1 USÁMUWƐ̄LU 30 - Ubáyíbu kú Idɔma

Udéfīdi kpɛ́fú tá ācɛ Ámālɛ̄ki

¹ Igbīhi nɛ̄ ɛ̄cī ɛpa le gla ā, Udéfīdi mɛ́mla ācɛ ɔlɛ́ nū gā Usíkilāgi. Eko nɛ̄ Udéfīdi í yɔ̄ ɔlɛ́ ŋ́ mā, ācɛ kú Ámālɛ̄ki wā í le ɔfú kpó kwū ɛháajɛ kú Ujúda mɛ́mla Usíkilāgi. É kwú Usíkilāgi ú yɔlá tāajɛ dúúdú.

² É lɛ odúúdú ācɛnyā kú uwā kpó kwú yɔ̄ī ga ɔlɛ́ uwā. É ŋmó ɔ̄cɛ dúúmā ŋ́, amáŋ é le odúúdú uwā kpó kwú. Anɔ́ɔ é le uwá kpó yɔ̄ ī ga ɔlɛ́ uwā á.

³ Eko nɛ̄ Udéfīdi mɛ́mla ācɛ ɔlɛ́ nū gā ā, é le má ka é lɛ ɔlɛ́ uwá tɔ̄lá, é klla lɛ ācɛnyā kú uwā mɛ́mla ayí uwā kpó ŋmá ɔlɛ́.

⁴ Udéfīdi mɛ́mla ācɛ ɔlɛ́ nu gbɔɔ́ ō jikwū, é tá kéē mā ikwū ā jāā gbéeko nɛ̄ ɛ̄jɛ̄ le jɛ uwā.

⁵ É le anyā ɔlɛ́ Udéfīdi ɛpa ā, Ahínōwam mɛ́mla Abígɛ̄lu ā kpó kwú nyɔ̄ dúú.

⁶ Udéfīdi yɔ̄ ipú ákanya nɛ̄hi. Ohígbū ka ɔtū yɔ̄ í wú odúúdú ācɛ ɔlɛ́ nū nɛ̄hi ohígbū ayí uwā mɛ́mla anyā uwā nēé je kpó ā. É le tútū kéē tá ɛcɔ̄ klá Udéfīdi. Amáŋ, Óndú, Ɔwɔicō kú nū le ɔ́ ɔtū tú kwu ɔtū.

⁷ Anɔ́ɔ Udéfīdi da Abíyāta, ɔ̄cogwɛ́ɛya ā kahíníī, “Lɛ ɛ́fɔ̄du o bī le jé ɔtū kú Óndú ā, bī ge um.” Anɔ́ɔ Abíyāta le bī ge lɛ ɔ́ á.

⁸ Udéfīdi da Óndú ā ɔ̄kā ka anúɔ nū ācɛ nēe wā í je ɔlɛ́ anúɔ yɔlá tāajɛ ā nyɔ̄ kɛ̄ɛ? Ó klla dɔɔ̄kā ō jé ɔ́dāŋ ka anúɔ lɔfú kwú uwā glá kpɔ́ ɛ́ɛ́? Óndú ā tá ɔ̄ ohi kɔ́ɔ̄ nū uwā nyɔ̄, kɔ́ɔ géē kwú uwā klla í mīyɛ ācɛ ɔlɛ́ nū nēé kpó yɔ̄ī nyɔ̄ ɔlɛ́ uwā ā.

⁹ Anɔ́ɔ Udéfīdi mɛ́mla ācɛ úlā ce ofu igwó ā (600) gbɔɔ́ ō nyɔ̄. Eko nēé ga ɔkpá kú Ubésɔ ā, ācɛ ōhī kú ɔlɛ́ Udéfīdi má bá abɔ́ɔ.

¹⁰ Udéfīdi yɔ̄ í nyɔ̄ mla ācɛ úlā (400) o hile ā kpɔ́. Ɛ̄jɛ̄ klla le jɛ̄ ācɛ ofu igwó (200) o hile ā, nēé klla bēé ɔkpá ā gɔbū glá gɛ ŋ́.

¹¹ Anɔ́ɔ ācɛ nēe nyɔ̄ mla anú ā le ɔ̄cɛ Íjīpiti éyi má, anɔ́ɔ é lɛ ɔ́ kwú gé lɛ Udéfīdi. É le ɔdōlé kú īkpɔ̄dā mɛ́mla éŋkpɔ̄ kpó lɛ ɔ́.

¹² Eko nɛ̄ ó le lé, le éŋkpɔ̄ gwá ā, owu kú nū má kwu ɔhá. Ohígbū ka ó lé ɔdā dúúmā ŋ́ ɛ̄cī ɛtá.

¹³ Anɔ́ɔ Udéfīdi le ɔ̄kā da ɔ́ kahíníī, “Ɔ̄nyɛ wɛ ɔkpáni uwɔ ā? Iní nāa ŋmá ā?” Anɔ́ɔ ó tá ɔ̄ ohi ka anúɔ wɛ ɔ̄cɛ kú Íjīpiti. Anúɔ kē wɛ ɔ̄cocɛ̄hɔ̄ kú ɔ̄cɛ Ámālēki éyi. Ɔkpáni anúɔ ɔ́ɔ nyɛ̄ɛ̄ gwū anúɔ tá ícɛmɛtá ŋmá eko nēé kwú anúɔ ā, ohígbū ka anúɔ yɔ̄ ī doōcē.

¹⁴ Ó ka aá le ɔlɛ́ kú ācɛ Ukérēti ɛháajɛ kú ajɛ kú Ujúda, ipɔ́ɔma kú Ukálēbu ā wúla tāajɛ. Ó ka ka aá le Usíkilāgi tɔ̄lá.

