1 USÁMUWƐ̄LU 29 - Ubáyíbu kú Idɔma

Ācɛ kú Ufilístiya tá Udéfīdi

¹ Odúúdú aícɔ́ɔja kú Ufilístiya le jila Áfēki. Aícɔ́ɔja kú Ísrɛ̄lu ā kē le jīla bá ɔpɛ́ kú Ujesiríl pī njɔlɔ kú éŋkpɔ̄ ā.

² Aɔ́cɛ́ ɛhɔ̄ kú Ufilístiya ā le bɛ̄cɛ mɛ́mla aígwu ofu ɛhɔ̄ mɛ́mla ulá ɛpa ce ofu igwó (1,000) kú uwā. Udéfīdi mɛ́mla ācɛ ɔlɛ́ nū hɔ́ɔgba yɔ̄ ī yɛce Ákisi, ɔcɛ́ ā igbīhi.

³ Otrɛ̄yí kú aícɔ́ɔja kú Ufilístiya le uwá má. Anɔ́ɔ ó le ɔ̄kā da kahíníī, “Ɔdí nɛ̄ ācɛ Uhíburu nēe bá nyā bā í yá amānyā ā?” Anɔ́ɔ Ákisi tá ɔ̄ ohi kahíníī, “Ɔ̄cɛ ā lé ka Udéfīdi, éyi kú aótrɛ̄yí kú aícɔ́ɔja kú Usɔ́lu. Ó lā mla um gbojī ɛɛ́, ó yá ɔdōbɔ̄bí dúúmā ɛgiyí alɔ ŋmífī nɛ̄ ó wā í lā mla alɔ ā jéjēe ɛ́ɛ́ ŋ́.”

⁴ Anɔ́ɔ otrɛ̄yí kú aícɔ́ɔja ā kwú cɔ̄nū mla Ákisi klla da ɔ́ kóō lɛ ɔ́ kwúcē ga igelī nɛ̄ŋcɛ́ nɔ́ɔ je lɛ ɔ́ ā. Ó klla da ɔ́ ka ɔ́ɔ̄ cɛ̄ lɛ ɔ́ ga ɔgbɛ́fú mla aá ŋ́. Ohígbū ka ɔ́ɔ lɔfú je eyī pīya kwu aá ɔgbɛ́fú ā glá. Ɔwɛ nyā klla yɔ̄ lɛ ɔ́ nɛ̄ ɛlā nū klla í he ɔkpáni nū ɔtū igbɔhá fíyɛ́ ō kpó aá lɛ ɔkpáni nū ɛ́ɛ́ mā ā?

⁵ Ó ka ofíyɛ́ dúú ā, ɔ̄cɛ ā klla wɛ Udéfīdi, nɛ̄ ācɛnyā ɛ́ɛ gē gwéeyē ohígbū nū klla í gwííjē ka Usɔ́lu ŋmó ācɛ úluulā, amáŋ Udéfīdi ŋmó ācɛ úlúúlā ɛga igwó ā.

⁶ Ákisi lɛ Udéfīdi hīgwú, anɔ́ɔ ó da ɔ́ kahíníī, “N lɔfú gwá ɛka ŋmá lɛ iyē kú Ɔwɔicō kú Ísrɛ̄lu nōo yēeyī ā ka, a húmáyī lɛyítáajɛ gā um. Ó géē he um ɔtū ka aá le tá ɔgbɛ́fú ā gāá lɛ ɛfú nyā kpó. Ń má ɔdōbɔ̄bí dúúmā ɛgiyí uwɔ, ŋmífī nāa wā í lā mla um ā ɛ́ɛ́ ŋ́. Amáŋ aɔ́cɛ́ ɔhá ā í cɛ̄ kú ā nyɔ̄ ɔgbɛ́fú ā mla alɔ ŋ́.

⁷ Ó lɛ a, kwúcē ga ɔlɛ́ ɛbɔ́, á kē yá ɔdā dúúmā nōo géē wū uwá ɔtū ŋ́.”

⁸ Udéfīdi le ohi tá ɔ̄ dɔɔ̄kā kahíníī, “Ɔdí nɛ̄ n yá bɔ̄bí ā ɔkpani? Ɛ́gɛ́nɛ̄ a ka anúɔ í má ɔdōbɔ̄bí dúúmā ɛgiyí um ŋ́, ŋmífī nɛ̄ n gbɔɔ́ ō cɛ̄ uwɔ ɛhɔ̄ jāā í kwu ícɛ ā. Ɔdíyá nɛ̄ ń gáā nyɔ̄ mla awɔ, ɔkpáni um mɛ́mla ɔcɛ́ kú um gaá kpɛ́fú tá aólɛlā kú uwɔ ŋ́ mā a?”

⁹ Ákisi tá ɔ ohi kahíníī, “Ɛyí nāa le táajɛ gā um ā lɛbɛ̄ɛka ákú alelékwū-ōtɛ̄hɔ̄ kú Ɔwɔicō ā. Amáŋ aɔ́cɛ́ ɔhá ohile ā le ka ka á gáā ga ɔgbɛ́fú ā mla alɔ ŋ́.

¹⁰ Ó lɛ ā, Udéfīdi, óócí, odúúdú aá nēe nyɛ̄ɛ̄ ŋmá ɛgiyí Usɔ́lu wā ɛgiyí um mla awɔ abɔ̄yī uwɔ dúú, géē cāŋjɛ ofúlɔ̄cī kú aá nyɛ̄ɛ̄.”

¹¹ Anɔ́ɔ Udéfīdi mla ācɛ ɔlɛ́ nū ā cāŋjɛ ɔ̄cɔ̄ɔ̄cī oŋmɔ́ɔ̄cī nū, eko nɛ̄ eyī le nyā ā, é kwúcē wā Ufilístīya, anɔ́ɔ ācɛ Ufilístīya le pɛ́ ga Ujɛ́siríilu á.