1 USÁMUWƐ̄LU 2 - Ubáyíbu kú Idɔma

Ɔkɔ nɛ̄ Uhaná gbā ā

¹ Uhána gbɔ̄ɔkɔ kahíníī, “Óndú ā lɛ ɔtū kú um mu mla éeyē. N bī iyē kú Óndú ā yɔ̄ ī gwéeyē, ɔtū he um nɛ̄hi, ohígbū ɔdā nɛ̄ Óndú ā yá ga um nyá ā. N gē yɛhɛ tū aólɛlā kú um. Ɔtū he um nɛ̄hi ohígbū ka Ɔwɔicō, le abɔ̄ tá um.

² Ɔ̄cɛ dúúmā í yɔ̄ nōo tīihɔ bɛ̄ɛka Óndú ā ɛ́ɛ́ gɛ ŋ́. Ɔ̄cɛ dúúmā í yɔ̄ bɛ̄ɛka awɔ ā ɛ́ɛ́ gɛ ŋ́, Óndú. Ápátɛ́cɔ̄, ɔ̄cɛ ɔhá dúúmā í yɔ̄ nōo ī leyīkwu ɔ̄cɛ bɛ̄ɛka Ɔwɔicō kú alɔ ā ŋ́.

³ N lɔfú da ācɛ o yɔ́bɔ́ɔ̄cɛ klla gē gwō ā, kéē lɛ okónu klá cíí, ohígbū ka ɔdā dúúmā í tayínū ŋmá ɛgiyí Óndú ā glá ŋ́. Ɔdā nɛ̄ ɔ̄cɛ yá ā nɛ̄ ó gē bī lɛ kɛpɔ̄ tū ɔ̄cɛ á.

⁴ É le ɔtā kú ɔ̄cɛ o lɔfú nɛ̄hi ā cē ɛɛ́. Amáŋ ɔ̄cɛ nōo tɛtɛ kwáahi ā, kwú pīya o lɔfú nɛ̄hi ɛɛ́.

⁵ Ācɛ nēe tɛtɛ gē lé ɔdōlé gē nū ipú ā, klla gē yúklɔ́ ɔgwū ɛ́ɛ́ nēé gē lé ɔdōlé mɛ́ɛ̄ á. Amáŋ ɔ̄cɛ nɛ̄ ɛmiyɛ tɛtɛ gē ŋmó ɔ̄ ā, ɛmiyɛ í ŋmó ɔ̄ ɛ́ɛ́ gɛ ŋ́. Ɔnyā nōo wɛ ɔdɔma ā, le ayí ahāapa ma ɛɛ́. Amáŋ ɛ́nɛ́ kú ayí alɛwa tɛtɛ ā, í lɛ odúúmā ɛ́ɛ́ gɛ ŋ́.

⁶ Óndú ā gē ŋmó klla í je oyēeyī á, anú gē bī ɔ̄cɛ ga ɔlékwū klla í je ɔ́ héyī ŋmá ɔlékwū á.

⁷ Ó lɛ ācɛ ōhī tū ɔdu, ó kē le ācɛ ɔhá tɛ́ɛhá. Ó lɛ ācɛ ōhī tū gicō, ó kē le ācɛ ɔhá tū wāajɛ.

⁸ Ó kwú aógbɛhá ú cāŋjɛ ŋmá úmlá. Ó klla í je ācɛ nɛ̄ ɛgbá ce uwá ā cāŋjɛ ŋmá ɔtūnōbí mɛ́mla ōwē kú uwā. Ó kwu uwā u ce mɛ́mla aótrɛ̄yí ɛga kú ojīlīmā. Óndú le ikpó kú ɛcɛ nyā táajɛ á, ɛyí nū nɛ̄ ó gwó ɛcɛ ce á.

⁹ Ó gē gbō oyēeyī kú ācɛ nēe gē yá okpaakpa ā, amáŋ ācobɔ̄bíipú ā géē bí tāajɛ ipú obū. Ohígbū ka, ɔ̄cɛ í bī ɔfú kú abɔ̄yī nū yá unu dúúmā lé glá ŋ́.

¹⁰ Aólɛlā kú Óndú ā géē je kpó yíífi. Ó géē gbo akpáabana ŋmá ɔkpáncō klá uwá. Óndú ā géē kɛpɔ̄ tū odúúdú ɛcɛ. Ó klla géē je ɔfú lɛ ɔcɛ́ kú nū. Ó géē cɛ̄ lɛ ɔcɛ́ nɛ̄ ó fu ā kóō le yálé.”

