1 USÁMUWƐ̄LU 27 - Ubáyíbu kú Idɔma

Udéfīdi yɔ̄ ipú ācɛ kú Ufilístiya

¹ Udéfīdi gbafíyóó ɛ̄cī éyi kahíníī, “Ɛ̄cī éyi, Usɔ́lu géē je um ŋmó nɛ̄ u. N géē le kwu ŋmá ajɛ kú Ísrɛ̄lu ga ajɛ kú ācɛ Ufilístiya, cɛ́ɛ́ eko nɛ̄ ó le pó ka ami ɔ́ɔ yɔ ajɛ kú ācɛ kú Ufilístiya, cɛ́ɛ́ ó géē mlɛ́nyɔ́ ō tíne um.”

² Anɔ́ɔ Udéfīdi mɛ́mla ācɛ ulá ce ofu igwó kú ɔlɛ́ nū ā le tá ɛgiyí Ákisi, ɔyí kú Umáyɔ̄ku, ɔcɛ́ kú Ugáti.

³ Anɔ́ɔ Udéfīdi mɛ́mla ācɛ ɔlɛ́ nū mɛ́mla ācocɛ̄hɔ̄ kú uwā gaá má lā Ugáti á. Anyā ɔlɛ́ Udéfīdi ɛpa ā bá mla anú. Ahínōwam nōo ŋmá Ujesiríili ā, mɛ́mla Abígɛ̄lu ɔnyā okwūmā kú Unábalu nōo ŋmá Ukámɛ̄lu ā.

⁴ Eko nɛ̄ Usɔ́lu le pó ka Udéfīdi ɔ́ɔ le kwu ga Ugáti ā, ó mā mlɛ́nyɔ́ ō tíne nū.

⁵ Anɔ́ɔ Udéfīdi da Ákisi ka ɔ́dāŋ ka ɔ́ɔ wɛ oklóbīya anúɔ nɛɛ, ɔ́ɔ kwú igēlī nɛ̄ŋcɛ́ éyi ú lɛ anúɔ kú anúɔ lā anú. Ó ka ó lɔhi ka anúɔ mɛ́mla anú lā tɔ̄há ipú igelī nɛ̄hi kú Ágábáidú ŋ́, ɔkpani.

⁶ Anɔ́ɔ Ákisi, ɔcɛ́ ā kwú Usíkilāgi ú lɛ ɔ́ á. Ohígbū ɛ̄nyā ā Usíkilāgi kwú pīya ɔlɛ́ kú aɔ́cɛ́ kú Ujúda kwu eko nēé tɔ́kpá nyā ā.

⁷ Udéfīdi lā ajɛ kú Ufilístiya abɔ́ɔ, ɔyā igwɛ́ɛhīlī.

⁸ Eko ɔ́ɔmā, Udéfīdi kpɛ́fú tá ācɛ kú Ugɛ́sɔ, Ugísi, mɛ́mla Ámālēki nēe tɛtɛ lā abɔ́ɔ gbojīgbojī ā. Ó mīyɛ uwá ajɛ gā Ussɔ́ɔ jāā gaá kwu Íjīpiti.

⁹ Ó le odúúdú ācɛ kú uwā, kwu ācɛnyā mɛ́mla ācɛnyīlɔ kpó ŋmó. Ó klla le aálá, aɛ́na, aíjakī, aínyankwūlūmī mɛ́mla īlī kú uwā kpó.

¹⁰ Ɔ́dāŋ nɛ̄ Ákissi le ɔ̄kā da ɔ́ ka, iní nɔ́ɔ nyɔ̄ í kpó ɛ̄nyā ŋmá mɛ́ɛ̄ ā, ó gē tá ɔ̄ ohi ka, ɛháajɛ kú Ujúda amáŋ, ipɔ́ɔma kú Ujérāmiili, ámāŋ, ɛga nɛ̄ ācɛ Ukéni lā ā.

¹¹ Udéfīdi gē je odúúdú uwá kpó ŋmó, nɛ̄ ɔ̄cɛ dúúmā í gáā hile nōo géē nyɔ̄ í kpɛ́pɔ̄ Ugáti kú ɔdā nɛ̄ anú mɛ́mla ācɛ ɔlɛ́ nū yá ā ŋ́. Ɔdā nɛ̄ Udéfīdi yá odúúdú eko nɛ̄ ó yɔ̄ ajɛ kú ācɛ Ufilístiya ā yɔ̄ á.

¹² Amáŋ, Ákisi lɔtūce Udéfīdi nɛ̄hi klla í ka kahíníī, “Ācɛ kú ɔlɛ́ nū, Ísrɛ̄lu ɛ́ɛ gē tū ɔ̄ eyījii nɛ̄hi. Ɛ̄nyā gē yá kóō yúklɔ́ gā um kú ō klla gbā um ɛ̄gbā eko nɛ̄ ó géē yēeyī gaá kwu ā.”