1 USÁMUWƐ̄LU 6 - Ubáyíbu kú Idɔma

Ikpati kú Ɛka kú Óndú ā pīyɛyí wā ɔlɛ́

¹ Eko nɛ̄ ikpati okónu ōce kú Óndú ā lɛ ɔyā ahāapa yá ajɛ kú Ufílīstiya ā.

² Ācɛ kú Ufílīstiya le ācogwɛ́ɛya kú uwā mɛ́mla ācogwɛ́bā mɛ́mla ācoyímabɔ̄ kú uwá kpó hīgwú, anɔ́ɔ é da ɔ̄kā kahíníī, “Ɔdí nɛ̄ alɔ géē yá mla ikpati okónu ōce kú Óndú nyā ā? Ɔ́dāŋ́ ka, alɔ kwú ɔ̄ ú tɛ̄hɔ̄ ga ɛga nɛ̄ ó ŋmá ā, ɔdí nɛ̄ alɔ géē je tɛ̄hɔ̄ búla anú nyɔ̄ ā?

³ É tá ācɛ Ufilístiya ā ohi kahíníī “Ɔ́dāŋ ka aá kwú ikpati okónu ōce kú Ɔwɔicō kú Ísrɛ̄lu ā ú cīgbīhi, aá géē je ɔ́ cīgbīhi mla ɔdā kú ɛ̄gbā nēe géē cíla ulé kú íne nɛ̄ aá bīya ā piíí. Aá híī je ɔ́ cīgbīhi abɔ̄ áncā, nɛ̄ ɔdā ɛ̄gbā í gáā bula anú nyɔ̄ ŋ́ nɛ ŋ́. Ɔ́dāŋ ka aá lɛ ɛ́gɛ́nɛ̄ alɔ ka ā yá, ōcē kú aá géē mɛ, aá í jé ɔkwu ɔdā nōo yá ɛ́ɛ́ nɛ̄ ó yɔ̄ gē yá aá italā á.”

⁴ Ācɛ ā da uwá ɔ̄kā kahíníī, “Ɛdɔ ɛ̄gbā nyá nɛ̄ alɔ géē je tɛ̄hɔ̄ búla anú nyɔ̄ āa?” É tá ācɛ ā ohi kahíníī, “Ɛ̄gbā kú ojibó kú ōcē apú ā kú ugóolu (oje ɔdɔ) ɛhɔ̄ mɛ́mla ojibó kú ifú nēé bī ugóolu (oje ɔdɔ) ma ɔ́ ɛhɔ̄. Éyééye kú uwā géē kwɛyí kú aɔ́cɛ́ ɛhɔ̄ kú Ufílīstiya ā. Ohígbū ka, é tū ōcē apú ā ɛhɔ̄ klá odúúdú ācɛ mɛ́mla aɔ́cɛ́ ɛhɔ̄ kú aá ā.

⁵ Aá géē ma ojibó kú ugóolu (oje ɔdɔ) kú ōcē obɔ̄bí nyā, mla ákú ifú nōo gē je ajɛ kú aá cē nyā. Aá kē í lɛ ojīlīmā ce Ɔwɔicō kú Ísrɛ̄lu ā. Eko ōhī, ó géē mā ō yá aá mɛ́mla aɔ́wɔ kú aá mɛ́mla ajɛ kú aá italā.

⁶ Ɔdíyá nɛ̄ aá gē bā í yíkpɛ̄yí olɔfú bɛ̄ɛka ɔcɛ́ kú Íjīpiti mɛ́mla ācɛ kú Íjīpiti ā? Aá híī je mlanyī ɛ́gɛ́nɛ̄ Ɔwɔicō yá uwā olíla klla yá uwá ɛbɛ́ jāā gbéeko nɛ̄ ācɛ kú Ísrɛ̄lu nyɛ̄ɛ̄ ŋmá Íjīpiti ā ŋ́.

