2 ÚKLƆ́ KÚ AƆ́CƐ́ 2 - Ubáyíbu kú Idɔma

Otútū kéē gwó Agblīihɔ-nɛ̄hi ā

¹ Usólōmɔn le tútū kóō gwó Agblīihɔ-nɛ̄hi ā, ɛga nēé géē gbā Óndú ā ɛ̄gbā mɛ́mla agblɔ̄cɛ́ kú anú abɔ̄yīnū ā.

² Ó lɛ ācɛ úlā ofu ahātá ce igwɛ́ɛhɔ̄ (70,000) kpó kéē kpó iyó kú úklɔ́ ā wā. Ó le ācɛ úlā ofigwó (80,000) kpó kéē ca ɛcɔ̄ mɛ́mla ɛcɔ̄ kú Agblīihɔ-nɛ̄hi ā ō gbā. Ācɛ nēe gē leyīkwu úklɔ́ ā wɛ úlā ahāanɛ (3,600).

³ Anɔ́ɔ Usólōmɔn lɛ ɛhɔ̄ tū fu ɔcɛ́ kú Utáya, Uhíram kahíníī, “Ālɔ̄ tɔ́hí ɛ́gɛ́nɛ̄ a tá mla ádā um Udéfīdi, ɔcɛ́ ā, nāa kē kpó aígbɔ́cí nēé hī ka usɛ́da lá lɛ ɔ́ kóō be le gwó agbla ɔcɛ́ kú nū ā.

⁴ N yɔ̄ í gwó Agblīihɔ-nɛ̄hi ká n̄ lɛ ojīlīmā ce Óndú, Ɔwɔicō kú um. Ó géē wɛ ɛga otīihɔ nɛ̄ ami mɛ́mla ācɛ ɔlɛ́ um géē bá gē gbā Óndú ā ɛ̄gbā, o ŋmá lɛ ɔtulalī o kpócu nɛ̄hi o je gwɛ́ɛya lɛ ɔ́. Ó klla í wɛ ɛga nēé géē yɔ̄ ī je igbō ōtīihɔ gwɛ́ɛya lɛ Óndú ā piyóó, mɛ́mla ɛga nɛ̄ alɔ géē gwɛ́ɛya kú aɔ́dā ō je yɔlá dúúdú lɛ ɔ́ ɔ̄cɔ̄ɔ̄cī mɛ́mla ɔ̄nɔ̄ɔ̄nɛ̄ dóódu, ɛ̄cī Usábāti mɛ́mla ucɛ kú Ɔyā Ɛ̄yīpɛ̄ mɛ́mla aɛ́cī ō tīihɔ ohile wɛ dúú. Óndú ā kē le ɔ́da je lɛ ācɛ kú Ísrɛ̄lu kéē yá lɛ ā piyóó.

⁵ N tíne o gwó Agblīihɔ-nɛ̄hi kú Óndú ā nwuné nɛ̄hi, ohígbū ka Óndú, Ɔwɔicō kú alɔ ā lɔfú fíyɛ́ ɔwɔ dóódu á.

⁶ Náaná, ɔ̄cɛ dúúmā í gwó Agblīihɔ-nɛ̄hi nōo gē jɛ́ ɔ̄ glá ŋ́, ohígbū ka odúúdú ɔkpáncō nááná í bī Óndú ā glá ŋ́. Ɔnyɛ nɛ̄ n wɛ ɛ́ɛ́ nɛ̄ n géē gwó ɔlɛ́ lɛ ɔ́ kóō lā anú glá ā? Amáŋ Agblīihɔ-nɛ̄hi nɛ̄ n gáā gwó lɛ ɔ́ ā wɛ ɛga ō gwɛ́ɛya kú ɔtulalī o yɔlá lɛ anú Óndú ā ōfōōfūnū nɛ̄ n

⁷ Ohígbū ɔ́ɔmā ā lɛ ācoyúklábɔ̄ abɔ̄ lɔɔlɔhi kú oje udɔ, ugóolu (oje ɔdɔ), mɛ́mla oje nɛ̄hɛ́, oje ɔlamu, mɛ́mla ācotíīlī kú odufā, ɔgalúlā, mɛ́mla ɔnɔwá kpó tɛ̄hɔ̄ fu um. Cɛ́ɛ́ kéē yúklɔ́ mla ācoyúklábɔ̄ abɔ̄ kú Ujúda mɛ́mla Ujerúsālɛm nɛ̄ ádā um, Udéfīdi fu bá ajɛ ā.

⁸ N jé ɛ́gɛ́nɛ̄ ācɛ ɔlɛ́ uwɔ jé ō yúklɔ́ ɔcí lɛ ā. Lɛ ígbɔ́ɔ́cí kú ulóko, ɔpí mɛ́mla usáyípurɛ̄ssi kpó tɛ̄hɔ̄ gé um. N le tútū o tū ācɛ ɔlɛ́ um ɛhɔ̄ wā í tá uwá abɔ̄ dúú ɛɛ́.

