1 USÁMUWƐ̄LU 9 - Ubáyíbu kú Idɔma

Usɔ́lu le jīla mla Usámūwɛ̄lu

¹ Ɔ̄cɛ ipɔ́ɔma kú Ubénjamīn éyi yɔ̄, nɛ̄ iyē nū lé ka, Ukíssi, ɔyí kú Abīyelu, ɔyí kú Usérɔ, ɔyí kú Ubékórati, nōo ŋmá ipɔ́ɔnū kú Afíya, ɔ̄cɛ ipɔ́ɔma kú Ubénjamīn. Ó lɛ agbénú nɛ̄hi.

² Ó lɛ ɔyí éyi nɛ̄ iyē nū lé ka, Usɔ́lu, nōo jōklóbīya nɛ̄hi. Ɔ̄cɛ dúúmā í yɔ̄ ajɛ kú Ísrɛ̄lu nōo jōklóbīya bɛ̄ɛka anú ā ɛ́ɛ́ gɛ ŋ́. Anú klla jɛ̄ licō fíyɛ́ odúúdú ācɛ kú Ísrɛ̄lu á.

³ Aíjakī kú Ukíssi, ádā kú Usɔ́lu le pɛ́ gebí. Anɔ́ɔ Ukíssi da Usɔ́lu ká ɔ̄ kwú éyi kú ɔ̄cocɛ̄hɔ̄ kú anúɔ ú, kéē nyɔ̄ í dɔɔ̄kā aíjakī ā.

⁴ Anɔ́ɔ é le bū ipú ɔlɛ́ kú ɛyí ɛfu kú Ɛfrēm ā gāá bū ipú ajɛ kú Ussálim, amáŋ é má aijakī ā ŋ́. É klla gāá le bū ipú ajɛ kú Ubénjamīn, amáŋ é má aíjakī ā ŋ́ kpɔ́.

⁵ Eko nēé gā ipú ajɛ kú Usúfu ā, Usɔ́lu da ɔ̄cocɛ̄hɔ̄ ā kóō wā kú aá kwúcē ga ɔlɛ́, ámāŋ ádā anúɔ ɔ́ gáā lɛ ɛlá wu aíjakī ā ɛ́ɛ́ gɛ ŋ́, amáŋ ɔ́ɔ géē yɔ̄ ī gbɛlá ɔdā nōo yá ɛ́ɛ́ nɛ̄ aá í wā ɔlɛ́ ŋ́ mā nɛ̄ n.

⁶ Amáŋ ó tá ɔ̄ ohi kahíníī, “Háyi ɛ́ɛ́, ɔ̄cɛ otīihɔ kú Ɔwɔicō éyi yɔ̄ ipú igelī nɛ̄ŋcɛ́ nyā. Ó wɛ ɔ̄cɛ nōo lɛ ojīlīmā nɛ̄hi, ohígbū ka ɔdā dóódu nɛ̄ ó gē ka ā, gē yá jīla. Ālɔ̄ ga ɛgiyí nū, ekōhī, ó géē da alɔ ɛga nɛ̄ alɔ lɔfú pīyɛ̄ aíjakī ā.”

⁷ Anɔ́ɔ Usɔ́lu le ɔ̄kā da ɔ́ ka eko nɛ̄ aá le tá ɛgiyí nū, ɔdí nɛ̄ aá géē je lɛ ɔ́ ā? Ó da ɔ́ ka igbō nɛ̄ aá kpó tū ipú ɛkpa ā í mɛ ɛ́ɛ́ ŋ́ nɛɛ? Ka aá í lɛ ɔdā kú ɛhi dúúmā ō bī gé lɛ ɔ̄cɛ otīihɔ kú Ɔwɔicō ā gɛ ŋ́ nɛɛ?

⁸ Anɔ́ɔ ɔ̄cocɛ̄hɔ̄ ā tá Usɔ́lu ohi kahíníī, “N bī āyā éyi kú o kɔ̄ ɛga ɛnɛ kú īkpō ije nɛ̄hɛ́. N géē je ɔ́ lɛ ɔ̄cɛ otīihɔ kú Ɔwɔicō ā, cɛ́ɛ́ kóō lɛ ɛga nɛ̄ alɔ í lɔfú pīyɛ̄ aíjakī ā glá ā mafú lɛ alɔ.”

⁹ Eko tɛtɛ ā, ipú ajɛ kú Ísrɛ̄lu ā, é gē hī ɔ̄comɛ́ɛbɛ ka omɛ́ɛbɛ. Eko dúú nēé tíne ɔdā dúúmā ŋmá ɛgiyí Ɔwɔicō nɛɛ, é gē kahíníī, “Wā kú ālɔ̄ ga ɛgiyí omɛ́ɛbɛ.”

