2 ĀCƐ UKƆ́RĪNTI 12 - Ubáyíbu kú Idɔma

Ɛbɛ kú Upɔ́lu mla ahi kú nū

¹ N géē gwó piíí, nááná nōó tīile dúúmā ŋ́ mā. Abālɔbányā, n géē kɛlā lɛyíkwu ɛbɛ mɛ́mla aɔ́dā nɛ̄ Óndú mafú gā um mā ā.

² N jé ɔ̄cɛ kú Ohɔ́nyɛtá ā éyi nēé je gicō ga ɔkpáncó ɔ́mɛtá ā, iháyí igwɛ́ɛnɛ nōo yɛ ā. Ɔ́dāŋ ka ɔdā nyā yá ā, koó yɔ̄ ipú ɔkpíyē ga ɔkpáncō nɛ́ɛ́, ń jé ŋ́, ámāŋ ka ɛbɛ nōó wɛ á nɛɛ, Ɔwɔicō ōfōōfūnū jé á.

³ N̄ ka ɔ́ igbɔhá kpɔ́, n jé keé le ɔ̄cɛ ā nú gā Ajɔ̄ɔ̄cɛ́ (Ɔ́dāŋ ka ɔdā nyā yá ā, koó yɔ̄ ipú ɔkpíyē ga ɔkpáncō nɛ́ɛ́, ń jé ŋ́, ámāŋ ka ɛbɛ nōó wɛ á nɛɛ, Ɔwɔicō ōfōōfūnū jé á).

⁴ Anɔ́ɔ abɔ́ɔ ā, ó po ɔdā nōó tōō ka tɛ́ɛcɛ glá ŋ́, aɔ́dā nɛ̄ okónu kú ɔ̄cɛ ɔlamu í ka ɔ́ glá ŋ́.

⁵ Ohígbū ɔ́ɔmā, n géē gwō ohígbū ɔdā nɛ̄ ɔ̄cɛ ɔ́ɔmā má ā, amáŋ ń gáā bī iyī um gwō ŋ́, ń táafú ŋ́ ɛga nɛ̄ n kwáahi ā ōfūnū.

⁶ Ɔ́dāŋ ka n tíne ō gwō nááná, ń gáā wɛ olíla ŋ́, ohígbū ka ɛlā ɔkwɛ̄yi nɛ̄ n yɔ̄ gē ka á. Amáŋ ń gáā gwō ŋ́, ohígbū ka ń tíne ká ācɛ kéē je um gicō fíyɛ́ ɛ́gɛ́nɛ̄ n wɛ ohígbū ɔdā nɛ̄ n má ā ŋ́. É lɔfú je um gicō fíyɛ́ ohígbū ɔdā nēé má um yɔ̄ gē yá mɛ́mla ɔdā nēé pó ŋmá okónu kú um.

⁷ Ɔdā nɛ̄ɛ̄nɛ̄hi nēé mafú gā um nyā, lɔfú yá ká n̄ je iyī um gicō nwunééné glá. Ohígbū ɔ́ɔmā o yá ɛ́ɛ́ ká n̄ híīī je iyī um gicō ŋ́ mā, Ɔwɔicō lɛ ōcē kú ɔkpíye nōo lɔnɔ bɛ̄ɛka ujē ō kwu ācɛ úklɔ́ ā tɛ̄hɔ̄ wā í kwu um áklō. Ōcē nyā gē yúklɔ́ bɛ̄ɛka ɔ̄cocɛ̄hɔ̄ kú ebilíi kóō yá ká n̄ je iyī um gicō ŋ́.

⁸ Igbɛtá, n gbɔ̄ɔkɔ lɛ Óndú ā, kóō kwú ōwē nɛ̄ n yɔ̄ ī má nyā ú ŋmá ɛgiyí um!

