1 USÁMUWƐ̄LU 12 - Ubáyíbu kú Idɔma

Ɛlā ámōmɛ nɛ̄ Usámūwɛ̄lu ka ā

¹ Usámūwɛ̄lu da ācɛ kú Ísrɛ̄lu kahíníī, “N le ɔdā nɛ̄ aá da um ka ami ɔ́ɔ̄ yá ā, yá lɛ aá ɛɛ́. N lɛ ɔcɛ́ fu lɛ aá kóō gbō aá ɛɛ́.

² Aá lɛ ɔ̄cɛ nōo ī kpó aá trɛ̄yí lɛ ɛɛ́. Ami ā le hīla klla lɛ īnyīlɛyí nɛ̄hɛ́ bū ɛɛ́, ayí um bá mla aá. N húmáyī wɛ ɔ̄cɛ otrɛyí kú aá ŋmá eko ɔyípɛ̄ oklóbīya kú um jāā kwu ícɛ.

³ Ami yɔ̄ á, ɔ́dāŋ ka n yá ɔ̄cɛ dúúmā ɔdōbɔ̄bí dóódu, ɔ̄cɛ ɔ́ɔmā kóō le ka tɛ́ɛcɛ amānyā, iyɔ̄bū Óndú ā mɛ́mla ɔcɛ́ nɛ̄ Óndú ā fu ā. N mīyɛ ɛna kú ɔ̄cɛ dúúmā abɔfú jéjéé ɛɛ́ ɛ̄ɛ̄? Ámāŋ ka n mīyɛ ijakī kú ɔ̄cɛ dúúmā ā? Ɔ̄nyɛ nɛ̄ n hɛ́ lé, amáŋ nɛ̄ n lɛ abɔ̄ da ɔ́ ɛyí tāajɛ ā? Ɔ̄nyɛ yɔ̄ amānyā nɛ̄ n mīyɛ ómíci lé ŋmá ɛgiyí nū? Ɔ́dāŋ ka, ɔ̄cɛ dúúmā yɔ̄, nɛ̄ n mīyɛ ɔdā dúú ŋmá ɛgiyí nū lé, n géē cíla anú ulé kú ɔdā dúúmā ɛ́gɔ́ɔma nɛ̄ n mīyɛ ŋmá ɛgiyí nū ā lɛ ɔ́.”

⁴ Anɔ́ɔ ācɛ ā tá ɔ̄ ohi kahíníī, “Ehéee, á hɛ́ ɔ̄cɛ dúúmā lé ŋ́, ɛ́ɛ́ nāa gē lɛ abɔ̄ da ɔ̄cɛ dúúmā ɛyí tāajɛ ŋ́, ɛ́ɛ́ nāa gē mīyɛ ɔdā dúúmā lé ŋmá ɛgiyí ɔ̄cɛ dúúmā ŋ́.”

⁵ Usámūwɛ̄lu tá uwa ohi kahíníī, “Ɔwɔicō mla ɔcɛ́ nɛ̄ ó fu a wɛ ijáalí ka, ń lé ɛpɔ̄bí kú ɔ̄cɛ dúúmā kú aá ŋ́. Ka n háyi yēŋēē ipú aá.” Anɔ́ɔ é tá ɔ̄ ohi kahíníī, “Īī Óndú ā wɛ ijáalí kú alɔ mla uwɔ á.”

⁶ Anɔ́ɔ Usámūwɛ̄lu da ācɛ ā ka Óndú ā ɔ́ɔ, fu Umósīsi, mɛ́mla Árɔ̄ni á, anú kpó aádáádā aá bɛ̄cɛ ŋmá ajɛ kú Íjīpiti á.

⁷ Ó gɔbū yɔ̄ ī kɛlā lɛ uwá kpɔ́ kahíníī, “Abālɔbányā, aá háyi, ɛga nɛ̄ aá háyi ā, ká n̄ kɛlā klá aá ɛyí ipéyī Óndú. Ká n̄ tá aá ɛlá kwu odúúdú ɔdā idáagó nɛ̄ Óndú ā yá ɛ́ɛ́ nɛ̄ ó hɛ́ aádáádā aá tá ā.

