2 ĀCƐ UKƆ́RĪNTI 6 - Ubáyíbu kú Idɔma

¹ Abɔ̄ alɔ gē yúklɔ́ tɔ̄há mla Ɔwɔicō ā, alɔ gē gbɔ̄ɔkɔ lɛ aá ka ɛ́gɛ́nɛ̄ Ɔwɔicō le ɛhi je lɛ aá ŋmá lɛ eyīnyinyi kú nū ɛɛ́ mā, aá kóō bī ɛhi ɔ́ɔmā yúklɔ́.

² Ɔwɔicō kahíníī, “N le ɔkɔ kú aá pó eko nɛ̄ n tíne ō tá aá abɔ̄ ā. N tá aá abɔ̄ eko nɛ̄ ɛ̄cī nɛ̄ n tíne ō nyā aá tá ā ga ā.” Aá jāhɔ̄! Abālɔbányā wɛ eko nɛ̄ Ɔwɔicō ī tá aá abɔ̄ á! Ícɛ nyā wɛ ɛ̄cī nɛ̄ Ɔwɔicō ī nyā aá tá á.

³ Alɔ í dɔɔ̄kā kú ɔ̄cɛ dúúmā kóō ŋmó úklɔ́ kú alɔ okónu ŋ́, ohígbū ɔ́ɔmā alɔ cēyītīkwū kú alɔ híīī lɛ ɔdā nōo ī hɛ́ ɔ̄cɛ gwōnū tá ɔwɛ lɛ ɔ̄cɛ dúúmā ŋ́.

⁴ Ikɔkɔ ɔ́ɔmā, alɔ gē mafú ka alɔ wɛ ācocɛ̄hɔ̄ kú Ɔwɔicō ipú ɛjɛ̄ɛ̄jī ɔdā dóódu nɛ̄ alɔ gē yá ā. Alɔ lɔtulé nɛ̄hi ipú unwalu, ipú ōwē mɛ́mla ipú ɛdɔ ɛ́kɛma dóódu.

⁵ É ŋmó alɔ ije, é kpó alɔ tū agbá, ɛwa wuklíico lɛyíkwu alɔ, alɔ yúklɔ́ nōo kpó gla ɔfú kú alɔ, alɔ í gbɔlā lɔhi glá ŋ́, alɔ klla ī gbo ɛmiyɛ.

⁶ Alɔ lɛ iyī alɔ mafú ka alɔ wɛ ācocɛ̄hɔ̄ kú Ɔwɔicō oŋmá lɛ oyēeyī oyēŋēē nɛ̄ alɔ lā ā, Ɔdōojé kú alɔ, ɔtōōlé kú alɔ, ogbonɛnɛ kú alɔ, oŋmá lɛ ɔfú kú Alelékwū Ihɔ, mɛ́mla ihɔtū ɔkwɛ̄yi nɛ̄ alɔ lɛ lɛ ācɛ ɔhá ā.

⁷ Alɔ lɛ iyī alɔ mafú ŋmá olɛhɔ̄ ɔkwɛ̄yi nɛ̄ alɔ tɔ́ɔna nū ā, mɛ́mla ɔfú kú Ɔwɔicō nōo húmáyī bī alɔ yúklɔ́ ā. Alɔ bī oyēeyī okpaakpa nɛ̄ alɔ lā bɛ̄ɛka iyɔ́fú ā. Alɔ ī bī ɔ̄ le nuunu, klla ī bī ɔ̄ le gbā iyī alɔ ɛyí.

⁸ Ācɛ ōhī ka olɔhi kú alɔ, ācɛ ōhī kē ka obɔ̄bí kú alɔ. Ācɛ ōhī ca alɔ ɛcá, ācɛ ōhī kē cɛ̄tra alɔ. Ācɛ ka ka alɔ wɛ ācokɛ̄mgbɛ̄, amáŋ ɛlā ɔkwɛ̄yi nɛ̄ alɔ gē ka á.

