1 USÁMUWƐ̄LU 8 - Ubáyíbu kú Idɔma

Ācɛ kú Ísrɛ̄lu dɔɔ̄kā ɔcɛ́ nōo géē gbō uwā

¹ Eko nɛ̄ Usámūwɛ̄lu kwú hīla ā, ó kwu ayí nū ú pīya aɔ́cɛ́ ohɛ́pɔ̄ kú Ísrɛ̄lu.

² Iyē kú ɔ́kplá kú nū ā wɛ, Ujówɛ̄lu, ɔyí nū ɔ́mpa ā lé ka, Ábīja. Uwá ɛpɛlɛ́ɛpa gē hɛ́ɛpɔ̄ Ubiyɛssɛba.

³ Amáŋ, ayí nū ā í yɛ tá íkpa kú ádā uwā ŋ́. Eyī kú uwā kwu itene nēé géē lé ā ōfōōfūnū. É gē mīyɛ ómíci lé ŋmá abɔ̄ ācɛ, é klla ī hɛ́ɛpɔ̄ okpaakpa glá gɛ ŋ́.

⁴ Anɔ́ɔ odúúdú anyākwɔ́cɛ kú Ísrɛ̄li le jīla, anɔ́ɔ é wā í le jīla tɔ̄ɔ̄há ɛgiyí Usámūwɛ̄lu, Uráma á.

⁵ Anɔ́ɔ é da ɔ́ kahíníī, “A le hīla ɛɛ́, ayí uwɔ í yɛce ɔwɛ kú uwɔ̄ ŋ́, abālɔbányā, lɛ ɔcɛ́ fu lɛ alɔ kóō gbō alɔ bɛ̄ɛka odúúdú aéwo ɔhá nēe lɛ ɔcɛ́ ā.”

⁶ Amáŋ, ɛlā nēé ka ka, “Lɛ ɔcɛ́ je lɛ alɔ kóō gbo alɔ.” nyā wú Usámūwɛ̄lu ɔtū nɛ̄hi.

⁷ Anɔ́ɔ Óndú ā da Usámūwɛ̄lu ká ɔ̄ lɛ ahɔ̄ jē lɛ ɛlā dóódu nɛ̄ ācɛ ā ka lɛ ɔ́ ā. Ó klla da ɔ́ ka ó wɛ anú nōo wɛ Usámūwɛ̄lu nɛ́ɛ tá ā ŋ́, amáŋ anúɔ nēé tá ka anúɔ wɛ ɔcɛ́ kú uwā gɛ ŋ́ má.

⁸ Óndú ā klla da ɔ́ ka ɔdā dóódu nɛ́ɛ yá anúɔ, gbɔɔ́ ŋmá ɛ̄cī nɛ̄ anúɔ kpó uwā bɛ̄cɛ ŋmá Íjīpiti jāā gaá kwu ícíícɛ ɔ́ɔmā ā, mɛ́mla ɛ́gɛ́nɛ̄ ɛ́ɛ je mlanyī anúɔ gbɔɔ́ ō gbā ɔwɔ ɔhá ā, ó da ɔ́ ka ɛ́gɔ́ɔmā nɛ́ɛ yɔ̄ gē yá ɔ̄ eko nyā dúú á.

⁹ Ó da ɔ́ ká ɔ̄ jāhɔ̄ lɛ uwá. Amáŋ ɔ́ɔ̄ lɛ ukɔ́ tū uwā lɔhi lɔhi, kú ɔ̄ klla le mafú lɛ uwá ɔwɛ alɛwa nɛ̄ ɔcɛ́ ā géē gbō uwā ā, mla ɛ́gɛ́nɛ̄ ɔ́ɔ géē yá uwā lɛ ā.

Oōmiya kú ɔcɛ́ ā

¹⁰ Anɔ́ɔ, Usámūwɛ̄lu lɛ odúúdú ɛlā kú Óndú ā, kpó da ācɛ nēe gē tíne ɔcɛ́ ŋmá ɛgiyí nū ā.

