1 USÁMUWƐ̄LU 4 - Ubáyíbu kú Idɔma

É mīyɛ Ikpati kú Ɛka kú Óndú ā

¹ Ācɛ kú Ísrɛ̄lu le yɛ gáā kpɛ́fú tá ācɛ kú Ufílīstiya. É le aáklɔ̄kpɛ kú ɛfú kú uwā cē kwu ɛga nēé hī ka Ebɛnésa ā, ācɛ kú Ufílīstiya kē lɛ aáklɔ̄kpɛ kú ɛfú kú uwā cē kwu Áfēki.

² Ācɛ Ufílīstiya kē gbɔɔ́ ō kpɛ́fú tá ācɛ kú Ísrɛ̄lu. Ɛfú ā kē kwú hɔ́lá tū ācɛ Ísrɛ̄lu iyē nɛ̄hi, anɔ́ɔ é le ācɛ kú Ísrɛ̄lu yálé á. É klla ŋmó ācɛ Ísrɛ̄lu nɛ̄ áluka kú uwā lɛbɛ̄ɛka ācɛ úlā igwó (4,000) ɔgbɛ́fú ā.

³ Eko nɛ̄ ācɛ nēe hile ā le yɛ ɔkwɔɔkwu wā aáklɔ̄kpɛ kú ɛfú ā, anyākwɔ́cɛ kú Ísrɛ̄lu ā da iyī uwā ɔ̄kā kahíníī, “Ɔdíyá nɛ̄ Óndú ā cɛ̄ lɛ ācɛ kú Ufílīstiya yá alɔ lé āa? Ālɔ̄ nyɔ̄ gaá kwú ikpati kú Ɛka kú Óndú ā ú bī wā ŋmá Ussílo, cɛ́ɛ́ kú Óndú ā kóō géē nyɔ̄ mla alɔ, kóō lɛ alɔ hɛ́tá ŋmá abɔ̄ kú aólɛlā kú alɔ.

⁴ Anɔ́ɔ ācɛ ā le ɛhɔ̄ tū ga Ussílo nyɔ̄ í kwú ikpati kú Ɛka kú Óndú ā ú bī wā ā. Ikpati ā, kwɛyí akpa kú ɛgahi mɛ́mla ɔfú mla ojīlīmā kú Óndú ā á. Ayí kú Ɛ́lāyi ɛpa ā, Uhófīni mɛ́mla Ufínɛ̄hasi bī ɔ̄ wā á.

⁵ Eko nēé lɛ ikpati kú ɛka ā bī wā ā, odúúdú ācɛ kú Ísrɛ̄lu lɛ ɛgba kú éeyē dɛ̄ nɛ̄hi, nōo le ajɛ jíliyē.

⁶ Ācɛ kú Ufílīstiya ā lɛ ɛgba ā pó, anɔ́ɔ é kahíníī, “Aá pó ɛgba nɛ̄hi nēé bā ī dɛ̄ aáklɔ̄kpɛ kú ɛfú kú ācɛ Uhíburu ā, ɔdí wɛ ɛyí ɛgba nēé bá ī dɛ̄ ā?” Eko nēé le jé ka, ikpáti ɛka kú Óndú ā ɔ́ɔ gā aáklɔ̄kpɛ kú ɛfú kú ācɛ Uhíburu ā.

⁷ É yúufi nɛ̄hi, anɔ́ɔ é kahíníī, “Ɔwɔ éyi gā aáklɔ̄kpɛ kú ɛfú kú uwā ɛɛ́. Alɔ gebí ɛɛ́. Ɔdā ɛ́gɛ́nyā í yá alɔ jéjée ɛ́ɛ́ ŋ́.

⁸ Ɔ̄nyɛ géē nya alɔ tá ŋmá abɔ̄ kú aɔ́wɔ olɔfú nɛ̄hi nyā ā? Ɛ̄nyā wɛ aɔ́wɔ nēe kpó ācɛ kú Íjīpiti ŋmó á.

⁹ Aá lɛ ɔtū lé, ācɛ Ufílīstiya, aá kpɛ́fú bɛ̄ɛka ācɛnyīlɔ ā, ámāŋ alɔ kwú pīya ɔfiyɛ kú ācɛ Uhíburu ɛ́gɛ́nɛ̄ é tɛtɛ wɛ ɔfiyɛ kú alɔ ā.”

¹⁰ Anɔ́ɔ ācɛ kú Ufilístiya ā lɔfú tū iyē le ɛfú kpó lɔfú lɔfú nɛ̄hi, anɔ́ɔ é kwú ācɛ Ísrɛ̄lu í yálé á. Ācɛ kú Ísrɛ̄lu nēe hile ā le pɛ́ kwu ga ɔlɛ́ uwā. Ācɛ kú Ísrɛ̄lu nēé ŋmó ɛ̄cī ɔ́ɔmā ā lɛwa nɛ̄hi. Áluka kú aícɔ́ɔja kú Ísrɛ̄lu nēé ŋmó ɛ̄cī ɔ́ɔmā ā wɛ úlā ofu ɛtá ce úlā igwɛ́ɛhɔ̄ (30,000).

¹¹ É mīyɛ Ikpati kú Ɛka kú Óndú ā dúú. É le ayí kú Ɛ́lāyi ɛpɛlɛ́ɛpa, Uhófīni mɛ́mla Ufínɛ̄hasi kpó ŋmó dúú.

