2 ÚKLƆ́ KÚ AƆ́CƐ́ 6 - Ubáyíbu kú Idɔma

Ɛlā nɛ̄ Usólōmɔn ka lɛ ācɛ ā

¹ Anɔ́ɔ Usólōmɔn le ɔkɔ gbā lɛ Óndú ā yɔ̄ ī ka kahíníī, “Óndú ā tɛtɛ le ka, ka anúɔ ɔ́ɔ géē lā ipú ojuja mɛ́mla obū nɛ̄hi.”

² Usólōmɔn yɔ̄ ī kɛlā gɔbū kpɔ́ kahíníī, “N lɛ Agblīihɔ-nɛ̄hi kú ojīlīmā, ɛga nāa géē lā piyóó ipú ɛcɛ nyā gwó gā uwɔ ɛɛ́.”

³ Anɔ́ɔ Usólōmɔn kwú eyī ú pīya kwu ācɛ kú Ísrɛ̄lu nēe háyi abɔ́ɔ ā, anɔ́ɔ ó gbɔɔ́ ō hɔ́hā ce uwá kahíníī,

⁴ “Ɔhā kóō yɔ̄ lɛ Óndú ā, Ɔwɔicō kú Ísrɛ̄lu, nōo bī abɔ̄ kú nū lɛ okónu nɛ̄ ó ce lɛ ádā um, Udéfīdi ā yá jīla ícɛ ā. Okónu nɛ̄ ó ce kahíníī,

⁵ ‘Ŋmífī nɛ̄ n bī ācɛ ɔlɛ́ um bɛ̄cɛ ŋmá Íjīpiti ā, ń je igelī nɛ̄hi dúúmā ŋmá ipɔ́ɔma kú Ísrɛ̄lu kéē lɛ Agblīihɔ-nɛ̄hi gwó gā um ŋ́, ɛ́ɛ́ nɛ̄ iyē kú um gē yɔ̄ abɔ́ɔ ká e gbā um ɛ̄gbā ŋ́. Ń kē je ɔ̄cɛ dúúmā kōó wɛ ɔcɛ́ kú ācɛ ɔlɛ́ um Ísrɛ̄lu ŋ́.

⁶ Amáŋ n kwú Ujerúsālɛm ú ká iyē kú um kóō yɔ̄ abɔ́ɔ, n klla le Udéfīdi fu kóō wɛ ɔcɛ́ kú ācɛ ɔlɛ́ um.’”

⁷ Anɔ́ɔ Usólōmɔn gɔbū mla ɛlā kú nū ā kpɔ́ kahíníī, “Ádā um Udéfīdi, ɔcɛ́ ā le miya ipú ɔtū kú nū ka anúɔ géē gwó Agblīihɔ-nɛ̄hi ā lɛ awɔ Óndú ā, Ɔwɔicō kú Ísrɛ̄lu.

⁸ Amáŋ Óndú ā da ɔ́ kahíníī, ‘A yá lɔhi ɛ́gɛ́nɛ̄ ó yɔ̄ ɔtú kú uwɔ káā gwó Agblīihɔ-nɛ̄hi gā um ā.

⁹ Amáŋ, ó wɛ awɔ gaá gwó ɔ̄ gā um ā ŋ́. Amáŋ ɔyínɔ̄nyīlɔ kú uwɔ éyi, gáā gwó Agblīihɔ-nɛ̄hi ā gā um á.’

¹⁰ Ícɛ nyā Óndú, ā le okónu nāa ce ā yá jīla ɛɛ́. Ohígbū ka n le ɔcɛ́ lé kwɛyí Udéfīdi, ádā um. N klla cīce akpa kú ɔcɛ́ kú Ísrɛ̄lu kwɛyí nū, ɛ́gɛ́nɛ̄ awɔ, Óndú ā cokónu lɛ ā. N le Agblīihɔ-nɛ̄hi gwó lɛ awɔ, Óndú, Ɔwɔicō kú Ísrɛ̄lu ɛɛ́.

