2 ÚKLƆ́ KÚ AƆ́CƐ́ 3 - Ubáyíbu kú Idɔma

¹ Anɔ́ɔ Usólōmɔn gbɔɔ́ o gwó Agblīihɔ-nɛ̄hi kú Óndú ā ɛyí ɛfu kú Umórīya, ɛga nɛ̄ Óndú ā wā ɛgiyí ádā nū Udéfīdi ā. Ɛga nɛ̄ Udéfīdi lá ŋmá abɔ̄ kú Arawúna, ɔ̄cɛ Ujébūsi, ɛga o wú īkpɔ̄dā kú nū ā.

² Ipú ɔyā ɔ́mpa kú iháyí ɔ́mɛɛnɛ nɛ̄ ó ce ɔcɛ́ ā, anɔ́ɔ ó gbɔɔ́ ō gwó Agblīihɔ-nɛ̄hi ā á.

³ Ɛ́gɛ́nyā nɛ̄ Usólōmɔn miya Agblīihɔ-nɛ̄hi nɛ̄ ó gwó ā á. Īkpō kú ō táajɛ kú Agblīihɔ-nɛ̄hi nɛ̄ ó gwó ā wɛ ikpó ofɛɛnɛ ce igwó, ɔwá kú nū wɛ ikpó ofu ce igwó.

⁴ Olīkpō mɛ́mla ɔwá kú ɔwɛ o bū ga ipú Agblīihɔ-nɛ̄hi ā, wɛ ikpó ofu ce igwó, nōo jónjīlɛ mla ɔwá mɛ́mla īkpō kú nū ā. Olicō kú nū ŋmá ajɛ gicō wɛ ikpó ofu ahāanɛ. É le ipú nū plla mla oje ɔdɔ (ugóolu) dúúdú.

⁵ Ipú inu ā abɔ̄yī nū, é le ɔcí nēé hī Uséda ā kpó bá ɔ̄ iyē, anɔ́ɔ é klla le oje udɔ olɔhi ma plla anú. É le ofu kú ɔcí alī mɛ́mla ákú agbá yá tū ɔ̄ oje udɔ ā.

⁶ Ɔcɛ́ ā lɛ Agblīihɔ-nɛ̄hi ā yíifa mla ɛcɔ̄ ō gbó ɔlá mɛ́mla ugóolu (oje ɔdɔ) nɛ̄ ó kpó ŋmá Upafáyim ā.

⁷ Ó le ugóolu (oje ɔdɔ) ā ma plla ɔdɔ kú Agblīihɔ-nɛ̄hi ā, ɔcí nēé le gbā ɔ́ ā, mɛ́mla ajɛ o yɛ ga okómpinu kú Agblīihɔ-nɛ̄hi ā. Ācoyúklábɔ̄ le ofu kú ucérūbim hijā tū ɔ̄.

⁸ Īkpō kú inu eyīpú, ɛga nēé hī ka ɛga otīihɔ fíyɛ́ dúú ā wɛ ikpó ofu ce igwó, ɔwá kú nū kē wɛ ikpó ofu ce igwó nōo jōnjīlɛ̄ mla ɔwá kú Agblīihɔ-nɛ̄hi abɔ̄yīnū ā. Ó klla le oje ɔdɔ nɛ̄hi ma plla ɔdɔ kú ɛga nōo tīihɔ fíyɛ́ dúú ā.

⁹ Unɛ́ɛlu kú ugóolu (oje ɔdɔ) nēé bī le yúklɔ́ kú Agblīihɔ-hɛ̄hi ā dúú á. Ogbɛnú kú unɛ́ɛlu nēé bī le yúklɔ́ ā lɛbɛ̄ɛka ákú usɛ́kɛlu ofu ɛpa ce igwó ā. É klla le ugóolu (oje ɔdɔ) ma plla ɔdɔ kú aípíinu icō ā dúú.

¹⁰ Ɔcɛ́ ā cɛ̄ lɛ ācoyúklɔ́ kú nū kéē lɛ ofu kú aɔ́dā néē hī ka aúcérōbim ā yá, cɛ́ɛ́ kéē lɛ ugóolu (oje ɔdɔ) ma plla uwá iyē. Cɛ́ɛ́ é kwú uwā ú kpó ce ɛga nēe tīihɔ fíyɛ́ dúú ā.

¹¹ Olīkpō kú acá kú Ucérōbim nōo nwūla acá gaá kwu ɔdɔ kú ipú inu ā wɛ ikpó ahāapa ce āyā. Acá ɔhá ā nɛ̄ īkpō kú nū wɛ ikpó ahāapa ce āyā ā kē le nāŋdaa nyɔ̄ í le iyē kwu acá ō nāŋdaa kú Ucérōbim ɔhá ā.

¹² ɛ́gɔ́ɔmā nɛ̄ acá kú Ucérōbim ɔhá nɛ̄ olikpō kú acá kú nū kē wɛ ikpó ahāapa dúú ā kē le nāŋdaa gaá kwu ɔdɔ, anɔ́ɔ acá ɔhá, nōo kē wɛ ikpó ahāapa dúú ā le nwūla gaá kwu acá kú Ucérōbim kú aflɛ́yí ā.

¹³ O nādaa kú acá kú aúcérōbim ɛplɛ́ɛpa ā kē wɛ ikpó ofu ce igwó. Aúcérōbim ɛpɛplɛ́ɛpa ā háyi ikpó abɔ̄yī uwā leyī pīya kwu ipú inu nɛ̄hi kú Agblīihɔ-nɛ̄hi ā kpaakpa.

¹⁴ É le ukɔ́tin kú ɛga nōo tīihɔ fíyɛ́ dúú ā yá mla īlī nēé hī ka ulínin ā mɛ́mla ɛdɔ kú īlī ɔhá. É klla le ɔ́ tɛ̄tū odufā, ɔgalúlā, mɛ́mla ɔnɔ̄wá. É le ijā kú ofu kú ucérōbim wu tū ukɔ́tin ā dúú.

Aúpíla kú oje udɔ̄ ā

¹⁵ Anɔ́ɔ Usólōmɔn le aúpíla ɛpa kú oje udɔ ma. Éyééye kú uwā wɛ ikpó ofu ce ahāapa. Anɔ́ɔ ó kwú uwā ú kpó kwu iyɔ̄bū kú Agblīihɔ-nɛ̄hi ā. Éyééye kú uwā lɛ ogbló ō cíla anú nēe wɛ ikpó ahāapa ce āyā.

¹⁶ É bī agbá ō jíla tɔ̄há le yá ifa tū icō kú ogbló ā. É klla bī oje udɔ le ija kú ofu kú ohéepu kú ɔcí nēé hī ka upomégraneeti ofu ɛhɔ̄ he tū ɔ̄ É kē le uwá kpó gɔ́ tū agbá ā.

¹⁷ É le aúpíla ā kpó kwaajɛ okómpíinu kú Agblīihɔ-nɛ̄hi ā. Éyi kwu ɛháajɛ, ɔhá ā kē kwu ɛhícō. Ɛ̄nɛ̄ o kwu ɛháajɛ ā, ó hī ɔ̄ ka, Ujakín, ɛ̄nɛ̄ o kwu ɛhícō ā, ó hī ɔ̄ ka, Ubówāsi.