2 ĀCƐ UKƆ́RĪNTI 11 - Ubáyíbu kú Idɔma

Upɔ́lu mɛ́mla ācotɛ̄hɔ̄ ɛ̄kɛ̄mgbɛ̄

¹ Aá géē lɔtū lé ga um lígíí, ó kōō wɛ eko nɛ̄ n yɔ̄ ī kɛ̄la bɛ̄ɛka olííla ā. Aá kócōō lɔtūlé gā um.

² N yɔ̄ ī yɔ́bɔ́nyā aá lɛ Ohɔ́nyɛtá ā, bɛ̄ɛka ɛ́gɛ́nɛ̄ Ɔwɔicō yɔ̄ ī yá ā. Aá lɛbɛ̄ɛka ɔyípɔ̄nɔ̄nyā nōó jé ɔ̄cɛnyílɔ jéjéé ŋ́ mā, nɛ̄ n je kwelúbi le Ohɔ́nyɛtá ā, kóō wɛ ɔbá ékpó kú nū ā.

³ Amáŋ ufi gē yá um, Ohígbū nɛ̄ ɔdā nōo yá Íifu kóō bīyíne ā géē yá aá. Ɛgwā bī ula ɛ̄kɛ̄mgbɛ̄ lɛ ɔ́ plla le íne bīya. Ɔwɛ ékpó ɔ́ɔmā, ufi gē yá um kú aá gbɔɔ́ ō gbɛlá kú ɔdōōbɔ̄bī ō yá, cɛ́ɛ́ ká aá lɛyítáajɛ lɛ Ohɔ́nyɛtá ŋmá odúúdú ɔtū ékpó gɛ ŋ́ nóó ŋ́.

⁴ N má ka aá gē jɛɛga lɛ ācɛ dóódu nēe gē wā ɛgiyí aá ā. Aá ī cɛ̄ olɛhɔ̄ kú uwā lɛyíkwu Ujísɔ̄si nááná nōó wɛ ɛyɛ́ɛ́yí gwū ɛ̄nɛ̄ alɔ tɔ́ɔna nū lɛ aá ā. Aá kē ī mīyɛ alelékwū mɛ́mla ɔ̄kōolɔhi nēé kē wɛ Alelékwū Ihɔ mɛ́mla ɔ̄kōolɔhi nɛ̄ aá mīyɛ ŋmá ɛgiyí alɔ ŋ́ mā ā!

⁵ N gbɛlá ka n jōonjīlɛ̄ mla ācɛ nɛ̄ aá je ka uwá wɛ ācotɛ̄hɔ̄ nēe fíyɛ́ dúú nēe bá abɔ́ɔ ā.

⁶ Ó wɛ ɔkwɛ̄yi ka ń jé o kɛlā ŋ́. Amáŋ n jé odée lɛyíkwu ɔ̄kōolɔhi ā. Alɔ yá ɛ̄nyā tá aá eyī péee igbalɛwa mɛ́mla āyā dóódu.

⁷ Ń cɛ̄ olɛhɔ̄ nōo ka ka Ɔwɔicō nyā aá tá lɛ aá, ká n̄ da aá kú aá cíla ɔdā dóódu nóó ŋ́. N lɛ iyī um tú wāajɛ cɛ́ɛ́ kú aá le je gicō. Ɔ́ɔmā wɛ íne nɛ̄ n bīya á nɛɛ.

⁸ N mīyɛ ije ŋmá ɛgiyí aícɔ́ɔci ɔhá kéē tū um abɔ̄ ká n̄ yúklɔ́ lɛ aá. Ɛ́gɛ́nɛ̄ ɔ̄cɛ ī kɛlā ā, ɛ̄nyā lɛbɛ̄ɛka éjulúgwu nɛ̄ n hɛ́ uwā o yá ɛ́ɛ́ ká n̄ tá aá abɔ̄ á.

⁹ Eko nɛ̄ n yɔ̄ mla aá ā, ɛgbá ije ce um, amáŋ ń junwalu lɛ aá ká aá tū um abɔ̄ ŋ́. Ayínɛ́ nēe ŋmá Umasɛdónīya ā lɛ ɛjɛ̄ɛ̄jī aɔ́dā nēe ce um ɛgbá kpɛ́mm ā kpó gé um. Ń kē kwu aá bá ɔ̄ eko ɔ́ɔmā ŋ́, n kōō gáā kwu aá bá ɔ̄ kú aá tá um abɔ̄ abālɔbányā ŋ́.