¹¹ N kwú ikpáti kú Ɛka nɛ̄ Óndú ā gbo mla ācɛ ɔlɛ́ nū Ísrɛ̄lu ā, nɛ̄ usiléeti nɛ̄ íne bá ipú nū ā ú hayi ipú Agblīihɔ-nɛ̄hi kú nū ā ɛɛ́.”

Ɔkɔ nɛ̄ Usólōmɔn gbā ā

¹² Ipééyī ācɛ kú Ísrɛ̄lu dóódu abɔ́ɔ ā, Usólōmɔn nyɔ̄ gaá háyi iyɔ̄bū ede le abɔ̄ kú nū nāŋdaa kwu icō kóō gbɔ̄kɔ lɛ Óndú ā, Ɔwɔicō.

¹³ Usólōmɔn le úbɔ́ nɛ̄ ɔ̄cɛ í ce ɛyí nū glá éyi ma mla oje udɔ, anɔ́ɔ ó kwú ɔ̄ ú háyi ɔtāhɛ̄ kú ódúdɔ̄lɛ́ kú Agblīihɔ-nɛ̄hi ā. Īkpō kú úbɔ́ ā wɛ ikpó ahāapa ce āyā, ɔwá kú nū wɛ ikpó ahāapa ce āyā, anɔ́ɔ olicō kú nū wɛ ikpó ɛnɛ ce āyā. Anɔ́ɔ ó gaá kwú okwúukwu ú kwajɛ ɛyí nū ɛga nɛ̄ odúúdú ācɛ lɔfú má ɔ̄ glá, anɔ́ɔ ó le abɔ̄ naŋ́daa kwu ɔkpáncō á.

¹⁴ Anɔ́ɔ ó le ɔkɔ gbā lɛ Óndú ā kahíníī, “Óndú, Ɔwɔicō kú Ísrɛ̄lu, Ɔwɔicō ɔhá dúúmā í yɔ̄ bɛ̄ɛka awɔ ā ɛ́ɛ́ gɛ ŋ́. Kwu ɔkpáncō mɛ́mla ɛcɛ, nōo gē le okónu nɛ̄ ó ce lɛ ɔ̄cocɛ̄hɔ̄ kú nū nōo gē yɛ ɔwɛ kú íne kú nū kpaakpa mla ɔtū ékpónú ā tū ŋ́.

¹⁵ A kē le okónu nāa ce lɛ ádā um, Udéfīdi ā tū. Óndú, ā le okónu ce, anɔ́ɔ a kē le ɔ́ yá pélúú ícɛ á.

¹⁶ Óndú, Ɔwɔicō kú Ísrɛ̄lu, lɛ okónu ɔhá nāa ce lɛ ádā um Udéfīdi, ɔ̄cocɛ̄hɔ̄ kú uwɔ nāa ka ka, ɔ̄cɛ éyi kú ayááyí kú nū, ɔ́ɔ géē yɔ̄ ī lé ɔcɛ́ kú Ísrɛ̄lu piyóó, ɔ́dāŋ ka ɔ́ɔ lɛyí táajɛ klla yɛ tíkpa kú íne ká anúɔ ɛ́gɛ́nɛ̄ Udéfīdi, ɔcɛ́ ɔ́ɔ yɛ klla yá ɔdā nɛ̄ anúɔ ɔ́ɔ da ɔ́ ā.

¹⁷ Óndú, Ɔwɔicō kú Ísrɛ̄lu, lɛ ɛlā kú uwɔ ɔ́ɔmā nāa ka lɛ Udéfīdi, ɔ̄cocɛ̄hɔ̄ kú uwɔ ā, tú kwajɛ cɛ́ɛ́ kóō le pīya ɔkwɛyi ícɛ.”