⁹ Cɛ́ɛ́ kéē lɛ ɔcí olɔhi o nwuné nɛ̄hi ā kpó gē um.

¹⁰ O yɛ lɛyíkwu ɔdōlé kú ācɛ ɔlɛ́ uwɔ ō yúklɔ́ ā, n géē je ɛkpa úlā bá ɛga ofigwɛ́ɛpa cɛhɔ̄ (100,000) kú īkpɔ̄dā, ɛkpa úlā ɛhɔ̄ (100,000) kú umu, mɛ́mla ɔjá nɛ̄ŋcɛ́ kú ejé úlā ba ɛga úlā (110,000) kpó tɛ̄hɔ̄ fu uwá.”

¹¹ Anɔ́ɔ Uhíram, ɔcɛ́ kú Utáya le ɔkpá tá fu Usólōmɔn kahíníī, “Ohígbū abɔ̄ ācɛ ɔlɛ́ Óndú ā he ɔ́ ɔtū nɛ̄hi ā, anɔ́ɔ ó kwú uwɔ ú ce ɔcɛ́ kú uwā á.

¹² N cɛ̄tra Óndú ā, Ɔwɔicō kú Ísrɛ̄lu. Anú nōo yá ɔkpánco mla ɛcɛ ā. Ó lɛ ɔyínɔ̄nyīlɔ ojéeyī mla o jɔ́ɔ́dā mɛ́mla o tōhílīpú je lɛ Udéfīdi, nōo kē yɔ̄ ī tútū kóō le Agblīihɔ-nɛ̄hi gwó lɛ Óndú ā, mɛ́mla agblɔ̄cɛ́ kú abɔ̄yī nū ā.

¹³ Ɔ̄coyúklábɔ̄ abɔ̄ kú um nɛ̄hi nōo klla jé ɔdā kú úklábɔ̄ abɔ̄ fíyɛ́ dúú ā, Uhúram nɛ̄ n géē je tɛ̄hɔ̄ fu uwɔ á.

¹⁴ Ɛ́nɛ́ nū ŋmá ipɔ́ɔma kú Udán, amáŋ ádā nū wɛ ɔ̄cɛ kú Utáya. Ó jé ō yá ɔdée mla ugóolu (oje ɔdɔ), oje udɔ, oje nɛ̄hɛ́, oje ɔlamu, ɛcɔ̄ mɛ́mla ɔcí nɛ̄hi. Ó klla lɔfú bī odufā, ɔgalúlā, mla ɛ̄tū ɔnɔ̄wá le yúklɔ́ glá. Ɛdɔ ijā dóódu nāa da ɔ́ kóō he tū ɔdā dóódu gā awɔ ā, ó géē yá ɔ̄ glá. Jɛga lɛ ɔ́ kóō yúklɔ́ mla ācoyúklábɔ̄ kú ɔlɛ́ uwɔ, mɛ́mla ācoyúkláɔb nōo gē yúklábɔ̄ kú ádā uwɔ Udéfīdi, ɔcɛ́ ā.

¹⁵ Lɛ īkpɔ̄dā mɛ́mla anɔ̄, umu, ejé, nāa cokónu nū lɛ alɔ ā kpó tɛ̄hɔ̄ fu alɔ mɛ́ɛnɛ.

¹⁶ Ɛdɔ ɔ̄cí dóódu nāa tíne ɛyí ɛfu kú Ulébānɔn ā, alɔ géē hɛ́ uwā bá ajɛ ga awɔ. Alɔ klla í kpó uwá gbō bɔ́há, klla í kpó uwá ce eyī enyi gaá kwu ajɛ Ujópa, ɛga nɛ̄ aá géē kpó uwá ŋmá ga Ujerúsālɛm glá ā.”

É gbɔɔ́ ō gwó Agblīihɔ-nɛ̄hi ā

¹⁷ Usólōmɔn lɛ odúúdú aéwo ɔhá nēe lā Ujerúsālɛm ā gbaáluka. Ɛ̄nyā wɛ ɛdo kú ācɛ o gbaáluka nɛ̄ ádā nū Udéfīdi, ɔcɛ́ gbaáluka ā. Odúúdú aéwo ɔhá nēe lā ajɛ kú Ísrɛ̄lu ā wɛ, úlā ofu igwáahānɛ ce ɛnɛ (153,600).

¹⁸ Ó lɛ ācɛ úlā ofu ahātá ce igwɛ́ɛhɔ̄ (70,000) kpó kéē gaá kpó iyó kú úklɔ́ kú Agblīihɔ-nɛ̄hi ā wā. Ācɛ úlā ofigwó (80,000) kéē nyɔ̄ gaá gbā ɛcɔ̄. Ó kē le ācɛ úlā ahāanɛ (3,600) nēe géē leyīkwu úklɔ́ kú uwā, cɛ́ɛ́ kéē má ka é lɛ úklɔ́ a yá piíí ā fu dúú.