⁹ Amáŋ ohi nōó tá um ā wɛ, “Odúúdú ɔdā nōo ce uwɔ ɛgbá ā wɛ ɛhi kú eyīnyinyi kú um nɛ̄ n gē je gā awɔ ā nɛ̄. Ohígbū ka ɔfú kú um gē lɔfú nɛ̄hi ipú ācɛ nēe kwáahi ā.” Ohígbū ɔ́ɔmā n gē gwéeyē nɛ̄hi ka n̄ je iyī um gicō ohígbū á lɔfú iyē ŋ́ kú um, o yá ɛ́ɛ́ kú ɔfú kú Ɔwɔicō kóō gbō um ɛyí.

¹⁰ Ohígbū ɔ́ɔmā ɔtū gē he um nɛ̄hi ká n̄ móōwē ohígbū Ohɔ́nyɛtá. Ó wú um ɔtū gɛ ŋ́, ɔ́dāŋ ka ōcē kōō yɔ̄ gē yá um, nēe yɔ̄ gē yá um ōwē, ámāŋ ka eko nɛ̄ ń lɛ ɔdā dúú ŋ́ nááná, nɛ̄ ɔ̄cɛ yɔ̄ ī yá um ōwē, nɛ̄ ɛ́kɛma yɔ̄ gē yá um ohígbū Ohɔ́nyɛtá ā. Ohígbū ka eko nɛ̄ n lɔfú iyē ŋ́ mā, eko ɔ́ɔmā nēé ge wā í lɔfú tū um īyē á.

Ɔtū kú Upɔ́lu pliico ohígbū ācɛ ɔlɛ́ Ɔwɔicō nēe bá Ukɔ́rīnti

¹¹ N yɔ̄ gē yá ucē bɛ̄ɛka olíla ā, amáŋ aá yá ɛ́ɛ́ nɛ̄ n yá lɛ ā á. Aá wɛ ācɛ nēe cíkā ō cɛ̄tra um á. Ohígbū ka ɔ́dāŋ ka ŋ́ kōō wɛ ɔdā dúúmā ŋ́ nááná, ó lɔwɛ dúúmā nɛ̄ ācotɛ̄hɔ̄ nɛ̄ɛ̄nɛ̄hi kú ɔlɛ́ aá ā lɔhi fíyɛ́ um ŋ́.

¹² Abɔ̄ n lɔtūlé yɔ̄ gē yúklɔ́ kú um ā, Ɔwɔicō bī um le yúklɔ́ ō hídáagó alɛwa mɛ́mla aɔ́dā nɛ̄ɛ̄nɛ̄hi nēe wɛ ɛyɛ́ɛ́yí gwū aɔ́dā ɔhá tá ɔtāhɛ̄ ā. Aúklɔ́ ō hídáagó nēe bá abɔ́ɔ ā mafú ka n wɛ ɔ̄cotɛ̄hɔ̄ ɔkwɛ̄yi.

¹³ Ɔwɛ nyá nɛ̄ n yá aá bɔ̄bí fíyɛ́ aícɔ́ɔci ohile āa? Ń táafú ŋ́ abɔ̄ ń da aá kú aá bī ije tū um abɔ̄ ŋ́ mā nɛɛ? Aá kócōō kwú ɔdōōbɔ̄bī nɛ̄ n yá ɔ́ɔmā í yá um ɛhi.

¹⁴ Ɛ̄nyā ā wɛ igbo ɔ́mɛtá nɛ̄ n tútū ō táaha wā gaá má aá yɔ̄ mɛ́ɛ́ á, ń kē gáā dɔɔ̄kā ɔdā dúúmā ŋmá ɛgiyí aá ŋ́. Aá nɛ̄ n tínē ō má á, ń cɛgbá ije kú aá ŋ́. Ohígbū ka ayípɛ̄ í cíkā ō tá agbénú tū gbēyī ádā mɛ́mla ɛ́nɛ́ uwā ŋ́, ádā mɛ́mla ɛ́nɛ́ cíkā ō tá agbénú tū gbēyī ayípɛ̄ ɔlɛ́ uwá á.