¹⁸ “Amáŋ awɔ, Ɔwɔicō, lā ipú ɛcɛ mla alɛɛcɛ glá āā? Odúúdú ɔkpáncō ā í bī uwɔ glá ɛ́ɛ́ ŋ́, abɔ̄ ó yá lɛ ɛ́ɛ́ nɛ̄ Agblīihɔ-nɛ̄hi nɛ̄ n gwó nyā géē jɛ̄ uwɔ ā?

¹⁹ Náaná, jāhɔ̄ lɛ ɔkɔ nɛ̄ ami ɔ̄cocɛ̄hɔ̄ kú uwɔ ī gbā gā awɔ ā cɛ́ɛ́ ká ā lɛ ɛ̄ba nɛ̄ n ba uwɔ ā yá gā um.

²⁰ Óndú, Agblīihɔ-nɛ̄hi kú uwɔ yɔ̄ á, gbō ɔ̄ otú mla ɛnɔ mɛ́ɛnɛ. A le okónu ce ɛɛ́ ka amānyā nɛ́ɛ géē gbā anúɔ ɛ̄gbā á, ohígbū ɔ́ɔmā, eko dóódu nɛ̄ n kwú eyī ú pīya kwu Agblīihɔ-nɛ̄hi nyā, anɔ́ɔ n lɛ ɔkɔ gbā gā awɔ, kócōō lɛ ɔkɔ nɛ̄ n gbā ā pó.

²¹ Lɛ ɔkɔ nɛ̄ ami mɛ́mla ācɛ ɔlɛ́ uwɔ Ísrɛ̄lu í gbā gā awɔ ā pó, eko dúúmā nēé lɛ eyī pīya kwu Agblīihɔ-nɛ̄hi amānyā. Kócōō lɛ ɔkɔ nɛ̄ alɔ í gbā ɔ́ɔmā pó ɔkpáncō kú uwɔ, cɛ́ɛ́ a kwú ɔ́bíipú nɛ̄ alɔ bī ā í yá alɔ ɛhi.

²² Eko nɛ̄ ɔ̄cɛ éyi lɛ ɛlā kpóce ɔ́mpa nū ka ɔ́ɔ yá anúɔ ɔdōbɔ̄bí, anɔ́ɔ é lɛ ɔ́ bī wā ɛgiyí ede kú uwɔ ipú Agblīihɔ-nɛ̄hi nyā, cɛ́ɛ́ kóō lɛ ɔkpá gbo ka anúɔ í jé ikpɔ́ ɔdā dúúmā ŋ́,

²³ Óndú, jāhɔ̄, ɔkpáncō cɛ́ɛ́ káā lɛ ɛpɔ̄ hɛ́, cɛ́ɛ́ a lɛ ɔ̄cɛ nōo lɛ́pɔ̄bí ā yá italā.

²⁴ Eko nɛ̄ aólɛlā kú ācɛ ɔlɛ́ uwɔ, Ísrɛ̄lu lɛ uwá yálé, ohígbū kēé le íne kú uwɔ bīya, anɔ́ɔ é le pīyabɔ̄ gā ipú Agblīihɔ-nɛ̄hi kú uwɔ nyā, kócōō, lɛ ɔkɔ nē í gbā gā uwɔ ā pó,

²⁵ ɔkpáncō, cɛ́ɛ́ a kwú íne kú uwɔ nɛ̄ ācɛ ɔlɛ́ uwɔ bīya ú yá uwā ɛhi, cɛ́ɛ́ a lɛ uwá kpó kwúcē wāajɛ nāa je lɛ aádáádā uwā ā.

²⁶ Eko nɛ̄ á cɛ̄ lɛ ɔwɔ yā ŋ́, ohígbū íne kú uwɔ nɛ̄ ācɛ ɔlɛ́ uwɔ, Ísrɛ̄lu bīya ā, anɔ́ɔ é le pīyabɔ̄, anɔ́ɔ é kwú eyī í pīya kwu Agblīihɔ-nɛ̄hi kú uwɔ nyā, lɛ īyī uwā tū wāajɛ iyɔ̄bū uwɔ lɛ ɔkɔ gbā ga awɔ.