¹¹ Anɔ́ɔ Ɛlkána kwú cīgbīhi ga ɔlɛ́ nū Uráma á. Amáŋ ɔyí nu Usámūwɛ̄lu ā má klá Ussílo abɔ́ɔ pī Ɛ́lāyi ɔ̄cogwɛ́ɛya ā, cɛ́ɛ́ kóō cɛ̄ Óndú ā ɛhɔ̄ ɛháajɛ ɔ̄cogwɛ́ɛya ā.

Ayí kú Ɛ́lāyi

¹² Ayí kú Ɛ́lāyi wɛ ayí ɔdāhá, nēe tū ile dúúmā ŋ́. É klla lɛ ɛlá wu Óndú ā ŋ́.

¹³ É kwu eyī í gwū íne nōo lɛyíkwu ɔdā nɛ̄ ɔ̄cogwɛ́ɛya cɛgbá ŋmá ɛgiyí ācɛ nēe gē wā í gwɛ́ɛya ā bónū. Ikɔkɔ ɔ́ɔmā, eko dúúmā nɛ̄ ɔ̄cɛ dúúmā wā yɔ̄ ī gwɛ́ɛya lɛ Óndú ā nɛ, eko nɛ̄ ɛbɛ́ ā ce ɔlá yɔ̄ gē wú ā, ayíkpó kú ɔ̄cogwɛ́ɛya ā gē bī oje otɛ́ɛbɛ́ ŋmá ɔlá nōo kwāabɔ̄ ɛtá wā,

¹⁴ cɛ́ɛ́ é gē le ɔ́ wu ipú ɛ̄hī ā, ɔdā dóódu nōo géē kwu oje otɛ́ɛbɛ ŋmá ipú ɛ̄hī nōo ce ɔlá, kwú pīya ukpɛ̄ kú ɔ̄cogwɛ́ɛya ā. Ɛ́gɛ́nyā nēé gē yá odúúdú ācɛ kú Ísrɛ̄lu nēé gē wā í gwɛ́ɛya Ussílo á.

¹⁵ Ofíyɛ́ dúú ā, ɛ́ɛ́ kú ɔ̄cɛ nōo gē wɛ́ɛbɛ́ ā kóō wá ijē ŋmá anú gaá yɔlá dúúdú lɛ Óndú ā, ayí kú Ɛ́lāyi gē wā í háyi ce ɔ̄cɛ nōo wā gaá gwɛ́ɛya ā ɛyí, gē da ɔ́ ká ɔ̄ lɛ ɛbɛ́ je lɛ ɔ̄cogwɛ́ɛya ā ká ɔ̄ pá lé, ohígbū ó ka anúɔ ɔ́ gáā lé ɛbɛ́ nōo le jé ɔlá ŋ́, amáŋ ɛbɛ́ ɛ̄mɛ̄ɛ̄mɛ̄ ɔ́ɔ he anúɔ ɔtū á.

¹⁶ Ɔ́dāŋ́ nɛ̄ ɔ̄cɛ ā da ɔ́ ká ɔ̄ lɛ ɔtū lé ká anúɔ lɛ ijē kú nū pá, ɛ́ɛ́ ká ɔ̄ je ɛ́gɛ́ dúú nōo he ɔ́ ɔtū nɛɛ, ɔ̄cocɛ̄hɔ̄ kú ɔ̄cogwɛ́ɛya ā gē da ɔ́ ka, ɔ́ɔ géē je lɛ anúɔ ɔkwɔɔkwu ɔ́ɔmā, ɔ́dāŋ ka ɔ́ɔ je lɛ anúɔ ŋ́, anúɔ géē je abɔ̄fú.

¹⁷ Ínoōbīya kú ayí kú Ɛ́lāyi ā kwú nwuné ɛgiyí Óndú ā ɛɛ́. É le ojīlīmā ce ɛya nēé gē gwó lɛ Óndú ā ŋ́.

Usámūwɛ̄lu yɔ̄ Ussílo

¹⁸ Eko nyā Usámūwɛ̄lu yɔ̄ Ussílo yɔ̄ gē cɛ̄ Óndú ā ɛhɔ̄. Ó gē le īlī ōgbō-ɛ́nyɔ́ kú ɔ̄cogwɛ́ɛya ā gbō ɛ́nyɔ́.