¹⁵ Udéfīdi le ɔ̄kā da ɔ́ kahíníī, “A géē bī um ga ɛgiyí ācɛ ɔ́ɔmā ā?” Anɔ́ɔ ó tá ɔ̄ ohi kahíníī, “N géē bī uwɔ nyɔ̄, ɔ́dāŋ ka a bī iyē kú Ɔwɔicō lɛ okónu ce gā um ka, anúɔ í gáā ŋmó um, ɛ́ɛ́ nɛ̄ anúɔ gē je um kwúcē lɛ ɔkpáni um ŋ́.”

¹⁶ Anɔ́ɔ ó le Udéfīdi bī ga ɛgiyí uwā á. É wɛ ō pahīla klá ɛga dóódu, bá í lé, bá í gwá klla bā ī gwéeyē kú agbénú nēé wu ŋmá ɔgbɛ́fú ā. Agbénú kú ācɛ Ufilístiya mɛ́mla ācɛ Ujúda.

¹⁷ Ɔ̄cɔ̄ɔ̄cī Oŋmɔ́ɔ̄cī nū ā, Udéfīdi nuunu tá uwā jāā ga ɔ̄nɔɔ̄nɛ̄. Ayíka ayīpōklóbīya úlā nēe tū icō aínyakwūlūmī je pɛ́ kwu ā ōfōōfū wā nɛ̄ n, ɔ̄cɛ ɔhá kú uwā í klla kwu glá ɛ́ɛ́ gɛ ŋ́. Ó le uwá kpó ŋmó.

¹⁸ Ó klla mīyɛ ɔdā dóódu kú uwā nɛ̄ ācɛ Ámālēki kpó ā, kwu anyā nū ɛpa ā.

¹⁹ Ɔdā dóódu kú uwā í bī gɛ ŋ́. Udéfīdi mīyɛ odúúdú ayí, anyā mla iyó kú ācɛ ɔlɛ́ nū nɛ̄ ācɛ Ámālēki kpó ā.

²⁰ Ó klla mīyɛ odúúdú aálá mɛ́mla aɛ́na kú uwā. Ācɛ ɔlɛ́ nū ā lɛ uwá pīya tá ɔbū, anɔ́ɔ é ka aɔ́dāajɛ ā wɛ ákú Udéfīdi mɛ́ɛnɛ.

²¹ Anɔ́ɔ Udéfīdi kwúcē wā í tá ācɛ ofu igwó (200) nɛ̄ ɛ̄jɛ̄ í cɛ̄ lɛ uwá bēé ɔkpá gɔbū ŋ́ mā. É le pɛ́ wā í jīla Udéfīdi ɔwɛ, anɔ́ɔ Udéfīdi le tá ɛgiyí uwā, le okónu hɛ́ tū uwá lɔɔlɔhi á.

²² Amáŋ ācɛ ɔdāhá ohi nēe nyɔ̄ mla Udéfīdi ā, ka abɔ̄ é nyɔ̄ mla aá ŋ́ mā, aá í gáā je iyó dúúmā lɛ uwá ŋ́. Anɔ́ɔ é da uwá kéē lɛ anyā uwā mɛ́mla ayí uwā kpó kéē nyɔ̄.

²³ Amáŋ Udéfīdi da uwá kéē híī hágágá kú ɔdā nɛ̄ Óndú ā ɔ́ɔ kpó lɛ aá ā ŋ́. Ó klla ka Óndú ā lɛ aá gbō ɛbɔ́, ɔ́ɔ klla cɛ̄ lɛ aá le ācɛ nēe wā í je ɔlɛ́ aá wu ā yálé.

²⁴ Udéfīdi klla da uwá ka ɔ̄cɛ dúúmā ɔ́ɔ́ cɛ̄ mla ɛlā nɛ́ɛ ka ā ŋ́ ka odúúdú aá géē kɔ̄ iyo ā jōonjīlɛ̄. Kwu ācɛ nēé bá ɔlɛ́ ā mɛ́mla ācɛ nēé ga ɔgbɛ́fú ā géē kɔ̄ odúúdú iyō ā jōonjīlɛ̄.

²⁵ Udéfīdi kwú íne ā ú kwaajɛ. É kē yɔ̄ ī lɛ íne ā tū ajɛ kú Ísrɛ̄lu, jāā kwu eko nēé tɔ́kpá nyā ā.

²⁶ Eko nɛ̄ Udéfīdi gā Usíkilāgi ā, ó lɛ ōhī kú iyó nēe bī ŋmá ɔgbɛ́fú kpó tɛ̄hɔ̄ fu aóklóbīya nū, aɔ́cɛ́ kú Ujúda ā, yɔ̄ ī da uwá ka, ɛhi ā wɛ ákú uwā ŋmá ipú iyó kú aólɛlā kú Óndú ā nɛ̄ aá kpó ŋmá ɔgbɛ́fú ā.

²⁷ Ó le tɛ̄hɔ̄ fu ācɛ Ubɛ́tɛlu, Uráma, ɛháajɛ kú Ujúda ā mɛ́mla ācɛ kú aígelī nɛ̄ŋcɛ́ kú Ujátɛ̄,

²⁸ Árōwɛ, Usífimōtu, Ɛ́ssitemōwa,

²⁹ Urákalu, mɛ́mla ipɔ́ɔma kú Ujérāmiilu mɛ́mla ācɛ kú Ukéni,

³⁰ Mɛ́mla ācɛ kú aígelī nɛ̄ŋcɛ́ kú Uhóma, Ubórāssan, Átāki,

³¹ Mɛ́mla Uhɛ́burɔn. Ó le tɛ̄hɔ̄ ga ɛga dóódu nɛ̄ anú mɛ́mla ācɛ ɔlɛ́ nū tɛtɛ yɛ ā.