⁸ Eko nɛ̄ Ujékɔ̄pu mla aíkonó kú nū gā ajɛ Íjīpiti ā, nɛ̄ ācɛ kú Íjīpiti yá uwá ōwē ā, aádáádā aá le ikwū je klá Óndú ā kóō tá uwā abɔ̄. Ó lɛ Umósīsi mɛ́mla Árɔ̄ni tɛ̄hɔ̄ gaá le uwá kpó bɛ̄cɛ ŋmá Íjīpiti. Anɔ́ɔ ó kwú uwā ú lā ipú ajɛ nyā á.

⁹ Amáŋ ācɛ ā kwú mlanyī Óndú, Ɔwɔicō kú uwā, anɔ́ɔ ó cɛ̄ lɛ ācɛ Ufílīstiya, ɔcɛ́ kú Umówābu, mla Usisɛ́ra otrɛ̄yí kú aícɔ́ɔja kú igelī nɛ̄hi kú Uhaásɔ kpɛ́fú tá aádáádā aá lɛ uwá yálé.

¹⁰ Anɔ́ɔ é le ikwū je klá Óndú ā kó ō tá uwā abɔ̄, é le okónū cē ɔdā nēé yá kahíníī, ‘Alɔ le íne bīya ɛɛ́, ohígbū ka alɔ kwu pīyeyī ŋmá ɛgiyí uwɔ, Óndú, alɔ gbɔɔ́ ō pā ɛcí kú Ubáal mɛ́mla Ástārɔtu. Kóocōō, lɛ alɔ hɛ́tá ŋmá abɔ̄ kú aólɛlā kú alɔ, ká ālɔ̄ géē gbā uwɔ ɛ̄gbā piyóó mɛ́ɛ́nɛ.’

¹¹ Anɔ́ɔ Óndú ā lɛ Ugídēyɔn, Ubárāki, Ujéfuta mɛ́mla am tɛ̄hɔ̄, ɔnyɔɔnyɛ kú alɔ hɛ́ aá tá ŋmá abɔ̄ kú aólɛlā kú aá, eko ɛyɛ́ɛyɛ́yí. Anɔ́ɔ aá lā ɛbɔ́ ícɛ yɔ̄ á.

¹² Amáŋ eko nɛ̄ aá má ɔcɛ́ kú Ámɔn Unáhāsi yɔ̄ ī wā gáā kpɛ́fú tá aá ā, nááná nɛ̄ Óndú, Ɔwɔicō wɛ ɔcɛ́ kú aá. Anɔ́ɔ aá da um kahíníī, “Eko nyā wɛ ɛyɛ́ɛ́yí, lɛ ɔcɛ́ fu lɛ alɔ nōo géē gbō alɔ.”

¹³ “Aá dɔɔ̄kā ɔcɛ́ á, Óndú ā kwú ɔcɛ́ ā ú lɛ aá ɛɛ́.

¹⁴ Ó géē lɔhi lɛ aá ɔ́dāŋ ka, aá mɛ́mla ɔcɛ́ kú aá géē bá ī lɛ ojīlīma ce Ɔwɔicō, gē gbā ɔ̄ ɛ̄gbā, ī jāhɔ̄ lɛ ɔ́, klla ī lɛyítáajɛ lɛ odúúdú íne kú nū, nɛ̄ aá klla í yɛce ɔ́.

¹⁵ Amáŋ, ɔ́dāŋ ka, aá jāhɔ̄ lɛ Óndú ā ŋ́, nɛ̄ aá gē yíkpɛ̄yí olɔfú tá ɔ̄, nɛ̄ aá lɛyítáajɛ lɛ ɔ́ ŋ́, ó géē bɛ́yí kwu aá mɛ́mla ɔcɛ́ kú aá.

¹⁶ Aá háyi ɛga nɛ̄ aá bá āa, aá géē má ɔdā nɛ̄hi nɛ̄ Óndú ā gáā yá ā.