¹⁰ Anɔ́ɔ Usɔ́lu da ɔ̄cocɛ̄hɔ̄ kú nū ā ka ɔ́ɔ lɔhi, ó wā kú aá nyɔ̄. Anɔ́ɔ é le yɛ tá ipú igelī nɛ̄ŋcɛ́ nɛ̄ ɔ̄cɛ kú Ɔwɔicō ā yɔ̄ ā.

¹¹ Abɔ́ɔ é bá í tū ɛfu ga igelī nɛ̄ŋcɛ́ ā, é jīla ayípɔ̄ncɛ́nyā nēe bɛ̄cɛ gāá hɛ́ éŋkpɔ̄ ɔwɛ. Anɔ́ɔ é da uwá ɔ̄kā ɔ́dāŋ ka ɔ̄comɛ́ɛbɛ ā yɔ̄ abɔ́ɔ.

¹² Anɔ́ɔ, é tá uwā ohi ka, ɔ́ɔ yɔ̄ abɔ́ɔ. É klla da uwá kéē má ɔ́, ka anú ɔ́ɔ yɔ̄ ī yɛ iyɔ̄bū uwā abɔ́ɔ á. É da uwá kéē nyɔ̄ fíyaa, ohígbū ka ɔkwɔɔkwu ɔ́ɔmā nɔ́ɔ wā igelī nɛ̄ŋcɛ́ ā á, ohígbū ka, ācɛ gáā gwɛ́ɛya ɛyí ede ícíícɛ ɔ́ɔmā.

¹³ Ayípɔ̄nɔ̄nyā ā klla da uwá ka obōōbū nɛ́ɛ le tá igelī nɛ̄ŋcɛ́ ā, ɛ́ɛ géē má ɔ̄ ɛ́ɛ́ kú ɔ̄ ga ɛyí ɛfu gaá lé ucɛ kú ɛya nēé gwó ā. Ohígbū ka, ācɛ í gáā lé ucɛ kú ɛya nēé gwó ā ŋ́, jāā gbéeko nɛ̄ ɔ́ ga, gaá lɛ ɔhā hɛ́ ce ɔ́. Igbīhi ɔ́ɔmā ɛ́ɛ́ nɛ̄ ācɛ nɔ́ɔ hīgwú wā ɔnū ucɛ kú ɛya ā géē gbɔɔ́ ō lé kllɔ́dɔ́ á. É da uwá ka ɛ́ɛ ga ipú igelī nɛ̄ŋcɛ́, ɛ́ɛ géē má ɔ̄ bōōbū.

¹⁴ Anɔ́ɔ é le tá ipú igelī nɛ̄ŋcɛ́ ā. Abɔ́ɔ é bá ī bēhé ga ipú nū ā, é le Usámūwɛ̄lu má yɔ̄ í wɛ̄ɛcɛ lɛyíkwu uwá, ɔwɛ nōo yɔ̄ í yɛ ga ɛyí ɛfu ɛga nēé gē gbā Óndú ā ɛ̄gbā ā.

¹⁵ Ɛ̄cī éyi gbɔbū ɛ́ɛ́ kú Usɔ́lu kóō wā ā, Óndú ā le mafú lɛ Usámūwɛ̄lu ka,

¹⁶ “Óócí ɛpllá eko nyā, n géē tū ɔ̄cɛ éyi ɛhɔ̄ fu uwɔ ŋmá ajɛ kú Ubénjamīn, a géē lɛ anɔ̄ tū ɔ̄ ɛyí kóō kwú pīya ɔcɛ́ kú ācɛ ɔlɛ́ um, Ísrɛ̄lu. Ó géē hɛ́ ācɛ ɔlɛ́ um tá ŋmá abɔ̄ kú ācɛ Ufilístiya. Ohígbū ka n le ōwē kú uwā má ɛɛ́, ohígbū ka ikwū nēé je ā, gā ɛgiyí um ɛɛ́.”

¹⁷ Eko nɛ̄ Usámūwɛ̄lu le Usɔ́lu má ā, Óndú ā da ɔ́ kahíníī, “Ɔ̄cɛ nɛ̄ n kɛlā nū gā uwɔ, ka anú géē gbō ācɛ ɔlɛ́ um, Ísrɛ̄lu ā, yɔ̄ á.”

¹⁸ Anɔ́ɔ Usɔ́lu ga ɛgiyí Usámūwɛ̄lu, okónu igá ā, anɔ́ɔ ó da ɔ́ kahíníī, “Iní nɛ̄ ɔlɛ́ kú ɔ̄comɛ́ɛbɛ ā yɔ̄ ā?”

¹⁹ Usámūwɛ̄lu tá Usɔ́lu ohi kahíníī, “Ami wɛ ɔ̄comɛ́ɛbɛ ā á, aá bēhé nyɔ̄ iyɔ̄bū um, ga ɛyí ɛfú ā, ohígbū ka ícɛ nyā, á géē le ɔdōlé mla um, ɔ̄cɔ̄ɔ̄cī nɛ̄ n géē ka ɔdā dóódu nōo yɔ̄ ipú ɔtū kú uwɔ̄ ā gā uwɔ á, ɛ́ɛ́ kú n̄ ma uwɔ tá nyɔ̄.

