1 USÁMUWƐ̄LU 28 - Ubáyíbu kú Idɔma

Usɔ́lu mɛ́mla inambo kú Usámūwɛ̄lu

¹ Igbīhāajɛ ā, ācɛ kú Ufilístiya le jīla kéē gaá kpɛ́fú tá ācɛ kú Ísrɛ̄lu. Anɔ́ɔ Ákisi da Udéfīdi ka anú mɛ́mla ācɛ ɔlɛ́ nū géē nyɔ̄ í kpɛ́fú mla aá ābɔ̄ kú aá.

² Anɔ́ɔ Udéfīdi tá ɔ̄ ohi ka anúɔ cɛ̄ ohígbū ka anúɔ wɛ ɔ̄cocɛ̄hɔ̄ kú ɔlɛ́ nū nɛɛ, ɔ́ɔ kē í bī īkpēyī abɔ̄yī nū má ɔdā nɛ̄ anúɔ lɔfú yá glá ā. Anɔ́ɔ Ákisi da ɔ́ ka ɔ́ɔ lɔhi, anúɔ géē je ɔ́ yá ɔ̄cɛ nōo géē gbō anúɔ abɔ̄yī anúɔ ɛyí.

Usɔ́lu ga ɛgiyí ɔ̄cogwɛ́bā

³ Eko nyā Usámūwɛ̄lu gekwú ɛɛ́, odúúdú ācɛ Ísrɛ̄lu lɛ ekwu kú nū yɔ̄ kwɛyí ɛɛ́. É klla kwú ɔ̄ ú nyi, ɔlɛ́ nū Uráma ɛɛ́. Usɔ́lu lɛ odúúdú ācogwɛ́bā mɛ́mla aɔ́hɛ ā kpó nū ŋmá ajɛ Ísrɛ̄lu dúúdú.

⁴ Ācɛ kú Ufilístiya le jīla, lɛ aáklɔ̄kpɛ́ kú ɛfú kú uwā kwu pī igelī nɛ̄ŋcɛ́ kú Ussúnɛm, Usɔ́lu mɛ́mla aícɔ́ɔja kú nū le aáklɔ̄kpɛ́ kú ɛfú kú uwá kwu ɛyí ɛfu kú Ugílibōwa.

⁵ Eko nɛ̄ Usɔ́lu lɛ aícɔ́ɔja kú ācɛ Ufilístiya má ā, ufi le ɔ́ kwú nɛ̄hi.

⁶ Anɔ́ɔ ó lɛ ɔ̄kā da Óndú ā, amáŋ, Óndú ā í tá ɔ̄ ohi ɔwɛ kú ɔ̄na, ámāŋ ákú ɔdā nēé ī bī lɛ jé ɔtū kú nū ā, ámāŋ o ka bū okónu kú ɔ̄comɛ́ɛbɛ ŋ́.

⁷ Anɔ́ɔ Usɔ́lu da aígabɔ̄ kú nū kéē lɛ ɔnyā nōo ī gwɛ́ɛbā éyi tíne lɛ anúɔ. Cɛ́ɛ́ ká anúɔ da ɔ́ ɔ̄kā. Anɔ́ɔ é da ɔ́ ka ɔnyā éyi yɔ̄ ajɛ kú Ɛ́ndɔ.

⁸ Usɔ́lu, ɔcɛ́ kwú iyī nū ú pīya bɛ̄ɛka ɔ̄cɔlamu ā, kwú īlī ɔlamu ú kpó wiyē. Anɔ́ɔ otú éyi, ó le yɛ mla aígabɔ̄ ɛpa kú ɔlɛ́ nū, gaá má ɔnyā ā. Anɔ́ɔ ó da ɔnyā a ká ɔ̄ lɛ ɔ̄kā da alekwu kú ɔ̄cɛ éyi nɛ̄ anúɔ géē hi iyē lɛ ɔ́ ā.

⁹ Ɔnyā ā da ɔ́ ka ɔ́ jé ɔdā nɛ̄ Usɔ́lu, ɔcɛ́ kú Ísrɛ̄lu yá ā ŋ́ nɛɛ, ɛ́gɛ́nɛ̄ ɔ́ɔ je ācogwɛ́bá mɛ́mla aɔ́hɛ kpó nū ŋmá ajɛ kú Ísrɛ̄lu ā. Anɔ́ɔ ó da ɔ́ ka ɔdíyá nɔ́ɔ yɔ̄ ī jē ukpa lɛ anúɔ, cɛ́ɛ́ kéē lɛ anúɔ ŋmó ā?

¹⁰ Anɔ́ɔ Usɔ́lu le ɛka gbo lɛ ɔ́ ka O ŋmá lɛ iyē kú Ɔwɔicō nōo yēeyī ā, ɔ̄cɛ dúúmā í gáā yá ɔ́ italā ohígbū ɔdā nɔ́ɔ gáā yá lɛ anúɔ nyā ŋ́.

¹¹ Anɔ́ɔ ɔnyā ā da ɔ́ ka ɔ̄nyɛ nɛ̄ anúɔ géē hīgwú lɛ ɔ́ ā? Anɔ́ɔ ó tá ɔ̄ ohi ka Usámūwɛ̄lu.

¹² Eko nɛ̄ ɔnyā ā le Usámūwɛ̄lu má ā, ó lɛ ɛgba dɛ̄ kahíníī, “A wɛ ɔcɛ́ Usɔ́lu, ɔdíyá nāa pllá um ā? A wɛ ɔcɛ́ Usɔ́lu.”

