1 USÁMUWƐ̄LU 31 - Ubáyíbu kú Idɔma

Ikwū kú Usɔ́lu mɛ́mla ayí nū

¹ Ācɛ kú Ufilístiya kpɛ́fú tá ācɛ kú Ísrɛ̄lu ɛyí ɛfú kú Ugílibowa. É ŋmó aícɔ́ɔja kú Ísrɛ̄lu alɛwa abɔ́ɔ. Ohile kú aícɔ́ɔja ā, mɛ́mla Usɔ́lu mɛ́mla ayí nū kwú pɛ́ kwu ŋmá abɔ́ɔ.

² Amáŋ ācɛ Ufilístiya ā nū uwā inya jāā gbéeko nēé gāá le ayínɔ̄nyīlɔ kú Usɔ́lu kpó kwú, le Ujonátan mɛ́mla Abínādabu mɛ́mla Umálkīssɔ kpó ŋmó.

³ Ɛfú ā le lɔfú tū Usɔ́lu iyē ɔ́kíka dóódu. Ɔyī alɛwa le Usɔ́lu kwú klla le ɔ́ yá ágbe bɔ̄bí nɛ̄hi.

⁴ Anɔ́ɔ ó da ɔyípōklobīya nōo gē bī iyɔ́fú kú nū ā káɔ̄ lɛ ɔkpacaŋ́gelī kú pi kɔ́ ɔ̄ lɛ anúɔ ŋmó, cɛ́ɛ́ ka aólufíyé, opɛ̄cí kú Ufilístiya ā kéē híī wā í yá anúɔ ɛbɛ́ klla hólígbō ce anúɔ ɛ́ɛ́, kéē ŋmó anúɔ ŋ́. Amáŋ, ɔ̄cɛ o bī iyɔ́fú kú kú nū ā í lɔtū yá ɔdā nɛ̄ ó ka ā glá ŋ́. Ohígbū ka ó gē yúufi nɛ̄hi. Anɔ́ɔ Usɔ́lu le ɔkpacaŋ́gelī kú nū pi kwu ajɛ, anɔ́ɔ ó má gwōnū klá anú le iyī nū ŋmó á.

⁵ Eko nɛ́ ɔyípōklobīya nōo gē bī iyɔ́fú kú nū ā, le má ka Usɔ́lu ɔ́ɔ gekwú ɛɛ́ mā. Ó le ɔkpacaŋ́gelī kú nū bī kwu ajɛ, má gwōnū klá anú gekwú mla Usɔ́lu dúú.

⁶ Anɔ́ɔ Usɔ́lu gekwú mla ayínɔ̄nyīlɔ kú nū ɛtá ā, mɛ́mla ɔyípōklobīya o bī iyɔ́fú kú nū ā, mɛ́mla odúúdú ācɛ ɔlɛ́ nū tɔ̄ɔ̄há, ɛ̄cī ékpónú.

⁷ Eko nɛ̄ ācɛ kú Ísrɛ̄lu ohile nēe lā āyā ɔhá kú ɔpɛ́ ā, mɛ́mla aɛ́nɛ̄ e lā ogbeé kú Ujɔ́dan ā má ka ācɛ kú Ísrɛ̄lu ɛ́ɛ le inya kwu ŋmá ɔgbɛ́fú kú ācɛ Ufilístiya, nɛ̄ Usɔ́lu mɛ́mla ayí nū le pɛ́ gekwú á, é nyɛ̄ɛ̄ hɛ ɔlɛ́ uwā tá le pɛ́ kwu. Anɔ́ɔ ācɛ Ufilístiya wā í lā ɔlɛ́ uwā nēé kwu hɛ ɔ̄ tá ā á.

⁸ Oŋmɔ́ɔ̄cī nū ā, eko nɛ̄ ācɛ Ufilístiya wā kéē kpó iyó ŋmá iyē kú okwū ā, é má okwu kú Usɔ́lu mɛ́mla ayí nū ɛtɛ́trɛ́ɛtá ā bá ɛyí ɛfu kú Ugílibōwa.

⁹ É le ɔ́ ɛyí hɛ́, le iyɔ́fú kú nū kpó. Anɔ́ɔ é le ɛhɔ̄ tū ga ipú ajɛ kú Ufilístiya dóódu, ka ɛɛ́ lɛ ɔ̄kā olɔhi ā bī gē lɛ ɛcí kú uwā mɛ́mla ācɛ ɔlɛ́ aá.

¹⁰ É kwú iyɔ́fú kú nū ú kpó playi inu ɛcí kú uwā nēé hī ka, Ássitārɔtu ā. Anɔ́ɔ é kwu okwu kú Usɔ́lu ú playi ɔdɔ kú Ubɛ́tissan.

¹¹ Amáŋ, eko nɛ̄ ācɛ kú igelī nɛ̄hi kú Ujábesi ipú Ugílɛ̄di ā lɛ ɔdā nɛ̄ ācɛ Ufilístiya yá Usɔ́lu ā pó ā,

¹² odúúdú ayípōklóbīya ā lɛ ɔtū yékpónú anɔ́ɔ é le pɛ́ i yɛ otú gaá kwú okwū kú Usɔ́lu mɛ́mla ayí nū ú kpó ŋmá ɔdɔ kú Ubétissan. Anɔ́ɔ é gā Ujábesi, le uwá kpó tɔ̄lá abɔ́ɔ.

¹³ É le ikpokwú kú uwá kpó nyɔ̄ í nyi ɔkwu ɔcí kú Utámārisiki ipú ajɛ kú Ujábesi ā. Anɔ́ɔ é le okónu gwū ɛ̄cī ahāapa á.