1 ĀCƐ UTESALONÍKA 3 - Ubáyíbu kú Idɔma

¹ Igbīhāajɛ ā, alɔ í lɔtū gla gɛ ŋ́, abɔ̄ alɔ í wā gaá má aá glá ŋ́ mā, anɔ́ɔ alɔ le miya ka alɔ bá ōfōōfū alɔ ipú ajɛ kú Átɛns.

² Anɔ́ɔ alɔ lɛ Utímōti, ɔyínɛ́ alɔ tɛ̄hɔ̄ fu aá, alɔ mɛ́mla anú ī yúklɔ́ lɛ Ɔwɔicō gē tɔ́ɔna kú ɔ̄kōolɔhi lɛyíkwu Ohɔ́nyɛtá á. Alɔ tū ɔ̄ ɛhɔ̄ fú aá kóō yá kú aá lɔtū lɛ fíyɛ́ ipú ɔtū nɛ̄ aá le ce Ohɔ́nyɛtá ā.

³ Cɛ́ɛ́ kú ɔ̄cɛ dúúmā kú aá kóō híīī kwúcē igbīhi ohígbū ōwē nēé cɛ̄ lɛ aá má ā ŋ́. Aá abɔ̄yī aá jé ka Ɔwɔicō lɛ ɔ́ miya táajɛ lɛ alɔ kā alɔ í móōwē piíí.

⁴ Ohígbū ka, eko nɛ̄ alɔ bá mla aá ā, alɔ tɛtɛ le da aá táajɛ kéē í yá alɔ ōwē ɛ́gɛ́nɛ̄ aá je lɔɔlɔhi ā, é lɛ ōwē ā yá alɔ ɔkwɔ̄ɔ̄kwɛ̄yi.

⁵ Ɔ́ɔmā yá ɛ́ɛ́ nɛ̄ n gbɛlá ká n̄ lɛ Utímōti tɛ̄hɔ̄ wā ɛgiyí aá piíí á. Ń lɔtū yājɛ icííci nɛ̄ ń póofu aá ŋ́ nɛɛ glá ŋ́ anɔ́ɔ n lɛ ɔ́ tɛ̄hɔ̄ cɛ́ɛ́ ká n̄ le jé ɛ́gɛ́nɛ̄ aá bá ī yɛ gɔbū ipú ɔtū nɛ̄ aá le ce Ohɔ́nyɛtá ā. N yɔ̄ gē da iyī um ɔkā, ɔ́dāŋ nɛ̄ ebilíi i kpōō wā í lɛ ojámá yá aá cɛ́ɛ́ ká úklɔ́ nɛ̄ alɔ yá abɔ́ɔ ā kóō le bīya nɛɛ?

⁶ Abālɔbányā Utímōti pīyɛyi ɛɛ́, ó kē lɛ ɔkā ō tá alɔ ɔtū lé bī wā. Ó ka ka aá yɔ̄ ī lɔtūce Ɔwɔicō kpɔ́, ka aá klla gē yíhɔtū tá iyī aá. Ó da alɔ ka ɔtū gē he aá eko dúú nɛ̄ aá lɛ ɛlá gbo kwu alɔ. O klla kē da alɔ dúú ka aá tíne ō má alɔ ɛ́gɛ́nɛ̄ alɔ abɔ̄yī alɔ gē tíne kú alɔ má aá ā.

⁷ Ohígbū ɔ́ɔmā, abɔ̄ alɔ yɔ̄ ipú unwalu nɛ̄hi klla húmáyī móōwē ā, nááná ā ɔwɛ nɛ̄ aá lɔtūce Ohɔ́nyɛtá lɔfú kpɔ́ ā, lɛ alɔ ɔtū tū kwu ɔtū.

⁸ Ohígbū ka, abālɔbányā oyēeyī kú alɔ le lɔhi ɛɛ́ ɔ́dāŋ ka aá háyi kpaakpa ipú oyēeyī kú aá ipú opīyatɔ̄há mla Ohɔ́nyɛtá.

⁹ Ó lɛ ahínyá dúú nɛ̄ alɔ ī tá Ɔwɔicō kú alɔ ohígbū aá nōo ī jɛ̄ alɔ eyī glá ohígbū aá ŋ́. Ó cɛ̄ lɛ alɔ gwéeyē nɛ̄hi iyɔ̄bū nū ohígbū aá ā.

¹⁰ Alɔ gē ba Ɔwɔicō kú ɛbɔ́ ŋmá ɔtū ékpó kú alɔ, ɔlɛ́ɛnɔ mɛ́mla otú, kóō cɛ̄ lɛ alɔ wā í lɛ aá má eyī cɛ́ɛ́ kú alɔ lɛ ɔdā nɛ̄ aá cíkā ō lɛ ā kpó lɛ aá ɔ́dāŋ ka aá lɔtucē Ohɔ́nyɛtá ɛ́gɛ́nɛ̄ o cíkā ā.

¹¹ N gē gbɔ̄ɔkɔ kú Ɔwɔicō kú alɔ mɛ́mla Ádā alɔ abɔ̄yīnū mɛ́mla Óndú alɔ Ujísɔ̄si kéē lɛ ɔ́ yá tɔ́ɔtɛ lɛ alɔ kú alɔ gā ɛgiyí aá.

¹² N gē gbɔ̄ɔkɔ ka Óndú ā kóō yá kú aá yíhɔtū tá ɔ́mpa aá mɛ́mla odúúdú ācɛ nwuné nwuné cɛ́ɛ́ kóō le lɔfú bɛ̄ɛka ihɔtū nɛ̄ alɔ yá tá aá ā.

¹³ Oŋmá ɛnyā nɛ̄ aá yɔ̄ ī yá ā, ó géē lɔfú tū aá iyē, nɛ̄ aá gáā lɛ ɛnyá dúúmā ŋ́, kú aá le tīihɔ iyɔ̄bū Ɔwɔicō kú alɔ mɛ́mla Ádā alɔ, eko nɛ̄ Óndú alɔ ī wā mɛ́mla ācɛ nēe wɛ ákú nū ā.