2 ÚKLƆ́ KÚ AƆ́CƐ́ 4 - Ubáyíbu kú Idɔma

Iyó kú Agblīihɔ-nɛ̄hi ā

¹ Usólōmɔn, ɔcɛ́ cɛ̄ lɛ uwá le ede kú oje udɔ nɛ̄ īkpō kú nū wɛ ikpó ofu ce igwó, ɔwá kú nū wɛ ikpó ofu ce igwó dúú, olicō kú nū wɛ ikpó igwɛ́ɛhɔ̄ yá

² Anɔ́ɔ ó le utánki okokolo kú oje udɔ o bī éŋkpɔ̄ yá. O ŋmá okónu éyi ga okónu ɔhá kú nū wɛ ikpó igwɛ́ɛhɔ̄. O lipú kú nū wɛ ikpó ahāapa ce āyā, anɔ́ɔ o pīya biílí kú nū wɛ ikpó ofu ɛpa ce ɛhɔ̄.

³ É le ofu kú ɛna kú oje udɔ ɔgba ɛpa ma, kwu ɛháajɛ kú ahɔ̄ biílí kú utánki ā. Ijā nēé he nyā wɛ ɔgba ɛpa, ɔgba éyi ce ɛyí ɔgba ɔhá. É kē le uwá ma tɔ̄há mla ɛga ohile kú utánki ā.

⁴ Utánki kú éŋkpɔ̄ ā ce ɛyí kú ɛna kú oje udɔ igwɛ́ɛpa nēé yá dúú ā. Ɛna ɛtá leyī pīya kwu ābɔ̄ ɛhícō, ɛtá kē leyī pīya kwu ābɔ̄ ɛháajɛ, ɛtá lɛ eyī pīya kwu ābɔ̄ ɛnɔ̄ɔ̄cī, ɛtá ɔhá nōo hile ā kē leyī pīya kwu ābɔ̄ ɛnɔ̄ɔ̄nɛ̄.

⁵ Ocɔkpɛ́nú kú utánki kú éŋkpɔ̄ ā wɛ, īkpō kú ayíkābɔ̄ éyi. Ɔ̄wū kú nū lɛbɛ̄ɛka okónu kú ikókwū ā, okónu kú utánki ā le cē wɛ̄ɛcɛ bɛ̄ɛka oō nwūla kú ododó ā. Utánki nyā lɔfú bī ɔgālā kú éŋkpɔ̄ úlā ahāanɛ ce ofu igwáahātá ce igwɛ́ɛhɔ̄ (3,960) glá.

⁶ É klla le ɔgbanjɛ igwó kú oje udɔ yá, ɛhɔ̄ kú nū gē bá ɛháajɛ kú Agblīihɔ-nɛ̄hi ā, ɛhɔ̄ ɔhá klla í bá ɛhícō kú Agblīihɔ-nɛ̄hi ā. É gē bī ɔgbánjɛ nyā le na iwili kú ɛbɛ́ kú ɛya nēé je gwɛ́ɛya o yɔlá dúúdú ā. Éŋkpɔ̄ nōo yɔ̄ ipú utánki nɛ̄hi ā nɛ̄ ācogwɛ́ɛya gē bī le na odée á.

⁷ É le ɔdā ō lɛ agege ce ɔ́ igwó yá ce ipú Agblīihɔ-nɛ̄hi ā. Ɛhɔ̄ bá ɛháajɛ, ɛhɔ̄ ɔhá bá ɛhícō

⁸ É le utébulu o lɛ akā kú oje udɔ igwó yá. Ɛhɔ̄ bá ɛháajɛ, ɛhɔ̄ klla bá ɛhícō kú Agblīihɔ-nɛ̄hi ā. É klla le ocíbú kú oje ɔdɔ ofɛhɔ̄ yá dúú.

⁹ É le aínu eyīpú kú ódúdɔ̄lɛ́ kú ācogwɛ́ɛya kpó gwó lɛ uwá. É le oje udɔ ma plla okómpinu nōo tá ɔtāhɛ̄ kú inu kú eyīpú kú ódúdɔ̄lɛ́ ā.