¹⁷ Ó wɛ ɔnɔ̄ yɔ̄ a ŋ́ nɛɛ? N géē gbɔ̄ɔkɔ lɛ Óndú ā kó ō lɛ akpáabana mɛ́mla ɔwɔ tū wāajɛ abālɔbányā. Eko nɛ̄ ɛ̄nyā le yá, aá géē jé ka, aá lɛ íne kú Óndú ā bīya nɛ̄hi, o ŋmá lɛ ɔcɛ́ nɛ̄ aá tíne ā.”

¹⁸ Anɔ́ɔ Usámūwɛ̄lu le ɔkɔ gbā á. Anɔ́ɔ ícíícɛ ɔ́ɔmā, Óndú ā le akpáabana mɛ́mla ɔwɔ tū wāajɛ. Anɔ́ɔ odúúdú ācɛ ā gbɔɔ́ ō yúufi Óndú mɛ́mla Usámūwɛ̄lu á.

¹⁹ Anɔ́ɔ é da Usámūwɛ̄lu kahíníī, “Ɔkpáni, gbɔ̄ɔkɔ lɛ Óndú, Ɔwɔicō kú uwɔ lɛ alɔ, cɛ́ɛ́ kú ō híī kpó alɔ ŋmó ŋ́. Alɔ le jé ɛɛ́ ka, nááná nɛ̄ alɔ tɛtɛ bīya íne igbo alɛwa ŋmá igbīhi ā, alɔ klla le íne bīya kpɔ́, o ŋmá lɛ ɔcɛ́ kú abɔ̄yī alɔ nɛ̄ alɔ dɔɔ̄kā ā.”

²⁰ Anɔ́ɔ, Usámūwɛ̄lu da uwá ka ɛ́ɛ̄ yúufi ŋ́. Ɛ́gɛ́nɛ̄ ɛ́ɛ le ɔdōbɔ̄bí ɛ́gɔ́ɔmā yá nááná ā, ó ka ɛ́ɛ́ híī pīyeyī ŋmá ɛgiyí Óndú ā ŋ́, amáŋ, kéē gbā ɔ̄ ɛ̄gbā mla odúúdú ɔtū kú uwā.

²¹ Ó klla da uwá kéē híī yɛce aɔ́wɔ ɛ̄kɛ̄mgbɛ̄ ā ŋ́, ka ɛ́ɛ́ tá uwā abɔ̄ glá ŋ́, ɛ́ɛ́ nēé gē nya uwá tá glá ŋ́, ohígbū ka é wɛ ɔwɔ ɔkwɛ̄yi ŋ́.

²² Usámūwɛ̄lu klla da uwá ka Óndú ā ɔ́ɔ le okónu ce lɛ uwá ɛɛ́. Ó gáā cīgbīhi kwu uwá ŋ́, ohígbū ka ó kwú uwā ú pīya ācɛ ɔlɛ́ nū ɛɛ́.

²³ Ó klla ka kpɔ́ kahíníī, “Ɛjī kwɛjī lɛ ami nɛ̄ɛ̄, Ɔwɔicō kóō ŋmó ɔwɛ tū um, ɔ́dāŋ ka n lɛ íne kú nū bīya, o ŋmá lɛ o tá ka ń gbɔ̄ɔkɔ lɛ Ɔwɔicō ohígbū aá ŋ́. Ikɔkɔ ɔ́ɔmā, n géē nwū aá kú aá yá ɔdā nōo lɔhi mɛ́mla ɔdā nōo le kpaakpa lɛ aá.

²⁴ Aá lɛyítáajɛ lɛ Óndú ā kú aá gbō ɔ̄ ɛ̄gbā kpaakpa mla odúúdú ɔtū kú aá. Aá blakwu ɔdā nɛ̄hi nɛ̄ ó yá lɛ aá ā.

²⁵ Amáŋ ɔ́dāŋ ka, aá bá gē bīya íne kpɔ́, aá mɛ́mla ɔcɛ́ kú aá géē je kpó yíífi ŋmá ajɛ.