2 ĀCƐ UKƆ́RĪNTI 5 - Ubáyíbu kú Idɔma

Ɔkpíyē ɛ̄yīpɛ̄

¹ Ɔkpíyē kú alɔ lɛbɛ̄ɛka áklɔ̄kpɛ nɛ̄ alɔ lā anú ipú ɛcɛ nyā ā. Amáŋ alɔ jé ka eko nēé lɛ áklɔ̄kpɛ nɛ̄ alɔ lā anú nyā catāajɛ ipú ɛcɛ amānyā, Ɔwɔicō géē lɛ ɔlɛ éyi tū lɛ alɔ ipú ɔkpáncō kú alɔ lā ipú nū, ɔlɛ́ nɛ̄ anú abɔ̄yī nū gwó nōo géē yɔ̄ piyóó ā.

² Abɔ̄ alɔ lā ipú ɔkpíyē nyā ā, ɔtū í he alɔ ŋ́, anɔ́ɔ alɔ yɔ̄ ī tíifu ka ɔkpíyē ɔhá, ɛ̄nɛ̄ o ŋmá ɔkpáncō ā he alɔ ɔtū mɛ́ɛ̄ á, kéē kwú ɔ̄ ú wu alɔ iyē bɛ̄ɛka úwé ā.

³ Alɔ gē tíne nɛ̄ɛ̄nɛ̄hi kú alɔ yɔ̄ ipú ɔkpíyē kú alɔ ɛ̄yīpɛ̄ ā cɛ́ɛ́ alɔ í gáā yɔ̄ nɛ̄ ɔkpíyē í gáā klá alɔ iyē ŋ́ nɛɛ ŋ́.

⁴ Abɔ̄ alɔ lā ipú ɔkpíyē kú alɔ nōo ī kwú ā, ó gē yá kú alɔ tíifu, amáŋ ó wɛ ka alɔ tíne ō kwú kú alɔ híīī lɛ ɔkpíyē dóódu fúlufúlu ŋ́ nɛɛ ŋ́. Amáŋ alɔ gē dɔɔ̄kā kéē kwú ɔkpíyē kú ɔkpáncō ā wu alɔ iyē, cɛ́ɛ́ ka ɔkpíyē nōo ī kwú ā le pīyabɔ̄ ga oyēeyī opiyóó.

⁵ Ɔwɔicō lɛ alɔ tútū ohígbū opīyabɔ̄ nyā, anɔ́ɔ ó kwú Alelékwū kú nū ú lɛ alɔ kóō wɛ ɔdā o kwajɛ kú odúúdú ɔdā nōó kpó bá gbēyī alɔ ā á.

⁶ Ohígbū ɔ́ɔmā alɔ ī lɔtū eko dóódu. Alɔ jé ka ɔdā nōo yá ɛ́ɛ́ nɛ̄ alɔ lā ipú ɔkpíyē nyā kpɔ́ ā, alɔ í yɔ̄ ɔlɛ́ Óndú ā ŋ́.

⁷ Ohígbū ko yɔ̄ gē lɔtūce Ɔwɔicō ā yá nɛ̄ alɔ yēeyī á, ó wɛ oŋmá lɛ ɔda nɛ̄ alɔ má ā ŋ́.

⁸ Alɔ í lɔtū, ó géē yɛ í he alɔ ɔtū fíyɛ́ ká alɔ nyɛ̄ɛ̄ ŋmá ɔlɛ́ alɔ ipú ɔkpíyē cɛ́ɛ́ ka alɔ gaá lā mla Óndú Ujísɔ̄si.

⁹ Ohígbū ɔ́ɔmā alɔ tíne ō yá ɔdā nōo ī he Óndú ā ɔtū, ɛga dúú nɛ̄ alɔ bá ā, ka alɔ kōō bá ipú ɔkpíyē kú alɔ kpɔ́ oo amáŋ ka alɔ nyɛ̄ɛ̄ ŋmá ipú nū.

¹⁰ Ohígbū ka odúúdú alɔ géē háyi iyɔ̄bū Ohɔ́nyɛtá, ɔ̄cóhɛ́pɔ̄ kú alɔ. Ó géē kɛpɔ̄ tū alɔ cɛ́ɛ́ kóō gbā ulé lɛ alɔ ámāŋ kóō yá alɔ italā ɛ́gɛ́nɛ̄ ɔdā nɛ̄ ɔnyɔɔnyɛ yá ā lɛ ā. Ohɔ́nyɛtá géē yá ɛ̄nyā ɛ́gɛ́nɛ̄ ɔdā olɔhi ámāŋ ka ɔdōōbɔ̄bí nɛ̄ ɔnyɔɔnyɛ kú alɔ yá ipú oyēeyī kú nū ipú ɛcɛ ā lɛ ā.

Olɛhɔ̄ kú ɛbɔ́

¹¹ Abɔ̄ alɔ jé ɔdā nōó wɛ ka ɔ̄cɛ kóō yúufi Óndú ɔkwɔɔkwɛ̄yi ā, alɔ yɔ̄ ī yá ɔwɛ dóódu ka alɔ pīya odúúdú ācɛ abɔ̄ wā ɛgiyí nū. Ɔwɔicō je ɛjɛ̄ɛ̄jī ɔda dóódu nɛ̄ alɔ wɛ ā á. N kē leyīce ka aá je alɔ lɔɔlɔhi lɛ ā dúú.

