1 ĀCƐ UTESALONÍKA 4 - Ubáyíbu kú Idɔma

Oyēeyī nōo he Ɔwɔicō ɔtū ā

¹ Oŋmɛ́yí kú nū ā, ayínɛ́ alɔ, aá le nwū ŋmá ɛgiyí alɔ ɛ́gɛ́nɛ̄ aá géē lā nɛ̄ ɔtū géē he Ɔwɔicō ā. N jé dúú ka ɔwɛ ɛ́gɛ́nyā nɛ̄ aá yɔ̄ ī lā á. Alɔ bī iyē kú Óndú Ujísɔ̄si gē gbɔ̄ɔkɔ lɛ aá klla tú aá ɔtū kwu ɔtū ka aá yá lɔhi fíyɛ́.

² Ohígbū ka aá gbɛlá kwu ukɔ́ nɛ̄ alɔ tū aá ŋmá ɛgiyí Óndú alɔ Ujísɔ̄si ā.

³ Ɔwɔicō tíne ká aá lā oyēeyī ɔwɛ nōo géē mafú ká aá kwú iyī aá ú lɛ Ɔwɔicō dúúdú. Aá kóō cikpɔ́nyā ɔhá ámāŋ ka o gbajā ŋ́.

⁴ Ɔnyɔɔnyɛ kú aá nōo wɛ ɔ̄cɛnyīlɔ ā cíkā ō lā mla ɔnyā nū ɔwɛ nōo tīihɔ mɛ́mla ɔwɛ ojīlīmā

⁵ Amáŋ ó híīī wɛ ákú unwū ɔnyā o yá, bɛ̄ɛka aílɔ́wá nēé jé Ɔwɔicō ŋ́ mā ŋ́.

⁶ Ɔ̄cɛ dúúmā í cíkā ō pīya ɔyínɛ́ nū, ɔ̄cɔ̄lóhɔ́nyɛtá, tū ipú ɛlā nya ŋ́, ohígbū ka Óndú ā géē yá ācɛ ó yá ɔdā ɛ́gɔ́ɔmā italā ɛ́gɛ́nɛ̄ alɔ tɛtɛ tū aá ukɔ́ lɔfúlɔfú ā.

⁷ Ɔwɔicō í hī alɔ igwú kú alɔ gwutá mla ɔnyā ɔhá gwū ɔnyā alɔ tá ŋ́, amáŋ ká alɔ lā oyēeyī ō tīihɔ.

⁸ Ohígbū ɔ́ɔmā ɔ̄cɛ dúú nōo tá ɔdā nɛ̄ alɔ nwū aá nyā, ó wɛ ɔ̄cɛ nōó yɔ̄ ī tá ā ŋ́, amáŋ ɔ̄cɛ ɔ́ɔmā yɔ̄ ī tá Ɔwɔicō nōo je Alelékwū ihɔ kú nū lɛ aá ā.

⁹ Ó cɛgbá ká n̄ tɔ́kpá fú aá lɛyíkwu ihɔtū o yá tá ācɛ nēe kpɔ́tūce Ohɔ́nyɛtá ɔ́mpa aá gɛ ŋ́. Ohígbū ka Ɔwɔicō abɔ̄yīnū lɛ ɔwɛ nɛ̄ aá cíkā ō yíhɔtū tá ɔ́mpa aá nwū aá ɛɛ́.

¹⁰ Ɔkwɔ̄ɔ̄kwɛ̄yi aá kē ī yíhɔtū tá odúúdú ayínɛ́ nēé bá odúúdú Umesadónīya ā. Nááná alɔ yɔ̄ ī gbɔ̄ɔkɔ lɛ aá, ayínɛ́ alɔ, ká aá yá lɔhi fíyɛ́.

¹¹ Aá kóō yɔ̄ ī yɛ ŋmá ɛga éyi ga ɛgɔhá yɔ̄ gē yúuya nɛ̄ɛ̄nɛ̄hi ŋ́, aá nyɔ̄ í gwōtū ipú ɛlā kú ācɛ ɔhá ŋ́, aá kóō kpó abɔ̄ wu agada icííci ŋ́ amáŋ aá yúklɔ́ ka aá má lé. Ɛ̄nyā wɛ ɔdā nɛ̄ alɔ tɛtɛ nwū aá á.

¹² Ɔ́dāŋ nɛ̄ aá ī yá ɛnyā ā, aá géē yá kú ācɛ nēé wɛ ācɔ̄lóhɔ́nyɛtá ɛ́ɛ́ ŋ́ má kéē lɛ ojīlīmā ce aá. Aá kē gáā gbolóce ācɛ kéē yá ɛgbá dúúmā lɛ aá ŋ́.

Eko nɛ̄ Óndú í wā ā

¹³ Ayínɛ́ alɔ, alɔ tíne ká aá lɛ ɛlā ɔkwɛ̄yi kú ɔdā nōo géē yá da ācɔ̄lóhɔ́nyɛtá nēe bá ɔlékwū ɛɛ́ mā jé, cɛ́ɛ́ kú aá yɔ̄ ipú ɔtūnōbí bɛ̄ɛka ācɛ nēé lɛ ɔdā ō leyice ɔ́ ŋ́ mā ŋ́.

¹⁴ Ohígbū ka abɔ̄ alɔ cɛ̄ ka Ujísɔ̄si gekwú klla le héyī kpɔ́ ā, alɔ klla kē cɛ̄ dúú ka eko nɛ̄ Ujísɔ̄si í kwúcē wā kpɔ́ ā, Ɔwɔicō géē kpɔ́ ācɛ nēe yɔ̄ ī cɛ̄ɛ̄lā Ujísɔ̄si ɛ́ɛ́ kéē kwú ā wā mla anú.

¹⁵ Ɔdā nɛ̄ alɔ gáā da aá nyā wɛ ɔdā nɛ̄ Óndú ā nwū ofúnú ā nɛ̄ n. Alɔ nēe yēeyī ɛ̄cī nɛ̄ Óndú ā géē wā ā, í gáā gbɔbū lɛ ācɛ nēe bá ɔlékwū ā ga ɛgiyí nū ŋ́.

¹⁶ Ācɛ géē pó ɛgba ɔfú nēé í dɛ̄ nɛ̄ɛ̄nɛ̄hi, ɔkɔ kú otrɛ̄yí kú aálelékwū-ōtɛ̄hɔ̄ mɛ́mla opo kú Ɔwɔicō. Cɛ́ɛ́ Óndú ā abɔ̄yīnū géē wā ajɛ ŋmá ɔkpáncō. Ācɛ nēe yɔ̄ ī cɛ̄ ɛlā Ujísɔ̄si ɛ́ɛ́ kéē kwú ā wɛ ācɛ nēe géē héyī aflɛ́yí á.

¹⁷ Cɛ́ɛ́ Ɔwɔicō géē yá kéē lɛ alɔ nēe yēeyī eko ɔ́ɔmā túba tɔ̄há mla uwá ipú ojuja cɛ́ɛ́ kú alɔ jīleyī mla Óndú ā ipú owu. Cɛ́ɛ́ alɔ géē bá pī Óndú ā eko dóódu piyóó.

¹⁸ Ohígbū ɔ́ɔmā, aá bī ɛlā nēe bá nyā le tá iyī aá ɔtūlé.