¹³ Anɔ́ɔ Usɔ́lu da ɔ́ ká ɔ̄ híī yúufi ŋ́, ɔdí nɔ́ɔ má ā? Anɔ́ɔ ɔnyā ā ka anúɔ má alelékwū yɔ̄ í wɛ̄ɛcɛ ŋmá ajɛ.

¹⁴ Usɔ́lu da ɔ́ ɔ̄kā ka ɔdí nɔ́ɔ gbla ā? Usɔ́lu klla le ɔ̄kā da ɔnyā kpɔ́, anɔ́ɔ ɔnyā ā ka ɔnyākwɔ́cɛ éyi yɔ̄ ī wɛ̄ɛcɛ á. Ó ka ɔ̄cɛ ɔ́ɔmā le awulú wiyē. Anɔ́ɔ Usɔ́lu le jé ka ɔ́ɔ wɛ Usámūwɛ̄lu nɛ̄, anɔ́ɔ ó tukpɛɛ́ le okónu hɛ́ tū ɔ̄.

Usámūwɛ̄lu bɛ̄cɛ ŋmá únóji

¹⁵ Anɔ́ɔ Usámūwɛ̄lu da Usɔ́lu kahíníī, “Ɔdíyá nāa wā í junwalu gā um ā? Ɔdíyá nāa wā í yá um ká n̄ cīgbīhi ā?” Usɔ́lu tóohi kahíníī, “N yɔ̄ ipú unwalu nɛ̄hi. Ācɛ kú Ufilístiya gáā wā í kpɛ́fú tá um, Ɔwɔicō kē le igbīhi cē kwu um. Ó klla tá um ohi ɔwɛ dúúmā ɔhá gɛ ŋ́. Kwu ɔwɛ kú ɔ̄na, amáŋ ákú ācomɛ́ɛbɛ. Anú yá ɛɛ́ nɛ̄ n wā í hī uwɔ igwú kú ā da um ɔdā nɛ̄ n géē yá ā á.”

¹⁶ Usámūwɛ̄lu da ɔ́ kahíníī, “Ɔdíyá nāa wā í hī um igwú eko nɛ̄ Óndú ā le igbīhi cē kwu uwɔ, klla kwú pīya olɛlā kú uwɔ ɛɛ́ mā a?

¹⁷ Ɔdā nɛ̄ Óndú ā ka gā uwɔ bū okónu kú um ā, nɛ̄ ó yá uwɔ abɔ́ɔ á. Ó kwú ajɔ̄ɔ̄cɛ́ ā ú ŋmá ɛgiyí uwɔ klla kwú ɔ̄ ú lɛ Udéfīdi ɛɛ́.

¹⁸ A tá kóō lɛyítáajɛ lɛ Óndú ā eko nɛ̄ á je ācɛ kú Ámālēki mɛ́mla ɔdā dóódu nēé lɛ ā, yíífi dúúdú ŋ́ mā. Ɔdā nɛ̄ ó yá ɛ́ɛ́ nɛ̄ Óndú ā gē yá uwɔ lɛ á yɔ̄ abɔ́ɔ á.

¹⁹ Ó géē je awɔ mɛ́mla Ísrɛ̄lu kpó lɛ ācɛ Ufilístiya. Óócí, awɔ mɛ́mla ayínɔ̄nyīlɔ kú uwɔ géē wā í lā mla um. Óndú ā í kpó aícɔ́ɔja kú Ísrɛ̄lu lɛ ācɛ Ufilístiya óócí.”

²⁰ Anɔ́ɔ Usɔ́lu má gwōnū, má gwutá abɔ́ɔ kɔ́ngɔ́ɔ, ipú ufi nɛ̄hi, ohígbū ɔdā nɛ̄ Usámūwɛ̄lu da ɔ́ ā. Ɛ̄jɛ̄ le jɛ̄ ɔ̄, ohígbū ka ó lé ɔdōlé ŋ́ jāā gbɔ́ɔ̄cī.

²¹ Ɔnyā ā le tá ɛgiyí nū, anɔ́ɔ ó má ka ɔɔ́ yɔ̄ í yúufi nɛ̄hi. Anɔ́ɔ ó da ɔ́ kahíníī, “Ɔkpani, n le ɛyí cikwū le ɔdā nāa da um ka ami ɔ́ɔ yá ā yá ɛɛ́.

²² Kócōō, lɛ ɔdā nɛ̄ n da uwɔ nyā yá. Ká n̄ lɛ ɔdōlé yá gā uwɔ. A géē lé ɔdōlé cɛ́ɛ́ kú ā le lɔfú iyē nāa géē yāwu ga ɔlɛ́ glá.”

²³ Amáŋ, Usɔ́lu tá ka anúɔ í gáā lé ɔdā dúúmā ŋ́. Amáŋ aígabɔ̄ kú ɔlɛ́ nū ɛpa a le ɔfú tū ɔ̄ iyē kú ō lɛ ɔdōlé lé. Anɔ́ɔ ó cɛ̄, cāŋjɛ ŋmá ajɛ, má cīce agōdō.

²⁴ Ɔnyā ā le omlede ŋmó fíyaa, anɔ́ɔ ó klla lɛ umu fú lɛ igbō nɛ̄ ó gē nū ŋ́ mā yá fíyaa.

²⁵ Ó kwu ɔdōlé ā ú kpó ce iyɔ̄bū Usɔ́lu mɛ́mla aígabɔ̄ ɛpa kú ɔlɛ́ nū ā, anɔ́ɔ é le lé, anɔ́ɔ é nyɛ̄ɛ̄ otú ɔ́ɔmā á.