¹⁰ Ɛ́gɛ́nɛ̄ ɔkwɛ̄yi kú Ohɔ́nyɛtá yɔ̄ ipú um ā, n kē ī kɛlā ɔkwɛ̄yi ka ɔ̄cɛ dúú í yɔ̄ ipú odúúdú Akáya nōo lɔfú ka ka n híīī gwō ɛ́gɛ́nyā ŋ́ nɛɛ glá ŋ́.

¹¹ N ka ɛ̄nyā ohígbū ka aá he um ɔtū ŋ́ nɛɛ? Ɔwɔicō jé ka aá he um ɔtū!

¹² N géē gɔbū mla ɔdā nɛ̄ n miya táajɛ ka ń gáā mīyɛ otábɔ̄ kú ije ŋmá ɛgiyí aá ŋ́. N tíne ō le mafú lɛ ācɛ nēe ka aá wɛ ācotɛ̄hɔ̄ dúú ā cɛ́ɛ́ kéē híīī lɛ ɔdā nēé géē lɛ abɔ̄ bá ɔ ka ami mla uwá ɔ́ɔ gē yúklɔ́ ɛdɔ ékpó nú ŋ́.

¹³ Ācɛ nēe bá nyā gē ka ka aá wɛ ācotɛ̄hɔ̄, amáŋ é wɛ ŋ́, é wɛ ācotɛ̄hɔ̄ ɛ̄kɛ̄mgbɛ̄, ācɛ o yúklɔ́ ō pla ācɛ, ācɛ nēe gē lɛ iyī uwā yá kéē lɛbɛ̄ɛka ācotɛ̄hɔ̄ kú Ohɔ́nyɛtá ā.

¹⁴ Ɛ̄nyā í yéyījii ŋ́! Ebilíi nááná ā kōō ī lɛ iyī nū yá kóō lɛbɛ̄ɛka alelékwū-ōtɛ̄hɔ̄ ofíyajɛ ā.

¹⁵ Ohígbū ɔ́ɔmā, o wɛ ɔdā eyījii ŋ́, ɔ́dāŋ nɛ̄ ācocɛ̄hɔ̄ kú nū lɛ iyī uwā yá kéē lɛbɛ̄ɛka ācocɛ̄hɔ̄ kú ɔdā okpaakpa ā ŋ́. Italā ámōōmɛ kú uwā nɛ̄ Ɔwɔicō géē yá uwā ā géē joonjīlɛ̄ mla úklɔ́ ɔbíipú kú uwā.

Upɔ́lu bī ōwē nōó má ā gwō

¹⁶ N klla ī ka igbɔhá kpó ka ɔ̄cɛ dúúmā kóō gbɛlá ka n wɛ olíla ŋ́. Amáŋ ɔ́dāŋ ka n kōō wɛ olíla nááná, aá kōō í yɛ í mīyɛ um lɛ ā, cɛ́ɛ́ kú n̄ lɛ ɔdā nɛ̄ n géē bī gwō lígíí lɛ dúú.

¹⁷ Ń yɔ̄ gē yɛce ɔ́da kú Óndú Ujísɔ̄si, Ohɔ́nyɛtá eko nɛ̄ n gē gwō ɛ́gɛ́nyā ŋ́. N yɔ̄ gē yá ucē bɛ̄ɛka olíla ā.

¹⁸ Amáŋ ɛ́gɛ́nɛ̄ ācɛ kú ipú ɛcɛ nyā gē gwō kú ɔdā nēé yá ā, n géē yá lɛ ā dúú.

¹⁹ Aá abɔ̄yī aá jéeyi nɛ̄hi, ɔ́ɔmā yá ɛ́ɛ́ nɛ̄ aá ī jāhɔ̄ lɛ aólíla á.

²⁰ Aá gē cɛ̄ lɛ ɛdɔ ɔ̄cɛ dóódu kóō yá aá bɛ̄ɛka ɔfiyɛ ā. É gē bī aá le yúklɔ́ kú olɔhi kú iyī uwā, gē leyī gwō aá bónū, anɔ́ɔ é klla gē yá aá ɔdūwēyī.

²¹ Ó gē tū um uwēyī ká alɔ cɛ̄ ka alɔ í lɔtū yá ɔdā ɛ́gɔ́ɔmā glá ŋ́. N gáā yá ucē bɛ̄ɛka olíla ā ɛɛ́, cɛ́ɛ́ ká n̄ gwō kú ɔdā nɛ̄ ācɛ ɔhá gē bī le gwō ā.