²⁷ Óndú, lɛ ɔkɔ nēé gbā ā pó ɔkpáncō, cɛ́ɛ́ ká ā kwú íne nēé bīya ā ú yá uwā ɛhi, cɛ́ɛ́ a lɛ ɔdā nōo le kpaakpa ā nwū uwā. Cɛ́ɛ́ a klla lɛ ɔwɔ tɛ̄hɔ̄ wāajɛ kú uwā, Óndú. Ajɛ kú úgwū opiyóó nāa je lɛ ācɛ ɔlɛ́ uwɔ ā kóō wɛ ɔdā kú úgwū kú uwā ā.

²⁸ Ɔ́dāŋ́ ka ɔkpɛtá mɛ́mla ōcē obɔ̄bí le tū ipú ajɛ kú ācɛ ɔlɛ́ uwɔ, anɔ́ɔ ɔwɔ ohɛ́ɛnɔ ámāŋ ka efūma gaá kwú ɔdɛ̄hɔ̄ kú ācɛ ɔlɛ́ uwɔ ú kpó bīya. Amáŋ ka aólɛlā kú uwá lɛ ɛfú kpó tū uwā, anɔ́ɔ é lɛ uwá ɔdɛ̄hɔ̄ kpó bīya, ámāŋ ka ōcē obɔ̄bí yɔ̄, ipú ajɛ kú uwā.

²⁹ Kócōō lɛ ɔkɔ nēé í gbā ā pó, Óndú, ɔ́dāŋ ka ɔ̄cɛ dúúmā kú ācɛ ɔlɛ́ uwɔ ā, lɛ abɔ̄ kú uwā nāŋdaa kwú ɔkpáncō ipú ɔtūnōbí, anɔ́ɔ ó lɛ ɔkɔ gbā ga uwɔ leyīkwu Agblīihɔ-nɛ̄hi nyā.

³⁰ Kócōō lɛ ɔkɔ nɛ̄ ācɛ ɔlɛ́ uwɔ gbā gā uwɔ ā pó ŋmá ɔkpáncō ɔlɛ́ uwɔ. Awɔ ōfōofū uwɔ jé ɛlá nɛ̄ ɔlɛɛcɛ gē gbo ipú ɔtú kú nū á. Ohígbū ɔ́ɔmā yá ɔdā nōo cíkā lɛ ɔnyɔɔnyɛ ā mɛ́ɛnɛ.

³¹ Cɛ́ɛ́ ká ācɛ ɔlɛ́ uwɔ kéē yúufi uwɔ, kéē klla lɛyítáajɛ gā awɔ odúúdú eko nēé lā ipú ajɛ nāa je lɛ aádáádā uwā ā.

³² Ɔ́dāŋ́ ka aéwɔhá nōo lā ajɛ éwɔhá ā le pó, ɛ́gɛ́nɛ̄ a lɔfú nɛ̄hi lɛ ā, mla ɛ́gɛ́nɛ̄ a gē yúklɔ́ lɛ ā, anɔ́ɔ é gā ipú Agblīihɔ-nɛ̄hi nyā gaá lɛ ɔkɔ gbā gā awɔ.

³³ Kócōō lɛ ahɔ̄ jē lɛ ɔkɔ nēé í gbā gā awɔ ā pó ɔkpáncō ɛga nāa lā ā, cɛ́ɛ́ ká ā lɛ ɔdā nēé ba ŋmá abɔ̄ uwɔ ā yá lɛ uwá. Cɛ́ɛ́ ká odúúdú ācɛ kú ɛcɛ kéē lɛ uwɔ jé, cɛ́ɛ́ kéē lɛyí táajɛ gā awɔ. Ɛ́gɛ́nɛ̄ ācɛ ɔlɛ́ uwɔ Ísrɛ̄lu gē yá ā. Cɛ́ɛ́ é géē jé ka, Agblīihɔ-nɛ̄hi kú uwɔ, nɛ̄ n gwó nyā wɛ ɛga nɛ̄ iyē kú uwɔ yɔ̄ nēé klla gē gbā uwɔ ɛ̄gbā á.