¹⁰ É kwú utánki kú éŋkpɔ̄ ā ú ce ɔkíkā kú ɛháajɛ lɛyíkwu ɛnɔ̄ɔ̄cī kú Agblīihɔ-nɛ̄hi ā.

¹¹ Uhúram le ɛtɛ́, ɔdofɔ́lá mɛ́mla ocíbú, kpó yá dúú. Odúúdú odée kú úklabɔ̄ kú oje udɔ nɛ̄ ó cokónū nū lɛ Usólōmɔn ka anúɔ géē yá kú ipú Agblīihɔ-nɛ̄hi mɛ́mla iyɛ̄ɛcɛ kú nū ā, ó le uwá kpó yá dúúdú.

¹² Aúpíla kú oje udɔ ɛpa, ogbló ō lɛbɛ̄ɛka ɔgbanjɛ ɛpa o ce ɛyí aúpíla ā.

¹³ É le ohépu kú ɔcí nēé hī upomégranēeti úlā (400) nēé le playi agbá nēé hā tū aúpíla ā ɛyí ā kpó yá dúú.

¹⁴ Aútébulu igwó ā, aófulēnjē igwó ā,

¹⁵ Utánki kú éŋkpɔ̄ kú oje udɔ, mɛ́mla ɛna kú oje udɔ igwɛ́ɛpa nē é le utánki kú éŋkpɔ̄ ā ce ɛyí nū ā kpó yá kpɛ́mm.

¹⁶ Uhúram ɔ̄coyúklábɔ̄ nɛ̄hi ā le odúúdú ɛhī, ukɔ̄, ussɔ́bɛ̄lu kpó yá mla oje udɔ bá ipú Agblīihɔ-nɛ̄hi kú Óndú ā ɛ́gɛ́nɛ̄ Usólōmɔn da ɔ́ lɛ ā kpó yá dúú.

¹⁷ Ó yá odúúdú aɔ́dā nēe bá nyā ɔpɛ́ nōo tá ɔtāhɛ̄ kú Usúkōtu mɛ́mla Usérēda kú ɔpɛ́ kú Ujɔ́dan ā.

¹⁸ Ó yá ɔdā alɛwa mla oje udɔ nɛ̄hi nɛ̄ ɔ̄cɛ dúúmā í miya uwá ŋ́, ɛ́ɛ́ nēé jé onwuné kú nū glá ŋ́.

¹⁹ Ó klla lɛ ɔdā ocíce kú oje udɔ yá tū ipú Agblīihɔ-nɛ̄hi ā mɛ́mla ɔdā ɔhá kú ugóolu (oje ɔdɔ) ɛyí ede, mɛ́mla utébulu nēé gē lɛ igbō kú ɛ̄gbā kú Óndú ce ɔ́ ā.

²⁰ Ɔdā ō lɛ agege ce ɔ́, agege nōo gē yɔ̄ í cɛ̄ piyóó iyɔ̄bū ede kú ɛga otīihɔ fíyɛ́ dúú ā, odúúdú uwá wɛ oje udɔ.

²¹ Kwu ofu kú ododó nēé le yá inu ā ifa ā, agege mɛ́mla alápā ō je ahɔ̄lá ŋmá ɔlá.

²² Ɔgbanjɛ̄, ocíbú, ɔdā ó yi ɔtulalī ɔlá ipú nū, mɛ́mla ocíbú ōbī fɔ́lá kú ɛya ɛyí ede kú Agblīihɔ-nɛ̄hi ā, oje ɔdɔ nēé bī le yá odúúdú uwā á. Ugóolu (oje ɔdɔ) nēé bī le yá odūngwɔ̄wɛ kú Agblīihɔ-nɛ̄hi ā mɛ́mla odūngwɔ̄wɛ kú ɛga otīihɔ fíyɛ́ dúú āá.