¹⁵ Ó géē he um ɔtū nɛ̄hi ká n̄ kwú iyī um mɛ́mla odúúdú ɔdā nɛ̄ n lɛ ā ī ŋmó tū aá. Ɔdí í yá nɛ̄ ń he aá ɔtū nwuné ŋ́ nááná nɛ̄ aá kē he um ɔtū nɛ̄ɛ̄nɛ̄hi ā mɛ́ɛ̄?

¹⁶ Aá géē cɛ̄ mla um, ka ń wɛ iyó ɔwɛ dúúmā lɛ aá ŋ́. Amáŋ ācɛ ōhī géē ka ka n bī ula gē le pīya aá tū.

¹⁷ Ɔwɛ nyá nɛ? Ācɛ nɛ̄ n tɛ̄hɔ̄ gé lɛ aá ā lɛ aá pīyatū nɛɛ?

¹⁸ N gbɔ̄ɔkɔ lɛ Utáyítɔ̄si kóō nyɔ̄, anɔ́ɔ n klla tū ɔyínɛ́ ɔhá ā mla anú á. Aá géē ka ka Utáyítɔ̄si lɛ aá pīyatū nɛɛ? Ami mɛ́mla anú gē bī ɛdɔ ɔtū ékpó gē le yúklɔ́. Ami mɛ́mla anú gē yúklɔ́ ɔwɛ ékpó.

¹⁹ Ikōhī ŋ́ mā aá yɔ̄ gē gbɛlá ka alɔ yɔ̄ gē kɔkɔ ká ālɔ̄ lɛpɔhi iyɔ̄bū aá! Ehée! Ó lɛ ā ŋ́, Ɔwɔicō wɛ ijáalí kú alɔ ka alɔ gē kɛlā ɔkwɛ̄yi bɛ̄ɛka ācocɛ̄hɔ̄ kú Ohɔ́nyɛtá ā. Ɛjɛ̄ɛ̄jī ɔdā dúú nɛ̄ alɔ gē yá ā, ācɛ o he alɔ ɔtū, ó wɛ o yá kú ālɔ̄ tá aá abɔ̄ nɛ n.

²⁰ Ufi gē yá um ohígbū ka, eko nɛ̄ n gā abɔ́ɔ, ekōhī aá lɔfú le pīya ācɛ ɛyɛ́ɛ́yí gwū ɛ́gɛ́nɛ̄ n tíne kú aá wɛ ā tá. Ekōhī aá kē í má ka n le pīya ɔ̄cɛ ɛyɛ́ɛ́yí gwū ɛ́gɛ́nɛ̄ aá tíne ká n̄ wɛ ā tá glá. Ufi gē yá um ohígbū ka n lɔfú gáā má aá yɔ̄ í yíkpɛ́lā mla iyí aá glá, bá gē má iyī aá imalanyi, bá gē kpó ɔtū fúulu lɛyíkwu ɔ́mpa aá, bá gē pīya olɔhi kwu iyī aá ofūnū, bá gē cá iyī aá ɛcá, bá gē yá awanda tū īyī aá, bá gē yɔbɔ́ɔ̄cɛ, klla bá í lɛ íne tū glá ŋ́.

²¹ Ufi ī yá um, ka eko nɛ̄ n gā abɔ́ɔ kpɔ́, ɔdā ékpó nōo yá aflɛ́yí ā géē yá kpɔ́. Ka Ɔwɔicō géē yá kú um yúwēyī aá. Ufi í yá um ohígbū ka n géē jikwū ohígbū odúúdú ācɛ nēe géē yɔ̄ ī bīyíne kú Ɔwɔicō ɔwɛ ékpó ŋmá eko nōo yɛ ā, nēé kē pīyabɔ̄ ŋmá ɔdīcííci, ikpɔ́nyā ōce, ajā ō gbo mɛ́mla únwū ɔkpíyē ɛdɔ̄ obɔ̄bí ɛyɛ́ɛyɛ́yí otūwēyī nēé yá ā ŋ́.