³⁴ Eko dúú nāa lɛ ɔ́da je lɛ ācɛ ɔlɛ́ uwɔ, Ísrɛ̄lu kéē gaá lɛ ɛfú kpó tá aólɛlā kú uwā, eko nēé leyī pīya kwu igelī nɛ̄hi a nɛ̄ a fu ā mɛ́mla Agblīihɔ-nɛ̄hi nɛ̄ n gwó gā uwɔ nyā, ɛga dúúmā nēé kōō bá nááná,

³⁵ kócōō, Óndú lɛ ɔkɔ nēe í gbā gā awɔ ā pó ŋmá ɔkpáncō, cɛ́ɛ́ káā cɛ̄ lɛ uwá lɛ aólɛlā kú uwā ɔ́ɔmā yálé.

³⁶ Eko nɛ̄ odúúdú ācɛ ɔlɛ́ uwɔ le íne kú uwɔ bīya, anɔ́ɔ íne nēé bīya nyā cɛ̄ lɛ aólɛlā kú uwā gaá lɛ uwá yálé klla kwú uwá ú kpó kwú ŋmá ajɛ kú uwā ga ajɛ kú éwɔhá,

³⁷ kócōō lɛ ɔkɔ nēé í gbā gā awɔ ipú ajɛ kú éwɔhá ɔ́ɔmā pó, ɔ́dāŋ kēé le pīyabɔ̄ ŋmá íne nēé bīya mɛ́mla ɔ́bíipú nēé bī ā le ka tɛ́ɛcɛ.

³⁸ Ɔ́dāŋ́ kēé le pīyabɔ̄ ŋmá ɔtū ékpónú kú uwā, anɔ́ɔ é lɛ eyī pīya kwu ajɛ nyā nāa je lɛ aádáádā uwā, mɛ́mla igelī nɛ̄hi nyā nāa fu ā, mɛ́mla Agblīihɔ-nɛ̄hi nɛ̄ n gwó gā uwɔ nyā,

³⁹ ó lɛ ā, kócōō, Ɔwɔicō kú um, méyīnyinyi uwā cɛ́ɛ́ ká ā lɛ ɔkɔ nēé í gbā gā awɔ ā pó. Cɛ́ɛ́ a kwú odúúdú ɔdōbɔ̄bí nɛ̄ ācɛ ɔlɛ́ uwɔ yá ā í yá uwā ɛhi.

⁴⁰ Abālɔbányā Óndú, eyī mɛ́mla ahɔ̄ kú uwɔ kóō le nwūla ká a jāhɔ̄ lɛ ɔkɔ nɛ̄ alɔ géē gbā amānyā ā.

⁴¹ Cāŋjɛ abālɔbányā, Óndú Ɔwɔicō, cɛ́ɛ́ káā lɛ bēhé wā ɛga omlɛ́nyɔ́ kú uwɔ nyā, ɛga nēé kwú ikpati kú ɛ ka kú uwɔ ā ú háyi ipú nū ɛɛ́ mā. Lɛ ɔhā kú uwɔ hɛ́ ce ācogwɛ́ɛya kú uwɔ ipú odúúdú ɔdā dúúmā nēé gē yá ā. Ká odúúdú ācɛ ɔlɛ́ uwɔ kéē gwéeyē ohígbū ɔdā olɔhi nāa yá lɛ uwá ā.

⁴² Óndú, Ɔwɔicō, á tá klla pīya igbīhi kwu ɔcɛ́ nāa lɛ anɔ̄ tū ɔ̄ ɛyí klla fu je ce ɔcɛ́ ā ŋ́. Lɛ ɛlá kwu ihɔtū kú uwɔ nɛ̄ ó gē mɛ ŋ́ nāa lɛ lɛ ádā um, Udéfīdi ā.”