1 USÁMUWƐ̄LU 5 - Ubáyíbu kú Idɔma

Ikpáti kú okónu o ce ā ipú ācɛ Ufilístiya

¹ Eko nɛ̄ ācɛ Ufílīstiya mīyɛ ikpati okónu ōce kú Óndú ā ŋmá ɛgiyí ācɛ Ísrɛ̄lu ā, é kwu ɔ̄ ú ŋmá Ebɛnésa gaá háyi ipú igelī nɛ̄hi kú uwā nēé hī ka Ássīdɔdu ā.

² É kwú ɔ̄ ú ga ipú inu ɛcí kú uwā nēé hī ka, Udégɔn ā. É gaá kwú ɔ̄ ú háyi pī ojibó kú ɛcí kú uwā ɔ́ɔmā.

³ Ɔ̄cɔ̄ɔ̄cī kú oŋmɔ́ɔ̄cī nū, ācɛ kú Ássīdɔdu má ka ojibó kú ɛcí kú uwā, Udégɔn ā má gwōnū lɛ eyī pīya klá ajɛ iyɔ̄bū Ikpati kú Ɛka kú Óndú ā. É gaá kwú ɔ̄ ú gicō, kwú ɔ̄ ú hayi ɛga nɛ̄ ó tɛtɛ háyi ā.

⁴ Ɔŋmɔ́ɔ̄cīnū kpɔ́, é klla má ka ɛcí kú uwā Udágɔn ā klla má gwōnū iyɔ̄bū kú Ikpati kú Ɛka kú Óndú ā. Igbɛ́ ɛ̄nyā ā, ɔkɔ kú Udégɔn mɛ́mla abɔ̄ ɛpɛplɛ́ɛpa kú nú kwú kpó cē ŋmá anú bá okómpinu kú inu ɛcí ā, anɔ́ɔ igbuntulu kú Udégɔn ōfōōfūnū hile tāajɛ mɛ́ɛ̄ á.

⁵ Ɔdā nōo yá ɛ́ɛ́ nɛ̄ ācɛ kú Ássīdɔdu mɛ́mla ācogwɛ́ɛya kú Udégɔn ā í gē lɛ ikpó da abɔ́ɔ ɛ́ɛ́ nēé gē yɛ abɔ́ɔ ŋ́, jāā kwu ícɛ nyā ā yɔ̄ abɔ́ɔ á.

⁶ Óndú ā le italā nɛ̄hi yá ācɛ kú Ássīdɔdu nɛ̄ɛ̄nɛ̄hi. Ó yá uwā mɛ́mla ācɛ nēe lā jīla tū uwā ā italā nɛ̄hi, o ŋmá lɛ o tū ōcē obɔ̄bí kú apú alɛwa nɛ̄hi klá uwá.

⁷ Eko nɛ̄ ācɛ kú Ássīdɔdu gbɔɔ́ ō má ɔdā nōo yɔ̄ ī yá nyā, anɔ́ɔ é kahíníī, “Ikpati kú Ɛka kú Ɔwɔicō kú Ísrɛ̄lu ā, í gáā yɔ̄ mla alɔ ɛ́ɛ́ gɛ ŋ́, ohígbū ka, ohígbū nū nɛ̄ Óndú, Ɔwɔicō kú Ísrɛ̄lu gē yá alɔ mla Udégɔn, ɔwɔ kú alɔ ā italā yɔ̄ á.”

⁸ Anɔ́ɔ é le ɛhɔ̄ tū gaá lɛ odúúdú aɔ́cɛ́ ɛhɔ̄ kú Ufílīstiya kpó hīgwú. Anɔ́ɔ é da uwā ɔ̄kā ka, ɔdí nɛ̄ aá géē yá mla Ikpati kú Ɛka kú Ɔwɔicō kú Ísrɛ̄lu ā? Anɔ́ɔ é tá uwā ohi ka, “Aá kwú ɔ̄ ú bī ga Ugáti” (Ugáti wɛ igelī nɛ̄hi ɔhá kú ācɛ Ufílīstiya). Anɔ́ɔ é kwú Ikpati kú Ɛka kú Ɔwɔicō kú Ísrɛ̄lu ā ú bī ga abɔ́ɔ á.

⁹ Amáŋ, eko nēé lɛ ɔ́ bī ga abɔ́ɔ ā, Óndú ā gbɔɔ́ ō yá ācɛ kú Ugáti italā nɛ̄hi nōo cɛ̄ lɛ ācɛ kú igelī nɛ̄hi ā kwú hútú nɛ̄ɛ̄nɛ̄hi. Ōcē kú apú wā í klla odúúdú ācɛ Ugáti, kwu ayípɛ̄ kwu anyākwɔ́cɛ.

¹⁰ Anɔ́ɔ ācɛ Ugáti kwú Ikpati kú Ɛka kú Óndú ā, ú tɛ̄hɔ̄ ga igelī nɛ̄hi ɔhá kú Ufílīstiya nēé hī ka Ékron ā. Amáŋ eko nɛ̄ ó gā ajɛ abɔ́ɔ ā, ācɛ kú Ékrɔn ā gbɔɔ́ ō jikwū, gbɔɔ́ ō dɛ̄gba tɛ́ɛcɛ kéē kwú ikpati ɛka kú Óndú, Ɔwɔicō kú Ísrɛ̄lu ā ú bī wā ɔlɛ́ aá, kóō gaá je odúúdú aá kpó ŋmó ɛ́ɛ́.

¹¹ Anɔ́ɔ ācɛ kú Ékrɔn lɛ ɛhɔ̄ tū gaá lɛ odúúdú aɔ́cɛ́ ɛhɔ̄, kú ācɛ Ufílīstiya ā kpó hīgwú, anɔ́ɔ é da uwá kahíníī, “Aá kwú Ikpati kú Ɛka kú Óndú, Ɔwɔicō kú ācɛ Ísrɛ̄lu ā ú cīgbīhi ga ɛgiyí nū, cɛ́ɛ́ kóō híī kpó alɔ mɛ́mla aíkonó kú alɔ ŋmó ŋ́.” Ufi cɛ̄ le ɔtū kú odúúdú ācɛ kú igelī nɛ̄hi ā, kwú wuklílicō, cɛ̄ lɛ uwá lā ipú ufi, ohígbū ka Óndú ā yɔ̄ ī yá uwā italā nɛ̄hi.

¹² Ācɛ ɔlɛ́ uwā nēe kwú ŋ́ mā, ōcē le uwá kwú, anɔ́ɔ é bá ī jikwū kú aɔ́wɔ kú uwā kóō wā í tá uwā abɔ̄ á.