²² É ka aá wɛ ācɛ Uhíbru nɛɛ? N kē wɛ dúú. Uwá wɛ ācɛ Ísrɛ̄lu nɛɛ? N kē wɛ dúú. Uwá wɛ ayááyí kú Ébrahām nɛɛ? N kē wɛ ɔyí nū dúú.

²³ É wɛ ācocɛ̄hɔ̄ kú Ohɔ́nyɛtá nɛɛ? N jé ka n kɛlā bɛ̄ɛka ojɛɛ́lá ā, amáŋ n kē wɛ ɔ̄cocɛ̄hɔ̄ olɔhi fíyɛ́ uwā! N yúklɔ́ lɔfúlɔfú fíyɛ́ uwā. É tū um agbá igbalɛwa. É ŋmó um ijē igbalɛwa fíyɛ́ uwā kɔ́ɔ́. N kwu ikwū ajaajɛ ojigogo fíyɛ́ uwā kɔ́ɔ́.

²⁴ Igbo ɛyɛ́ɛyɛ́yí ɛhɔ̄ ācɛ kú Ujíyu gɔ́ um ɔ́glɔ́ igbo ofucigwáahāanɛ.

²⁵ Igbɛ ɛtá ācɛ kú Uróm bī ogbló gɔ́ um ɔ́glɔ́. Ācɛ kē tá ɛcɔ̄ klá um igbɛ éyi. Igbɛ ɛtá úgbéenyi nɛ̄ n yɛ anú ā le ca tū enyi. Igbɛ éyi n tá eyī enyi yɔ̄ gē yɛ icííci ɛ̄cī odunkulu.

²⁶ Oŋmá iyāwu alɛwa nɛ̄ n yɛ ā, n gē kwu ikwu ajaajɛ ipú enyi o cēenyi klɛ́ɛcɛ. N gwō tū ipú aíjagwuda. N lɛyí cikwū ipú abɔ̄ kú ācɛ Ujíyu kú ɔlɛ́ um, n lɛyí cikwu ipú abɔ̄ kú aílɔ́wá. N lɛyí cikwū ipú igelī alɛwa, n lɛyícikwū ipú ūpū. N lɛyí cikwū ipú ísu, n klla kē lɛyícikwū ipú abɔ̄ kú aóklóbīya ɛ̄kɛ̄mgbɛ̄.

²⁷ N yúklɔ́ jāā gbéeko nɛ̄ n le gbagbafú. Otú alɛwa ń gbɔlā ŋ́. Ɛmiyɛ ŋmó um, ijēnyi éŋkpɔ̄ kē ŋmó um. Ojígógó ń gē má odolé jē um ŋ́, ń lɛ ɛga nɛ̄ n gē gbo ŋ́, ń kē má īlī ō wiiyē ŋ́.

²⁸ Ń kōō gáā lɛ okónu kwu aɔ́dā ɔhá gɛ ŋ́, iyó kú ɔtū nɛ̄ n gē bī ɛ̄cī dóódu ā wɛ ɛlá nɛ̄ n gē gbo kwu aícɔ́ɔci ā.

²⁹ Eko nɛ̄ ɔ̄cɛ dúúmā le gbagbafú cɛ́ɛ́ n kē le gbagbafú dúú. Eko nēé lɛ ɔ̄cɛ dúúmā plla nōo lɛ íne bīya, ɔtū gē bīya gā um nɛ̄hi.

³⁰ Ɔ́dāŋ ka n géē gwō piíí ayíka aɔ́dā nōo gē mafú ka ń lɔfú ŋ́ mā nɛ̄ n cíkā ō bī gwō á.

³¹ Ɔwɔicō mɛ́mla Ádā kú Óndú Ujísɔ̄si, nēé gē cɛ̄tra ɔ́ piyóó ā wɛ ijáalí kú um ka ń kɛ̄mgbɛ̄ ŋ́.

³² Eko nɛ̄ n yɔ̄ Udamáskɔ̄si ā, igbómína nɛ̄ Arétāsi, ɔcɛ́ ā fu ā lɛ ācogbāājɛ fú bá okómpīinu nɛ̄hi kú igelī ā kéē lɛ um kwú.

³³ Amáŋ é kwú um tá ipú ómblí bū uwíndo wāajɛ eyīyɛ̄cɛ kú ɔdɔ kú igá kú igelī ā, anɔ́ɔ n le kwu ŋmá ɛgiyí nū á.