2 ĀCƐ UKƆ́RĪNTI 3 - Ubáyíbu kú Idɔma

Ācotɛ̄hɔ̄ kú ɛka ɛ̄yīpɛ̄ ā

¹ Ɔdā nɛ̄ alɔ tá ānāānā ā í wɛ ka alɔ yɔ̄ ī cɛ̄tra iyī alɔ igbɔhá ŋ́. Alɔ í lɛbɛ̄ɛka ācɛ ɔhá ā ŋ́, nɛ̄ alɔ ī cɛgbá ɔkpá nōo ī cɛ̄tra alɔ lɛ aá ŋ́. Alɔ í kōō cɛgbá ɔkpá ŋmá ɛgiyí aá nōo ī cɛ̄tra alɔ lɛ ācɛ ɔhá ŋ́.

² Aá Abɔ̄yī aá wɛ ɔkpá nɛ̄ alɔ tá bá ɔtū kú alɔ nɛ̄ ɛjɛ̄ɛ̄jī ācɛ géē má klla ī jé ā.

³ Aá lɛbɛ̄ɛka ɔkpá nɛ̄ Ujísɔ̄si tá nɛ̄ alɔ le tɛ̄hɔ̄ ā. Ɛ̄nyā í wɛ ɔkpá nɛ̄ ɔ̄cɛ éyi bī ɔdā otɔ́kpá tá tū usiléti kú ɛcɔ̄ ŋ́. Ikɔkɔ ɔ́ɔmā, ɛ̄nyā wɛ, ɛ́gɛ́nɛ̄ ó lɛ mɛ́ɛ̄ ā, ɔkpá nɛ̄ Ohɔ́nyɛtá bī Alelékwū kú Ɔwɔicō nōo yēeyī ā tá tū ɔtū kú ɔ̄cɛ ɔlamu.

⁴ Alɔ ka ɛ̄nyā oŋmá ɛgiyí Ohɔ́nyɛtá nōo yá kú alɔ lɔtūce Ɔwɔicō ā.

⁵ Alɔ abɔ̄yī alɔ í lɛ ɔdā dúú ipú alɔ nōo je íkwu lɛ alɔ kú alɔ gbɛlá ka alɔ lɔfú yúklɔ́ nyā glá ŋ́. Ɔwɔicō je ɔfú lɛ alɔ ka alɔ le yúklɔ́ nyā á.

⁶ Anú yá ɛ́ɛ́ nɛ̄ alɔ í cɛ̄ Ɔwɔicō ɛhɔ̄ ɔwɛ nɛ̄ ɛka ɛ̄yīpɛ̄ bī wɛ̄ɛcɛ ā. Ɛka ɛ̄yīpɛ̄ nyā í wɛ íne nēé tá tāajɛ ŋ́, amáŋ Alelékwū kú Ɔwɔicō nēé bī le tá ɔ̄ á. Ine nēé tá tāajɛ ā gē bī ikwū wā gé lɛ ɔ̄cɛ, amáŋ Alelékwū gē je oyēeyī lɛ ɔ̄cɛ.

⁷ É lɛ íne kú Umósīsi ā tá tū ɛcɔ̄ usílēti, anɔ́ɔ eko nēé je ɔ̄ ā, ɛgahi kú Ɔwɔicō ɛ̄nɛ̄ o yɔ̄ ī ceyī nɛ̄hi ā le bɛ̄cɛ ā. Ɛgahi ā cɛ̄ lɛ eyī kú Umósīsi ceyī nɛ̄hi, anɔ́ɔ nááná nɛ̄ ɛgahi ā gbɔɔ́ ō ca ā, ācɛ kú Ísrɛ̄lu í leyīkwu ɔ̄ eyī gbojī ajɛ glá ŋ́ má. Ɛgahi o ceyī nɛ̄hi kú Ɔwɔicō le bɛ̄cɛ eko nēé yɔ̄ ī je íne nōo gē bī ikwū wā gé lɛ ācɛ ā.

