1 USÁMUWƐ̄LU 7 - Ubáyíbu kú Idɔma

¹ Anɔ́ɔ ācɛ kú Ukɛriyati Ujéyarím gāá kwu ikpati okónu ōce kú Óndú ā ú ga ɔlɛ́ kú ɔ̄cɛ éyi nēé hī ka Abínādabu, nōo lā ɛyí ɛfu ā. É kwú abɔ̄ ú ce ɔyí Ɛlísa éyi ɛyí klla kwú anɔ̄ ú tū ɔ̄ ɛyí dúú, anɔ́ɔ é da ɔ́ kóō leyīkwu ikpati okónu ōce kú Óndú ā.

Usámūwɛ̄lu gbō ācɛ kú Ísrɛ̄lu

² Ikpati okónu ōce kú Óndú ā yɔ̄ Ukɛriyati Ujéyarím iháyí ofu. Eko nyā odúúdú ācɛ kú Ísrɛ̄lu gbɔɔ́ ō jikwū klá Óndú ā kóō tá uwā abɔ̄.

Igwú kú opīyabɔ̄

³ Anɔ́ɔ Usámūwɛ̄lu da odúúdú ācɛ kú Ísrɛ̄lu kahíníī, “Ɔ́dāŋ ka, aá géē kwúcē igbīhi wā ɛgiyí Óndú ā mla odúúdú ɔtū kú aá, ayíka aá kwu aɔ́wɔ kú éwɔhá mɛ́mla ojibó kú ɛcí nēé hī ka Ásitārɔtu nɛ̄ aá bá ī gbɛ̄ɛgbā ā ú kpó bónū, cɛ́ɛ́ kú aá kwú ɔtū kú aá ú pīya kwu Óndú ā, ka aá gbā anú ōfōōfūnū ɛ̄gbā. Ó í hɛ́ aá tá ŋmá abɔ̄ olɔfú kú ācɛ Ufílīstiya.”

⁴ Anɔ́ɔ ācɛ kú Ísrɛ̄lu ā kwú odúúdú ojibó kú Ubáalu mɛ́mla Ástārɔtu ú kpó bónū ŋmá ɛgiyí uwā. Anɔ́ɔ é gbɔɔ́ ō gbā Óndú ā ōfōōfūnū ɛ̄gbā á.

É le ācɛ Ufílīstiya yálé

⁵ Anɔ́ɔ Usámūwɛ̄lu da uwá kahíníī, “Aá lɛ odúúdú Ísrɛ̄lu túbá Umísipa, cɛ́ɛ́ ká n̄ lɛ ɔkɔ gbā lɛ Óndú ā abɔ́ɔ ohígbū aá.”

⁶ Anɔ́ɔ é le jīla Umísipa, le éŋkpɔ̄ hɛ́ lɛ enyi fu ajɛ iyɔ̄bú Óndú ā, é klla le okónu gwū ɛ̄cī ɔ́ɔmā. É kahíníī, “Alɔ le íne kú Óndú ā bīya ɛɛ́.” Umísīpa abɔ́ɔ nɛ̄ Usámūwɛ̄lu je ɛpɔ̄ kú ācɛ kú Ísrɛ̄lu ka lɛ uwá á.

⁷ Abɔ̄ ācɛ kú Ufílīstiya le pó ka, ācɛ Ísrɛ̄lu le jīla bá Umísipa ā, aɔ́cɛ́ kú Ufílīstiya gbɔɔ́ ō nyɔ̄ kéē kpɛ́fú tá uwā abɔ́ɔ. Eko nɛ̄ ācɛ kú Ísrɛ̄lu le ɛ̄nyā pó ā, é gbɔɔ́ ō yúufi ācɛ Ufílīstiya ā nɛ̄hi.

⁸ Anɔ́ɔ ācɛ kú Ísrɛ̄lu da Usámūwɛ̄lu kahíníī, “Áa híī mā ō jikwū klá Óndú, Ɔwɔicō kú alɔ ŋ́. Cɛ́ɛ́ kóō géē lɛ alɔ nyatá ŋmá abɔ̄ kú ācɛ Ufílīstiya.”