¹² Alɔ í yɔ̄ ī cɛ̄tra iyī alɔ ɛgiyí aá igbɔhá gɛ ŋ́. Ehée, ɔdā nɛ̄ alɔ tíne ō yá ā wɛ o yá ká aá le jé lɔɔlɔhi ɔdā nōo yá ɛ́ɛ́ nɛ̄ aá cíkā ō bī alɔ gwō ā. Cɛ́ɛ́ aá géē je ɔwɛ nɛ̄ aá géē tá ācɛ nēe ī kɔbɔ́ɔ̄cɛ kú ɛ́gɛ́nɛ̄ o má eyī kú ɔ̄cɛ lɛ, nóō wɛ uce kú nū ŋ́ mā, ohi.

¹³ Alɔ ī jɛɛ́lɛ́ ɔkwɛ̄yi ɛ́gɛ́nɛ̄ ācɛ ka ā nɛɛ? Ɔ́dāŋ koó lɛ ā, ayíka ohígbū Ɔwɔicō nɛ n. Amáŋ ɔ́dāŋ koó lɛ ā ŋ́ ayíka ohígbū aá nɛ n.

¹⁴ Alɔ yá ɔdā nɛ̄ alɔ yá ā ohígbū ihɔtū nɛ̄ Ohɔ́nyɛtá lɛ lɛ alɔ nōo gē gbō alɔ ā nɛ. Ó kwú ohígbū odúúdú ācɛ, anɔ́ɔ ó ce alɔ eyī gēdēē ka ɔ̄cɛ éyi gekwú ohígbū odúúdú ācɛ, ɔ́ɔmā lé ka odúúdú ācɛ gekwú mla anú ipú alelékwū.

¹⁵ Ohɔ́nyɛtá kwú ohígbū odúúdú ācɛ cɛ́ɛ́ kú ācɛ nēe yēeyī ā í cíkā ō lā lɛ iyī uwā gɛ ŋ́, amáŋ é cíkā ō lā lɛ Ohɔ́nyɛtá nōo kwú, nɛ̄ Ɔwɔicō je ɔ́ héyī ŋmá ɔlékwū ohígbū uwā ā.

¹⁶ Alɔ í gē je ɔdā nɛ̄ ɔ̄cɛ wɛ ā ŋmá lɛ ɔwɛ nɛ̄ alɛɛcɛ gē gbɛlá ā gɛ ŋ́. Ó wɛ ɔkwɛ̄yi ka eko éyi alɔ kɛpɔ̄ tū Ohɔ́nyɛtá ɔwɛ ɛ́gɛ́nyā dúú, amáŋ alɔ í gē yá lɛ ā gɛ ŋ́.

¹⁷ Eko nɛ̄ ɔ̄cɛ dúúmā mīyɛ Ohɔ́nyɛtá ā, ó kwú pīya ɔ̄cɛ nēé yá ɛ̄yīpɛ̄. Ɔwɛ kú oyēeyī nɛ̄ncɛ̄ ā le yɛ, ɔwɛ kú oyēeyī ɛ̄yīpɛ̄ ga ɛɛ́.

¹⁸ Ɔwɔicō ī yá odúúdú ɔdā nyā á. Anú ka alɔ gwó mla iyī nū ohígbū ɔdā nɛ̄ Ohɔ́nyɛtá yá ā. Ó klla kwú úklɔ́ ú lɛ alɔ ka alɔ yá kú odúúdú ācɛ ɔhá kéē le kagwó mla anú dúú.

¹⁹ Ɔdā nōō wɛ olɛhɔ̄ ka alɔ ā wɛ ka Ɔwɔicō yɔ̄ ī ka alɛɛcɛ gwó mla iyī nū ohígbū ɔdā nɛ̄ Ohɔ́nyɛtá yá ā. Ó kwú íne nēé bīya í yá uwā ɛhi icííci, anɔ́ɔ ó kwú ɔ̄ ú ŋmá ɔtū kú nū á. Ó kē kwú olɛhɔ̄ ā ú lɛ alɔ nēe wɛ ācotɛ̄hɔ̄ ā, ka alɔ ka tɛ́ɛcɛ ka Ɔwɔicō ī dɔɔ̄kā kóō lɛ odúúdú ācɛ kagwó mla iyī nū.

²⁰ Ohígbū ɔ́ɔmā alɔ ī kɛlā kwɛyí Ohɔ́nyɛtá ā á. Ó lɛbɛ̄ɛka ɔdā nɛ̄ Ɔwɔicō abɔ̄yī nū ī bī alɔ le gbɔ̄ɔkɔ lɛ aá ā. Alɔ ī gbɔ̄ɔkɔ lɛ aá kwɛyí Ohɔ́nyɛtá, ka aá kóō le kagwó mla Ɔwɔicō.

²¹ Ohɔ́nyɛtá abɔ̄yī nū í bīyíne dóódu ŋ́, amáŋ ohígbū alɔ Ɔwɔicō lɛ ɔ́ pīya ɔ̄cobīyíne. Ohígbū ɔ́ɔmā alɔ nēe mīyɛ Ohɔ́nyɛtá ā le pīya ācɛ nēe yá ɔdā nɛ̄ Ɔwɔicō tíne ā.