¹⁹ Iháyí dóódu nɛ̄ ɛ́nɛ́ nū gē wā í gwɛ́ɛya mla ádā nū nɛɛ, ɛ́nɛ́ nū gē gɔ́ awulú nɛ̄ŋcɛ́ gé lɛ ɔ́.

²⁰ Cɛ́ɛ́ Ɛ́lāyi gē hɛ́ ɔhā ce Ɛlkána mɛ́mla ɔnyā nū gē kahíníī, “Óndú ā kóō je ayí ɔhá lɛ aá bū ipú kú ɔnyā nyā, nɛ̄ ɔyí ɔ́ɔmā géē kwɛyí ɔyí nɛ̄ ó je lɛ Óndú nyā ā.” Cɛ́ɛ́, é gē cīgbīhi ga ɔlɛ́ uwā.

²¹ Óndú ā lɛ ɔhā hɛ́ ce Uhána, nɛ̄ ó klla le ayí nɔ̄nyīlɔ ɛtá mɛ́mla ayí nɔ̄nyā ɛpa kpó ma. Usámūwɛ̄lu yɔ̄ í jɛ̄ gɔbū ipú úklɔ́ kú Óndú ā.

Ɛ́lāyi mɛ́mla Ayí nū

²² Ɛ́lāyi le hīla nɛ̄hi. Ó yɔ̄ í pó ɔ̄kā kú ɔdōōbɔ̄bí dóódu nɛ̄ ayí nū bá gē yá ācɛ kú Ísrɛ̄lu, nēe gē wā ī gwɛ́ɛya ā. Ó klla ī pó kpɔ́ ka, ayí ā ɛ́ɛ gbɔɔ́ ō cikpó anyā nēe gē yúklɔ́ ɛga nɛ̄ áklɔ̄pīihɔ kú Óndú yɔ̄ ā.

²³ Anɔ́ɔ ó da ayí nū kahíníī, “Ɔdíyá nɛ̄ aá gē yá aɔ́dā nēe bá nyā a? Ācɛ dóódu gē da um ɔdōbɔ̄bí nɛ̄ aá gē yá ā.

²⁴ Aá habɔ̄ ɔ̄ tá ayí um. Ɛlā obɔ̄bí nɛ̄ ācɛ kú Óndú ā gē ka lɛyíkwu aá yɔ̄ á.

²⁵ Ɔ́dāŋ́ ka, ɔ̄cɛ le ɔ́bíipú bī tá ɔ̄cɛ ɔ́mpa nū, Ɔwɔicō gē cɛ̄pɔ̄ nū klla í je yá ɔ̄ ɛhi. Amáŋ, ɔnyɛ̄ géē cɛ̄pɔ̄ ɔ̄cɛ nōo gē bɔ́bíipú tū Óndú ā?” Amáŋ é jāhɔ̄ lɛ ɛlá nɛ̄ ádā uwā da uwá ā ŋ́, abɔ̄ Óndú ā le tútū kóō kpó uwā ŋmó ā.

²⁶ Usámūwɛ̄lu, ɔyí nɛ̄ŋcɛ́ ā, yɔ̄ í jɛ̄ téeyī olɔhi kú Óndú ā mla ákú alɛɛcɛ.

Ɛbɛ nēé má lɛyíkwu ipɔ́ɔnū kú ɔlɛ́ Ɛ́lāyi

²⁷ Ɔ̄comɛ́ɛbɛ éyi ŋmá ɛgiyí Óndú ā wā ɛgiyí Ɛ́lāyi mla olɛhɔ̄ nōo kahíníī, “Eko nɛ̄ aádáádā aá Árɔ̄ni mɛ́mla ɔ̄cocɛ̄hɔ̄ kú nū wɛ ɔfiyɛ kú Uféro ā, n lɛ īyī um mafú lɛ Árɔ̄ni.

²⁸ O ŋmá ipú odúúdú ipɔ́ɔma kú Ísrɛ̄lu ā, n le ipɔ́ɔnū kú ɔlɛ́ nū mɛ́mla ipɔ́ɔma kú nū fu kéē wɛ ācogwɛ́ɛya kú um, cɛ́ɛ́ kéē yúklɔ́ ɛyí ede, kéē yi ɔtulalī ɔlá, cɛ́ɛ́ kéē lɛ úwé kú ɔ̄cogwɛ́ɛya wu iyē, cɛ́ɛ́ kéē da um ɔ̄kā. N klla le ɛga je lɛ uwá kéē klla lé ŋmá ɛya nēé gwó ɛyí ede ā.

