2 ĀCƐ UKƆ́RĪNTI 13 - Ubáyíbu kú Idɔma

Ukɔ́ ámōomɛ nɛ̄ Upɔ́lu tū ācɛ Ukɔ́rīnti mɛ́mla okónu o hɛ́

¹ Ɛ̄nyā wɛ igbo ɔ́mɛtá nɛ̄ n gáā wā í má aá yɔ̄ mɛ́ɛ ā ɛ́gɛ́nɛ̄ Ɔkpíihɔ ka ā, “Ɔkwɛ̄yi kú ɛlā dóódu gē bɛ̄cɛ ŋmá ijáalí kú ācɛ ɛpa amáŋ ka ācɛ nēe fíyɛ́ ɛpa.”

² N tíne ká n̄ kɛlā lɛ ācɛ ōhī kú aá nēe bīyíne eko nóō yɛ ā, mɛ́mla odúúdú ācɛ ohile. N kɛlā nyā ɛpléeko nɛ̄ n wā ɛgiyí aá igbo ɔ́mpa ā. N klla kē í ka ɔ́ igbo ɔ́mpa kpɔ́ ɛ́ɛ́ abɔ̄ ń yɔ̄ mla aá abālɔbányā ŋ́ mā. Eko ɔhá nɛ n géē wā ā, n géē yá odúúdú ācɛ nēe bīyíne ā italā.

³ N géē je ɔdōcābɔ̄ nɛ̄ aá ī dɔɔ̄kā ō má ɛ́ɛ́ kú aá cɛ̄ ka Ohɔ́nyɛtá gē kɛlā bū okónu kú um ā lɛ aá. Ohɔ́nyɛtá í kwáahi eko nōó ī yá mla aá ā ŋ́. Amáŋ ó ma ɔfú nɛ̄hi kú nū fú ipú aá.

⁴ Ó wɛ ɔkwɛ̄yi ka Ohɔ́nyɛtá wɛ ɔ̄cɛ o kwáahi eko nēé je ɔ́ nyɔ́kpá ā. Amáŋ oŋmá lɛ ɔfú kú Ɔwɔicō ā Ohɔ́nyɛtá yēeyī kpɔ́. Alɔ ā dúú ā, le kwáahi ipú ōpīyatɔ̄há mla Ohɔ́nyɛtá. Amáŋ eko nɛ̄ alɔ gā Ukɔrinti wā í le yá mla aá, alɔ géē pīyatɔ̄há mla Ohɔ́nyɛtá nōo yēeyī ā cɛ́ɛ́ alɔ géē lɛ ɛdɔ ɔfú kú Ɔwɔicō nēe í cɛ̄ lɛ alɔ yúklɔ́.

⁵ Aá jila iyī aá kú aá má ɔ́dāŋ ka aá yɔ̄ gē lɔtūce Ɔwɔicō kpɔ́ ɛ́ɛ́. Aá já iyī aá má. Aá jé ka Ohɔ́nyɛtá lā ipú aá ŋ́ nɛɛ? Īī gbóó, ó lā ipú aá, n táafú ŋ́ ayíka aá magwonu ojámá ā.

⁶ N kpéyīce ka aá géē le jé ka n wɛ ɔ̄cotɛ̄hɔ̄ ɔkwɛ̄yi ɛɛ́.

⁷ Amáŋ alɔ ī gbɔ̄ɔkɔ lɛ Ɔwɔicō kú aá híīī yá ɔdōōbɔ̄bí dúúmā ŋ́. Ó wɛ ó yá ká alɔ mafú ka alɔ le yá lɔhi ɛ́ɛ́ nɛ ŋ́, amáŋ o yá ɛ́ɛ́ kú aá yá ɔdā okpaakpa, nááná nōó lɛbɛ̄ɛka alɔ mágwōnū ɛ́ɛ́ mā ā.

⁸ Ɔdā nōo géē tá ɔ̄kōōlɔhi ā abɔ̄ ā ōfōōfūnū nɛ̄ alɔ lɔfú yá glá mɛ́ɛ̄ á. Alɔ í yúklɔ́ nōo ī bɛyíkwu ɔ́ glá gɛ ŋ́.

⁹ Alɔ gē gwéeyē eko dúú nɛ̄ alɔ le gbagbafú, amáŋ nɛ̄ aá le lɔfú. Anɔ́ɔ alɔ gē gbɔ̄ɔkɔ dúú kú aá yɔ̄ gē je pīya ācɛ ɔlɛ́ Ɔwɔicō nēe í yɔ̄ ī yá ɔdā olɔhi gɔbɔ̄ɔ̄bū.

¹⁰ Ɔ́ɔmā yá ɛ́ɛ́ nɛ̄ n tɔ́kpá nyā fu aá eko nɛ̄ ń yɔ̄ mla aá ŋ́ mā á. Ó lɛ ā, cɛ́ɛ́ ká eko nɛ̄ n gaajɛ ɛgiyí aá, ká n̄ híīī bī ɔfú nɛ̄ Óndú ā je ga um ā le lɔnɔ ɔtū lɛ aá ŋ́. Ɔfú ā wɛ ká n̄ bī ɔ̄ le yá kú aá jɛ̄ gicō. Ó wɛ ka n̄ bī ɔ̄ le híla aá tāajɛ ŋ́.

¹¹ Abɔ̄ n yɔ̄ ī bī ɔkpá nyā wā oŋmɛ́yí abālɔbányā ā, ayínɛ́ um, aá ńŋmóō! Aá nya kú aá lɛ ɛnyá ipú ɔdā dóódu nɛ̄ aá gē yá ā ŋ́. Aá jāhɔ̄ lɛ ɛlā nɛ̄ n nwū aá ā. Aá cɛ̄ɛlā kú iyī aá. Aá lā ɛbɔ́ mla iyī aá. Cɛ́ɛ́ ká Ɔwɔicō nōo yíhɔtū tá alɔ nōo klla ī yá kú alɔ lɛ ɛbɔ́ ā géē yɔ̄ mla aá.

¹² Aá bī ɛdɔ kú okónu o hɛ́ kú ācɛ ɔlɛ́ Ɔwɔicō ā le hokónu tū iyī aá.

¹³ Ɛjɛ̄ɛ̄jī ācɛ ɔlɛ́ Ɔwɔicō nēe bá amānyā ā ka āmíyɔ̄ hokónu tū aá.

¹⁴ N gē gbɔ̄ɔkɔ kú ɛhi kú eyīnyinyi nɛ̄hi kú Óndú Ujísɔ̄si, Ohɔ́nyɛtá ā mɛ́mla ihɔtū kú Ɔwɔicō mɛ́mla olétɔ̄há kú Alelékwū Ihɔ kóō yɔ̄ mla odúúdú aá.