²⁰ Aíjakī kú uwɔ nēe bī ícɛmɛtá ā, kóō híī je unwalu gā uwɔ ɛ́ɛ́ gɛ ŋ́, ohígbū ka é le uwá pīyɛ̄ ɛɛ́. Amáŋ ɔ̄nyɛ wɛ ɔ̄cɛ nōo ce Ísrɛ̄lu ɛgbá abālɔbányā fíyɛ́ dúú ā, nɛ̄ ó wɛ awɔ mɛ́mla ipɔ́ɔnū kú ádā uwɔ ŋ́ mā ā?”

²¹ Anɔ́ɔ Usɔ́lu tá ɔ̄ ohi ka anúɔ wɛ ɔ̄cɛ ipɔ́ɔma kú Ubénjamīn nōo nyɛ́ fíyɛ́ dúú, ajɛ kú Ísrɛ̄lu ā. Ipɔ́ɔnū kú anúɔ ɔ́ɔ nyɛ́ klla túwāajɛ fíyɛ́ dúú ipɔ́ɔma kú Ubénjamīn á. Ɔdíyá nɔ́ɔ da anúɔ ɛdɔ ɛlā ɛ́gɔ́ɔmā ā?

²² Anɔ́ɔ Usámūwɛ̄lu le Usɔ́lu mɛ́mla ɔ̄cocɛ̄hɔ̄ kú nū kpo wā icō ga ipú inu nɛ̄hi ā, ó le ɛga ocīce yá lɛ uwá ɛga ojīlīmā, ɛyí utébulu ɛga nɛ̄ ācɛ ofu cigwó tɛtɛ cīce, ɛɛ́ nēé wā ā.

²³ Anɔ́ɔ Usámūwɛ̄lu da ɔ̄cɛ nōo ī yá ɔdōlé ā kú ɔ̄ lɛ ɛga kú ɛbɛ́ nɛ̄ anúɔ je lɛ ɔ́ kú ɔ̄ kwú ɔ̄ ú tá ɛga ɛyɛ́ɛ́yí ā ú bī wā.

²⁴ Anɔ́ɔ ɔ̄cɛ nōo ī yá ɔdōlé ā kwú átákwū mla ɔkɔ́klɔtū ā ú ce iyɔ̄bū Usɔ́lu á. Anɔ́ɔ Usámūwɛ̄lu da Usɔ́lu ká ɔ̄ má ɔdā nɛ́ɛ le tū gbēyī nū ā ce iyɔ̄bū nū á. Ó da ɔ́ ká ɔ̄ lé, ka ɛ́ɛ le ɔ́ tū gbēyī nū jāā gbéeko ɔ́ɔmā, cɛ́ɛ́ kú ɔ̄ géē lé ɔdōlé mla aúgbɔga ā. Anɔ́ɔ Usɔ́lu le ɔdōlé lé mla Usámūwɛ̄lu ɛ̄cī ɔ́ɔmā á.

²⁵ Eko nēé ga ajɛ ŋmá ɛyí ɛfu, wā ipú igelī nɛ̄ŋcɛ́ ā, é lɛ agōdō tá lɛ Usɔ́lu inīico ā, anɔ́ɔ ó má gwutá lɛ iyɔ̄lā gbo gbɔ́ɔ̄cī á.

²⁶ Eko nɛ̄ eyī le nyā ā, Usámūwɛ̄lu lɛ Usɔ́lu hīgwú, anɔ́ɔ ó da ɔ́ kú ɔ̄ cāŋjɛ ká anúɔ bī ɔ̄ tá kú ɔ̄ nyɔ̄. Anɔ́ɔ Usɔ́lu cāŋjɛ, anɔ́ɔ anú mla Usámūwɛ̄lu le tá uláyī kú igelī nɛ̄ŋcɛ́ ā á.

²⁷ Abɔ̄ uwá gā okónōgwu kú igelī nɛ̄ŋcɛ́ ā, Usámūwɛ̄lu da Usɔ́lu ká ɔ̄ da ɔ̄cocɛ̄hɔ̄ kú nū ā ká ɔ̄ gáā lɛ gla aá gɔbū kú ɔ̄ lɛ ikpó hɛ́ce lígíí. Eko nɛ̄ ɔ̄cocɛ̄hɔ̄ ā le ikpó hɛ́ce gɔbū lígíí yɛɛ ā, anɔ́ɔ Usámūwɛ̄lu da Usɔ́lu ká ɔ̄ māháyi ɛga éyi lígíi, cɛ́ɛ́ ká anúɔ lɛ ɛlā kú Ɔwɔicō mafú lɛ ɔ́.