⁷ Aá lɛ úgbɔ́ɔnya gbā, cɛ́ɛ́ aá lɛ ɛna o bī ɔyí ɛpa, nēé lɛ ogbló ō lɛ wu ɛna ɛpa ɔkɔ kéē lɛ pi odée wu uwá ɔkɔ jéjéē ɛ́ɛ́ ŋ́ mā kpó. Cɛ́ɛ́ aá kwú ogbló ō lɛ wu ɛna ɛpa ɔkɔ kéē pi odée ā ú wu uwá ɔkɔ, cɛ́ɛ́ aá kwú ɔ̄ ú wū úgbɔ́nya ā, cɛ́ɛ́ aá lɛ ayí uwā ā kpɔ́ nū tū ipú igá.

⁸ Aá kwu ikpati okónu ōce kú Óndú ā ú háyi ipú úgbɔ́ɔnya ā. Cɛ́ɛ́, aá klla kwú aójíbo kú ōcē obɔ̄bí mɛ́mla ifú kú ugóolu (oje ɔdɔ) nɛ̄ aá ma nɛ̄ aá yɔ̄ ī tɛ̄hɔ̄ nyɔ̄ kéē wɛ ɛhi kú ínoōbīya ó je yɛ́ɛhi ā, ú kpó tū ipú ikpati nɛ̄ŋcɛ́ éyi nēé hayi pī ikpati okónu ōce kú Óndú ā. Aá kwú aɛ́na mɛ́mla iyó nēé géē kwu nyɔ̄ ā, ú nā tá ɔwɛ kéē gbɔɔ́ ō nyɔ̄ abɔ̄yī uwā.

⁹ Aá leyīkwu ɔ́ abɔ́ɔ ó yɔ̄ ī nyɔ̄ ā, ɔ́dāŋ ka, ó gbɔɔ́ ō yɛ lɛyíkwu igelī nɛ̄ŋcɛ́ kú Ubɛti Usɛ́mɛ̄ssi, ayíka, Ɔwɔicō kú Ísrɛ̄lu kē tū ōcē obɔ̄bí ā mla ákanya ā klá alɔ á. Ɔ́dāŋ́ ka, ó kē yɛ lɛyíkwu abɔ́ɔ ŋ́, alɔ kē í jé ka ó wɛ anú tū ōcē obɔ̄bí ā wā í klá alɔ ā ŋ́, ɛ́mba ɔdā kú ámíyā kú abɔ̄yī nú nɛ.”

¹⁰ É le ɔdā nēé da uwá ā yá. É kwú úgbɔ́ɔya ú fúlá tū ogbló nōo wū aɛ́na ɛpa o bī ayí ɛpa ā ɔkɔ, anɔ́ɔ é le ayí uwā kpó ga ipú igá ɔlɛ́ á.

¹¹ É kwú ikpati okónu ōce kú Óndú ā ú háyi ipú úgbɔ́ɔnya ā, mla ojíbó kú ɔdā ɛ̄gbā kú ōcē apú mla ákú ojibó kú ifú nēé bī ugóolu (oje ɔdɔ) ma ā, kpó tū ɔ̄.

¹² Anɔ́ɔ aɛ́na ā gbɔɔ́ lɛyíkwu ɔwɛ kú Ubɛ́ti Ussɛ́mɛ̄ssi, lɛyíkwu ɔwɛ ā kpaakpa, é nyā ga ɔwɛ ɔhá dúúmā ŋ́, é bá ī dɛ̄gba abɔ̄ é bá ī nyɔ̄ ā. Aɔ́cɛ́ ɛhɔ̄ kú Ufílīstiya ā yɛce uwá jāā ga ɛjī kú Ubɛ́ti Ussɛ́mɛ̄ssi.

¹³ Ācɛ kú Ubɛ́ti Ussɛ́mɛ̄ssi bā í ce ɔdɛ̄hɔ̄ ɔpɛ́ ā, ɛ́ɛ́ nɛ̄ igbeékpónú, é je eyī gicō, anɔ́ɔ é má ikpati okónu ōce kú Óndú ā. É gwéeyē kú ɛbɛ o yéeyi jii nēé má ā.