⁸ Amáŋ ɛgahi kú eko nɛ̄ Alelékwū ā lɛ ɛka ā kwajɛ ā nwuné fíyɛ́ kɔ́ɔ́.

⁹ Ohígbū ka ɔ́dāŋ ka íne nōo í ŋmó ācɛ ɛpɔ̄bí ā lɛ ɛgahi ɛ́gɛ́nyā lɛ, ayíbɛ̄ ɛ́gɛ́nyā nɛ̄ ɛgahi kú íne nōo gē nyā ācɛ tá ā kē í lɔhi lɛ ā!

¹⁰ Kú ɔkwɛ̄yi ā, alɔ lɔfú ka ka ohígbū ɛgahi olɔhi nɛ̄hi kɔ́ɔ́ kú ɛka kú abālɔbányā ā, ɛgahi olɔhi nɛ̄hi kú eko nōo yɛ ā mɛ ɛ́ɛ́.

¹¹ Ohígbū ka ɔ́dāŋ ka ɛka nɛ̄ncɛ̄ nōo mɛ ɛ́ɛ́ mā lɛ ɛgahi nɛ̄hi, ayíbɛ̄ ɛ́gɛ́nyā nɛ̄ ɛgahi kú ɛka ɛ̄yīpɛ̄ nōo ī yɔ̄ piyóó ā í lɔhi lɛ ā!

¹² Ohígbū ka alɔ lɔtūkpóce ɛka ɛ̄yīpɛ̄ nyā ā, alɔ lɔtū ī kɛlā tɛ́ɛcɛ.

¹³ Alɔ í lɛbɛ̄ɛka Umósīsi nōo gē lɛ īlī klá eyī cɛ́ɛ́ kú ācɛ kú Ísrɛ̄lu kéē híīī má oceyī kú eyī kú nū nōo yɔ̄ gē mɛtáajɛ ā ŋ́.

¹⁴ Amáŋ é lɛ ɔtū kú ācɛ ā yá kóō le lɔfú. Jāā kwu ícɛ nyā é gē lɛ īlī ɛdɔ ékpó ɔ́ɔma klá eyī kpɔ́ eko dúúmā nēé gē jé ɛka nɛ̄ncɛ̄ ā tɛ́ɛcɛ. Ohɔ́nyɛtá ā ōfōōfūnū gē kpo īlī ā ŋmá ɔ̄ eyī ā.

¹⁵ Ó kōō kwu ícɛ nyā, eko dúú nēé jé ɔkpá kú íne kú Umósīsi tɛ́ɛcɛ, īlī gē klá ɔtū kú uwā kpɔ́.

¹⁶ Amáŋ eko dúúmā nɛ ɔ̄cɛ le pīya tá ɛgiyí Óndú ā, é gē je īlī ā kpó ŋmá ɔ̄ eyī.

¹⁷ Abalɔ̄bányā Óndú ā wɛ Alelékwū ā, ɛga nɛ̄ Alelékwū kú Óndú ā yɔ̄, abɔ́ɔ nɛ̄ ācɛ gē lɛ iyī uwā á.

¹⁸ Odúúmā kú alɔ í lɛ īlī dúúmā klá eyī gɛ ŋ́, ɔ́ɔmā yá ɛ́ɛ́ nɛ̄ alɔ má ɛgahi kú Óndú ā klla ī ma ɔ́ fú á. Anɔ́ɔ ɛgahi ɔ́ɔmā nōo ŋmá ɛgiyí Óndú ā, nōo wɛ Alelékwū ā, yɔ̄ gē pīya alɔ abɔ̄ piyóó ā. Alɔ yɔ̄ ī pīya bɛ̄ɛka anú ā fíyɛ́ ŋmá ɛgahi onwuné éyi ga ɛ̄nɛ̄ o nwuné fíyɛ́ ā.