⁹ Ācɛ ka ɔ̄cɛ dúú í jé alɔ ŋ́, amáŋ odúúdú ācɛ kē jé alɔ. Alɔ gē lɛyí ce ikwū, amáŋ ɛ́gɛ́nɛ̄ aá má ɔ̄ ā, alɔ yēeyī kpɔ́. Nááná nēé yá alɔ italā nɛ̄ɛ̄nɛ̄hi ā, é kē ŋmó alɔ ŋ́.

¹⁰ É gē bīya alɔ ɔtū nááná, alɔ kē ī gwéeyē. Alɔ lɛbɛ̄ɛka ācogbɛhá ā, amáŋ alɔ lɛ ācɛ alɛwa yá ācɛ olagbénú. Ó lɛbɛ̄ɛka alɔ í lɛ ɔdā dóódu ŋ́ mā ā, amáŋ alɔ kē lɛ ɛjɛ̄ɛ̄jī ɔdā dóódu.

¹¹ Aóklóbīya mɛ́mla ańcɛ́nyā alɔ o he alɔ ɔtū kú Ukɔ́rīnti! Alɔ kɛlā lɛ aá ŋmá ɔtū ékpó kú alɔ. Alɔ lɛ ɔtū kú alɔ nwulā lɛ aá.

¹² Alɔ í je ihɔtū kú alɔ ŋmá ɛgiyí aá ŋ. Aá wɛ ācɛ nēe je ihɔtū kú aá ŋmá ɛgiyí alɔ á.

¹³ N gē kɛlā lɛ aá abālɔbányā ɛ́gɛ́nɛ̄ ádā gē kɛlā lɛ ayí nū ā. Aá yíhɔtū tū alɔ ɛ́gɛ́nɛ̄ alɔ yá tū aá ā.

Aá pīyatɔ̄há mla ācɛ nēé cɛ̄ ɛlā kú Ohɔ́nyɛtá ā ŋ́ mā ŋ́.

¹⁴ Aá jámá ká aá yúklɔ́ tɔ̄há mla ācɛ nēé cɛ̄lā Ohɔ́nyɛtá ŋ́ mā ŋ́, ohígbū ka ɔ́ɔmā í yá glá ŋ́. Ɔwɛ nyā nɛ̄ ɔdā okpaakpa mɛ́mla ɔ́bíipú yúklɔ́ tɔ̄há glá āa? Ɔwɛ nyā nɛ̄ ɔlá ofíyajɛ mɛ́mla obū lā tɔ̄há glá ā?

¹⁵ Ɔwɛ nyā nɛ̄ Ohɔ́nyɛtá mɛ́mla ebilíi cɛ̄ tɔ̄há glá āa? Ɔdí nɛ̄ ɔ̄cɛ o cɛ̄ɛ̄lā Ɔwɔicō lɛ ī yá tɔ̄há mla ɔ̄cɛ nōó cɛ̄ɛ̄lā Ɔwɔicō ŋ́ mā ā?

¹⁶ Ɔwɛ nyā nɛ̄ agbla kú Ɔwɔicō gē lé tɔ̄há mla ikpɛ́cí kú ācopɛ̄cí gɛ? Ohígbū ka alɔ ā wɛ agbla kú Ɔwɔicō nōo yēeyī ā á! Ɛ́gɛ́nɛ̄ Ɔwɔicō abɔ̄yī nū ka ā. Ó kahíníī, “N géē gwó ɔlɛ́ um ipú ācɛ ɔlɛ́ um. N géē lā mla uwā. N géē wɛ Ɔwɔicō kú uwā, é kē í wɛ ācɛ ɔlɛ́ um.”

¹⁷ Anɔ́ɔ Óndú ā da ācɛ ɔlɛ́ nū kahíníī, “Aá le bɛ̄cɛ ŋmá ipú ācɛ nēé cɛ̄ɛ̄lā Ɔwɔicō ŋ́ mā ká aá le fō í bá ɛgɛyɛ́yí. Aá lɛ iyī aá tū ŋmá ɔdēelihɔ, cɛ́ɛ́ ká n̄ géē mīyɛ aá.

¹⁸ N géē wɛ ádā aá, aá kē géē je pīya ayínɔ̄nyīlɔ mɛ́mla ayínɔ̄nyā kú um, Óndú ā nōo lɔfú fíyɛ́ dúú ā ka á.”