1 ĀCƐ UTESALONÍKA 5 - Ubáyíbu kú Idɔma

Aá le tútū gbēyī eko nɛ̄ Óndú ā ī wā ā

¹ Ayínɛ́ um, ó cɛgbá ká n̄ tɔ́kpá fu aá lɛyíkwu eko piíí nɛ̄ Óndú géē wā ā ŋ́.

² Ohígbū ka aá abɔ̄yī aá jé lɔɔlɔhi ka Óndú ā géē wā eko nɛ̄ ɔ̄cɛ í leyīce ŋ́ mā, ɛ́gɛ́nɛ̄ ɔ̄cowūwī gē wā eko nɛ̄ ɔ̄cɛ í yɔ̄ ī leyīce ŋ́ mā.

³ Eko nɛ̄ ācɛ yɔ̄ ī ka kahíníī, “Ɔdā dóódu í je unwalu lɛ alɔ gɛ ŋ́, alɔ kē bá ɛbɔ́,” ā, cɛ́ɛ́ igbɛ ékpónú ífi nɛ̄ɛ̄nɛ̄hi géē wā í yá uwā! Ōwē ā géē wā eko nɛ̄ ācɛ í leyīce ŋ́ ɛ́gɛ́nɛ̄ ɔnɔ ɔ̄ma géē wā ɛgiyí ɔnyā nōo gáā ma ɔyí ā. É kē gáā kwu hɛ̄ ɔ̄ tá glá ŋ́.

⁴ Amáŋ, ayínɛ́ um, aá í bá ipú ajodobū kú ogwuda kú aɔ́dā nēe bá ā, bɛ̄ɛka ācɛ nēé jé Ɔwɔicō ŋ́ mā ŋ́, ohígbū ɛ́gɔ́ɔmā nɛ̄ ɛci kú Ɔwɔicō ɔ́ɔmā kóō híī hɛ́ aá idáagó bɛ̄ɛka ɛ́gɛ́nɛ̄ ɔ̄cowūūwī gā wā ā ŋ́.

⁵ Ohígbū ka odúúdú aá wɛ ācɛ kú ɔlá ofíyájɛ mɛ́mla ɔlɛ́ɛnɔ. Alɔ í yɔ̄ bɛ̄ɛka ācɛ nēe gē yá ɛjɛ̄ɛ̄jī ɔdā kú uwa otú ámāŋ ka ipú ajoodobū ā ŋ́.

⁶ Ohígbū ɛ́gɔ́ɔmā, ālɔ̄ híīī yɔ̄ gbɔlā icííci bɛ̄ɛka ācɛ nēé wɛ ācɔ̄lóhɔ́nyɛtá ŋ́ mā ŋ́, amáŋ ká alɔ leyī kwɛcɛ, kú ālɔ̄ klla bēē gbeyīgɔɔ.

⁷ Otú wɛ eko nɛ̄ ācɛ gē gbɔlā á, otú kē wɛ eko nɛ̄ ejé gē kwú ācɛ á.

⁸ Amáŋ alɔ wɛ ācɛ ɔlɛ́ɛnɔ, ohígbū ɔ́ɔma ālɔ̄ gbeyīgɔɔ. Ālɔ̄ lɔtūce Ɔwɔicō ká ālɔ̄ klla yíhɔtū tá ɔ̄ piíí. Ɔ́ɔmā géē lɛbɛ̄ɛka oje o le klá ɔtū kpɛ́fú kú alɔ ā, ɛ́gɛ́nɛ̄ ɔ̄cɛ ī kɛlā ā. Ká ālɔ̄ lɛ eyīyōce ka Ɔwɔicō í nya alɔ tá ā klá ɛyí bɛ̄ɛka ɔkpú ōje ā.

⁹ Ɔwɔicō í fu alɔ kóō lɛ alɔ ŋmɛpɔ̄bí cɛ́ɛ́ kóō lɛ italā yá alɔ ŋ́, amáŋ ó dɔɔ̄kā ō yá kóō lɛ alɔ nyatá ohígbū Ujísɔ̄si Ohɔ́nyɛtá,

¹⁰ nōo kwú ohígbū alɔ, o yá ɛ́ɛ́ kú ālɔ̄ lɔfú lā tɔhá mla anú, ɔ́dāŋ ka alɔ kōō yēeyī ámāŋ ka alɔ gekwú eko nōó í wā ā.

¹¹ Ohígbū ɔ́ɔmā aá tá iyī aá ɔtū kwu ɔtū, aá klla tū iyī aá abɔ̄, bɛ̄ɛka ɛ́gɛ́nɛ̄ aá yɔ̄ í yá abālɔbányā ā.