Ikwū kú Ɛ́lāyi

¹² Ɔ̄cɛ éyi ŋmá ipɔ́ɔma kú Ubénjamīn, kwinya ŋmá ɔgbɛ́fú ā jāā ga Ussílo ícíícɛ ɔ́ɔmā. O yá ɛ́ɛ́ kú ō ma ɔtūnōbí kú nū fú ā, ó lɛ úmúlá gwu klá ɛyí, lɛ īlī kú nū híla.

¹³ Ɛ́lāyi nɛ̄ ɛlā kú Ikpati kú Ɛka kú Óndú ā kwú ɔ̄ iyē nɛ̄hi ā, cīce okónu ɔwɛ leyīkwu ɔwɛ gɛɛ. Ɔ̄cɛ nōo ŋmá ɔgbɛ́fú ā le ɔ̄kā kú ɛfú nōo lé uwā ā ca kllɛcɛ ga ɛga dúúdu kú igelī nɛ̄ŋcɛ́ ā, anɔ́ɔ odúúdú ācɛ ā gbɔɔ́ ō jikwu wōōō á.

¹⁴ Ɛ́lāyi lɛ uya ā pó, anɔ́ɔ ó le ɔ̄kā da ka ɔdí wɛ ɛyí kú uya nɛ̄ ācɛ bá ī yá ā? Anɔ́ɔ ɔ̄cɛ ā le inya kwu gaá le ɔ̄kā ā kā Ɛ́lāyi á.

¹⁵ Ɛ́lāyi wɛ iháyí ofɛnɛ ce igwáahātá, ó mɛ́ɛbɛ lɔhi eko ɔ́ɔmā gɛ ŋ́.

¹⁶ Anɔ́ɔ ɔ̄cɛ ā da Ɛ́lāyi ka anúɔ kwu ŋmá ɔgbɛ́fú klla kwinya jāā wā abɔ́ɔ ícíícɛ ɔ́ɔmā. Anɔ́ɔ Ɛ́lāyi da ɔ́ ɔ̄kā ka ɔdí ɔ́ɔ yá ɔgbɛ́fú ā, ɔyí anúɔ?

¹⁷ Anɔ́ɔ ɔ̄cɛ nōo bī olɛhɔ̄ ā wā ā tá Ɛ́lāyi ohi ka ācɛ Ísrɛ̄lu ɛ́ɛ le pɛ́ kwu ŋmá ɛgiyí ācɛ Ufílīstiya. Ɛ́ɛ kē le aá yálé bɔ̄bí bɔ̄bí. Ó klla da ɔ́ ka ayí nū ɛpa ā, Uhófīni mɛ́mla Ufínīhas ā, ɛfú ɔ́ɔ le uwá lé. Ācɛ Ufílīstiya ɛ́ɛ klla mīyɛ Ikpati kú Ɛka kú Óndú ā, klla kwú ɔ̄ ú ga ɔlɛ́ uwā.

¹⁸ Eko nɛ̄ ɔ̄cɛ ā kwú okónu ú kwu Ikpati kú Ɛka kú Óndú ā, Ɛ́lāyi kwú míya ga igbīhi ŋmá úgādā nɛ̄ ó cīce okónu ɔwɛ kú igá kú igelī nɛ̄ŋcɛ́ ā gaá le ɔkɔ tāajɛ, le ɔkɔ ā cē. Ó kwú pīya ɔnyākwɔ́cɛ, ó klla kwú gbɛ nɛ̄hi, ōgwōnū kú nū ɔ́ɔmā kwú ɔ̄ ɔkɔ ú cē, anɔ́ɔ ó gekwú á. Ó kpó ācɛ kú Ísrɛ̄lu trɛ̄yí iháyí ofɛpa.

Ikwū kú ɔnyā kú okwūmā Ufínīhasi

¹⁹ Ɔnyā ɔyí kú Ɛ́lāyi, ɔnyā kú Ufínīhasi ā yīipú eko ɔ́ɔmā. Eko nɛ̄ ó cíkā ō ma ɔyí ā má kwajaajɛ ɛɛ́. Eko nɛ̄ ɔnyā ā le pó ka, ɛɛ́ mīyɛ Ikpati kú Ɛka kú Óndú ā, ka ádā ɔbá nū mɛ́mla ɔbá nū, ɛ́ɛ le pɛ́ gekwú ā, ɔma ekpūkpūlū le ɔ́ kwú, anɔ́ɔ ó le ɔyí ma á.

²⁰ Abɔ̄ ó yɔ̄ í kwú eko nɛ̄ ó yɔ̄ ī ma ɔyí ā, anɔ́ɔ ɔnyā nōo yɔ̄ ī kɔ́ ɔ̄ ɔma ā da ɔ́ kóō lɛ ɔtū lé ká, ka ɔyínɔ̄nyīlɔ nɔ́ɔ yɔ̄ ī ma á. Amáŋ ó jāhɔ̄ lɛ ɔnyā ā ɛ́ɛ́ nɛ̄ ó gē tá ɔ̄ ohi ŋ́.

²¹ Ó hī ɔyí nū ā iye kahíníī, “Íkābɔdu” nɛ̄ ɛyí nū wɛ, “Ɛgahi kú Ɔwɔicō nyɛ̄ɛ̄ ŋmá Ísrɛ̄lu ɛɛ́.” Ó kɛlā nyā lɛyíkwu Ikpati kú Ɛka kú Óndú ā nēé mīyɛ ā, mla ikwū kú ɔbá nū mla ádā ɔbá nū ā.

²² “Ɛgahi mla ocɛ̄tra kú Ɔwɔicō nyɛ̄ɛ̄ ŋmá Ísrɛ̄lu, ohígbū ka é mīyɛ Ikpati kú Ɛka kú Óndú ā.”