²⁹ Ɔdíyá nɛ̄ aá kē kwú eyī í kwu ɛya mɛ́mla ɛhi nɛ̄ n cɛgbá ŋmá abɔ̄ ācɛ ɔlɛ́ um ā? Ɛ́lāyi, ɔdíyá nāa le ojīlīma ce ayí uwɔ fíyɛ́ um, anɔ́ɔ a cɛ̄ lɛ uwá le kpó jɔ̄kwū o ŋmá lɛ ō je ɛga olɔhi fíyɛ́ dúú kú ɛbɛ́ kú ɛya nɛ̄ ācɛ ɔlɛ́ um gē bī ge um ā kpó lé ā?

³⁰ Ami, Ondú, Ɔwɔicō kú Ísrɛ̄lu tɛtɛ cokónu ka, ipɔ́ɔnū mɛ́mla ipɔ́ɔma kú uwɔ géē wɛ ācogwɛ́ɛya kú um piyóó á, amáŋ abālɔbányā ó gáā lɛ ā ɛ́ɛ́ gɛ ŋ́. Ohígbū ka, n géē lɛ ojīlīma ce ācɛ nēe gē lɛ ojīlīma ce um ā. Ācɛ nēe leyī gwū um bónū ā, n géē leyī gwū uwā bónū dúú.

³¹ Eko géē wā nɛ̄ n géē je ācɛnyīlɔ kú ipíinu mɛ́mla ipɔ́ɔnū kú uwɔ kpó ŋmó, nɛ̄ ɔnyākwɔ́cɛ dúúmā í klla gáā yɔ̄ ipíinu mɛ́mla ipɔ́ɔnū kú uwɔ ɛ́ɛ́ gɛ ŋ́.

³² Ó géē je unwalu gā uwɔ, ɔhā nɛ̄ n gáā hɛ́ ce ācɛ ohile kú Ísrɛ̄lu ā géē tū uwɔ ímálānyī. Amáŋ, ɔ̄cɛ dúúmā í gáā yɔ̄ nōo géē hīla ókpílícī ɔlɛ́ uwɔ mɛ́mla ipɔ́ɔnū kú uwɔ ŋ́.

³³ Náaná n géē mā ɔ̄cɛ ipɔ́ɔnū kú uwɔ éyi ta oyēeyī, nōo géē wɛ ɔ̄cogwɛ́ɛya kú um, amáŋ eyī kú nū géē je pu, cɛ́ɛ́ eyīyōce kú nū géē mɛ. Ācɛ o hile kú ipɔ́ɔnū kú uwɔ kpɛ́mm ā géē kwú ikwū ɔlɔ́ɔ́lá.

³⁴ Eko nɛ̄ ayí uwɔ ɛpa, Uhófīni mɛ́mla Ufínēhasi ā gekwú ɛ̄cī ékpónú, cɛ́ɛ́ kóō mafú gā uwɔ ɛ̄cī ɔ́ɔmā ka, ɔdā dóódu nɛ̄ n ka ga uwɔ nyā wɛ ɔkwɛ̄yi.”

³⁵ Óndú ā klla kɛlā lɛ ɔ́ gɔbū kpɔ́ kahíníī, “N géē fu ɔ̄cogwɛ́ɛya nōo géē lɛyítáajɛ gā um, nōo klla géē yá ɔdā dóódu nɛ̄ n géē da ɔ́ ā. N géē je ipɔ́ɔma éyi lɛ ɔ́ nōo géē yɔ̄ ī yúklɔ́ ɛgiyí ɔcɛ́ nɛ̄ n fu ā eko dóódu.

³⁶ Ɔ̄cɛ ipɔ́ɔma kú uwɔ dóódu, nōo géē hile ā géē nyɔ̄ í ba ije ŋmá ɛgiyí ɔ̄cogwɛ́ɛya ɔ́ɔmā kóō bī le lá ɔdōlé lé. Ó klla í gbɔ̄ɔkɔ lɛ ɔ́ kóō lɛ ɛga je lɛ anúɔ kú anúɔ tá ɔ̄ abɔ̄ ipú úklɔ́ kú ɔ̄cogwɛ́ɛya nɛ̄ ɔ̄cɛ ɔ́ɔmā géē yɔ̄ í yá ā, o yá ɛ́ɛ́ kóō géē lɛ ɔdōlé má lé.”