⁹ Anɔ́ɔ Usámūwɛ̄lu kwú ɔyí omlede nōo gē gwá amɛ̄ kpɔ̄ ɛ́ɛ́ mā ú, ó kwú ɔ̄ ú gwɛ́ɛya o yɔlá dúúdú lɛ Óndú ā. Anɔ́ɔ Usámūwɛ̄lu le ikwū je klá Óndú ā, ohígbū ācɛ Ísrɛ̄lu á. Anɔ́ɔ Óndú ā le ɔkɔ nɛ̄ ó gbā ā pó á.

¹⁰ Abɔ̄ Usámūwɛ̄lu yɔ̄ í gwɛ́ɛya o yɔlá dúúdú ā, ācɛ kú Ufílīstiya le tū wā ajaajɛ kéē gbɔɔ́ ō kpɛ́fú tá ācɛ Ísrɛ̄lu, amáŋ, ɔkɔ kú Óndú ā le akpáabana nɛ̄hi gbo ŋmá ɔkpáncō klá ācɛ Ufílīstiya ɛ̄cī ɔ́ɔmā. Ó kwú uwā ú kpó gbájí, anɔ́ɔ é le fíyákátá bá ī kwu ohígbū ufi.

¹¹ Ācɛ kú Ísrɛ̄lu kwú bɛ̄cɛ ŋmá Umísipa abɔ́ɔ, gbɔɔ́ ō nū ācɛ kú Ufílīstiya inya. É ŋmó uwā jāā ga ɛháajɛ kú Ubɛ́tíkā.

Ɛcɔ̄ kú Ebɛnésa

¹² Anɔ́ɔ Usámūwɛ̄lu kwú ɛcɔ̄ ú kwu ajɛ ɔtāhɛ̄ kú Umísipa mɛ́mla Ujessána, anɔ́ɔ ó kwú iyē ú ce abɔ́ɔ kahíníī, “Ebɛnésa” (ɛ̄nɛ̄ ɛyí nū wɛ ɛcɔ̄ kú otábɔ̄), ohígbū ka ó ka abɔ́ɔ nɛ̄ Óndú ā ɔ́ɔ tá aá abɔ̄ á.

¹³ É le ācɛ kú Ufílīstiya yálé, anɔ́ɔ é klla lɛ ɔtū nyɔ̄ í kpɛ́fú tū ācɛ kú Ísrɛ̄lu igbɔhá gɛ ŋ́, odúúdú eko nɛ̄ Usámūwɛ̄lu yēeyī ā, ohígbū ka Óndú í cɛ̄ lɛ uwá ŋ́.

¹⁴ Ācɛ kú Ufílīstiya kwú odúúdú aígelī nɛ̄hi nēé tɛtɛ mīyɛ ŋmá ɛgiyí ācɛ kú Ísrɛ̄lu ā, o ŋmá Ékrɔn jāā ga Ugáti ā, ú kpó cīgbīhi lɛ uwá. Anɔ́ɔ ɛbɔ́ má yɔ̄ ɔtāhɛ̄ ācɛ kú Ísrɛ̄lu mɛ́mla Ámɔn eko ɔ́ɔmā dúú á.

¹⁵ Usámūwɛ̄lu kɛ́pɔ̄ kú ācɛ Ísrɛ̄lu, odúúdú eko nɛ̄ ó yēeyī gaá kwu ā.

¹⁶ Ó gē yɛ ajɛ ā bilíbilí iháyí dóódu gē kɛ́pɔ̄ kú ācɛ Ísrɛ̄lu. O ŋmá Ubɛ́tɛlu ga Ugígalu mɛ́mla Umísipa.

¹⁷ Ɛ́ɛ́ kóō géē cīgbīhi wā Uráma ɛga nōo wɛ ɔlɛ́ nū ā. Uráma nɛ̄ ó gē gbō ācɛ kú Ísrɛ̄lu ŋmá á. Ó kē le ede gwó lɛ Óndú ā Uráma dúú.