2 ĀCƐ UKƆ́RĪNTI 2 - Ubáyíbu kú Idɔma

¹ Anɔ́ɔ n lɛ ɔtū kú um yéékpó ka o yá ɛ́ɛ́ kú aá lɛ ɔtūnōbí ŋ́ mā, ń gáā wā í má aá igbɔhá gɛ ŋ́.

² Ɔ́dāŋ nɛ̄ n lɛ aá ɔtū bīya, ó lɛ ā, ɔ̄nyɛ̄ kē í yá kú ɔtū kóō he um mɛ́ɛ̄ ā? Aá piíí nɛ̄ n bīya ɔtū ā.

³ Ɔdā nōo yá ɛ́ɛ́ nɛ̄ n tɔ́kpá ɔ́ɔmā fu aá ā wɛ ka ń tíne ō wā í má aá ŋ́. Ohígbū ka ɔ́dāŋ ka n ga eko ɔ́ɔmā ɔtū géē bīya gā um. Aá ā kē wɛ ācɛ piíí nēe géē yá kú ɔtū kóō he um á! N kē le jé kpɔcíí ka eko nɛ̄ ɔtū le he um, ɔtū kē í he odúúdú aā dúú.

⁴ Eko nɛ̄ n tɔ́kpá ɔ́ɔmā fu aá ā, ɔtū bīya gā um nɛ̄hi, ɔtū kú um klla le wuklíicō nōo cɛ̄ gā um yɔ̄ gē jikwū. N tɔ́kpá ā fu aá, o yá ká n̄ lɛ aá ɔtū bīya ŋ́, amáŋ o yá kú aá jé ɛ́gɛ́nɛ̄ aá he um ɔtū lɛ ā.

Upɔ́lu kwú ɛlā obɔ̄bí nēé yá ɔ̄ ā í yá uwā ɛhi

⁵ Ɔ̄cɛ nōo bīya ācɛ ɔtū ā, í bīya um ɔtū ŋ́, amáŋ aá nōo bīya aá ɔtū á. Amáŋ ɔwɛ éyi, ó bīya ācɛ ōhī kú aá ɔtū. (N ka ɛ̄nyā ká n̄ híīī ka ɔ́ lɔfu fíyɛ́ lɛ ɔ̄cɛ nōo bī ɔtūnōbí wā ŋ́)

⁶ Italā nɛ̄ ācɛ alɛwa kú aá yá ɔ̄cɛ nōo yá ɔdā nyā jɛ̄ ɛ́ɛ́.

⁷ Ohígbū ɛnyā aá kwú ɔdā nōo yá ā ú yá ɔ̄ ɛhi. Aá tá ɔ̄ ɔtū kwu ɔtū cɛ́ɛ́ kú ɔtū kóō híīī bīya lɛ ɔ́ nɛ̄ɛ̄nɛ̄hi nōo ī yá kóō cīgbīhi ŋmá ɛlɔ̄ɔwɔicō ŋ́.

⁸ Ohígbū ɔ́ɔmā, n gē gbɔ̄ɔkɔ lɛ aá kú aá le mafu lɛ ɛdɔ ɔ̄cɛ ɔ́ɔmā koó he aá ɔtū lɔɔlɔhi.

⁹ N tɔ́kpá ā fu aá, o yá ɛ́ɛ́ kú um lɛ aá jámá cɛ́ɛ́ ka n le jé ɔ́dāŋ ka aá le tútū ō lɛyítáajɛ gā um eko dóódu.

¹⁰ Eko dúú nɛ̄ aá kwú obɔ̄bi nɛ̄ ɔ̄cɛ dúú yá aá ā ú yɛ́ɛhi, n kwú yá ɔ̄ ɛhi dúú. Ohígbū ka eko nɛ̄ n kwú yá ɔ̄ ɛhi ɔ́dāŋ ka ɔdā dúú kōō yɔ̄ nɛ̄ n cíkā ō je yɛ́ɛ́hi ɔkwɔ̄ɔ̄kwɛ̄yi n gē je yɛ́ɛ́hi iyɔ̄bū Ohɔ́nyɛtá nōo wɛ ijáalí kú um ā.

¹¹ N gē yá ɛ̄nyā kú ebilíi kóō híīī lɔfu ɛgiyí alɔ ŋ́, ohígbū ka alɔ jé ɔdā nōó bī ɔtū ā.

Upɔ́lu klá ajɛ kú Utrówāsi lígíí

¹² Eko nɛ̄ n wā Utrówāsi gaá tɔ́ɔna kú ɔ̄kōōlɔhi lɛyíkwu Ohɔ́nyɛtá ā tɛ́ɛcɛ ā, n le ma ka Óndú ā lɛ ɔwɛ nwūla gā um ká n̄ yúklɔ́ abɔ́ɔ.

¹³ Ɔtū kú um í wāajɛ ŋ́ ohígbū ka ń má ɔyínɛ́ alɔ Utáyítɔ̄si abɔ́ɔ ŋ́. Anɔ́ɔ n le ńŋmóō tá ācɛ kú Utrówāsi anɔ́ɔ n le yɛ tá Umasɛdónīya á.

Ohɔ́nyɛtá cɛ̄ lɛ alɔ le yálé

¹⁴ Amáŋ alɔ tá Ɔwɔicō ahínyá! Ohígbū koó yá kú alɔ lɛ ukpɛ̄ kú oyálé kú Ohɔ́nyɛtá lɛ dúú. Ɔwɔicō bī alɔ le yúklɔ́ kú alɔ bī olɛhɔ̄ kú Ohɔ́nyɛtá le tɔ́ɔna. Ó lɛbɛ̄ɛka ɔdā okpóocu lɔhi nōo ī mīyɛ ɛga dóódu tābɔ̄ ā.

¹⁵ Alɔ lɛbɛ̄ɛka ɔdā okpóocu olɔhi nɛ̄ Ohɔ́nyɛtá fu tū ipú ɔlá kóō lɛbɛ̄ɛka ɛya nōó gwó lɛ Ɔwɔicō nɛ̄ ocu kú nū gē nyíla ga ɛgiyí ācɛ nēé yɔ̄ gē nyatá mɛ́mla ācɛ nēe yɔ̄ gē bí ā.

¹⁶ Olɛhɔ̄ kú alɔ ā wɛ ikwū lɛ ācɛ nēe yɔ̄ gē bí ā, ó kē wɛ oyēeyī lɛ ācɛ nēé yɔ̄ gē nyatá ā. Ɔ̄nyɛ yá jɛ̄ ō yúklɔ́ ocɛgbá nyā glá ā?

¹⁷ Alɔ í lɛbɛ̄ɛka ācɛ ɔhá nēe yá jɛ̄ o yúklɔ́ nyā ŋ́ mā ŋ́. É gē tɔ́ɔna kú ɔ̄kōōlɔhi ā lɛbɛ̄ɛka ó wɛ ɔdā ɔ́hi nēé lɔfú yá ije o le lé ɔdōlé ŋmá anú glá ā. Amáŋ alɔ ā gē lɛyítáajɛ, alɔ kē ī yúklɔ́ kú alɔ ŋmá ɔtū ékpó. Alɔ gē tɔ́ɔna kú ɔ̄kōōlɔhi oŋmá lɛ ɛ́gɛ́nɛ̄ Ɔwɔicō má ɔ̄ fú lɛ alɔ ā, abɔ̄ alɔ wɛ ācocɛ̄hɔ̄ nōó tɛ̄hɔ̄ ā, alɔ klla lɛbɛ̄ɛka ācotɛ̄hɔ̄ kú Ohɔ́nyɛtá ā.