¹¹ Anɔ́ɔ ó da uwá kahíníī, “Ɛ́gɛ́nyā nɛ̄ ɔcɛ́ nōo géē gbō aá a géē yá aá klla í gbō aá lɛ á. Ó géē je ayí aá nɔ̄nyīlɔ kpó pīya ācɛ o kpɛ́fú ɔnya kú nū, é klla í bá ī kwinya tá iyɔ̄bū aúgbɔ́ɔnya kú nū.

¹² Ó géē fu ācɛ ōhī kú uwā kéē wɛ aógbēnjūwā kú aícɔ́ɔja ulúlā kú nū, ācɛ ɔhá kē í gbɔbɛ́fú kú ígwíígwu kú ofɛpa ce igwó ā, ofɛpa ce igwó, ayí aá ōhī géē bá í hɛ́hɔ̄ lɛ ɔ́, ígwu ɔhá géē bā ī cē ɔdɛ̄hɔ̄ kú nū. Aɔ́há géē bā ī na iyɛ́fú kú nū mɛ́mla iyó kú úgbɔ́ɔnya kú nū.

¹³ Ó géē kpó ayí aá nɔ̄nyā kéē wɛ ācɛ o jijē lɛ ɔ́, mɛ́mla ācɛ o yá ɔdōlé kú ɔlɛ́ nū.

¹⁴ Ó géē je ajɛ kú aá nōo lɔhi fíyɛ́ dúú ā, mɛ́mla ɛhɔ̄ kú ɔcí ufáyin, mɛ́mla ɛhɔ̄ kú ɔcí nēé hī ka ólīfu ā, kpó lɛ aígabɔ̄ kú nū.

¹⁵ Ó géē je éyi ŋmá ipú igwó kú ɔdɛ̄hɔ̄ kú aá dóódu kpó lɛ aígabɔ̄ kú nū.

¹⁶ Aɔ́fiyɛ kú aá nɔ̄nyā mɛ́mla aɔ́fiyɛ kú aá nɔ̄nyīlɔ mɛ́mla aɛ́na mɛ́mla ɔnya kú aá nēe lɔhi fíyɛ́ dúú ā, Ó géē je uwá kpó tū úklɔ́ kú nū.

¹⁷ Ó géē je éyi ŋmá ipú igwó kú ɔdā ajɛ kú aá dóódu. Aá abɔ̄yī aá géē je pīya aɔ́fiyɛ kú nū.

¹⁸ Eko nɛ̄ ɛ̄cī ɔ́ɔmā gā, aá géē jikwū klá Ɔwɔicō ā kóō lɛ aá hɛ́tá ŋmá abɔ̄ kú ɔcɛ́ nɛ̄ aá tíne ā. Amáŋ, Óndú ā í gáā pó ɔkɔ nɛ̄ aá í gbā ɛ̄cī ɔ́ɔmā ŋ́.”

¹⁹ Amáŋ, ācɛ ā tá kéē jahɔ̄ lɛ ɛlā nɛ̄ Usámūwɛ̄lu ka lɛ uwá ā, anɔ́ɔ é kahíníī, “Ehée. Amáŋ alɔ tíne ɔcɛ́ nōo géē gbō alɔ.

²⁰ Cɛ́ɛ́ ka ālɔ̄ géē lɛbɛ̄ɛka aéwɔhá dóódu ā. Cɛ́ɛ́ ka ɔcɛ́ kú alɔ ā kóō gbō alɔ, ó géē gbɔbū ɛfú lɛ alɔ í kpɛ́fú lɛ alɔ.

²¹ Eko nɛ̄ Usámūwɛ̄lu lɛ odúúdu ɛlā kú ācɛ ā pó ā, ó lɛ ɔ́ kpó ka lɛ Óndú ā kpɛ́mm.

²² Anɔ́ɔ Óndú ā da Usámūwɛ̄lu kóō lɛ ahɔ̄ jē lɛ ɛlā kú uwā, cɛ́ɛ́ kú ɔ̄ lɛ ɔcɛ́ fu lɛ uwá. Anɔ́ɔ Usámūwɛ̄lu da ācɛ kú Ísrɛ̄lu ā ka ɔnyɔɔnyɛ kú uwā kóō ga ɔlɛ́ nū mɛ́ɛ́nɛ.