¹⁴ Úgbɔ́ɔnya ā yɛ jāā gaá gā ɛhɔ̄ kú ɔ̄cɛ éyi nēé hī ka Ujóssuwa, nōo lā Ubɛti Ussɛ́mɛ̄ssi ā. Anɔ́ɔ é gáā māháyi pī ápátɛ̄cɔ̄ nɛ̄hi éyi abɔ́ɔ. Anɔ́ɔ ācɛ ā le ɔcí nɛ̄ é le gbā úgbɔ́ɔnya ā kpó yíla, le aɛ́na ɛpa ā kpó ŋmó, kwú uwā ú kpó gwɛ́ɛya o yɔlá dúúdú lɛ Óndú ā.

¹⁵ Ācɛ Ulífāyi kwú ikpati okónu ōce kú Óndú ā mɛ́mla ikpati nɛ̄ aójibó kú ugóolu (oje ɔdɔ) bá ipú nū ā ú kpó ce ɛyí Ápátɛ́cɔ̄ nɛ̄hi ā. Anɔ́ɔ ācɛ kú Ubɛ́ti Ussɛ́mɛ̄ssi le ɛya o yɔlá dúúdú gwó abɔ́ɔ lɛ Óndú ā á.

¹⁶ Aɔ́cɛ́ ɛhɔ̄ kú Ufílīstiya ā háyi abɔ́ɔ, le ɔdā nɛ̄ ācɛ ā yá ā má kwɛyí, anɔ́ɔ é kwúcē ga Ékrɔn ícíícɛ ɔ́ɔmā.

¹⁷ Ācɛ kú Ufilístiya ā, lɛ ɔdā ɛ̄gbā kú ugóólu kú ōce apú ɛhɔ̄ nyā kpó tɛ̄hɔ̄ gé lɛ Óndú ā kóō cíla ulé kú ínoōbīya kú uwá. Éyééye kwɛyí aígelī nɛ̄hi kú Ufílīstiya nēe bá ā, Ugása, Ásikēlɔn, Ugáti, Ássīdɔdu mɛ́mla Ékrɔn.

¹⁸ Ifú kú ugóolu (oje ɔdɔ) ɛhɔ̄ nēé tɛ̄hɔ̄ ā kē kwɛyí aígelī nɛ̄hi éyéeye nɛ̄ aɔ́cɛ́ ɛhɔ̄ kú Ufilístiya gē gbō ā. Kwu aígelī nɛ̄hi mɛ́mla aéyīpɔ́lɛ́ nēé hɛ́ igá tū ɔ̄ mɛ́mla aɛ́nɛ̄ é hɛ́ iga tū ŋ́ mā. Ápátɛ́cɔ̄ kú ipú ɛhɔ̄ kú Ujóssuwa nōo lā Ubɛ́ti Ussɛ́mɛ̄ssi nēé je ikpati okónu ōce kú Óndú ā ce ā kwu abɔ́ɔ jāā kwú ícɛ nyā, kóō wɛ ɔdā ijáalí lɛ alɛɛcɛ.

¹⁹ Óndú ā ŋmó ācɛ kú Ubɛ́ti Ussɛ́mɛ̄ssi ofɛtá ce igwó, ohígbū keé feyīkpeéé le ipú ikpati okónu ōce kú Óndú ā má. Anɔ́ɔ ācɛ ā le ekwu yɔ̄ ohígbū ka Óndú ā lɛ ācɛ alɛwa kpó ŋmó ŋmá ipú uwā á.

É kwú ikpáti ɛka kú Óndú ā ú ga Ukɛriyati Ujéyarím

²⁰ Anɔ́ɔ ācɛ kú Ubɛti Ussɛ́mɛ̄ssi da iyī uwā kahíníī, “Ɔnyɛ géē háyi mla Óndú, Ɔwɔicō otīihɔ nyā glá āā? Iní nɛ̄ alɔ géē tū ɛhɔ̄ nyɔ̄ kóō gāá kwú ɔ̄ ú ŋmá ɛgiyí alɔ āa?”

²¹ Anɔ́ɔ é lɛ ɛhɔ̄ tū fu ācɛ kú Ukɛriyati Ujéyarím kahíníī, “Ācɛ kú Ufílīstiya kwu ikpati okónu ōce kú Óndú ā ú tɛ̄hɔ̄ wā ɛɛ́, aá wā kú aá gāá kwú ɔ̄ ú.”