amáŋ ń híjémā ka n tá ɔkpá ā ŋ́. Ó kwú um iyē eko kpiíí dúú, ohígbū ka n le jé ka ɔkpá ā lɛ aá ɔtū bīya, nááná nɛ̄ aá cɔ̄nū gbojī ajɛ ŋ́ mā.

⁹ Amáŋ, ɛ́gɛ́nɛ̄ ó lɛ abālɔbányā ā, ɔtū he um ohígbū ɔkpá ɔ́ɔmā nɛ̄ n tá ā. Ɔtū í he um ohígbū ka n lɛ aá ɔtū bīya ā ŋ́, amáŋ ohígbū ka ɔtū nōo bīya lɛ aá ā cɛ lɛ aá le pīyabɔ̄. Ɔtū kú aá nōo bīya ā ŋmá lɛ ɛ́gɛ́nɛ̄ Ɔwɔicō cɛ̄ lɛ ā, ohígbū ɔ́ɔmā ɔdā nɛ̄ alɔ yá ā í yá aá ɔdōōbɔ̄bí dúúmā ŋ́.

¹⁰ Ohígbū ka ɔtū nēé bīya aá anú ŋmá lɛ ɛ́gɛ́nɛ̄ Ɔwɔicō cɛ̄ ā gē yá kú ɔ̄cɛ kóō le pīya ga ɛgiyí nū, cɛ́ɛ́ kóō lɛ ɔ́ nyatá. Ɔ̄cɛ dúúmā í kē ī híjémā kú ɔtūnōbí ɔ́ɔmā gɛ ŋ́. Amáŋ ɔtūnōbí nōo ŋmá ɛgiyí ɔ̄cɛ ɔlamu gē bī ɔ̄cɛ ga ɔlékwū.

¹¹ Ɔtū nōo bīya lɛ aá ā wɛ o ŋmá lɛ ɛ́gɛ́nɛ̄ Ɔwɔicō cɛ̄ kóō yá aá ā, aá kē má ɔdā nōó yá lɛ aá ā! Ó cɛ̄ lɛ aá yá ɔdā nɛ̄ aá yá ā o yá ɛ́ɛ́ kú aá mafú ka aá yá ɔdōōbɔ̄bí dúúmā ŋ́. Aá le cɔ̄nū ohígbū ɔdā nōo yá wā ī yɛ ā, aá gē yúúfi kú ɔdā nōo lɔfú yá glá kpɔ́ ā. Ó cɛ̄ lɛ aá ī dɔɔ̄kā ō lɛ um má eyī, ó cɛ̄ lɛ aá cɛ̄pɔ̄ um, cɛ́ɛ́ ká aá lɛ italā yá ācɛ nēe ī yá ɔdōōbɔ̄bí ā. Ipú odúúdú unwalu nōo yá gáā yɛ ā, aá le mafú ka abɔ̄ kú aá í wu ɔ́ ŋ́.

¹² Eko nɛ̄ n tɔ́kpá ɔ́ɔmā, ɔtū kú um í kwu ɔ̄cɛ nōo yá ācɛ ɔdōōbɔ̄bí ā ŋ ámāŋ kwu ɔ̄cɛ nēé yá ɔ̄ ɔdōōbɔ̄bí ā ŋ́. N tɔ́kpá ā o yá ɛ́ɛ́ kú aá le jé ka Ɔwɔicō jé ka aá lɛyítáajɛ lɛ alɔ.

¹³ Ɔ́ɔmā yá ɛ́ɛ́ nɛ̄ alɔ lɛ ɔtū ō tū kwu ɔtū á. Ó wɛ ɔtū ō tū kwu ɔtū ā kú alɔ ōfōōfūnū ŋ́, amáŋ ɔtū nōo he Utáyítɔ̄si ā klla cɛ̄ lɛ alɔ gwéeyē fíyɛ́ kpɔ́. Ó da alɔ ɛ́gɛ́nɛ̄ aá mīyɛ anú lɛ ā mɛ́mla ɛ́gɛ́nɛ̄ aá yá kú ɔtū kú nū kóō wāajɛ lɛ ā.

¹⁴ N bī aá gwō lɛ ɔ́, aá kē cɛ̄ lɛ uwēyī kwú um ŋ́. Alɔ í kɛ̄mgbɛ̄ lɛ aá jéjēē ɛ́ɛ́ ŋ́, ɔ́ɔmā yá ɛ́ɛ́ nɛ̄ ō gwō nɛ̄ alɔ bī aá gwō ipeyī Utáyítɔ̄si ā le kpaakpa ā á.

¹⁵ Aá ī he ɔ́ ɔtū fíyɛ́ eko nōó ī blakwu ɛ́gɛ́nɛ̄ aá le tútū ō lɛyítáajɛ lɛ ɛlā kú nū lɛ ā, ɛ́gɛ́nɛ̄ aá mīyɛ ɔ́ lɛ mla ojīlīmā mla ɛyí otúwāajɛ lɛ ā.

¹⁶ N gē gwéeyē nɛ̄hi abālɔbányā ohígbū ka n lɔtūce aá dúúdú.