Ukɔ́ ámōōmɛ nōó tū ā mɛ́mla okónu nōó hɛ́ ā

¹² Alɔ gbɔ̄ɔkɔ lɛ aá, ayínɛ́ alɔ, kú aá jé ojīlīmā ɔkwɛ̄yí kú ācɛ nēe gē yúklɔ́ ipú aá ā, nēe wɛ aótrɛ̄yí kú aá, klla ī nwū aá ɛlā lɛyíkwu oyēeyī kú ācɔ̄lóhɔ́nyɛtá ā.

¹³ Aá lɛ ojīlīmā ce uwá nɛ̄ɛ̄nɛ̄hi mɛ́mla ihɔtū ohígbū ɛjɛ̄ɛ̄jī ɔdā nēe yá ā. Aá bá ɛbɔ́ mla iyī aá.

¹⁴ Alɔ gbɔ̄ɔkɔ lɛ aá kpɔ́, ayínɛ́, kú aá pi ācɛ nēe lɛ abɔ̄ kpó wú agada, nēe dɔɔ̄kā ō yúklɔ́ ŋ́ mā ahɔ̄. Aá tá ācoyúúfi ɔtū kwu ɔtū, aá tá ācɛ nēe cɛgbá ō tábɔ̄ ā abɔ̄. Aá gbēyīcíí mla ācɛ dóódu.

¹⁵ Aá híīī cɛ̄ lɛ ɔ̄cɛ dúúmā kú ipú aá bī obɔ̄bí le cíla ulé kú obɔ̄bí ŋ́. Amáŋ eko dóódu aá cēyītīkwū kú aá yá ɔdā olɔhi lɛ iyī aá mɛ́mla odúúdú ācɛ.

¹⁶ Aá gwéeyē eko dóódu.

¹⁷ Aá kɛlā lɛ Ɔwɔicō ipú ɔkɔ ō gbā eko dóódu.

¹⁸ Aá tá Ɔwɔicō ahínyá ipú ɔdā dóódu, ohígbū ka ɛnyā wɛ ɔdā nɛ̄ Ɔwɔicō gē tíne ŋmá ɛgiyí aá nēe wɛ ákú Ohɔ́nyɛtá Ujísɔ̄si á.

¹⁹ Aá gwū ɔwɛ tū Alelékwū Ihɔ ŋ́.

²⁰ Aá híīī leyī gwō olɛhɔ̄ kú ācomɛ́ɛbɛ kú Ɔwɔicō bónū ŋ́.

²¹ Aá lɛ ɔkwu olɛhɔ̄ ā bū kú aá le jé ɔ́dāŋ nōó ŋmá ɛgiyí Ɔwɔicō, cɛ́ɛ́ ká aá bī ɔdā nōo lɔhi ā le yúklɔ́.

²² Aá túblá ɔdōōbɔ̄bí dóódu ŋ́.

²³ Ɔwɔicō nōo gē je ɛbɔ́ lɛ ɔ̄cɛ ā kóō lɛ aá yá tīihɔ ɔwɛ dóódu, kóō lɛ odúúdú oyēeyī kú aá, kwu alelékwū, odo, mɛ́mla ɔkpíyē kú aá tū, cɛ́ɛ́ kú aá lɛ ɛnyá dúúmā ŋ́ eko nɛ̄ Ohɔ́nyɛtá Ujísɔ̄si Óndú alɔ géē wā igbɔhá ā.

²⁴ Anú nōo hi aá igwú kú aá kwú pīya ákú nū ā, kē í yá ɔ̄ glá, ohígbū koó wɛ ɔ̄cɛ nɛ̄ ɔ̄cɛ lɔtūce ɔ́ glá.

²⁵ Ayínɛ́, aá gbɔ̄ɔkɔ ohígbū alɔ.

²⁶ Aá hokónu tū odúúdú ācɛ nēe kpɔ́tūce Ohɔ́nyɛtá, ɔ́mpā ā mla ihɔtū nɛ̄ɛ̄nɛ̄hi.

²⁷ N bī iyē kú Óndú ā ī gbɔ̄ɔkɔ lɛ aá, ká aá lɛ ɔkpá nyā jé tɛ́ɛcɛ lɛ odúúdú ayínɛ̄ alɔ nɔ̄nyīlɔ mɛ́mla ayínɛ́ nɔ̄nyā, ācɔ̄lóhɔ́nyɛtá ā.

²⁸ N gē gbɔ̄ɔkɔ ká Óndú alɔ Ujísɔ̄si Ohɔ́nyɛtá kóō je ɛhi kú eyīnyinyiy lɛ aá.